Leta Congo (Kinshasa)

Ndinam Utom ke Obot Ikan̄

UTỊN asiaha ke Goma. Enye eye etieti. Idụhe usen emi nnyịn mîkwe ediye Obot Nyiragongo, kiet ke otu obot nsụn̄ikan̄ emi esisọpde nditop mbomo. Nsụn̄ikan̄ esiwọrọ ke ndudu etịn̄e obot emi kpukpru ini. Ke okoneyo, nsụn̄ikan̄ emi esinen̄ede adat ndien emekeme ndida n̄kụt ata ufiop itiat ke esịt ndudu etịn̄e obot emi.

Mbon Swahili ẹkot obot emi Mulima ya Moto, emi ọwọrọde Obot Ikan̄. Akpatre ini emi obot emi okotopde obomo ata idiọk idiọk ekedi ke 2002. Ediwak mbọhọidụn̄ nnyịn ye mme ufan nnyịn mi ke Goma ẹma ẹtaba kpukpru n̄kpọ. Ke ini emi obot otopde obomo, enye esitara ọfiọrọ ke isọn̄, ekem asat akabade n̄kpotụk n̄kpotụk itiat ke ini ofụm otụkde enye. Ami ye ebe mi isisan̄a ke utọ itiat emi ke ediwak itie ke efakutom nnyịn. Esidi mma nsan̄a ke utọ itie emi, ami ntọn̄ọ ndikere nte ekpetiede owo ke idem ndisan̄a ke ọfiọn̄. Mbio obio emi itiehe nte itiat emi. Mmọ ẹnem itie, ẹnyene mmemmem esịt, ẹnyụn̄ ẹma eti mbụk oro nnyịn ikwọrọde inọ mmọ. Mme n̄kpọ emi ẹnam enem mi ndinam utom ke Obot Ikan̄ emi.

Ndemede ye ata inemesịt usenubọk Saturday emi. Ami ye ebe mi, ye mme ufan nnyịn emi ẹkedide ndise nnyịn, ye mme isụn̄utom eken, iyom ndika n̄kọkwọrọ ikọ ke itienna mbon itọkekọn̄ ke Mugunga, emi ekperede edem usoputịn obio emi. Ediwak owo do ẹkefehe ẹkpọn̄ obio mmọ ke ntak ekọn̄.

Ntre, imatan̄ mme n̄wed nnyịn ke usem French, Kiswahili, ye Kinyarwanda idọn̄ ke ubomisọn̄ umen mbiomo. Ekem itọn̄ọ isan̄, iwat ke n̄kpotụk n̄kpotụk Usụn̄ Sake idụk obio. Imokụt n̄kparawa ẹnụkde mbiomo ke ukpatn̄kpọ eto inyụn̄ ikụt iban ẹsịnede ndiye ọfọn̄ ẹsan̄a ke mbenusụn̄ ye mbiomo ke ibuot. Ubomisọn̄ ke ẹmen mme owo aka utom ye urua. Ufọk emi ẹdade eto ẹbọp ẹnyụn̄ ẹyetde awa ndom mbakara ọyọyọhọ obio emi.

Imedi idisịm Ufọkmbono Obio Ubọn̄ ke Ndosho, inyụn̄ isobo ye Mme Ntiense Jehovah eken emi ẹyomde ndisan̄a ye nnyịn n̄ka ukwọrọikọ. Enem mi ndikụt nditọwọn̄, mme ebeakpa, nditọakpa, ye idem mbon emi ẹbiomode ndo. Ata ediwak mmọ ẹbọ ufen etieti, edi nditiene mme edumbet Bible anam mmọ ẹfiak ẹkop inem uwem. Mmọ ẹnen̄ede ẹma mme un̄wọn̄ọ Bible, ndien enen̄ede ọdọn̄ mmọ ndinam mbon en̄wen ẹfiọk ẹban̄a emi. Ke ẹma ẹkeda esisịt ini ẹneme mme itie Bible emi ikemede ndida ndọn̄  mbon emi iyomde ndikosobo esịt, nnyịn owo 130 imodụk n̄kpri bọs ition ye ubomisọn̄ umen mbiomo kiet itọn̄ọ isan̄.

Ke ima ikawat ke n̄kpọ nte minit 30, imedisịm itienna mbon itọkekọn̄ emi. Imokụt ediwak mfia tent emi ẹbọpde ke enyọn̄ itiat obot nsụn̄ikan̄. Ẹbọp ediwak nsasana itie uken̄idem ye itie uyet ọfọn̄ ke ufọt itienna oro. Mme owo ẹyọyọhọ kpukpru itie—ke ẹyet n̄kpọ, ke ẹtem udia, ke ẹsat ọkọti, ke ẹnyụn̄ ẹkpọri tent mmọ.

Imosobo ete kiet emi ekerede Jacques, emi esede aban̄a kiet ke otu ikpehe itienna emi. Enye ekere nte ikpasan̄ade ibọk nditọ imọ ke idiọk ererimbot emi. Ntre, esịt enen̄ede enem enye ke ini inọde enye n̄wed Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn. Enye ọdọhọ ke iyokot n̄wed emi inyụn̄ ikot mme owo ibok itịn̄ se ikotde inọ mmọ.

Imafiak isan̄a esisịt, ikosobo mma kiet emi ekerede Beatrice. Enye obụp nnyịn m̀mê nso inam Abasi ayak mme owo ẹbọ ufen. Enye ekere ke Abasi amia imọ ufen. Ẹma ẹwot ebe esie ke ekọn̄, eyen esie an̄wan ọbọ ufen ọbọk eyen ikpọn̄, ndien mbon n̄wo ẹma ẹyịp eyen esie erenowo ọfiọn̄ ifan̄ emi ẹkebede, enye idiọn̄ọke ebiet emi eyen emi odude.

Mfịna mma emi anam n̄kere nte eketiede Job ke idem ke ini ẹkedide ẹdinọ enye ndiọi etop. Nnyịn imada Bible iwụt enye ntak emi mme owo ẹbọde ufen ye nte ke idịghe Abasi ọnọ enye ufen. (Job 34:10-12; James 1:14, 15) Imetịn̄ mme ukpụhọde emi Abasi aduakde ndinam ke isọn̄ emi ke ini Obio Ubọn̄ esie edidide. Iso esie afiak atara, enye onyụn̄ ọdọhọ ke imọ imebiere ndika iso n̄kpep Bible nnyụn̄ mbọn̄ akam mben̄e un̄wam Abasi.

Ukwọrọikọ mfịn enem kpukpru nnyịn. Etie nnyịn nte ke Jehovah enen̄ede ada nnyịn ọdọn̄ mbon emi esịt onyụn̄ ọnọ mmọ idotenyịn. Nte iyomde ndinyọn̄, mmọ ẹmenede mme tract, magazine, ye mme n̄wed oro ikọnọde mmọ ke enyọn̄, ẹkọm nnyịn unyọn̄.

Nte iwatde inyọn̄, ke n̄kere nte usen oro eketiede. Mmenen̄ede n̄kọm Abasi ke utọ akpan usen emi. Mmeti nte ete Jacques okokopde inemesịt, nte iso akatarade mma Beatrice, ye akanian̄wan kiet emi n̄kukụre nneme esie ye ami ekedide ndituak inua imam. Mbon en̄wen emi ẹfiakde ẹdụk mi esịt edi n̄kpri nditọ emi ẹnyenede ifiọk, ẹbụp mbụme emi akande isua emana mmọ. Ama onyụn̄ eye mi ndikụt nte mme owo ẹsụk ẹsakde imam kpa ye emi ẹbọde ata idiọk ufen.

Mme owo mi ẹnen̄ede ẹma ndin̄wam mbon oro ẹbọde ufen. Mma nnyene ata akwa ifet mfịn ndida Bible n̄wụt nte ẹdikọkde kpukpru mfịna ubonowo ofụri ofụri. Esịt enen̄ede enem mi ndisịne ke otu mbon emi ẹnọde mme owo utọ un̄wam eke spirit emi.