iVola Mai Congo (Kinshasa)

Veiqaravi Volekata na Ulunivanua Kama

E PIQI qai seninawanawa na roka ni lomalagi ni cabe na siga ena siti o Goma. E veimataka ena tao na matada ena vakatubuqoroqoro ni ulunivanua o Nyiragongo, e dua vei ira na ulunivanua e dau kacabote e vuravura. E kubou vulavula tu ga na qara ena siga, ia e damudamu ena bogi qai vakaraitaka ni buebue tu e loma ni qara na vatu katakata waicala.

Ena vosa vakaSwahili, e kilai na ulunivanua o Nyiragongo me Mulima ya Moto—Ulunivanua Kama. Se qai kacabote ga na ulunivanua qori ena 2002. E voleka nira vakayalia kece na nodra iyau o ira keimami tiko veitikivi kei na neirau itokani. Ena so na itikotiko keirau dau vunau kina keirau na taubaletaka na vanua sukusukura e drodrova yani na vatu katakata waicala. Au lai vakasamataka kina se na vakacava tu mada na taubale ena vula. Ia e duatani sara o ira na lewenivanua mai na vatu waicala sukusukura. Era mamarau ra qai ciqoma ena yalomalumalumu na itukutuku vinaka keirau vunautaka. Qori na vuna e marautaki kina na veiqaravi volekata na Ulunivanua Kama.

Dua na ka noqu nanamaki ena Vakarauwai keirau na tomani ira kina eso na itokani era gade mai kei na so tale na daukaulotu me keimami lai vunau ena nodra keba na isenivalu e Mugunga, ena ra ni siti o Goma. E levu era tiko ena keba qori era drotaka mai na itovo voravora ena nodra itikotiko.

Keimami usana ena lori na ivola vakaivolatabu ena vosa vakaVaranise, vaKiswahili, kei na vosa vaKinyarwanda, oti keimami biubiu sara. E maue na siti ni keimami muria voli na gaunisala sukusukura. Era bili qiqi kau vakaiusana (chukudu) na cauravou, o ira na yalewa era dara tu na liku drasa nira taubale tu e gaunisala qai toka e uludra na ioloolo lelevu. O ira na lai cakacaka kei ira na lako ina makete era vodo motoka. E robota na vanua na valekau e loaloa qai braun na kena iboro, ia na tutuna e karakarawa.

Keimami lai sota kei ira eso tale na iVakadinadina i Jiova ena Kingdom Hall e Ndosho. E tarai au sara ga niu raici ira na gone, yada, luveniyali kei ira e vakaleqai tu na yagodra. Dua na ka na nodra rarawa e levu vei ira qori, ia e vinaka cake na nodra bula nira muria na ivakavuvuli ena iVolatabu. E dei e lomadra na inuinui ena iVolatabu ra qai vinakata mera tukuna vei ira tale eso. Ni veivosakitaki oti vakalekaleka na tikinivolatabu ena vakayaloqaqataki ira keimami sotava, keimami sa qai  vodo na le 130 ena lima na basi lalai kei na dua na lori.

E rauta ni 30 na miniti neimami vodo me qai yaco ina keba. E biri tu e drau vakacaca na valelaca vulavula lalai ena vanua e robota tu na vatu waicala ni volukano (volcano). E tuva vakamatau ena loma donu ni keba na valelailai kei na vanua ni savasava. Era tu e veivanua na lewe ni keba—eso era savasava, vakasaqa, voci bini, era tataviraki tale ga ena mata ni nodra valelaca.

Keirau sotava e dua na turaga o Papa Jacques, e qarava tiko e dua na yasa ni keba. E kauai ena nona susugi iratou na luvena ena gauna dredre qo. Dua na ka nona marau ni keirau solia vua na ivola Questions Young People Ask—Answers That Work, e tukuna tale ga ni na wilika qai soqoni ira vakalalai na lewe ni keba me vakamacalataka vei ira na ka e wilika.

Ni keirau toso vakalailai e liu, keirau sotavi Mama Beatrice. A taroga se cava e vakatara tiko kina na rarawa na Kalou. E nanuma ni rairai totogitaki koya na Kalou. A mate ena ivalu o watina, o luvena yalewa e itubutubu le dua qai saga me susuga na luvena ena keba, o luvena tagane a kauvakavesu ena vica na vula sa oti qai sega ni kilai na vanua e tu kina.

Niu rogoca na italanoa nei Mama Beatrice, au nanuma sara na ka e rairai vakila o Jope ni rogoca na itukutuku rarawataki. Keirau vakaraitaka vua na vuna e yaco tiko kina na rarawa, keirau vakadeitaka vua ni Kalou e sega ni totogitaki koya me rarawa. (Jope 34:10-12; Jemesa 1:14, 15) Keirau vakamacalataka tale ga ni sa vakarau veisautaka na ituvaki e vuravura na Kalou ni vakayagataka na nona Matanitu. Sa matamamarau sara o Mama Beatrice ni keitou veitalanoa tiko, e tukuna tale ga ni na vulica tiko ga na iVolatabu qai kere veivuke tiko ga vua na Kalou.

Qo e siga marautaki vei keimami kece, e vakilai tale ga na veivuke i Jiova me tukuni rawa kina vei ira ena keba na itukutuku ena vakayaloqaqataki ira qai solia vei ira na inuinui. Ni keimami biubiu ena keba, e levu era yalovaka na tikidua, mekesini kei na ivola nira vakamoce mai.

Ena ilakolako lesu i vale, dua na ka noqu vakavinavinaka niu vakasamataka tale na veika totoka a yaco ena siga oya. Au vakasamataka na nona marau o Papa Jacques, na nona lomavakacegu o Mama Beatrice, kei na kaukaua ni ligana e dua na marama keirau lululu e dredre tu ga niu vosa vua. Au nanumi ira na itabagone e laurai na nodra yalomatua ena nodra ivakarau ni taro, au qoroi ira tale ga na rarawa tu ena keba ni dei na yalodra ra qai matadredredre tu ga.

E laurai ena yasa ni vuravura qo na nodra sasaga e levu tale mera vakacegui ira na rarawa tu. Dua dina na ka dokai meda vakayagataka nikua na iVolatabu me vakaraitaki kina vei ira na tamata na iwali tawamudu ni nodra leqa. Au marau dina niu bau vakaitavi ena cakacaka levu duadua ni veivakacegui vakayalo me vakayacori e vuravura.