Amaniɛbɔɔ ni Jɛ Congo (Kinshasa)

La Gɔŋ lɛ Hewɔŋ

KƐ́ HULU lɛ je leebi maŋkpa yɛ Goma maŋ lɛŋ lɛ, ŋwɛi tsuɔ fioo ni eyɛ fɛo pam. Daa leebi lɛ, wɔnaa Nyiragongo Gɔŋ lɛ fɛo, ni eji gɔji ni yiteŋ jeɔ lasu waa yɛ je lɛŋ lɛ ateŋ ekome. Be fɛɛ be nɛɛ, lasu kpɔŋŋ ko miifã kɛmiijɛ gɔŋ lɛ yiteŋ. Kɛ́ je na lɛ lasu lɛ tsuɔ hɛluu, ni ehaa anaa bɔ ni ŋmɔtɔ kalakala ni yɔɔ gɔŋ lɛ teŋ lɛ yɔɔ ha.

Atsɛɔ gɔŋ lɛ Mulima ya Moto yɛ Swahili wiemɔ mli, ni eshishi ji La Gɔŋ. Naagbee be ni Nyiragongo gɔŋ nɛɛ fɛ́ waa ji afi 2002. Wɔkutsoŋbii kɛ wɔnanemɛi ni yɔɔ biɛ yɛ Goma lɛ ateŋ mɛi pii tsɔɔ akɛ amɛnibii fɛɛ hiɛ kpãta. Kɛ́ mikɛ miwu miiya shiɛmɔ yɛ hei komɛi lɛ, wɔnyiɛɔ ŋmɔtɔ ni fɛ́ kɛjɛ gɔŋ lɛ mli eshwie shi, ní ewa keketee, ní nɔ efee dokoidokoi lɛ nɔ, ni ehaa misusuɔ bɔ ni nyɔŋtsere lɛ nɔ nyiɛmɔ baatamɔ eha lɛ he. Shi maŋbii lɛ bɛ keketee tamɔ ŋmɔtɔ ni ewa lɛ. Amɛhe yɛ miishɛɛ, ni amɛjɛɔ tsui krɔŋŋ mli amɛboɔ sanekpakpa ni wɔjajeɔ lɛ toi. Enɛ haa shiɛmɔ nitsumɔ lɛ feɔ miishɛɛ waa yɛ La Gɔŋ lɛ hewɔŋ.

Hɔɔ leebi lɛ, mikɛ miishɛɛ te shi kɛjɛ saa mli. Mi kɛ miwu, kɛ wɔnanemɛi komɛi ni ebasara wɔ, kɛ maŋsɛɛ shiɛlɔi krokomɛi ni wɔkɛyɔɔ lɛ baayashiɛ yɛ abobalɔi ŋsara ko mli, yɛ Mugunga, yɛ maŋ lɛ klotia kɛmiiya anaigbɛ. Mɛi ni yɔɔ ŋsara lɛŋ lɛ ateŋ mɛi saŋŋ ji mɛi ni ejo tutuamɔ ni abatutua amɛmaŋ lɛ naa foi.

Wɔwo wɔtsɔne lɛ obɔ kɛ French, Kiswahili, kɛ Kinyarwanda Biblia kasemɔ woji. Kɛkɛ ni wɔyi mli. Beni wɔnyiɛ Route Sake gbɛ ni nɔ yɔɔ dokoidokoi lɛ nɔ lɛ, wɔbɔi maŋ lɛ kpeemɔ. Oblahii kɛ moto bibii ni akɛ tso fee ní atsɛɔ lɛ chukudus lɛ miitsi jatsui ni tsiitsii. Yei ni wo skɛɛtii fɛfɛji tere jatsui ni afimɔ, ni amɛmiidɔŋkɔ kɛmiinyiɛ gbɛjegbɛ lɛ toitoi. Taksi kudɔlɔi náaa hiɛ kwraa ejaakɛ amɛmiihole mɛi kɛmiiya nitsumɔhei kɛ jara lɛ nɔ. Tso tsũi kɛ amɛhe ediŋ kɛ asara su ní akɛ bluu ebã naa yɛ maŋ lɛŋ he fɛɛ he.

Wɔkɛ wɔnyɛmimɛi Yehowa Odasefoi krokomɛi ni baafata wɔhe kɛyashiɛ yɛ abobalɔi ŋsara lɛŋ lɛ kpe yɛ Maŋtsɛyeli Asa ni yɔɔ Ndosho lɛ nɔ. Nyɛmimɛi ni ji gbekɛbii, okulafoi, awusai, kɛ mɛi ni eje kpa ni wɔna lɛ ta mitsuiŋ waa. Amɛteaŋ mɛi babaoo ena nɔ̃ waa, shi Biblia mli shishitoo mlai ni amɛkɛtsuɔ nii lɛ eha amɛshihilɛ etsake kwraa. Biblia mli hiɛnɔkamɔ ni amɛyɔɔ lɛ tsoɔ yɛ amɛtsuiŋ tamɔ la, ni amɛfee klalo akɛ amɛkɛ mɔ fɛɛ mɔ baagba he sane. Wɔkɛ be kukuoo kpe kɛsusu Biblia mli ŋmalɛi ni baawo mɛi ni wɔkɛbaayakpe  lɛ hewalɛ lɛ he, ni no sɛɛ lɛ, wɔyatara bɔɔsui bibii enumɔ kɛ kar kome mli, ni wɔyi gbɛ. Wɔyi 130.

Aaafee minitii 30 sɛɛ lɛ, wɔyashɛ ŋsara lɛŋ. Akɛ abalai yɛji eshĩ buui ohai abɔ yɛ gɔŋ mli ŋmɔtɔ ni ewa keketee nɔ. Ato kuŋtsei kɛ niiahefɔmɔhei anaa fɛfɛo yɛ ŋsara lɛ teŋ aha ŋsara lɛŋ bii lɛ. Wɔna ni mɛi miifɔ nii ahe, aahoo nii, aakpɔ yɔɔ he, ni mɛi komɛi hu miibɛɛ amɛbuui lɛ ahiɛ.

Wɔkɛ nuu ko ni atsɛɔ lɛ Papa Jacques ni kwɛɔ ŋsara lɛ fã ko nɔ lɛ kpe. Bɔ ni eeefee etsɔse ebii lɛ yɛ jaramɔ bei nɛɛ amli lɛ suɔ etsui waa. Wɔshi Questions Young People Ask—Answers That Work wolo lɛ eko wɔha lɛ, ni no ha emii shɛ ehe waa, ni ekɛɛ ebaakane ni ebua mɛi anaa kuikui ni ekɛ amɛ agba emli sane.

Wɔtee hiɛ fioo kɛkɛ ni wɔyanina yoo ko ni atsɛɔ lɛ Mami Beatrice. Ebi wɔ nɔ hewɔ ni Nyɔŋmɔ ŋmɛɔ piŋmɔ gbɛ. Esusuɔ akɛ Nyɔŋmɔ miigbala etoi. Agbe ewu yɛ ta mli, ebiyoo ji fɔlɔ mɔ kome mɔ ni miimia ehiɛ kɛkwɛ ebi abifao yɛ ŋsara lɛŋ, ni amɔ ebi nuu ato nyɔji babaoo ni eho nɛ. Enuko ebi nuu lɛ he sane ko lɛ, eleee he ni eyɔɔ hu.

Mami Beatrice ŋkɔmɔyeli lɛ ha mina bɔ ni ekolɛ Hiob nu he eha beni ababɔ lɛ amaniɛi gbohii lɛ. Wɔtsɔɔ lɛ nɔ hewɔ ni adesai piŋɔ, ni wɔha ele akɛ epiŋmɔ lɛ jeee toigbalamɔ ni jɛ Nyɔŋmɔ ŋɔɔ. (Hiob 34:10-12; Yakobo 1:14, 15) Wɔha ele tsakemɔi ni etsɛŋ ni Nyɔŋmɔ baatsɔ e-Maŋtsɛyeli lɛ nɔ ekɛba shikpɔŋ lɛ nɔ lɛ hu. Ehiɛ bafee ŋmɔlɔŋmɔlɔ, ni eha wɔle akɛ etswa efai shi akɛ ebaaya nɔ ekase Biblia lɛ ni esɔle koni Nyɔŋmɔ aye abua lɛ.

Wɔkuu lɛ mlibii lɛ fɛɛ ná miishɛɛ waa, ni wɔ fɛɛ wɔnu he akɛ Yehowa eye ebua wɔ ni wɔnyɛ wɔha mɛi ni wɔkɛkpe lɛ ená hiɛnɔkamɔ kɛ hewalɛwoo. Beni wɔmiishi ŋsara lɛŋ lɛ, mɛi pii hole dɛhiɛmɔ woji, woji bibii, kɛ woji wuji ni wɔshi wɔha amɛ lɛ anɔ kɛfɔ̃ wɔ nine.

Wɔná hegbɛ kɛjwɛŋ nɔ ni wɔyatsu yɛ ŋsara lɛŋ lɛ nɔ be mli ni wɔnyiɛ gbɛ kɛmiiya shĩa lɛ. Miná gbi krɛdɛɛ nɛɛ he miishɛɛ waa. Mikaiɔ hiɛsɔɔ ni Papa Jacques jie lɛ kpo, bɔ ni Mami Beatrice tsui nyɔ emli, kɛ bɔ ni yoomo ko ni ŋmɔ sɔŋŋ ekɛ mi ŋmɔɔ shi enyɛɛɛ ekɛ mi awie lɛ ta midɛŋ waa lɛ. Misusuɔ oblahii kɛ oblayei ni bibii saji ni nilee yɔɔ mli, ni fee amɛnii oookɛɛ onukpai lɛ ahe. Minya bɔ ni mɛi ni wɔkɛkpe lɛ yɔɔ miishɛɛ yɛ shihilɛi ni mli wawai diɛŋtsɛ ni amɛkɛkpeɔ lɛ fɛɛ sɛɛ lɛ he waa.

Wɔnaa yɛ maŋ nɛŋ akɛ, mɛi babaoo ejɛ tsui krɔŋŋ mli amɛmiibɔ mɔdɛŋ waa kɛmiiye amɛmiibua mɛi ni naa nɔ̃ lɛ. Ŋmɛnɛ lɛ, wɔná hegbɛ kpele akɛ wɔjɛ Biblia lɛ mli wɔye wɔbua mɛi koni amɛná amɛnaagbai lɛ anaa tsabaa kwraa. Eŋɔɔ minaa waa akɛ mihu mifata he ni akɛ yelikɛbuamɔ ni anaŋ ehenɔ dɔŋŋ lɛ miiha mɛi ni hɔmɔ yeɔ amɛ yɛ mumɔŋ lɛ.—w11-E 09/1.