Sulat Halin sa Congo (Kinshasa)

Sa Ubos sang Bukid sang Kalayo

NAGAPULA ang langit samtang nagabutlak ang adlaw sa siudad sang Goma. Kada adlaw makita namon ang matahom nga Mount Nyiragongo, isa sa pinakaaktibo nga mga bulkan sa kalibutan. Makita pirme sa baba sini ang madamol nga aso nga nagapula kon gab-i bangod sa lava.

Sa Swahili, ang bukid ginatawag nga Mulima ya Moto, ukon Bukid sang Kalayo. Ang pinakaulihi nga mabaskog nga paglupok sang Nyiragongo natabo sang 2002. Madamo nga taga-Goma ang nadulaan sing mga pagkabutang. Sa pila ka lugar nga ginawalihan namon sang akon bana, nagaagi kami sa nagtig-a nga lava, kag daw pareho lang nga nagalakat kami sa bulan. Pero ang mga pumuluyo tuhay gid sa nagtig-a nga lava. Masinadyahon sila kag mabinatunon sa maayong balita nga amon ginasugid. Amo nga makalilipay gid mag-alagad sa ubos sang Bukid sang Kalayo.

Isa ka aga sang Sabado, excited gid ako. Bilog nga adlaw kami nga magawali sang akon bana upod sa amon mga bisita kag pareho namon nga mga misyonero sa kampo sang mga refugee sa Mugunga, sa katundan nayon sang siudad. Madamo ang nagpaamulya diri bangod sang mapintas nga pagpang-atake sa ila lugar.

Ginkargahan namon ang trak sing mga literatura sa Biblia nga Pranses, Kiswahili, kag Kinyarwanda. Dayon nagbiyahe kami. Sang nag-agi kami sa Route Sake, nakita namon ang masako nga siudad. Ginatulod sang bataon nga mga lalaki ang ila mga chukudu (scooter nga human sa kahoy kag ginakargahan). Ang mga babayi nga nagasuksok sing dekolor nga mga patadyong nagalakat sa higad sang dalan kag nagatus-on sang ila mga dala. Masako man ang mga traysikol sa pagdul-ong sang mga pasahero sa ulubrahan kag sa merkado. Makita sa palibot ang mga balay nga human sa kahoy nga may ribeti nga asul.

Ginhapit namon sa Kingdom Hall sa Ndosho ang mga Saksi ni Jehova nga maupod sa amon sa pagwali sa kampo. Natandog gid ako sang nakita ko ang mga pamatan-on, balo, ilo, kag mga may kasablagan sa lawas. Madamo sa ila ang nakaeksperiensia sing grabe nga pag-antos, pero nagbag-o ang ila kabuhi sang gintuman nila ang mga prinsipio sa Biblia. Nagasalig sila sa paglaum nga ginsambit sang Biblia, kag gusto gid nila nga isugid ini sa iban. Pagkatapos mabinagbinag kon ano  nga mga bersikulo sa Biblia ang makapainteres sa mga tawo, kami nga 130 nagsakay sa lima ka minibus kag sa isa ka trak.

Pagligad sang mga 30 minutos, nag-abot kami sa kampo. Ginatos ka magagmay nga tolda ang ginpatindog sa nagtig-a nga lava. Sa tunga sang kampo, nagaraya ang mga kasilyas kag mga lugar para sa pagpanglaba. Bisan diin may tawo—nagapanglaba, nagaluto, nagapangusipad, kag nagapanilhig sa ila ugsaran.

Nakilala namon si Papa Jacques, nga nagadumala sa isa ka bahin sang kampo. Nabalaka gid sia sa pagpadaku sa iya kabataan sa sining mabudlay nga tion. Nalipay gid sia sang ginhatagan namon sia sang libro nga Questions Young People Ask—Answers That Work. Nagsiling sia nga basahon niya ini kag magatipon sia sing gamay nga mga grupo para isugid sa ila ang iya natun-an.

Nakilala man namon si Mama Beatrice. Namangkot sia kon ngaa ginatugutan sang Dios ang pag-antos. Abi niya ginasilutan sia sang Dios. Ang iya bana napatay sa inaway, ang iya bata nga babayi nagasolo nga ginikanan kag nabudlayan sa pagpadaku sang iya lapsag sa kampo, kag ang iya bata nga lalaki ginkidnap pila na ka bulan ang nagligad kag wala sia kahibalo kon diin na ini.

Sang ginsugid ini ni Mama Beatrice, nahunahuna ko ang nabatyagan ni Job sang nakabaton sia sing masubo nga balita. Ginsugid namon kay Mama Beatrice kon ngaa nagaantos ang mga tawo kag ginpasalig sia nga wala sia ginapaantos sang Dios. (Job 34:10-12; Santiago 1:14, 15) Ginsugid man namon ang mga pagbag-o nga himuon sang Dios sa duta paagi sa iya Ginharian. Nagyuhum sia kag nagsiling nga padayunon niya ang pagtuon sa Biblia kag pagpangamuyo sa Dios.

Nalipay gid kami sa bilog nga adlaw, kag nabatyagan namon nga ginbuligan kami ni Jehova sa paghatag sing paglaum kag pagpabakod sa mga tawo nga amon naistorya. Paghalin namon sa kampo, ginabayaw sang mga pumuluyo ang mga tract, magasin, kag mga libro nga ginhatag namon sa ila samtang nagababay sa amon.

Samtang nagabiyahe pauli, ginpamalandungan ko ining pinasahi nga adlaw. Ginapanan-aw ko ang pagpasalamat ni Papa Jacques, ang lugpay nga nabatyagan ni Mama Beatrice, kag ang hugot nga pagpangamusta sang isa ka tigulang nga babayi nga nagayuhum sa akon. Nadumduman ko man ang mga pamatan-on nga daw hamtong na kon mamangkot. Nagdayaw gid ako sa kabakod sini nga mga tawo nga makayuhum gihapon kag makakadlaw sa pihak sang mga kabudlayan.

Nakita namon diri ang panikasog sang iban sa pagbulig sa mga nagaantos. Pero daku gid nga pribilehiyo nga isugid sa mga tawo ang permanente nga solusyon sang Biblia sa ila mga problema. Nalipay gid ako nga makapakigbahin sa paghatag sing espirituwal nga paumpaw nga amo gid ang kinahanglan sang mga tawo.