Mukanda mufumine mu Congo (Kinshasa)

Mu mundidimbi wa mukuna wa kapia

MU TSHIMENGA tshia Goma, padi dîba dienda dibanda, muulu mutu mukunzubila. Dituku dionso tutu tumona mukuna muimpe kumona wa Nyiragongo, umue wa ku mikuna ya pa buloba bujima itu itamba kuluka bitotshi bia kapia. Minshi itu ipatukila matuku onso ku mushiku udi ku mutu kua mukuna eu. Butuku, minshi idi ibanda muulu eyi itu mikunzubile anu bu mutu bitotshi bia kapia bidi bipatuka ku mutu kua mukuna eu.

Mu Tshisawudi, batu babikila mukuna eu ne: Mulima ya Moto, mmumue ne: mukuna wa kapia. Mu 2002, ke musangu wa ndekelu uvua mukuna wa Nyiragongo eu mupatule bitotshi bia kapia. Bena mutumba ne balunda betu ba bungi ba mu Goma mutudi bavua bajimije bintu biabu bionso. Mu imue ya ku miaba idi pabuipi ne muaba utudi tuyishila ne bayanyi, tudi tuendela ku mpenga kua mabue adibu benza kudi bitotshi bikadi biuminyine. Mabue aa mmashilangane ne bintu bionso bikuabu binkatu mumone. Kadi bantu bobu kabena ne mioyo mipape bu mabue au to. Badi ne musangelu ne mbasue kuteleja ne muoyo mujima lumu luimpe lutudi tuyisha. Bualu ebu ke budi bufila disanka bua kuyisha mu mundidimbi wa mukuna eu.

Mu Disambombo mu dinda, ngakabika ne disanka dia kuyisha. Meme ne bayanyi pamue ne balunda betu ne ba misionere netu bakuabu tuakenza dituku dijima tuyisha mu tshitudilu tshia bena tshimuanyi tshia Mugunga tshivua ku Ouest kua tshimenga. Bantu ba bungi badi muaba eu bavua banyeme bitotshi bia mukuna mu miaba ivuabu basombele.

Tuakuuja mashinyi ne mikanda idi ne malu a mu Bible mu Mfualansa, mu Tshisawudi ne mu Kinyarwanda. Tuetu kumata mu njila. Patuakabuela mu njila uvua ne bibungubungu, bantu bakavua bapingana mu musoko. Bana ba nsongalume bakavua batuadije kuendesha chukudus (makalu a mitshi atubu bambula nawu majitu). Ba mamu mbavuale jipe idi ikenka, benda bendela ku mpenga kua njila ne majitu mu mutu. Mioto ikavua miditue mu diambula bantu bua kubashiya ku mudimu ne mu tshisalu. Mbase nzubu ya mitshi muaba au milaba mukubu wa dikala dia ble imue miaba.

Tuakafika ku Nzubu wa Bukalenge wa Ndosho bua kupetangana ne bana betu Bantemu ba Yehowa bavua ne bua kuya kuyisha netu muaba uvua bena tshimuanyi basombele. Bivua bindenge ku muoyo pangakamona bansonga, bakaji bakamba, bana ba nshiya ne aba bavua ne makanda a mubidi makepele. Ba bungi ba kudibu bavua bapete makenga mavule, kadi bakakaja nsombelu wabu bua kutumikila mibelu ya mu Bible. Ditekemena dia mu Bible diakalenga mitshima yabu; nanku, badi ne disanka dia bungi bua kuambila bantu bakuabu bua ditekemena edi. Panyima pa tuetu bamane kupeta mibelu ya mu Bible ivua mua kukankamija bantu batuvua mua kuyisha, bantu 130 ba kutudi bakabuela mu mashinyi  makese atanu, bakuabu mu mashinyi manene.

Mu minite mitue ku 30, tuakafika ku tshitudilu atshi. Mbase nkama ya ntenta mikese mitoke muaba ukavua bitotshi bia mukuna biuminyine. Munkatshi mua tshitudilu tshia bena tshimuangi atshi, mbashila bantu nkumba mu milongo ne kudi miaba idi bantu bonso mua kusukuila bilamba. Bantu badi miaba yonso basukula bilamba, balamba, bapepula nkunda ne bakomba kumpala kua ntenta yabu.

Tuakapetangana ne tatu mukuabu uvuabu babikila ne: Papa Jacques, uvua utangila tshitupa kampanda tshia mu tshitudilu etshi. Uvua uditatshisha bua mudiye mua kukolesha bana bende mu tshikondo tshikole etshi. Uvua ne disanka patuvua bamushile mukanda wa Les jeunes s’interrogent​—Réponses pratiques; kuambaye ne: uvua musue kuubala ne pashishe kusangisha tusumbu tua bantu bua kubambilaye malu avuaye mubale.

Tusemena kumpala kakese, tuetu kupetangana ne mamu uvuabu babikila ne: Maman Beatrice. Wakatuebeja bua tshinyi Nzambi mmulekele makenga. Uvua wela meji ne: Nzambi ke uvua umunyoka. Bavua bashipe bayende mu mvita; muanende wa bakaji uvua uditatshisha bua kudikoleshila nkayende muanende wa pambidi mu tshitudilu amu ne kukavua ngondo ya bungi ivuabu bambule muanende wa balume. Kavua mumanye kuvuabu baye nende to.

Malu a dibungama avua Maman Beatrice mungambile adi amvuluija muvua Yobo mudiumvue pakamuambilabu ngumu yonso mibi ivuabu bamutuadile. Tuakamuleja bua tshinyi bantu badi bakenga ne kumujadikila ne: makenga ende kaavua dinyoka dia kudi Nzambi to. (Yobo 34:10-12; Yakobo 1:14, 15) Tuvua kabidi bamuleje mukadi Nzambi pa kulongolola malu pa buloba ku diambuluisha dia Bukalenge buende. Mu muyuki amu, kutuadijaye kutua mimuemue. Kuambaye ne: mmudisuike bua kutungunuka ne kulonga Bible ne kulomba Nzambi bua amuambuluishe.

Tuvua bonso ne disanka dituku adi. Tuetu kumona ne: Yehowa mmutuambuluishe bulelela bua tuetu kutuadila bantu batuvua bapetangane nabu ditekemena ne kubakankamija. Patukavua tupatuka mu tshitudilu amu, bantu ba bungi bakatukupa bianza bakuate trakte, bibejibeji ne mikanda bua kutulaya.

Patukavua tupingana, tuakatuadija kuela meji bua malu aa. Mvua muanyishe bikole dituku dia pa buadi adi. Ndi mvuluka muvua Papa Jacques ne dianyisha, muvua Maman Beatrice mutue mimuemue, muvua mamu mukuabu mukulakaje mungele muoyo ku tshianza ne disanka ne muvuaye muyukile nanyi anu ku mimuemue ivuaye muntuile. Ndi mvuluka nsonga uvua mutuele nkonko ya meji ne muleje muvuaye muntu mukole mu lungenyi. Ndi nganyisha bikole dikima dimvua mumone mu bantu, bavua anu batue mimuemue ne baseka nansha muvuabu ne ntatu kayiyi kuamba.

Muaba eu, tudi tumona mudi bantu ba bungi baditatshisha ne muoyo mujima bua kusamba badi bakenga. Lelu eu, tudi ne disanka dia bungi dia kuleja bantu tshidi mua kujikija ntatu yabu bua kashidi ku diambuluisha dia Bible. Ndi ne disanka dia bungi dia kuikala munkatshi mua bantu badi benza mudimu wa kusamba bantu ne Dîyi dia Nzambi wikala kauyi mua kuenzeka kabidi.