Juon Lõta Jãn Congo (Kinshasa)

 Kwal̦o̦k Naan Iturinl̦o̦k wõt Tol̦ in Kijeek

IJ JOKWE ilo juon bukwõn etan Goma. Rainin ej juon raan eaiboojoj. Ñe kwõj ruj in jibboñ, kwõmaroñ reilok im loe juon bool̦keno etan Nyiragongo. Aolep iien ej baatat lõñtak jãn loan. Im ñe ej boñ elukkuun bũrõrõ baat kein kõn wõt menin bool̦keno eo.

Ilo kajin Swahili, etan bool̦keno in ej Mulima ya Moto, mel̦el̦ein Tol̦ in Kijeek. Ilo kar 2002 eo, bool̦keno in ear rup. Joñan an kar l̦ap an rup, m̦oko im̦õn elõñ armej ro ekoba ro m̦õttam rar jorrããn im ejako aolep men ko m̦weier. Ilo jet bukwõn ko me kom̦ro l̦eo ippa ej kwal̦o̦k naan ie, el̦ap an dekãke jãn wõt kar menin bool̦keno eo. Armej ro ijin relukkuun jouj im rem̦õn̦õn̦õ in roñjake nuuj eo em̦m̦an kõmij kwal̦o̦ke. Eñin unin kom̦ro l̦eo ippa ej lukkuun m̦õn̦õn̦õ in mour im kwal̦o̦k naan ilo Goma, iturinl̦o̦k wõt Tol̦ in Kijeek.

Rainin ej Jãdede, im ilukkuun kijooror ke ij ruj. Kõmro l̦eo ippa kab ri lotok ro m̦õttam im mijenede ro jet naaj kwal̦o̦k naan ippãn doon. Kõm naaj ilo̦k im kwal̦o̦k naan ilo juon bukwõn etan Mugunga. Elõñ ri jipo̦kwe ro rej pãd ie im jokwe ilo em̦ nuknuk ko. Armej rein rar ko tok ñan Mugunga kõnke ri nana ro rar ko̦kkure bukwõn ko aer.

Kõmar kanne wa eo kõn bok ko ilo kajin France, Kiswahili, im Kinyarwanda, innem kõm ar ilo̦k. Ke kõmij tõpar town, kõmij lo elõñ armej ro. Likao ro rej bwilli diaka ko im elõñ kobbaer. Kõrã ro rej kõn̦ak l̦obl̦oba ko im etetal ilo ial̦ ko im em̦õj aer likũti ieb ko aer ioon bõraer. Tããkji ko rej bõkto bõktak armej ro ñan jikin jerbal ko aer im ñan m̦õn wia ko. Ñe kwõj reito reitak, kwõmaroñ lo an obrak jikin in kõn em̦ rã ko.

Kõm ar jikrõkl̦o̦k im̦õn kweilo̦k eo ilo Ndosho im iion bar jet Ri Kõnnaan ro an Jeova bwe kõmin jim̦or etal im kwal̦o̦k naan. Ro redik, kõrã ro me emej l̦õm̦aro pãleer, ro ejako jemãer im jineer im ro ewõr aer nañinmej rar itok. Men in ear lukkuun tõpar bũruõ. Elõñ iaaer rar iion elõñ apañ ko rel̦ap bõtab rar maroñ bõk jipañ ilo aer l̦oor naan in kakapilõk ko ilo Baibõl̦ eo. El̦ap an Baibõl̦ eo jipañ er im kiiõ rekõn̦aan jipañ ro jet. Ilo tukadu, kõmar kweilo̦k ippãn doon im etale jet eoon ko jãn Baibõl̦ eo me kõm naaj kõjerbali ilo kwal̦o̦k naan. Ãlikin wõt, kõmar kõjerbal 5 baj im juon tũrak ñan kõtõparl̦o̦k Mugunga. Oran aolep ri kwal̦o̦k naan ro ilo raan eo ej 130.

Ãlikin 30 minit, kõmij tõparl̦o̦k Mugunga. Elõñ buki em̦ nuknuk ko ilo jikin in. Ilo iol̦apen bukwõn in, em̦õj aer kõkkar im̦õn kapojak ko im jikin kwal̦kol̦ nuknuk ko. Ebwe an obrak bukwõn in kõn armej ro. Jet rej kõmat  im kapoje m̦õñã ko. Ro jet rej kwal̦kol̦ im burum̦ bajjek inabõj in m̦oko im̦wier.

Kõmar iione juon em̦m̦aan etan Baba Jacques, eo ej juon iaan ro rej lale jikin in. Jacques el̦ap an inepata kõn ajri ro nejin kõnke ebwe an nanal̦o̦k im penl̦o̦k mour. Ke kõmar lel̦o̦k ñane juon bok, (Questions Young People Ask​​—Answers That Work) ear lukkuun m̦õn̦õn̦õ. Ear ba bwe enaaj riiti bok eo im bareinwõt kwal̦o̦k ñan ro jet men ko enaaj katak jãn bok in.

Kõmar bar iione juon kõrã etan M̦am̦a Beatrice. Ear kajjitõk ippem etke Anij ej kõtl̦o̦k bwe armej ro ren eñtaan. Ear l̦õmn̦ak bwe unin an eñtaan ej kõnke Anij ej kaje e. Emej l̦eo ippãn ilo tarin̦ae im rar ko̦o̦te l̦addik eo nejin jejjo allõñ ko remootl̦o̦k. Ejaje epãd ia im ejaje el̦aññe ej mour wõt. Leddik eo nejin ewõr nejin bõtab ejjel̦o̦k ippãn im elukkuun pen aerro ajri eo mour ijin.

Ke iar roñ an kõrã in kõnnaan, iar keememejtok bwebwenato eo ilo Baibõl̦ eo kõn Job. Job ear lukkuun eñtaan im bũrom̦õj ke ear roñ aolep ennaan ko renana im rekabũrom̦õjm̦õj. Kõmar kõjerbale Baibõl̦ eo ñan kwal̦o̦k ñan M̦am̦a Beatrice unin an wõr eñtaan. Kõmar bar kaenõm̦m̦ane im kwal̦o̦k ñane bwe Anij ejjab kaje e. (Job 34:​10-​12, UBS; Jemes 1:​14, 15, UBS) Kõmar bareinwõt kwal̦o̦k ñane bwe m̦õttan jidik Aelõñ eo an Anij enaaj jol̦o̦k aolep men kein renana me rej wal̦o̦k ilo lal̦ in. Ke ear roñ men kein, ear jako an mejen bũrom̦õj im jino an ettõñdikdik. Ear ba bwe enaaj kate ñan wõnm̦aanl̦o̦k wõt im katak Baibõl̦ eo im jar bwe Anij en jipañe.

Ekar juon raan elukkuun em̦m̦an im aolep ri kwal̦o̦k naan ro rar m̦õn̦õn̦õ. Kõmar aolep kile bwe Jeova ear jipañ kõm bwe kõmin maroñ itok ñan bukwõn in ñan jipañ im kaenõm̦m̦ane armej ro. Ke kõmij ro̦o̦l jãn jikin in, joñan an armej ro kar m̦õn̦õn̦õ, rar kotak bok ko aer im yokwe tok kõm.

Ilo ial̦ eo am l̦o̦k, iar lukkuun kõl̦mãnl̦o̦kjen̦ kõn aolep men ko rar wal̦o̦k ilo raan eo. El̦ap aõ kam̦m̦oolol Jeova kõn juon raan eaiboojoj im em̦m̦an. Ij keememej tok an Baba Jacques lukkuun kam̦m̦oolol kõm. Ij bareinwõt keememej an M̦am̦a Beatrice oktak jãn bũrom̦õj im ear ettõñdikdik ke ear roñ katak ko rem̦ool jãn Baibõl̦ eo. Iaar bar iione juon lel̦l̦ap me joñan an kar m̦õn̦õn̦õ ear jab kerorotok ak ear ettõñdikdik wõt im letok pein bwe in yokyokwe. Elõñ jodrikdrik ro rar kwal̦o̦k elõñ kajjitõk ko, im iar bwilõñ kõnke ekkã wõt an rũtto ro kwal̦o̦k kajjitõk kein. El̦ap an armej ro ilo bukwõn in m̦õn̦õn̦õ im ettoñ wõt meñe el̦ap aer eñtaan ilo mour ko aer.

Elõñ armej ro rej itok jãn lal̦ ko jet im kajjioñ jipañ kakõm̦anm̦anl̦o̦k mour ko an armej ro ilo jikin kein. Rainin, ij lukkuun m̦õn̦õn̦õ bwe iar kwal̦o̦k naan ñan armej rein im kwal̦o̦k bwe m̦õttan jidik Anij enaaj kõm̦m̦an bwe ren jab bar eñtaan. El̦ap aõ m̦õn̦õn̦õ bwe ij bõk kun̦aaõ im kobal̦o̦k ippãn ro jet ipel̦aakin lal̦ in ñan jipañ armej ro bwe ren jel̦ã kõn Anij.