O se Tusi Mai Congo (Kinshasa)

I le Ata Lafoia o le Mauga o Afi

A O OSO aʻe le lā i le aai o Goma, ona vaaia lea o le lagi ua lanu moli ma piniki. E matou te vāai i aso uma i le matagofie o Mount Nyiragongo, o se tasi o mauga mū i le lalolagi atoa o loo ola pea. E alu ifo pea lava pea se asu mai le gutu o le mauga mū. A oo i le pō, e lanu mūmū le asu ona o le lava o loo i totonu o le gutu o le mauga mū.

Ua taʻua e tagata Swahili lenei mauga o Mulima ya Moto—Mauga o Afi. O le taimi mulimuli na pā ai lenei mauga o Nyiragongo o le 2002. O le toʻatele o o matou tuaoi ma uō i Goma, na faaleagaina uma a latou meatotino. I nisi o vaipanoa e ma te talaʻi ai ma laʻu tane, e ma te savavali i luga o lava ua liu papa, o se mea e lē masani ona ma vāai i ai. E tuufaafeagai uiga o tagata ma le tulaga malō o le lava. E fiafia tele tagata, ma talia ma le lotofaafetai le tala lelei e matou te talaʻia atu. O le mea lenā e avea ai la matou talaʻiga i le ata lafoia o le Mauga o Afi o se mea e matuā olioli ai.

Na ou ala i se tasi o Aso Toonaʻi ma se lagona o le naunau tele. O le a matou ō ma laʻu tane, uō o loo asiasi mai, ma isi misionare, e talaʻi mo le aso atoa i se nofoaga o tagata sulufaʻi i Mugunga, lea o loo i fafo atu o le aai i le itu i sisifo. O le toʻatele o loo nonofo i inā, ua latou sosola ese mai faiga sauā i o latou lava nuu.

Na matou uta se loli i lomiga faale-Tusi Paia i le gagana Falani, Kiswahili, ma le Kinyarwanda, ma matou ō loa. A o matou malaga atu i se auala omoomo o Route Sake, ua vaaia tagata o le aai ua amata a latou fuafuaga masani o le aso. O loo tūlei e tama talavou ni uta mamafa i a latou chukudus (o tamaʻi pasika ua fai i laupapa e laʻu ai uta). O loo savavali i le auala fafine e felanulanuaʻi ma sesega o latou ofu, ma o loo ave ni avega mamafa i o latou ulu. O loo pisi foʻi tagata e iai a latou uila afi laʻu pasese, i le aveina o tagata i fale faigaluega ma le maketi. O loo iai le tele o fale laupapa e vanisi i le lanu enaena ma le uliuli, ma e vali lanu moana pito o fale.

Ua matou taunuu i le Maota mo Sauniga i Ndosho, e feiloaʻi ma isi Molimau a Ieova o le a matou talaʻi faatasi i le nofoaga o tagata sulufaʻi. Na ootia oʻu faalogona i le vaai atu i fanau lāiti, fafine ua oti a latou tane, tamaiti ua mātuaoti, ma i latou e lē atoatoa le malosi o le tino. O le toʻatele o i latou na feagai ma mafatiaga ogaoga, ae ua faaleleia o latou olaga ona o le filifili e mulimuli i taʻiala o le Tusi Paia. E pei o se afi mumū le faamoemoe o le Tusi Paia i o latou loto, ma e naunau tele e taʻu atu i isi. Ina ua uma se sauniga puupuu lea na faailoa mai ai ni mau o le Tusi Paia e faalaeiau ai i tagata  e feiloaʻi i ai, ona ō uma loa lea o le 130 o i matou i ni tamaʻi pasi se lima ma se loli.

Pe ā ma le 30 minute mulimuli ane, ae matou taunuu loa i le nofoaga o tagata sulufaʻi. O loo iai le faitau selau o faleʻie papaʻe ua faatutū i luga o le lava ua liu papa. I le ogatotonu, o loo laina ai falelētaʻua mo le lautele, ma faletāmea e faaaogā e tagata uma. O so o se mea lava ua iai tagata—o loo fufulu ipu, kuka, aveese paʻu o pi, ma salu luma o o latou faleʻie.

Sa matou feiloaʻi ma se tamāloa e taʻua o Papa Jacques, o lē e vaaia se vaega o le nofoaga o tagata sulufaʻi. E manatu mamafa o ia i le tausia aʻe o lana fanau i nei taimi faigatā. Sa matuā fiafia ina ua matou tuuina iā te ia le tusi Fesili ua Fesili Mai ai Talavou—Tali e Aogā, ma sa ia faapea mai o le a ia faitauina ma faapotopoto mai ni vaega lāiti o tagata, e talanoa i ai i mea ua ia aʻoaʻoina.

Sa matou fetaui foʻi ma le tinā e taʻua o Mama Beatrice. Sa fesili o ia pe aiseā e faataga ai e le Atua puapuaga. Ua manatu o ia e faapea o loo faasalaina o ia e le Atua. Na fasiotia lona toʻalua i le taua, o loo feagai lana tama teine o se tinā nofofua ma le faigatā o le tausia aʻe o lana pepe, ma ua mavae le tele o masina talu ona ave faamalosi si ana tama tama, ma e leʻi toe maua lava se tala po o fea o iai o ia.

Na toe faamanatu mai e tala faanoanoa a Mama Beatrice, faalogona atonu sa oo iā Iopu ina ua ia maua tala faanoanoa. Sa matou faasino iā te ia le pogai moni o ona puapuaga, ma faamautinoa atu iai e lē o se faasalaga lea mai le Atua. (Iopu 34:10-12; Iakopo 1:14, 15) Na matou faailoa atu foʻi suiga o le a faia e le Atua i le lalolagi e ala i lona Malo. Na amata ona ʻataʻata mai o ia, ma faapea mai o le a ia maumauaʻi e faaauau le suʻesuʻeina o le Tusi Paia, ma tatalo i le Atua mo le fesoasoani.

Sa lagona uma e le ʻautalaʻi le fiafia i lenā aso, ma na matou iloa, sa matuā fesoasoani mai Ieova ina ia mafai ona matou avatu se faalaeiauga ma se faamoemoe i tagata na feiloaʻi i ai. A o matou ō ese mai le nofoaga o tagata sulufaʻi, o le toʻatele o i latou na faaali mai sāvali, o mekasini, ma tusi a o faatofā mai iā i matou.

A o matou toe foʻi i o matou aiga, sa matou toe tomānatu i lo matou aso. Na faatumulia aʻu i le lotofaafetai mo lenei aso faapitoa. Sa ou manatua uiga lototalisapaia na faaalia e Papa Jacques, o foliga toʻafilemu o Mama Beatrice, ma le malosi o le faatalofa a se loomatua ma ona foliga ataata. Ua ou toe mafaufau i talavou na faia ni fesili atamai, lea e faaalia ai lo latou tulaga matutua i le mafaufau. Ou te fiafia i uiga lelei na ou vaaia i tagata, e ui lava i puapuaga e tele, ae o loo ataata ma fiafia pea o latou foliga.

I lenei vaega o le lalolagi, ua tatou vaaia ai taumafaiga fitā a le toʻatele o tagata ina ia maua se mapusaga mo ē o loo puapuagatia. I aso nei, o se matuā faaeaga le faaaogāina o le Tusi Paia ina ia taʻu atu ai i tagata le vaifofō tumau mo o latou faafitauli. O se fiafiaga mo au le faia o se sao i taumafaiga ina ia avatu le vaifofō sili faaleagaga, lea e leʻi iloa muamua e tagata.