Pas i Kam Long Kongo (Kinsasa)

Klostu Long Maunten i Paia

TAIM san i save kam antap long taun Goma, kala bilong skai i pink na orens. Long olgeta de mipela i save lukim naispela maunten Nyiragongo, em wanpela bilong ol volkeno long olgeta hap bilong graun i save pairap planti taim. Long olgeta taim planti ston na smok i save kam ausait long het bilong maunten. Long nait ol dispela ston i luk retpela, em kala bilong lava i stap insait long maunten.

Long tokples Swahili, ol i kolim dispela maunten olsem Mulima ya Moto​—⁠olsem Maunten i Paia. Long 2002, em laspela taim maunten Nyiragongo i bin pairap bikpela. Olgeta samting bilong planti neiba na pren bilong mipela long Goma i bin bagarap. Long sampela ples i stap klostu we mitupela man bilong mi i save autim tok, mipela i save wokabaut antap long lava i kamap strong pinis olsem ston, na em i wanpela narakain samting tru. Tasol ol man i no gat pasin olsem ol dispela ston i strong pinis, nogat. Ol i lain bilong toktok, na ol i gat pasin isi na gutpela bel bilong harim gutnius mipela i autim. Dispela i mekim na mipela i amamas long autim tok klostu long dispela Maunten i Paia.

Long Sarere moning, mi kirap na amamas long tingim ol samting bai kamap. Mitupela man bilong mi, wantaim ol pren i kam visitim mipela na ol wanwok misineri, mipela bai raun de olgeta bilong autim tok long refiuji kem long Mugunga, em long hap wes bilong taun. Planti bilong ol dispela manmeri i stap long kem ol i bin ranawe long ol bikpela pait i kamap long ol taun bilong ol.

Mipela i kisim planti buk na nius bilong Baibel long tokples Frans, Kiswahili, na Kinyarwanda. Orait nau mipela i kirapim raun bilong mipela. Taim mipela i ron long rot Sake, em wanpela rot i gat planti pot-hol, mipela i lukim ol manmeri bilong taun i kirap pinis long mekim ol wok bilong ol. Ol yangpela man i pusim ol chukudus (em olsem wilbaro ol i wokim long diwai bilong karim ol kago samting). Ol meri i pasim ol kala kala laplap na wokabaut long sait bilong rot wantaim ol bikpela bandel antap long het bilong ol. Ol teksi i bisi tru long karim ol man i go i kam long wok na maket. Long olgeta hap i gat ol braunpela na blakpela haus ol i wokim long diwai na ol i penim sampela hap bilong en long blupela peint.

Mipela i kamap long Haus Kingdom long Ndosho na bungim sampela wanbilip Witnes Bilong Jehova husat bai joinim mipela long autim tok long kem. Mi sori tru long lukim ol yangpela, ol wido, ol pikinini i no gat papamama, na ol man i gat bagarap long skin. Planti bilong ol i bin karim bikpela pen na hevi, tasol ol i mekim i stap bilong ol i kamap gutpela moa long rot bilong bihainim ol stiatok bilong Baibel. Ol i bilip strong long ol gutpela tok promis bilong Baibel, na ol i  gat laik tru long tokim ol narapela long en. Bihain long sotpela bung we brata i tokim mipela long sampela skripsa bilong Baibel em ol i gutpela bilong strongim ol man mipela i bungim, mipela 130 i kalap long 5-pela liklik bas na wanpela 4-wil draiv trak.

Inap 30 minit bihain, mipela i kamap long kem. Planti handret waitpela haus sel ol i stap antap long lava i kamap ston. I gat ol pablik toilet na ples bilong wasim klos namel long kem. Planti manmeri i stap​—⁠ol i wasim ol samting, kukim kaikai, rausim skin bilong ol bin, na brumim fran bilong haus sel bilong ol.

Mipela i bungim wanpela man em ol i kolim Papa Jacques, em i save lukautim wanpela hap bilong kem. Em i wari long olsem wanem em i ken lukautim gut ol pikinini bilong em long dispela taim bilong planti hevi. Em i amamas tru taim mipela i givim em buk Sampela Askim Bilong Ol Yangpela​—⁠Ol Gutpela Bekim, na em i tok em bai ritim na bihain em bai singautim sampela i kam bung na tokim ol long samting em i lain long en.

Mipela i go moa na bungim wanpela meri em ol i kolim Mama Beatrice. Em i askim mipela long as na God i larim pen na hevi i stap. Em i ting olsem God i givim strafe long em. Ol i bin kilim i dai man bilong em long woa, pikinini meri bilong em i mama wanpis na i hatwok long lukautim bebi bilong em long kem, na sampela mun i go pinis ol man i bin kidnepim pikinini man bilong em. Em i no save pikinini man bilong em i stap we.

Stori bilong Mama Beatrice i kirapim mi long tingim samting Jop i mas pilim taim em i harim stori long ol samting nogut i bin kamap. Mipela i soim em long as na pen na hevi i stap na tokim em olsem ol pen na hevi bilong em i no strafe i kam long God. (Jop 34:​10-12; Jems 1:​14, 15) Na tu, mipela i stori gut long ol senis em klostu nau God bai kamapim long graun long rot bilong Kingdom bilong em. Isi isi em i kirap smail, na em i tok em i tingting strong long stadi yet long Baibel na beten long God i ken helpim em.

Olgeta long grup i amamas tru long dispela de, na mipela olgeta i pilim olsem Jehova i mekim wok long mipela long strongim ol man na ol i ken wetim gutpela samting bai kamap bihain. Taim mipela i lusim kem, planti manmeri i holim ol liklik nius, magasin, na buk bilong ol na ol i tromoi han bilong tok gutbai long mipela.

Taim mipela i draiv i go bek mipela i tingim ol gutpela samting i bin kamap. Mi amamas tru long kain gutpela de olsem. Mi tingim Papa Jacques na Mama Beatrice em ol i pilim tru ol tok, na wanpela lapun meri i sekanim strong han bilong mi na i smail tasol long mi. Mi tingim ol yangpela husat i bin kamapim ol gutpela askim na ol i soim olsem ol i gat tingting bilong man i bikpela pinis. Mi laikim gutpela pasin bilong ol man, em ol i smail na lap yet maski ol i karim bikpela pen na hevi.

Long dispela hap, mipela i lukim hatwok bilong planti narapela man em ol i traim long helpim ol manmeri i karim pen na hevi. Long dispela de, em i wanpela gutpela samting tru long yusim Baibel bilong soim ol manmeri olsem i gat wanpela rot tasol bilong stretim tru olgeta pen na hevi bilong ol. Mi amamas tru olsem mi insait long bringim nambawan gutpela helpim long ol samting bilong spirit i go long ol manmeri i karim pen na hevi.