Ukanda Umue wa Tunda ko Kongo (Kinshasa) Vulembo Womunda Yondalu

OSIMBU ekumbi li tunda volupale luo Goma, ilu li kala levala li kusuka kuenda eli li kusukilua. Eteke leteke eci tu vanja eposo Liomunda Nyiragongo, yimue pokati kolomunda vi totãla voluali (vulcão), yi tu lama. Vekungu liomunda yaco mua siata oku tuima owisi. Kuteke owisi waco u kusuka ndonata yi tunda vekungu.

Kelimi lio Swahili, omunda yaco yi tukuiwa hati Mulima ya Moto, ​—ci lomboloka Omunda Yondalu. Kunyamo wo 2002 oco onjanja ya sulako omunda Nyiragongo ya totãlele calua. Omanu valua tua lisunguile lavo kuenda akamba vetu volupale luo Goma va pesela ovina viavo viosi. Kovitumãlo vimue oku ame la veyange tua enda oku kundila, tua endela kilu lionata ya kõla kuenda nda kala ndu okuti ndi kasi oku liatela posi yimue yilikasi. Pole, omanu ka va kaile ndonata yaco ya kõla. Ovo va sanjuka, vawa, kuenda lutima wosi va tava kesapulo Liembimbiliya tua va kundila. Ca tu sanjuisa calua oku talavaya vulembo Womunda Yondalu!

Vocasapalo caco komẽle, nda pasuka lesanju lialua. Ulume wange lame, kumue lakamba vetu kuenda olomisionaliu vikuavo, tua sokiyile oku ka kundila ko Mugunga kocilombo comanu va tila uyaki, kutakelo wolupale. Valua va kasi kocilombo caco va tila ungangala kalupale avo.

Tua longeka vekãlu alivulu etu a pongoluiwa kelimi lio Francês, Kiswahili, kuenda Kinyarwanda. Noke tua fetika ungende. Osimbu tua kala oku pita vetapalo mueyuka ovikulungu ko Route Sake, volupale mua yuva. Amalẽhe akuenje va kala oku ambata apunda loloteyo (okuti kelimi liavo vi tukuiwa hati, chukudus). Akãi va wala asaya a kuete avala a litepa, kuenje lesanju va endela konele yetapalo lapunda avo kovitue. Vakualomoto va sakalala loku ambata omanu va enda kupange kuenda kocitanda. Konepa yaco kuli olonjo viavaya via li sila ocinãla calua, havio via pindaliwa levala litekãvelua kuenda lionoloti.

Noke tua pitila Konjango Yusoma kimbo lio Ndosho oco tu lisange Lolombangi vikuavo via Yehova via laikele oku ka kundila kocilombo caco. Eci nda mola amalẽhe, ovimbumba, olosiwe, kuenda ovilema, ca ndi sumuisa calua. Valua pokati kavo va tala ohali yalua, pole omo lioku kuama olonumbi Viembimbiliya, va mioñolola ekalo liomuenyo wavo. Elavoko Liembimbiliya lia petula ovitima viavo kuenda va sanjukilile oku sapuilako vakuavo elavoko liaco. Noke yohongele  yimue ya teta onimbu muna tua konomuisa ovinimbu Viembimbiliya vi vetiya omanu tua laikele oku sanga, ci soka 130 pokati ketu tua londa volokalela vitãlo vitito kuenda vekãlu limue li kuete ongusu yalua.

Noke yakukutu 30, tua pitila kocilombo comanu va tila uyaki. Olombalaka vialua vitito vi yela via tomehiwa vonata ya kukuta. Vokati kocilombo mua kala olokalete viowiñi kuenda ovitumãlo vioku sukuila uwalo. Vocitumãlo caco mua kalavo omanu va sukula, va teleka, va panda ocipoke kuenda ava va komba posamua yolombalaka viavo.

Tua sanga ulume umue o tukuiwa hati Papa Jacques, usongui wonepa yimue yocilombo. Eye wa sakalalele calua loku tekula omãla vaye vokuenda kuotembo yaco yohali. Eci tuo wĩha elivulu Os Jovens Perguntam—Respostas Práticas, wa sanjuka calua kuenda wa popia hati, o ka li tanga loku ongolola omanu vamue oco a va lomboluile eci a lilongisamo.

Noke yokatembo kamue tua sanga ukãi umue o tukuiwa hati Mama Beatrice. Wa tu pulisa esunga lieci Suku a kasilili oku ecelela ohali. Eye wa simile okuti Suku wa kala oku u kangisa. Ulume waye wa pondiwa kuyaki, omõlaye ukãi o kasi oku tekula omõla lika liaye vocilombo, kuenda omõlaye ulume tunde eci ambatiwa utiku, pa pita ale olosãi vialua. Toke cilo ka kũlĩhile oku a kasi.

Ulandu wa Mama Beatrice u njivaluisa esumuo Yovi a yeva eci a tambula asapulo ãvi. Tuo lekisa esunga lieci omanu va talela ohali kuenda tuo sapuila okuti, ohali a kasi oku tala, ka yi lomboloka ekangiso lia Suku. (Yovi 34:10-12; Tiago 1:14, 15) Tuo lekisavo apongoloko Suku a ka linga palo posi Vusoma waye. Noke wa fetika oku memena kuenje wa popia hati, ndi amamako oku lilongisa Embimbiliya loku likutilila ku Suku oco a ndi kuatise.

Keteke liaco, vosi yetu tua sanjukile calua kuenda tua limbuka okuti, Yehova wa tu kuatisa oku eca elavoko kuenda elembeleko komanu tua sanga. Osimbu tua kala oku tunda vocilombo, omanu valua poku tu usika, va tulika olotratadu, olorevista, kuenda alivulu tua va ĩha!

Eci tua kala oku tiukila kimbo, tua kuata epuluvi lioku sokolola ovina tua mola. Ngeca olopandu omo lieteke liwa tua kuata. Ndi ivaluka olopandu via Papa Jacques kuenda esanju lia Mama Beatrice, locilamo cukãi umue wa kuka, una wa sapela lika lame loku memena. Ndi ivalukavo amalẽhe va linga apulilo awa kuenda olondunge viavo vina okuti ka vi li kuata lanyamo avo. Oku mola ekalo liomanu vaco okuti ndaño lohali ya piãla va sanjuka, nda komoha calua.

Konepa eyi yoluali, tua mola elikolisilo liomanu valua va kasi oku eca elembeleko ku vana va tala ohali. Koloneke vilo, oku talavaya Lembimbiliya oco tu lekise komanu ono yi ka malako ovitangi viavo, esumũlũho liocili. Ñuete esanju lialua lioku kuatisa koku eca elembeleko konepa yespiritu okuti elikolisilo liaco li ka limbukiwa koluali luosi.