Nong Pwony Ki I Lok Pa Lubanga

In Itwero Nyikke Cok Bot Lubanga Nining?

Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.

1. Lubanga tika winyo lega ducu?

Jehovah lwongo dano me rok ducu ni gunyikke cok bote i lega. (Jabuli 65:2) Ento en pe winyo lega ducu. Me lapore, i kare ma Luicrael gubedo ka timo jami maraco, Lubanga okwero winyo legagi. (Icaya 1:15) Kadi wa lega pa laco ma uno dakone bene, Lubanga pe bijolone. (1 Petero 3:7) Ento inongo ni Lubanga winyo lega pa lutim bal madongo ka gungut.​—Kwan 2 Tekwaro 33:9-13.

2. Omyero waleg nining?

Lega tye mot dok but worowa, pi meno omyero waleg bot Jehovah keken. (Matayo 4:10; 6:9) Kit macalo watye ki rocci, omyero waleg i nying Yecu pien en aye “yo.” (Jon 14:6) Jehovah pe mito ni wanwo lega ma wamako i wiwa nyo ma nongo kicoyo i buk ento myero oa ki i cwinywa.​—Kwan Matayo 6:7 NW; Jo Pilipi 4:6, 7.

Lacwecwa twero winyo kadi wa lega ma kilego lalingling. (1 Camuel 1:12, 13) En mito ni waleg kare ki kare calo i odiko, otyeno, cawa me cam, ki dong ka watye i peko.​—Kwan Jabuli 55:22; Matayo 15:36.

3. Pingo Lukricitayo gicito i cokke?

Nyikke cok bot Lubanga pe yot pien wakwo i kin jo ma gipe ki niye i kom Lubanga, dok gingalo cikkene me kelo kuc i lobo. (2 Temceo 3:1, 4; 2 Petero 3:3, 13) Pi meno, lurem ma gicuko cwinywa i kin luye luwotwa mitte adada.​—Kwan Jo Ibru 10:24, 25.

In itwero nyikke cok bot Lubanga ka ce imako lirem ki jo ma gimaro Lubanga. Cokke pa Lucaden pa Jehovah miniwa kare me nongo adwogi maber ki i niye pa jo mukene.​—Kwan Jo Roma 1:11, 12.

  4. In itwero nyikke cok bot Lubanga nining?

Itwero nyikke cok bot Jehovah ka i lwodo lok i kom gin ma i pwonyo ki i Lokke. Bed ka tamo i kom ticce, tirane kacel ki cikkene. Lega miyo wadongo pwoc ma a ki i cwinywa pi mar ki ryeko pa Lubanga.​—Kwan Yocwa 1:8; Jabuli 1:1-3.

Itwero nyikke cok bot Lubanga ka ce itye ki niye. Ento niye gire obedo calo gin makwo dok mito agwoka. Omyero ibed ka teno kor niye-ni kun i lwodo lok i kom jami ma ipwonyogi.​—Kwan 1 Jo Tecalonika 5:21; Jo Ibru 11:1, 6.

5. Adwogi ango ma inongo ka inyikke cok bot Lubanga?

Jehovah gwoko jo ma marre. En gwokogi ki i kom gin mo keken ma twero balo niyegi nyo gengi me nongo kwo ma pe tum. (Jabuli 91:1, 2, 7-10) En cikowa i kom yo me kwo ma twero balo yotkomwa kacel ki yomcwinywa. Jehovah pwonyowa ki yo me kwo ma pud dong ber loyo.​—Kwan Jabuli 73:27, 28; Yakobo 4:4, 8.

Pi ngec mukene, nen dul me 17 i buk, Baibul Mono Ada Pwonyo Gin Ango? ma Lucaden pa Jehovah aye gucoyo.