Yumi Lanem Samting Long Tok Blong God

?Yu Mas Mekem Wanem Blong Kam Klosap Long God?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?God i stap harem olgeta prea?

Jehova i singaot ol man long evri ples blong kam klosap long hem long prea. (Ol Sam 65:2) Be hem i no stap harem olgeta prea. Taem ol man Isrel oli gohed long nogud fasin blong olgeta, God i no lesin long prea blong olgeta. (Aesea 1:15) Mo sipos wan man we i mared i spolem woman blong hem, samting ya i save blokem ol prea blong hem. (1 Pita 3:7) Nating sipos man i mekem sin we i nogud tumas, nao i tanem tingting blong hem, God bambae i harem prea blong hem.—Ridim 2 Kronikel 33:9-13.

2. ?Olsem wanem blong prea?

Prea i wan blesing mo i wan haf blong wosip we yumi mekem long God. Taswe yumi mas prea long Jehova nomo. (Matiu 4:10; 6:9) From we yumi sinman, yumi mas prea long nem blong Jisas. Hem i “rod” we God i yusum blong tekem yumi i kam long Hem. (Jon 14:6) Taem yumi prea, yumi mas talem ol toktok we i kamaot long hat blong yumi. Jehova i no wantem we yumi lanem baehat ol prea no yumi talem bakegen mo bakegen ol prea we man i raetem long wan buk.—Ridim Matiu 6:7; Filipae 4:6, 7.

God ya we i Mekem yumi i save harem ol prea we yumi talem long tingting no hat blong yumi, nating se voes blong yumi i no kamaot. (1 Samuel 1:12, 13) Hem i askem yumi blong prea long hem oltaem. Yumi save prea taem yumi girap, taem yumi go slip, taem yumi kakae, mo taem yumi kasem trabol.—Ridim Ol Sam 55:22; Matiu 15:36.

3. ?From wanem ol Kristin oli joen wanples?

Ol man raonabaot long yumi oli no bilif long God mo oli laf long promes we God i mekem long saed blong pis long wol. Samting ya i mekem se i no isi blong kam klosap long God. (2 Timoti 3:1, 4; 2 Pita 3:3, 13) Taswe yumi mas joen wanples wetem ol Kristin, nao bambae oli leftemap tingting blong yumi.—Ridim Hibrus 10:24, 25.

Yu save kam klosap long God sipos yu fren gud wetem ol man we oli lavem God. Sipos yu kam long ol miting blong ol Witnes blong Jehova, bambae bilif blong narafala i save givhan long yu.—Ridim Rom 1:11, 12.

  4. ?Fasin ya blong tingting dip i save givhan long yu olsem wanem, blong yu kam klosap long God?

I gud yu tingting dip long ol samting we yu lanem long Tok blong Jehova. Hemia bambae i givhan long yu blong kam klosap long Jehova. Yu save tingting gud long ol samting we hem i mekem, ol tok we hem i talem blong lidim yu, mo ol promes blong hem. Yu save tingting dip taem yu stap toktok wetem hem long prea. Samting ya bambae i givhan long yu blong kasem save moa long lav blong God mo waes blong hem, mo bambae yu wantem talem tangkiu tumas long hem.—Ridim Josua 1:8; Ol Sam 1:1-3.

Yu no save kam klosap long God sipos yu no trastem hem. Yu mas bilif long hem. Bilif i olsem wan samting we i laef mo i mas kakae blong i stap strong. Taem yu tingting dip long ol samting we yu lanem, i olsem se yu fidim bilif blong yu.—Ridim 1 Tesalonaeka 5:21; Hibrus 11:1, 6.

5. ?From wanem i gud yu kam klosap long God?

Jehova i lukaot gud long olgeta we oli lavem hem. Hem i blokem gud olgeta long eni samting we i save spolem bilif blong olgeta mo we i save mekem se oli no kasem laef we i no save finis. (Ol Sam 91:1, 2, 7-10) Hem i givim woning se yumi no mas mekem ol samting we oli save spolem bodi blong yumi, mo oli save mekem yumi harem nogud. Jehova i tijim yumi long rod blong laef we i beswan.—Ridim Ol Sam 73:27, 28; Jemes 4:4, 8.

Blong save moa, lukluk japta 17 blong buk ya ?Wanem Samting We Baebol i Rili Tijim?, we ol Witnes blong Jehova oli wokem.