Wĩrute Kuumana na Kiugo kĩa Ngai

Ũngĩkuhĩrĩria Ngai Atĩa?

Gĩcunjĩ gĩkĩ kĩrĩ na ciũria hihi waneyũria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Hihi Ngai nĩ athikagĩrĩria mahoya mothe?

Jehova eraga andũ a ndũrĩrĩ ciothe mamũkuhĩrĩrie na njĩra ya mahoya. (Thaburi 65:2) No ningĩ ti mahoya mothe athikagĩrĩria. Kwa ngerekano-rĩ, hĩndĩ ĩrĩa Aisiraeli maakĩrĩrĩirie gwĩka maũndũ moru, Ngai nĩ aaregire kũigua mahoya mao. (Isaia 1:15) Ningĩ ndangĩigua mahoya ma mũthuri wĩkaga mũtumia wake maũndũ moru. (1 Petero 3:7) O na kũrĩ ũguo, Ngai nĩ aiguaga nginya mahoya ma andũ arĩa mekĩte mehia maritũ angĩkorũo nĩ merirĩte.—Thoma 2 Maũndũ ma Matukũ ma Tene 33:9-13.

2. Twagĩrĩirũo kũhoya atĩa?

Nĩ gĩtĩo kwaria na Ngai mahoya-inĩ na ningĩ nĩ gĩcunjĩ kĩa ũthathaiya witũ, kwoguo twagĩrĩirũo kũhoya o Jehova wiki. (Mathayo 4:10; 6:9) Tondũ tũtirĩ akinyanĩru-rĩ, twagĩrĩirũo kũhoya thĩinĩ wa rĩĩtwa rĩa Jesu tondũ nĩwe “njĩra” ĩrĩa yamũrĩtwo. (Johana 14:6) Jehova ndendaga tũcokagĩre mahoya tũigĩte meciria-inĩ maitũ kana maandĩkĩtwo ibuku-inĩ, ĩndĩ endaga tũmũhoyage kuuma ngoro.—Thoma Mathayo 6:7; Afilipi 4:6, 7.

Mũũmbi witũ o na nĩ aiguaga hĩndĩ ĩrĩa tũkũmũhoya na ngoro. (1 Samueli 1:12, 13) Atwĩraga tũmũhoyage hingo ciothe, ta rũcinĩ na hwaĩ-inĩ, hĩndĩ ĩrĩa tũrarĩa, na hĩndĩ ĩrĩa tũrĩ na mathĩna.—Thoma Thaburi 55:22; Mathayo 15:36.

3. Akristiano macemanagia hamwe nĩkĩ?

Gũkuhĩrĩria Ngai ti ũndũ mũhũthũ tondũ tũtũũranagia na andũ matetĩkĩtie Ngai, na manyũrũragia kĩĩranĩro gĩake gĩa gũkaarehe thayũ thĩinĩ wa thĩ. (2 Timotheo 3:1, 4; 2 Petero 3:3, 13) Kwoguo nĩ tũkũbatara kũgwatanagĩra na aarĩ na ariũ a Ithe witũ nĩguo twĩkĩranage ngoro.—Thoma Ahibirania 10:24, 25.

No ũkuhĩrĩrie Ngai angĩkorũo nĩ ũgũtuma ũrata na andũ arĩa mamwendete. Mĩcemanio ya Aira a Jehova nĩ ĩtũheaga mĩeke ya kũgunĩka kuumana na wĩtĩkio wa arĩa angĩ.— Thoma Aroma 1:11, 12.

  4. Ũngĩkuhĩrĩria Ngai atĩa?

No ũkuhĩrĩrie Jehova na njĩra ya gwĩcũrania maũndũ marĩa wĩrutĩte kuumana na Kiugo gĩake. Wĩcũranie ũhoro wa mawĩko make, ũtongoria wake, na ciĩranĩro ciake. Gwĩcũrania na njĩra ya mahoya nĩ gũtũmaga tũgĩe na ngatho ciumĩte ngoro nĩ ũndũ wa wendo na ũũgĩ wa Ngai.—Thoma Joshua 1:8; Thaburi 1:1-3.

Ũngĩkuhĩrĩria Ngai angĩkorũo tu nĩ ũgũkorũo na wĩtĩkio harĩ we. Ĩndĩ wĩtĩkio ũtariĩ ta kĩndũ kĩrĩ muoyo kĩrĩa kĩbataraga kũramatwo nĩguo gĩtigakue. No mũhaka ũthiĩ na mbere na kũrĩmĩra wĩtĩkio waku na njĩra ya gwĩcũrania maũndũ marĩa ũreruta.—Thoma 1 Athesalonike 5:21; Ahibirania 11:1, 6.

5. Ũngĩgunĩka atĩa nĩ ũndũ wa gũkuhĩrĩria Ngai?

Jehova nĩ arũmbũyagia arĩa mamwendete. Nĩ amagitagĩra kuumana na ũndũ o wothe ũrĩa ũngĩthũkia wĩtĩkio wao na kĩĩrĩgĩrĩro kĩao kĩa muoyo wa tene na tene. (Thaburi 91:1, 2, 7-10) Nĩ atwĩraga maũndũ marĩa mangĩthũkia ũgima witũ na gĩkeno giitũ. Jehova nĩ atuonagia njĩra ĩrĩa yagĩrĩire biũ ũtũũro-inĩ.—Thoma Thaburi 73:27, 28; Jakubu 4:4, 8.

Nĩgetha wone ũhoro makĩria, rora gĩcunjĩ gĩa 17 kĩa ibuku rĩrĩ, Bibilia Ĩrutanaga Atĩa Kũna? rĩrĩa rĩcabĩtwo nĩ Aira a Jehova.