ʼE Lava Feafeaʼi Hakotou Fakaovi Ki Te ʼAtua?
Tou Ako Mai Te Folafola ʼa Te ʼAtua
ʼE Lava Feafeaʼi Hakotou Fakaovi Ki Te ʼAtua?
ʼE lagaʼi ʼi te ʼalatike ʼaenī te ʼu fehuʼi neʼe lagi kua kotou ʼosi fai pea ʼe ina fakahā peʼe ko te ʼu vaega Tohi-Tapu fea ʼi takotou Tohi-Tapu ʼe feala ke kotou maʼu ai tona ʼu tali. ʼE fiafia anai te kau Fakamoʼoni ʼa Sehova ʼi te fai palalau mo koutou ki te ʼu fehuʼi ʼaenī.
1. ʼE fagono koa te ʼAtua ki te ʼu faikole fuli?
ʼE fakaafe e Sehova ia te hahaʼi fuli ke natou fakaovi kiā te ia ʼi te faikole. (Pesalemo 65:2) Kae, ʼe mole fagono ia ki te ʼu faikole fuli. Ohagē lā, ʼi te haga fai aipē e te kau Iselaele te ʼu aga ʼaē ʼe kovi, neʼe mole fia fakalogo te ʼAtua ki tanatou ʼu faikole. (Isaia 1:15) Pea ʼe feala ke tuta te ʼu faikole ʼa he tagata ʼe ina gaohi koviʼi tona ʼohoana. (1 Petelo 3:7) Kae ko te ʼAtua ʼe fagono anai kiā nātou ʼaē neʼe agahala, māʼiapē lā mo nātou ʼaē neʼe agahala mamafa, mo kapau ʼe natou fakahemala.—Lau ia 2 Fakamatala 33:9-13.
2. ʼE tonu ke feafeaʼi tatatou ʼu faikole?
Ko te faikole ʼe ko he pilivilēsio lahi pea ʼe ko he faʼahi maʼuhiga ʼo tatatou tauhi, koia ʼaē ʼe tonu ai ke tou faikole ʼāteaina pē kiā Sehova. (Mateo 4:10; 6:9) ʼI totatou ʼuhiga agahala ʼe mole feala ai ke tou fakaovi ki te Tamai, koia ʼe tonu ai ke tou faikole ʼaki te huafa ʼo Sesu, heʼe ko ia te “ala” ʼaē neʼe hinoʼi e Sehova. (Soane 14:6) ʼE mole loto e Sehova ki he ʼu faikole ʼe tou lau liuliuga peʼe kua tohi, kae ke tou fakahā age te ʼu meʼa ʼaē ʼi totatou loto.—Lau ia Mateo 6:7; Filipe 4:6, 7.
ʼE toe feala pē ke fagono totatou Tupuʼaga ki te ʼu faikole ʼaē ʼe fai fakalogologo. (1 Samuele 1:12, 13) ʼE ina fakaafe tātou ke tou faikole ʼi te lakaga fuli pē, ohagē lā ko te ʼuhu, te afiafi, te temi kai, pea mokā tou felāveʼi mo he ʼu fihifihia.—Lau ia Pesalemo 55:22; Mateo 15:36.
3. He koʼē koa ʼe tonu ki te kau Kilisitiano ke natou fakatahitahi?
ʼE mole ko he meʼa faigafua hatatou fakaovi ki te ʼAtua, heʼe tou māʼuʼuli nei mo te ʼu hahaʼi ʼe mole natou tui ki te ʼAtua, pea ʼe natou manukiʼi tana fakapapau ʼo ʼuhiga mo te tokalelei ʼi te kele. (2 Timoteo 3:1, 4; 2 Petelo 3:3, 13) Koia ʼe ʼaoga ke tou fakatahi mo totatou ʼu tehina mo tuagaʼane, ʼaē ʼe fakalotomālohi ai tātou.—Lau ia Hepeleo 10:24, 25.
ʼE kotou lava fakaovi ki te ʼAtua mo kapau ʼe kotou kaumeʼa lelei mo nātou ʼaē ʼe ʼoʼofa ki te ʼAtua. ʼE fakafealagia mai te ʼu fono ʼa te kau Fakamoʼoni ʼa Sehova ke tou fefakalotomālohiʼaki ʼi te tui.—Lau ia Loma 1:11, 12.
4. ʼE kotou lava fakaovi feafeaʼi ki te ʼAtua?
ʼE feala ke kotou fakaovi kiā Sehova ʼaki takotou metitāsio ki te ʼu meʼa ʼaē neʼe kotou ako ʼi tana Folafola. Kotou fakakaukauʼi tana ʼu gāue, tana ʼu fakatotonu pea mo tana ʼu fakapapau. Ko te faikole pea mo te metitāsio, ʼe ina fakatuputupu takotou loto fakafetaʼi ʼaē ki te ʼofa pea mo te poto ʼo te ʼAtua.—Lau ia Sosue 1:8; Pesalemo 1:1-3.
ʼE hoki feala pē ke kotou fakaovi ki te ʼAtua mo kapau ʼe kotou falala pea mo tui kiā te ia. Kae ko te tui ʼe hagē ko he meʼa maʼuli, ʼe ʼaoga ke fafaga tuʼumaʼu. ʼE tonu ke kotou fafaga tuʼumaʼu takotou tui ʼaki takotou metitāsioʼi te ʼu akonaki ʼaē ʼe kotou tui kiai.—Lau ia 1 Tesalonika 5:21; Hepeleo 11:1, 6.
5. ʼE fua lelei feafeaʼi anai kiā koutou takotou fakaovi ki te ʼAtua?
ʼE tokaga ia Sehova kiā nātou ʼaē ʼe ʼoʼofa kiā te ia. ʼE ina puipui nātou mai te ʼu meʼa ʼaē ʼe feala ke fakatupu kovi ki tanatou tui pea mo tanatou ʼamanaki ʼaē ki te maʼuli heʼegata. (Pesalemo 91:1, 2, 7-10) ʼE ina fakatokaga mai ʼo ʼuhiga mo te ʼu aga ʼaē ʼe fakatupu tuʼutāmaki ki totatou sino mo pulihi ai totatou fiafia. ʼE akoʼi mai e Sehova ia te faʼahiga maʼuli ʼaē lelei ʼaupitō kiā tātou.—Lau ia Pesalemo 73:27, 28; Sake 4:4, 8.
[Paki ʼo te pāsina 31]
Kapau ʼe kotou fia maʼu he tahi ʼu fakamahino, vakaʼi te kāpite 17 ʼo te tohi ʼaenī Koteā Aaē ʼe Akoʼi Moʼoni Mai ʼi Te Tohi-Tapu?, neʼe tā e te kau Fakamoʼoni ʼa Sehova.