Bu meste paga inpostu?

É POKU algen ki gosta di paga inpostu. Txeu algen ta atxa ma ka ta uzadu dretu dinheru di inpostu i pur isu alguns algen ta atxa ma es ka debe paga inpostu pamodi es ta uza-l pa kuzas mariadu. Kes algen ki ta mora na un sidadi na Orienti Médiu splika pamodi ki es disidi ka paga inpostu: “Nu ka krê da dinheru pa bala ki ta mata nos mininu.”

Kes-li é ka situason novu ô ki ta kontise sô di vês en kuandu. Mohandas Gandhi ki é un líder indu ki dja móre, splika pamodi ki el ka ta paga inpostu di kel manera li: “Un algen ki ta apoia un stadu ki ten trópas organizadu di manera dirétu ô indirétu el sta ta partisipa di se pekadu. Tudu algen jóven ô di idadi ta partisipa di pekadu di stadu óras ki el ta paga inpostu.”

Di mésmu manera, Henry David Thoreau ki é un filózofu di séklu 19, splika ku bazi na se konsénsia pamodi ki el ka ta paga inpostu ki ta apoia géra. El purgunta: “Un sidadon debe dexa ken ki ta faze lei toma un disizon ki kada algen debe toma di akordu ku se konsénsia? Nton pakê ki kada algen ten konsénsia?”

Kel-li é un asuntu ki ta interesa kes ta sirbi Deus, pamodi Bíblia ta inxina di manera klaru ma es meste ten un konsénsia linpu na tudu asuntu. (2 Timóteo 1:3) Má tanbê Bíblia ta fla má govérnus ten autoridadi di kobra inpostu. El ta fla: ‘Tudu algen debe obi ku autoridadi supirior [govérnus di ómi], pamodi si Deus ka krê ka ta ten autoridadi; kes autoridadi ki ten, é Deus ki pô-s na ses puzison má ku limiti. Pur isu, nhos meste obi, ka sô pamodi ses raiba, má tanbê pamodi nhos konsénsia. Tanbê é pur isu ki nhos ta paga inpostu; pamodi es ta trabadja pa Deus i es ta faze kel trabadju li manenti. Nhos da tudu algen kel ki es ten direitu: ken ki pidi inpostu, da-l inpostu’. — Romanos 13:1, 5-7.

Pur isu, sigidoris di Jizus na ténpu di apóstlus ta pagaba inpostu, sikrê párti di kel dinheru éra uzadu pa kuzas ki ten aver ku trópas. Mésmu kuza ta kontise ku Tistimunhas di Jeová oji. Pamodi ki nu ta paga inpostu ki pode uzadu pa kuzas ki nu ka ta apoia? Un sérvu di Deus ta iginora se konsénsia na óra di paga inpostu?

Pa nu ten un konsénsia linpu nu meste paga inpostu

Na ténpu di apóstlus kuazi tudu kes inpostu ki sigidoris di Jizus ta pagaba, éra uzadu pa kuzas ki tinha aver ku trópas. Pur isu ki Mohandas i Henry ki dja nu papiaba di es antis, fla ma pamodi ses konsénsia es disidi ka paga inpostu.

Repara má kes ki ta sigiba Jizus obi ku órdi ki sta na Romanos kapítlu 13 ka sô pamodi es ka krê sérba kastigadu má ‘pamodi ses konsénsia.’ (Romanos 13:5) Konsénsia di kes ki ta sigi Jizus, na verdadi ta pô-s ta paga inpostu, sikrê kes inpostu pode uzadu pa algun atividadi ki es ka ta konkorda ku el. Pa nu ntende kel-li midjór nu meste sabe dretu modi ki nos konsénsia ta trabadja. Konsénsia é sima un vós déntu di nos ki ta fla-nu si kes kuza ki nu ta faze sta dretu ô mariadu.

Sima Henry fla, tudu algen ten kel vós déntu di el, má nu ka ta pode kunfia na kel vós sénpri. Pa nu agrada Deus nu ten ki trena nos konsénsia di akordu ku se leis. Deus ten más sabedoria di ki nos, pur isu txeu bês nu ten ki muda nos manera di pensa i prende pensa sima el. (Salmo 19:7) Pur isu ki é inportanti nu ntende kuzê ki Deus ta atxa sobri govérnus di ómi. Kuzê ki el ta atxa?

Repara má apóstlu Polu fla ma govérnus di ómi ‘ta trabadja pa Deus’. (Romanos 13:6) Kuzê ki kel-li krê fla? Kel-li krê fla ma es ta mante órdi i es ta faze kuzas dretu ki ta djuda ses povu. Ti kes govérnu ki ta faze txeu korupson ta faze trabadju sima kureiu, idukason, bonberu i pulísia. Nbóra Deus sabe má kes govérnu alvês ta faze kuzas mariadu, el ta dexa-s izisti i el krê pa nu mostra-s ruspetu i pa nu paga inpostu.

Deus sta ta dexa ómis governa pa algun ténpu. El ta ben troka tudu kes reinu di ómis pa se própi Reinu na Séu i el ta ben kaba ku tudu kuzas mariadu ki govérnus di ómi sta ta faze dja ten txeu ténpu. (Daniel 2:44; Mateus 6:10) Timenti kel ténpu li ka txiga, Deus krê pa nu obi ku govérnus i pa nu paga inpostu.

Má i si sima Mohandas, bu ta atxa ma paga inpostu ki ta apoia géra é un pekadu? Bon pensa na kel-li: sima óras ki bu subi na un lugar más altu bu ta konsigi odja kuzas más dretu, nu meste lenbra ma Deus ten más sabedoria i konhisimentu di ki nos. Pur isu, talvês nu ten ki muda nos manera di pensa. Deus uza proféta Izaías pa fla: ‘Sima séu é más altu di ki Téra, asi tanbê, nhas kaminhu é más altu di ki nhos kaminhu, i nhas pensamentu é más altu di ki nhos pensamentu.’ — Isaías 55:8, 9.

Nu debe sénpri obi ku autoridadis?

Nbóra Bíblia ta fla má nu debe paga inpostu, kel-li ka krê fla má nu debe obi sénpri ku tudu kuza ki govérnus ta manda. Jizus inxina má Deus ka da govérnus tudu autoridadi. Kantu es purgunta Jizus si pa Deus era dretu paga inpostu pa govérnu di Roma na kel ténpu, el fla: ‘Nhos paga Séza kel ki é di Séza, má nhos da Deus kel ki é di Deus.’ — Marcos 12:13-17.

Govérnus ki ta reprizentaba “Séza” ta fazeba dinheru i es ta flaba kantu valor ki kes dinheru tinha. Pur isu, Deus ta fla ma es ten direitu di pidi-nu pa nu paga inpostu. Má Jizus mostra má ‘kel ki é di Deus’ ki é nos vida i nos adorason é sô pa Deus. Óras ki leis di ómis ta bai kóntra leis di Deus, kes ki ta sigi Jizus ‘ten ki obi ku Deus antis di nu obi ku ómis’. — Atos 5:29.

Talvês kes ki ta sigi Jizus oji ka ta fika kontenti ku manera ki ta gastadu dinheru di inpostu. Má es ka ta fika kóntra govérnu nen es ka ta nega paga kes inpostu, pamodi si es faze kel-li es ta mostra ma es ka ta kunfia ma Deus ta ben rezolve prublémas di ómi. Envês di kel-li es ta spéra ku paxénxa pa ténpu ki Deus ta ben rezolve prublémas di ómis através di govérnu di se Fidju Jizus. Jizus fla: ‘Nha Reinu ka ta faze párti di es mundu.’ — João 18:36.

Pamodi ki é bon nu sigi kel ki Bíblia ta fla

Bu ta ivita txeu prubléma si bu sigi kel ki Bíblia ta fla sobri paga inpostu. Bu ta ivita kastigu ki lei ta da pa kes ki ta bai kóntra govérnu i tanbê bu ka ta fika ku medu di bu pegadu. (Romanos 13:3-5) I más inportanti inda é ki pa Deus bu ta ten un konsénsia linpu i bu ta da-l ónra pamodi bu sta ta obi ku el. Mésmu si bu perde algun dinheru, konparadu ku kes ki ka ta paga inpostu ô ki ka ta konta tudu verdadi na óra di paga inpostu, má bu pode kunfia na promésa di Deus ma el ta kuida di se sérvus. Davidi ki é un skritor di Bíblia fla: ‘Ami éra jóven i gósi N sta algen grandi, má nunka N ka odja un algen justu bandonadu, nen se fidjus ta djobe pon.’ — Salmo 37:25.

Ta da pa odja ma ntende i sigi kel ki Bíblia ta fla sobri paga inpostu, ta da-nu pas déntu nos. Deus ka ta kulpa-nu pa kel ki govérnu ta faze ku dinheru di inpostu, sima lei ka ta kulpa-nu pa kuzê ki donu di un kaza ta faze ku dinheru di renda ki el ta resebe. Stelvio ki ta mora na sul di Europa, antis di el studa Bíblia el luta duránti anus kóntra injustisa na se país. El splika pamodi ki el para di faze kel-la. El fla: “N tevi di rekonhese má ómi ka ta konsigi traze justisa, pas i union na mundu. É sô Reinu di Deus ki pode traze un sosiadadi diferenti i midjór.”

Si nu ‘da Deus kel ki é di Deus’ nu pode ten mésmu sertéza ki Stelvio tevi. Bu ta ben odja óras ki govérnu di Deus ben governa Téra interu i el ta ben kaba ku injustisa i ku tudu kuzas mariadu ki govérnu di ómi sta ta faze.

[Lejenda na pájina 22]

Deus ten más sabedoria di ki nos, pur isu txeu bês nu ten ki muda nos manera di pensa i prende pensa sima el.

[Lejenda na pájina 23]

Óras ki kes ki ta sigi Jizus ta paga inpostu, es ta ten un konsénsia linpu i es ta mostra ma es ta kunfia má Deus ta da-s kel ki es meste.

[Dizenhu na pájina 22]

‘Nhos paga Séza kel ki é di Séza, má nhos da Deus kel ki é di Deus’

[Dónu di fotus]

Copyright British Museum