ပကဘၣ်ဟ့ၣ် တၢ်ခိတၢ်သွဲဧါ
ပကဘၣ်ဟ့ၣ် တၢ်ခိတၢ်သွဲဧါ
ပှၤတနီၤန့ၣ် တအဲၣ်ဒိးဟ့ၣ် တၢ်ခိတၢ်သွဲဘၣ်. အဝဲသ့ၣ် ဆိကမိၣ်ဝဲလၢ ပဒိၣ်ပပှၢ်တဖၣ်န့ၣ် သူဝဲတၢ်ခိတၢ်သွဲလၢ အလီၢ်အကျဲ တဘၣ်ဘၣ်. တၢ်လၢ အကြၢးသူဝဲအလီၢ်န့ၣ် တသူဝဲဘၣ် ဒီးတၢ်လၢ အတလိၣ်သူဝဲအလီၢ်န့ၣ်သူဝဲ ဒီးအဝဲသ့ၣ် လံၣ်အီၣ်လီအီၣ်တၢ်. မ့မ့ၢ် ပှၤအဂၤတနီၤန့ၣ် တဟ့ၣ်ဝဲ တၢ်ခိတၢ်သွဲဘၣ်န့ၣ် မ့ၢ်လၢ ပဒိၣ်တဖၣ်သူဝဲ တၢ်ခိတၢ်သွဲလၢ တၢ်လၢ အတကြၢးတဘၣ်ဘၣ် အဂီၢ်အဃိ. အဒိ ပှၤသဝီဖိ လၢအအိၣ်လၢ ကီၢ်မုၢ်ထီၣ်အခၢၣ်သးန့ၣ် တဲဝဲလၢ “ပတဟ့ၣ် တၢ်ခိတၢ်သွဲလၢ ပဒိၣ်ပပှၢ် ကပှ့ၤကျိချံပှာ်သၣ် လၢကမၤသံ ပဖိပလံၤအဂီၢ်ဘၣ်.”
ပှၤအါဂၤ အိၣ်ဒီးတၢ်ထံၣ်ဒ်အံၤန့ၣ် တမ့ၢ်ထဲ ဆၢကတီၢ်ခဲအံၤဘၣ်, အအိၣ်ပာ်စၢၤ လၢပျၢၤလံၤလံၤလံ. ပှၤဟ့ၣ်ဒူၢ်ဖိအခိၣ် လၢအမ့ၢ် မိဟဲဒၤ ခ့ ကၤဒံၤ တဲဖျါထီၣ်ဝဲလၢ အသးလၢအသ့ၣ်ညါဒၣ်တၢ်န့ၣ် တဟ့ၣ်အခွဲး လၢအကဟ့ၣ် တၢ်ခိတၢ်သွဲဘၣ်. ဒီးအတဲဝဲလၢ “ပှၤတဂၤဂ့ၤ တဂၤဂ့ၤလၢ အဆီၣ်ထွဲသုးတၢ်မၤ လၢအနီၢ်ကစၢ်မ့ၢ်ဂ့ၤ လၢကျိၣ်စ့မ့ၢ်ဂ့ၤန့ၣ် မ့ၢ်အမၤဝဲတၢ်ဒဲးဘး. အဃိ ပှၤသးပှၢ်ဂ့ၤ ပှၤသးစၢ်ဂ့ၤ အမ့ၢ်ဟ့ၣ်လီၤပဒိၣ်လၢ တၢ်ခိတၢ်သွဲန့ၣ် မၤဝဲတၢ်ဒဲးဘးလီၤ.”
ပှၤကူၣ်ဘၣ်ကူၣ်သ့ လၢအမံၤမ့ၢ် ဒ့ဘ့ၤ သီရိၤန့ၣ် အတဟ့ၣ် တၢ်ခိတၢ်သွဲလၢ ကဆီၣ်ထွဲ တၢ်ဒုးတၢ်ယၤဘၣ်. ဒီးအ ပာ်ဖျါထီၣ်စ့ၢ်ကီးဝဲလၢ ဘၣ်မနုၤအဃိ အတဟ့ၣ်ဝဲဘၣ်လဲၣ်. အဝဲတဲဝဲလၢ “ပဝဲတဂၤဂ့ၤ တဂၤဂ့ၤန့ၣ် ပကဘၣ် ဆၢတဲာ်တၢ်ဒ် ပနီၢ်ကစၢ် သးလၢအသ့ၣ်ညါဒၣ်တၢ် အိၣ်ဝဲအသိး အဃိ ပမ့ၢ်ပျဲလၢ ပဒိၣ်ပပှၢ်တဖၣ် ဆၢတဲာ်န့ၢ်တၢ် လၢပဂီၢ်န့ၣ် ပအိၣ်ဒီး ပသးလၢအသ့ၣ်ညါဒၣ်တၢ် သနာ်က့ အကဲ တၢ်ခီလီလီလီၤ.”
ခရံာ်ဖိတဖၣ်န့ၣ် သူၣ်အိၣ်သးအိၣ်ဝဲ တၢ်ဂ့ၢ်တခါအံၤစ့ၢ်ကီး, မ့ၢ်လၢ လံာ်စီဆှံ ဟ့ၣ်သဆၣ်ထီၣ်ပှၤလၢ ပကဘၣ်အိၣ်ဒီး သးလၢအသ့ၣ်ညါဒၣ်တၢ် လၢအကဆှီ လၢတၢ်ကိးမံၤဒဲး အပူၤအဃိ. (၂ တံၤမသ့း ၁:၃) လံာ်စီဆှံ ပာ်ဖျါထီၣ်ဝဲလၢ ပဒိၣ်ပပှၢ်တဖၣ်န့ၣ် အိၣ်ဒီးတၢ်စိကမီၤလၢ ကထၢဝဲ တၢ်ခိတၢ်သွဲ. လံာ်စီဆှံ တဲဝဲလၢ “ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်တဖၣ်န့ၣ် မ်ပှၤကိးဂၤဒဲး ဒိးပၢအသးလၢ အဝဲသ့ၣ် အဖီလာ်တက့ၢ်. မ့တမ့ၢ်လၢ ကစၢ်ယွၤ ဟ့ၣ်အခွဲးဘၣ်န့ၣ် ပှၤလၢအအိၣ် ဒီးတၢ်စိတၢ်ကမီၤတဖၣ် အိၣ်ဝဲတသ့ဘၣ်. ဒီးပှၤလၢအအိၣ်ဒီး တၢ်စိတၢ်ကမီၤလၢ အအိၣ်ခဲအံၤတဖၣ်န့ၣ် ကစၢ်ယွၤ ပာ်အီၤလၢ အလီၢ်အလၤ အကလုာ်ကလုာ်လီၤ. အဃိ သုကဘၣ်ဒိးပၢသုသးလၢ အဝဲသ့ၣ်အဖီလာ်န့ၣ် တမ့ၢ်ထဲလၢ တၢ်စံၣ်ညီၣ်အဝဲန့ၣ်အဃိဘၣ် ကဘၣ်မ့ၢ်လၢ သုသးလၢအသ့ၣ်ညါဒၣ်တၢ်အဃိ စ့ၢ်ကီးလီၤ. လၢတၢ်ဂ့ၢ်အံၤအဃိ သုဟ့ၣ်တၢ်ခိတၢ်သွဲစ့ၢ်ကီး, မ့ၢ်လၢအဝဲသ့ၣ်မ့ၢ်ကစၢ်ယွၤ အခ့အပှၤတဖၣ်လၢ အမၤတၢ်လၢ ကမျၢၢ်အဂီၢ်အဃိလီၤ. ဟ့ၣ်ပှၤကိးဂၤဒဲး တၢ်လၢအဝဲသ့ၣ်ကြၢးဒိးန့ၢ်ဘၣ်ဝဲတက့ၢ်. ပှၤလၢအကြၢးဒိးန့ၢ်ဘၣ် တၢ်ခိတၢ်သွဲန့ၣ် ဟ့ၣ်အီၤတၢ်ခိတၢ်သွဲတက့ၢ်.”—ရိမ့ၤ ၁၃:၁, ၅-၇.
လၢတၢ်ဂ့ၢ်အံၤအဃိ ခရံာ်ဖိလၢ တၢ်မၢဖိအစိၤသ့ၣ်တဖၣ်န့ၣ် အဝဲသ့ၣ်ဟ့ၣ်ဝဲ တၢ်ခိတၢ်သွဲ. ဒီးတၢ်ခိတၢ်သွဲတဖၣ်အံၤ ပဒိၣ်တဖၣ် သူဝဲလၢ တၢ်ဒုးတၢ်ယၤအဂီၢ် အါမးသနာ်က့ ခရံာ်ဖိတဖၣ်ဟ့ၣ်ဝဲ တၢ်ခိတၢ်သွဲဒံး. ယဟိဝၤပှၤအုၣ်အသး လၢဆၢကတီၢ်ခဲအံၤ * စ့ၢ်ကီး ဟ့ၣ်ဝဲ တၢ်ခိတၢ်သွဲလီၤ. ခရံာ်ဖိသ့ၣ်တဖၣ် မ့ၢ်တဆီၣ်ထွဲ တၢ်ဒုးတၢ်ယၤဘၣ်န့ၣ် ဘၣ်မနုၤအဃိ အဝဲသ့ၣ်ဟ့ၣ်ဝဲ တၢ်ခိတၢ်သွဲလဲၣ်. ဖဲခရံာ်ဖိသ့ၣ်တဖၣ် ဘၣ်ဟ့ၣ် တၢ်ခိတၢ်သွဲတဖၣ်အခါ မ့ၢ်အတကြၢးဒိကနၣ် အသးလၢ အသ့ၣ်ညါဒၣ်တၢ် ဘၣ်ဧါ.
တၢ်ခိတၢ်သွဲ ဒီးသးလၢအသ့ၣ်ညါဒၣ်တၢ်
လၢတၢ်မၢဖိအစိၤန့ၣ် တၢ်ခိတၢ်သွဲလၢ အဝဲသ့ၣ် ဟ့ၣ်ဝဲတနီၤန့ၣ် ဖျါလၢပှၤသူဝဲလၢ တၢ်ဒုးတၢ်ယၤအဂီၢ်. တၢ်ဂ့ၢ်တခါအံၤန့ၣ် အမၤတံာ်တာ်ဝဲ ကၤဒံၤ ဒီးသီရိၤ အသးလၢအသ့ၣ်ညါဒၣ်တၢ် လၢကဟ့ၣ် တၢ်ခိတၢ်သွဲအဂီၢ်.
ခရံာ်ဖိတဖၣ် ဒိကနၣ်ဝဲ တၢ်မၤလိာ်ဖဲ ရိမ့ၤ အဆၢဒိၣ် ၁၃ န့ၣ်တမ့ၢ်ထဲလၢ အဝဲသ့ၣ် အဲၣ်ဒိးဟးဆှဲး တၢ်စံၣ်ညီၣ်အဃိဘၣ်, မ့ၢ်လၢအ “သးလၢအသ့ၣ်ညါဒၣ်တၢ်အဃိ” စ့ၢ်ကီး. (ရိမ့ၤ ၁၃:၅) တၢ်ခိတၢ်သွဲတဖၣ်န့ၣ် ပှၤမ့ၢ်သူအီၤလၢ တၢ်လၢ ခရံာ်ဖိတဖၣ် တူၢ်လိာ်ဝဲတသ့ဘၣ် ဒီးခရံာ်ဖိတဖၣ် မ့ၢ်ဆိကမိၣ်လၢ အသးလၢအသ့ၣ်ညါဒၣ်တၢ် တပျဲအီၤလၢ အကဟ့ၣ် တၢ်ခိတၢ်သွဲဘၣ် သနာ်က့ လံာ်စီဆှံ မၢကၢာ်တဆၢ တဲဝဲလၢ အဝဲသ့ၣ် ဘၣ်ဟ့ၣ်ဝဲ တၢ်ခိတၢ်သွဲ ဒ်သိး အဝဲသ့ၣ် ကအိၣ်ဒီး သးလၢအသ့ၣ်ညါဒၣ်တၢ် လၢအကဆှီအဂီၢ်လီၤ. ဒ်သိး ပကနၢ်ပၢၢ် တၢ်ဂ့ၢ်တခါအံၤအဂီၢ် ပကဘၣ် နၢ်ပၢၢ်အါထီၣ် ပသးလၢအသ့ၣ်ညါဒၣ်တၢ် အဂ့ၢ်.
ပှၤကိးဂၤဒဲးန့ၣ် အိၣ်ဒီး သးလၢအသ့ၣ်ညါဒၣ်တၢ် လၢဟ့ၣ်ပလီၢ်အဝဲသ့ၣ်. ဒီးအဝဲသ့ၣ်တနီၤန့ၣ် အသးလၢအသ့ၣ်ညါဒၣ်တၢ် ဟ့ၣ်ပလီၢ်အဝဲသ့ၣ် ဒ်သီရိၤအသိး ဘၣ်ဆၣ် ပနာ်န့ၢ် ပသးလၢအသ့ၣ်ညါဒၣ်တၢ် တသ့ထီဘိဘၣ်. ဒ်သိး ပကမၤတၢ်ဘၣ် ကစၢ်ယွၤအသးအဂီၢ် ပသးလၢအသ့ၣ်ညါဒၣ်တၢ်အံၤ ကဘၣ်ဟံးစုနဲၣ်ကျဲပှၤ ဒ်ကစၢ်ယွၤ အတၢ်သိၣ်တၢ်သီတဖၣ် တဲဝဲအသိး. ကစၢ်ယွၤန့ၣ် အတၢ်ဆိကမိၣ် အပတီၢ်ထီန့ၢ်ပှၤ အဃိ ဒ်သိးပတၢ်ထံၣ် ကလီၤဂာ်ဒီးအီၤအဂီၢ် ပကဘၣ်ဘှီဂ့ၤထီၣ် ပတၢ်ဆိကမိၣ် ဒီးပတၢ်ထံၣ်ထီဘိ. (စံးထီၣ်ပတြၢၤ ၁၉:၇) ကစၢ်ယွၤ အတၢ်ထံၣ်လၢ ဟီၣ်ခိၣ်ပဒိၣ်ပပှၢ်အဖီခိၣ် အိၣ်ဒ်လဲၣ်န့ၣ် ပကြၢးဂုာ်ကျဲးစၢး ဃုနၢ်ပၢၢ်အီၤ. အဃိ ဟီၣ်ခိၣ်ပဒိၣ်ပပှၢ်တဖၣ်န့ၣ် ကစၢ်ယွၤ ထံၣ်အဝဲသ့ၣ်ဒ်လဲၣ်.
စီၤပီလူးကိးဝဲ ဟီၣ်ခိၣ်ပဒိၣ်ပှၢ်တဖၣ်လၢ “ကစၢ်ယွၤ အခ့အပှၤတဖၣ်လၢ အမၤတၢ်လၢ ကမျၢၢ်အဂီၢ်.” (ရိမ့ၤ ၁၃:၆) ဖဲအံၤ စီၤပီလူး အဲၣ်ဒိးတဲဝဲ အခီပညီဒ်လဲၣ်. အဝဲအဲၣ်ဒိးတဲဝဲ ပဒိၣ်တဖၣ် ထုးထီၣ်တၢ်သိၣ်တၢ်သီ ဒီးအဝဲသ့ၣ် မၤဝဲတၢ်လၢ အကဲဘျုးလၢ ထံဖိကီၢ်ဖိအဂီၢ်. ပဒိၣ်လၢ အမၤလံၣ်မၤလီအီၣ်တၢ် စ့ၢ်ကီး ညီနုၢ် အဝဲသ့ၣ် မၤဝဲတၢ်လၢ အကဲဘျုးလၢ ထံဖိကီၢ်ဖိအဂီၢ်. အဒိ အဝဲသ့ၣ် ဒုးအိၣ်ထီၣ်ဝဲ တၢ်ဆှၢလံာ်ဆှၢလဲၢ်, ကၠိ, ပှၤမၤပံာ်မ့ၣ်အူကရၢ ဒီးပလံးတဖၣ်. ကစၢ်ယွၤထံၣ်ဝဲ ပဒိၣ်ပပှၢ်တဖၣ် အိၣ်ဒီးတၢ်လီၤတူာ်လီၤကာ် သနာ်က့ အပျဲဒံးလၢ အဝဲသ့ၣ် ကပၢတၢ် တစိၢ်တလီၢ်. အဃိ ကစၢ်ယွၤ ဟ့ၣ်ပှၤတၢ်သိၣ်တၢ်သီလၢ ပကဘၣ်ဟ့ၣ် အဝဲသ့ၣ် တၢ်ခိတၢ်သွဲ. မ့ၢ်လၢ ကစၢ်ယွၤပျဲဝဲလၢ ပဒိၣ်ပပှၢ်တဖၣ်ကပၢ ပှၤဟီၣ်ခိၣ်ဖိအဃိ ပမ့ၢ်ဟ့ၣ် တၢ်ခိတၢ်သွဲန့ၣ် လီၤဂာ်ဒ်သိးဒီး ပပာ်ကဲ ကစၢ်ယွၤ အတၢ်ရဲၣ်တၢ်ကျဲၤ.
ကစၢ်ယွၤ ပျဲပဒိၣ်ပပှၢ်တဖၣ်လၢ ကပၢပှၤဟီၣ်ခိၣ်ဖိ ထဲတစိၢ်တလီၢ်. ဘၣ်ဆၣ် ကစၢ်ယွၤ တိာ်ပာ်ဝဲလၢ တယံာ်လၢၤဘၣ်န့ၣ် အကပာ်လီၤက့ၤ ကစၢ်ယွၤအဘီမုၢ် လၢကပၢက့ၤတၢ်လၢ ဟီၣ်ခိၣ် အတၢ်ပၢတၢ်ပြးအလီၢ်. တကးဒံးဘၣ် တၢ်နးတၢ်ဖှီၣ်လၢ ပှၤဟီၣ်ခိၣ်ဖိ ထံၣ်ဘၣ်ဝဲ ခီဖျိလၢ ဟီၣ်ခိၣ်ပဒိၣ်ပပှၢ်တဖၣ် ဒုးအိၣ်ထီၣ်ဝဲန့ၣ် ကစၢ်ယွၤအဘီအမုၢ်အံၤ ကမၤလီၤမၢ်ကွံာ်ဝဲ ခဲလၢာ်. (ဒၤနံးယ့လး ၂:၄၄; မးသဲ ၆:၁၀) ဖဲပှၤထီဒါ ပဒိၣ်ပပှၢ်ခီဖျိလၢ အတအဲၣ်ဒိးဟ့ၣ်ဝဲ တၢ်ခိတၢ်သွဲဘၣ်အခါ ကစၢ်ယွၤ တဟ့ၣ်အခွဲးလၢ ခရံာ်ဖိတဖၣ် ကပၣ်ဃုာ်လၢ ပှၤထီဒါပဒိၣ်ပပှၢ်တဖၣ် အကျါဘၣ်.
ဒ်ပတဲသကိး ဖဲမၢကၢာ်အသိး ကၤဒံၤ ဆိကမိၣ်ဝဲလၢ တၢ်ဟ့ၣ်တၢ်ခိတၢ်သွဲ လၢအဆီၣ်ထွဲဝဲ တၢ်ဒုးတၢ်ယၤန့ၣ် မ့ၢ်ဝဲတၢ်ဒဲးဘးလီၤ. နၤစ့ၢ်ကီး နမ့ၢ်ဆိကမိၣ် ဒ်န့ၣ်န့ၣ် နကမၤဒ်လဲၣ်. အဒိ, ပလဲၤထီၣ် တၢ်လီၢ်ဒံးထီန့ၣ် ပထံၣ်စိတၢ် ဖျါဒံးယံၤ. ဒ်န့ၣ်အသိး ပမ့ၢ်ဆိကမိၣ်ထံက့ၤ ဒီးနၢ်ပၢၢ်လၢ ကစၢ်ယွၤအတၢ်ထံၣ်န့ၣ် အပတီၢ်ထီဒိၣ်န့ၢ်ဒံး ပတၢ်ထံၣ်အခါ ပတူၢ်လိာ်အတၢ်ထံၣ် ကညီ. ကစၢ်ယွၤ ထိၣ်ဟူးထိၣ်ဂဲၤထီၣ် ဝံယၡါယၤလၢ အကတဲဝဲလၢ “ဒ်မူခိၣ် ထီန့ၢ်ဒံး ဟီၣ်ခိၣ်အသိး တၢ်လၢယမၤတဖၣ်န့ၣ် အပတီၢ်ထီန့ၢ်ဒံး တၢ်လၢသုမၤတဖၣ် ဒီးယတၢ်ဆိကမိၣ်တဖၣ်န့ၣ် အပတီၢ်ထီန့ၢ်ဒံး သုတၢ်ဆိကမိၣ်တဖၣ်လီၤ.”—ယၡါယၤ ၅၅:၈, ၉.
ပဒိၣ်ပပှၢ်တဖၣ်န့ၣ် မ့ၢ်အအိၣ်ဒီး တၢ်စိတၢ်ကမီၤ လၢလၢပှဲၤပှဲၤဧါ
ဖဲလံာ်စီဆှံ တဲဝဲဘၣ်ဃးဒီး ပှၤဘၣ်ဟ့ၣ် တၢ်ခိတၢ်သွဲအဂ့ၢ်အခါ အတတဲဝဲဒၣ်လၢ ပဒိၣ်ပပှၢ်တဖၣ် အိၣ်ဒီးတၢ်စိတၢ်ကမီၤ လၢာ်လၢာ်ဆ့ဆ့ လၢပှၤလၢ အပၢဝဲတဖၣ် အဖီခိၣ်ဘၣ်. ယ့ၣ်ၡူး သိၣ်လိဝဲလၢ ကစၢ်ယွၤ တဟ့ၣ်ဝဲ ပဒိၣ်ပပှၢ်တဖၣ် တၢ်စိတၢ်ကမီၤ လၢာ်လၢာ်ဆ့ဆ့ဘၣ်. ဘၣ်တဘျီ ပှၤသံကွၢ် ယ့ၣ်ၡူးလၢ ပှၤဟ့ၣ်ရိမ့ၤအပဒိၣ် လၢတၢ်ခိတၢ်သွဲန့ၣ် မ့ၢ်ကစၢ်ယွၤ ထံၣ်ဝဲလၢ အကြၢးဧါ. ယ့ၣ်ၡူး စံးဆၢက့ၤဝဲလၢ “တၢ်လၢအဘၣ်ဃးဒီး ကဲစၢ်န့ၣ် ဟ့ၣ်က့ၤလၢ ကဲစၢ်တက့ၢ်.”—မၢ်ကူး ၁၂:၁၃-၁၇.
ပဒိၣ်ပပှၢ်လၢအမ့ၢ် ကဲစၢ်အပှၤခၢၣ်စးတဖၣ်န့ၣ် တ့ဝဲကျိၣ်စ့ ဒီးဒုးအိၣ်ထီၣ် စ့အလုၢ်အပှ့ၤ. အဃိ ကစၢ်ယွၤ ထံၣ်ဝဲလၢ အဝဲသ့ၣ်အိၣ်ဒီး တၢ်ခွဲးတၢ်ယာ်လၢ ကဃ့ပှၤ တၢ်ခိတၢ်သွဲ. ဘၣ်ဆၣ် ယ့ၣ်ၡူး ပာ်ဖျါထီၣ်ဝဲလၢ “တၢ်လၢအဘၣ်ဃးဒီး ကစၢ်ယွၤ” န့ၣ်မ့ၢ်ဝဲ ပတၢ်အိၣ်မူ ဒီးပတၢ်ဘူၣ်ထီၣ်ဘါထီၣ် အဃိ တၢ်သ့ၣ်တဖၣ်အံၤန့ၣ် ပှၤဟီၣ်ခိၣ်ဖိ အတၢ်ကရၢကရိ တကြၢးဒိးန့ၢ်ဝဲဘၣ်. ပှၤဟီၣ်ခိၣ်ဖိ အတၢ်သိၣ်တၢ်သီ မ့ၢ်ထီဒါလိာ်သးဒီး ကစၢ်ယွၤ အတၢ်သိၣ်တၢ်သီန့ၣ် လၢခရံာ်ဖိတဖၣ် “ကဒိကနၣ် ပှၤကညီအလီၢ် . . . ကဘၣ်ဒိကနၣ် ကစၢ်ယွၤ အကလုၢ်လီၤ.”—မၤတၢ် ၅:၂၉.
တၢ်ခိတၢ်သွဲတနီၤ ပှၤသူအီၤဒ်လဲၣ်န့ၣ် ကဲထီၣ် တၢ်သးဘၣ်တံာ်တာ်လၢ ခရံာ်ဖိလၢ မုၢ်မဆါတနံၤအံၤအဂီၢ်. သနာ်က့ အဝဲသ့ၣ် ဟ့ၣ်ဝဲ တၢ်ခိတၢ်သွဲ ဒီးအဝဲသ့ၣ် တမၤတံာ်တာ် ပဒိၣ်အတၢ်ဖံးတၢ်မၤ ဒီးတထီဒါ အဝဲသ့ၣ်ဘၣ်. အဝဲသ့ၣ် မ့ၢ်ထီဒါပဒိၣ်တဖၣ်န့ၣ် လီၤဂာ်ဒ်သိးဒီး အဝဲသ့ၣ် တအိၣ်ဒီးတၢ်သးစူၤ ဒီးတနာ်ဝဲ ကစၢ်ယွၤ အတၢ်အၢၣ်လီၤအီလီၤလၢ အကမၤဂ့ၤထီၣ် ပှၤဟီၣ်ခိၣ်ဖိ အတၢ်အိၣ်သး ခီဖျိ ယ့ၣ်ၡူးအတၢ်ပၢဘၣ်. ယ့ၣ်ၡူး အနီၢ်ကစၢ်ဒၣ်ဝဲ တဲဝဲလၢ “ယဘီယမုၢ်န့ၣ် တဘၣ်ဃးဒီး ဟီၣ်ခိၣ်အံၤဘၣ်.”—ယိၤဟၣ် ၁၈:၃၆.
ပမၤထွဲ လံာ်စီဆှံ အတၢ်သိၣ်လိနဲၣ်လိအဃိ ကဲဘျုးလၢပဂီၢ်
ပမ့ၢ်မၤပိာ်ထွဲ လံာ်စီဆှံ တၢ်သိၣ်လိနဲၣ်လိ ဘၣ်ဃးဒီး တၢ်ဟ့ၣ်တၢ်ခိတၢ်သွဲန့ၣ် ပကန့ၢ်ဘၣ် အဘျုးအါမး. အဒိ မ့ၢ်လၢ ပတမၤကမၣ် တၢ်သိၣ်တၢ်သီဘၣ်အဃိ ပတလိၣ် ဘၣ်ယိၣ်တၢ်လၢ ပှၤကစံၣ်ညီၣ်ပှၤ မ့တမ့ၢ် ပှၤကဟဲဖီၣ်ပှၤဘၣ်. (ရိမ့ၤ ၁၃:၃-၅) တကးဒံးဘၣ် မ့ၢ်လၢပမၤထွဲ တၢ်သိၣ်တၢ်သီအဃိ ပအိၣ်ဒီး သးလၢအသ့ၣ်ညါဒၣ်တၢ် လၢအကဆှီ ဒီးကဲထီၣ် တၢ်လၤကပီၤ လၢကစၢ်ယွၤအဂီၢ်. ပမ့ၢ်ထိၣ်သတြီၤဒီး ပှၤလၢအတဟ့ၣ် တၢ်ခိတၢ်သွဲ ဒီးအလံၣ်အီၣ်လီအီၣ် ပဒိၣ်ဘၣ်ဃးဒီး တၢ်ခိတၢ်သွဲတဖၣ်န့ၣ် ပကန့ၢ်ဘၣ်စ့ စှၤန့ၢ်ဒံးအဝဲသ့ၣ်. ဘၣ်ဆၣ် ပနာ်သ့သပှၢ်တၢၢ်လၢ ကစၢ်ယွၤ ကကွၢ်ထွဲ အခ့အပှၤ လၢအတီဒီးအီၤတဖၣ် ဒ်အအၢၣ်လီၤဝဲအသိး. ဘၣ်တဘျီ ပှၤကွဲးထါစံးထီၣ်ပတြၢၤ စီၤပၤဒၤဝံး တဲဝဲလၢ “လၢညါ ယမ့ၢ်ပှၤသးစၢ် ဒီးခဲအံၤ ယသးပှၢ်လံ ဘၣ်ဆၣ် ပှၤတီပှၤလိၤ ဘၣ်တၢ်ပာ်တ့ၢ်ကွံာ်အီၤ မ့တမ့ၢ် အဖိတဖၣ် ဘၣ်ဟးဃ့အီၣ်တၢ်န့ၣ် ယတထံၣ်ဘၣ် နီတဂၤဘၣ်.”—စံးထီၣ်ပတြၢၤ ၃၇:၂၅.
ပမ့ၢ်နၢ်ပၢၢ်ထီၣ် လံာ်စီဆှံအတၢ်မၤလိာ် ဘၣ်ဃးဒီး တၢ်ဟ့ၣ်တၢ်ခိတၢ်သွဲ ဒီးမၤထွဲအီၤန့ၣ် ပကအိၣ်ဒီး တၢ်သူၣ်မံသးမုာ်. အဒိ စ့လၢပဟ့ၣ်လီၤ ဟံၣ်ကစၢ် လၢပငါအိၣ်အဟံၣ်န့ၣ် အကသူဝဲစ့တဖၣ်အံၤ ဒ်လဲၣ်ဒ်လဲၣ်န့ၣ် အတဘၣ်ဃးဒီးပှၤဘၣ်. ဒ်န့ၣ်အသိး စ့လၢပဟ့ၣ်လီၤ ပဒိၣ်လၢ တၢ်ခိတၢ်သွဲတဖၣ်န့ၣ် အဝဲသ့ၣ် မ့ၢ်သူဝဲ ဒ်လဲၣ်ဂ့ၤဒ်လဲၣ်ဂ့ၤ ကစၢ်ယွၤ တဟံးန့ၢ်ပှၤအရ့ဘၣ်. စတဲလဘံဧိၤ လၢအအိၣ်လၢ ယူရပၤ ကလံၤထံးန့ၣ် တချုးလၢ အမၤလိလံာ်စီဆှံ ဒံးဘၣ်အခါ ဒ်သိး ထံကီၢ်တၢ်အိၣ်သး ကဂ့ၤထီၣ်အဂီၢ် အဝဲဂုာ်ကျဲးစၢးဝဲ တဘျုးနံၣ်ညါ. ဘၣ်ဆၣ်လၢခံ အဝဲတဂုာ်ကျဲးစၢး မၤဂ့ၤထီၣ် ထံကီၢ်တၢ်အိၣ်သး လၢၤဘၣ်. ဘၣ်မနုၤအဃိလဲၣ်, အတဲဖျါထီၣ်ဝဲလၢ “ယသ့ၣ်ညါလၢ ပှၤဟီၣ်ခိၣ်ဖိတဖၣ်န့ၣ် ဒုးအိၣ်ထီၣ် တၢ်တီတၢ်လိၤ, တၢ်ဃူတၢ်ဖိး ဒီးတၢ်အဲၣ်တၢ်ကွံ လၢဟီၣ်ခိၣ်ဒီဘ့ၣ် တန့ၢ်ဘၣ်. တၢ်လၢအဒုးအိၣ်ထီၣ် တၢ်ဆီတလဲ ဒီးမၤဂ့ၤထီၣ် ပှၤဟီၣ်ခိၣ်ဖိ အတၢ်အိၣ်သးသ့န့ၣ် မ့ၢ်ထဲဒၣ် ကစၢ်ယွၤ အဘီအမုၢ်တခါလီၤ.”
ဒ်စတဲလဘံဧိၤအသိး နမ့ၢ်ဟ့ၣ်က့ၤ “တၢ်လၢအဘၣ်ဃးဒီး ကစၢ်ယွၤ” တီတီလိၤလိၤန့ၣ် နၤစ့ၢ်ကီး နကန့ၢ်ဘၣ် တၢ်ဆိၣ်ဂ့ၤလၢ ကစၢ်ယွၤ အၢၣ်လီၤဝဲ. တၢ်ဟးဂူာ်ဟးဂီၤ ဒီးတၢ်တတီတလိၤ လၢပှၤဟီၣ်ခိၣ်ဖိ လၢအပၢတၢ်တဖၣ် ဒုးအိၣ်ထီၣ်ဝဲန့ၣ် ပနာ်သ့သပှၢ်တၢၢ်လၢ ကစၢ်ယွၤ ကမၤဂ့ၤထီၣ်က့ၤဝဲ ခဲလၢာ်. ဒီးအကမၤဝဲခီဖျိ အကသူဝဲ အတၢ်ပၢတၢ်ပြး လၢအတီအလိၤ.
[တၢ်ဂ့ၢ်အဘျဲၣ်တဖၣ်]
^ နမ့ၢ်အဲၣ်ဒိး သ့ၣ်ညါအါထီၣ် ဘၣ်ဃးဒီး ဘၣ်မနုၤအဃိ ယဟိဝၤပှၤအုၣ်အသးတဖၣ် ဟ့ၣ်ဝဲ တၢ်ခိတၢ်သွဲလဲၣ်န့ၣ် ကွၢ် The Watchtower, November 1, 2002, page 13, paragraph 15, and May 1, 1996, page 17, paragraph 7.
[တၢ်ဂ့ၢ်ဖုၣ်ကိာ်]
ကစၢ်ယွၤ အတၢ်ဆိကမိၣ်န့ၣ် အပတီၢ်ထီန့ၢ်ဒံး ပတၢ်ဆိကမိၣ်အဃိ ဒ်သိး ပတၢ်ထံၣ် ကလီၤဂာ်ဒီးအီၤအဂီၢ် ပကဘၣ်ဘှီဂ့ၤထီၣ် ပတၢ်ဆိကမိၣ် ဒီးပတၢ်ထံၣ်
[တၢ်ဂ့ၢ်ဖုၣ်ကိာ်]
ခရံာ်ဖိတဖၣ် မ့ၢ်မၤထွဲတၢ်မၤလိာ် ဘၣ်ဃးဒီး တၢ်ဟ့ၣ်တၢ်ခိတၢ်သွဲန့ၣ် အဝဲသ့ၣ်ကအိၣ်ဒီး သးလၢအသ့ၣ်ညါဒၣ်တၢ် လၢအကဆှီ ဒီးပာ်ဖျါထီၣ်လၢ အဝဲသ့ၣ်နာ်ဝဲလၢ ကစၢ်ယွၤကမၤလၢပှဲၤ အဝဲသ့ၣ်တၢ်လိၣ်ဘၣ်.
[တၢ်ဂီၤအဖီလာ်]
“တၢ်လၢ အဘၣ်ဃးဒီး ကဲစၢ်န့ၣ် ဟ့ၣ်က့ၤလၢ ကဲစၢ်တက့ၢ်. ဘၣ်ဆၣ် တၢ်လၢ အဘၣ်ဃးဒီး ကစၢ်ယွၤန့ၣ် ဟ့ၣ်က့ၤလၢ ကစၢ်ယွၤတက့ၢ်.”
[Credit Line]
Copyright British Museum