Taks – Motst du dän betolen?

DE MIEESCHTE Menschen jleichen nich Taks to tolen. Väle denkjen, daut äa Taksjelt nich rajcht jebrukt woat. En een Launt, wua daut väl Kjrich jeft, wullen eenje nich Taks tolen, wäajen dee säden: “Wie woaren nich de Schoss betolen, waut onse Kjinja ombrinjen.”

Daut jeft väl Menschen, waut uk soo denkjen. Dee wellen nich, daut äa Taksjelt fa waut schlajchtet jebrukt saul. Een polietischa Leida von Indien, waut Mohandas K. Gandhi heet, säd mol, woosoo sien Jewessen daut nich tooleet, Taks to tolen. Hee säd: “Deejanja, waut eene Rejierunk unjastett, waut een Millitäa haft, dee moakt aul bie dee äare Sind met, krakjt endoont aus dee daut jlikjtoo unjastett ooda onen to weeten. Jieda Mensch, endoont aus oolt ooda junk, haft Poat aun dee äare Sind, wan dee sienen Taks tolt toom de Rejierunk unjahoolen.”

De Jelieeda Henry David Thoreau wull uk nich Taks tolen toom Kjrich unjastetten. Hee jleewd, daut et nich rajcht wia, daut dee, waut en de Politikj schauften, de Menschen bemotten wullen, waut to unjastetten, waut fa an orrajcht wia. Daut sull eene perseenelje Entscheidunk sennen, waut sikj opp jiedrem eenen sien Jewessen stett.

Dise Sach äwa Taks tolen, es eene wichtje Sach fa Christen, wäajen de Schreft sajcht dietlich, daut wie sellen en aules een reinet Jewessen haben (2. Timotäus 1:3). Oba de Schreft sajcht uk, daut de Rejierunk daut Rajcht haft, Taks to fodren. Dee sajcht: “Lot aulemaun de Rejierunk unjadon sennen, dee Jewault äwa am haft. Wiels wan daut nich von Gott kjeem, wia kjeene Rejierunk; wiels Gott haft de Rejierungen aunjeordent. . . . Doawäajen es daut needich, unjadon to sennen, nich bloos ut Forcht fa de Strof, oba om daut Jewessen sient haulwen. Dit es uk wuarom jie Taks tolen; Rejierungs Beaumten sent Gott siene Deena, dee sikj doatoo hanjäwen. Tolt aulem, waut jie an schuldich sent: Taks, dän jie Taks schulden” (Reema 13:1, 5-7, PB).

Dit es wuarom de ieeschte Christen doafäa bekaunt wieren, daut see reed wieren, Taks to tolen, wan uk väl von daut Jelt jinkj toom de Armee unjastetten. Soo es daut uk bie Jehova siene Zeijen vondoag dän Dach. * Wuarom betol wie Taks, wan dee dän uk fa soont brucken, waut wie nich unjastetten? Sull een Christ nich no sien Jewessen horchen, wan daut bat doa es, Taks to tolen?

Toom een reinet Jewessen haben, mott wie Taks tolen

En dee Tiet von de ieeschte Christen wort väl von daut Taksjelt fa de Armee jebrukt. Daut es krakjt wuawäajen de polietischa Leida Gandhi un de Jelieeda Thoreau, wua wie aul ea von räden, nich wullen Taks tolen.

De Christen kjeemen daut Jeboot ut Reema, Kapitel 13 nich bloos doawäajen no, daut see nich wullen bestroft sennen; see deeden daut uk wäajens “daut Jewessen” (Reema 13:5, PB). Soo, mau rajcht wan een Christ daut uk nich jleicht, to waut daut Taksjelt jebrukt woat, betolt dee doawäajen Taks, om daut dee kaun een goodet Jewessen haben. Toom daut bäta vestonen mott wie weeten, woo daut Jewessen schauft. Daut es soo aus eene ennaliche Stemm, waut ons sajcht, aus daut, waut wie doonen, rajcht ooda orrajcht es.

Aule Menschen haben dise ennaliche Stemm, oba wie kjennen nich emma opp dee vetruen. Om Gott to jefaulen, mott wie ons Jewessen soo oppschoapen, aus Gott daut fa rajcht talt. Gott es weisa aus wie sent, un doawäajen mott wie foaken ons denkjen endren un lieren, soo to denkjen aus hee (Psalm 19:8). Un doawäajen mott wie vestonen, woo Gott äwa de menschelje Rejierungen denkjt. Woo denkjt hee äwa dee?

De Apostel Paulus säd, de menschelje Rejierungen “sent Gott siene Deena” (Reema 13:6, PB). Waut meent daut? Daut meent, daut dee doano sitt, daut doa Ordnunk es en äa Launt un dee deit uk goodet fa äare Menschen. Mau rajcht soone Rejierungen, waut onopprechtich sent, doonen waut fa de Menschen. Biejlikj daut dee de Post jebrocht woat, daut daut Schoolen jeft, daut dee Fiatrocks haben un uk Poliezen. Wan Gott uk de schlajchte Sachen weet, waut de Rejierungen eenjemol doonen, lat hee daut doawäajen too, daut et dee jeft. Un hee well haben, daut wie dee respakjten un onsen Taks tolen.

Gott woat de menschelje Rejierungen bloos fa eene jewesse Tiet loten rejieren. Lota woat hee met dee een Enj moaken un dan woat daut bloos sien himlischet Kjennichrikj jäwen un daut woat aul dän Schoden wada gootmoaken, waut de menschelje Rejierungen enne Vegonenheit haben äwa de Menschen jebrocht (Daniel 2:44; Matäus 6:10). Oba bat daut bat doa es well Gott haben, daut wie de Rejierungen unjadon sent un onsen Taks betolen.

Oba waut, wan die daut noch krakjt soo jeit aus dän polietischen Leida Gandhi un denkjst noch emma, daut Taks betolen, waut Kjrich unjastett, eene Sind es? Dan mott wie em Denkj hoolen, daut Gott weisa es un mea weet aus wie. Veleicht es daut needich, daut wie ons denkjen endren. Derch dän Profeet Jesaja säd Gott: “Soo väl hecha aus de Himmel äwa de Ieed es, soo väl hecha sent miene Wäaj aus june Wäaj, un es mien denkjen aus jun denkjen” (Jesaja 55:8-9, PB).

Wäa haft aul daut Rajcht äwa ons?

Wan de Schreft uk sajcht, daut wie sellen Taks tolen, meent daut oba nich, daut de Rejierungen emma von ons velangen kjennen, daut wie an jehuarsom sent. Aus de Menschen Jesus fruagen, aus dee sullen de reemische Rejierunk Taks tolen, säd Jesus: “Jäft dän Kjeisa, waut am traft, un jäft Gott, waut sient es!” (Markus 12:13-17, PB).

De Rejierungen doonen daut Jelt moaken un doawäajen jeft Gott an daut Rajcht, von ons Taks to fodren. Oba Jesus lieed, daut ons Läwen un onse Aunbädunk bloos Gott jehieren. Wan de Menschen äare Jesazen jäajen Gott siene Jesazen sent, dan motten Christen “Gott mea jehorchen aus Menschen” (Aposteljeschicht 5:29, PB).

Christen vondoag dän Dach jleichen daut veleicht nich, woo daut Taksjelt jebrukt woat. Oba dee stalen sikj nich jäajen de Rejierunk un sent uk nich jäajen Taks tolen. Wiels wan dee daut deeden, wudden see wiesen, daut see nich opp Gott vetruen, daut hee aule Trubbels fiksen woat. Christen luaren leewa jeduldich no Gott un sien Kjennichrikj. Jesus muak daut dietlich un säd, sien “Kjennichrikj es nich von dise Welt” (Johanes 18:36, PB).

Woo ons daut togood kjemt, wan wie daut nokomen, waut de Schreft sajcht

Die woat daut toom gooden sennen, wan du dän Rot nokjemst ut de Schreft un dän Taks tolst. Du woascht nich motten Strof tolen, soo aus dee, waut daut Jesaz bräakjen. Un du woascht die uk nich brucken ferchten, daut dee daut wudden enwoaren, wan du nich Taks tolsd (Reema 13:3-5). Waut noch wichtja es, du woascht een reinet Jewessen haben ver Gott un am derch dien Vehoolen ieren. Mau rajcht wan du uk weinja Jelt hast aus dee, waut onopprechtich sent un nich Taks tolen, kaust du die opp Gott sien Vespräakjen veloten, daut hee sikj om siene true Deena kjemmat. De Bibelschriewa David säd: “Ekj sie junk jewast un sie nu oolt, oba hab noch niemols jeseenen daut de jerajchta veloten es, ooda siene Kjinja no Broot prachren” (Psalm 37:25, PB).

Daut to vestonen un notokomen, waut de Schreft äwa Taks tolen sajcht, woat die uk ennalichen Fräd jäwen. Gott woat die nich veauntwuatlich hoolen fa daut, waut de Rejierungen doonen met daut Taksjelt. Biejlikj wan du een Hus pachst un du dän Wieet de Pacht betolst, best du verem Jesaz uk nich veauntwuatlich, waut dee met daut Jelt lota deit. Een Maun von Sied-Europa, waut Stelvio heet, kjamft jäajen de Ojjerajchtichkjeit en sien Launt, ea hee de Woarheit ut de Schreft lieed. Oba dan hieed hee opp, jäajen Ojjerajchtichkjeit to kjamfen. Hee säd: “Ekj must daut toostonen, daut de Menschen nich kjennen Jerajchtichkjeit un Fräd brinjen un uk nich doafäa sorjen, daut de Menschen soo aus Breeda toop oppe gaunze Welt läwen kjennen. Bloos Gott sien Kjennichrikj kaun daut endren, daut de Menschen unjarenaunda bäta foadich woaren.”

Wan du, krakjt soo aus Stelvio, Gott tru daut jefst, “waut sient es”, dan kaust du die uk secha sennen, daut Gott woat Jerajchtichkjeit veschaufen. Du woascht daut beläwen kjennen, wan Gott ieescht eene jerajchte Rejierunk oppstalen woat äwa de gaunze Welt un wada aul dän Schoden woat fiksen, waut de menschelje Rejierungen aunjerecht haben.

[Footnoot]

[Takjst]

Wie motten ons denkjen endren un lieren, soo to denkjen aus Gott, wäajen hee es väl weisa, aus wie sent

[Takjst]

Wan Christen jehuarsom sent un Taks tolen, dan woaren dee ver Gott een goodet Jewessen haben un wiesen, daut see doaropp vetruen, daut hee sikj om an kjemmat

[Bilt]

“Jäft dän Kjeisa, waut am traft, un jäft Gott, waut sient es”

[Biltnowies]

Copyright British Museum