Lafoga Pe E Tatau Ona Tatou Totogiina?

E TOʻAITIITI tagata e fiafia e totogi lafoga. E toʻatele e manatu o loo maʻimau a latou tupe o loo totogi ai lafoga ona e lē o faaaogāina lelei, faaaogā e isi mo a latou lava fuafuaga, faapea ai ma le taufaasesē. O nisi e tetee i lafoga ona o le lē talafeagai o le faaaogāina o na lafoga. Na faamatala e tagatānuu o se aai i Sasaʻe Tutotonu le māfuaaga na lē toe totogiina ai a latou lafoga: “E matou te lē mananaʻo e faatupeina le fausia o fana o loo fasiotia ai a matou fanau.”

O na manatu e lē o ni manatu fou. Sa taʻua e le taʻitaʻi o le ʻau Hinitū sa iai o Mohandas K. Gandhi, le māfuaaga e lē mafai ai ona ia totogia lafoga e faapea: “E auai se tasi i le faia o le agasala, pe afai e na te lagolagoina i se auala tuusaʻo pe iloagatā foʻi, se malo e iai sa latou vaegaʻau. Pe afai e totogia lafoga, ina ia saosaolaumea i le faatumauina o lenā malo, ua tofusia uma la tagata taʻitoʻatasi e tusa pe matutua pe lāiti i le faia o le agasala.”

I se tulaga tutusa, i le senituri 19 na taʻua ai e le faifilosofia o Henry David Thoreau lona tetee i le totogiina o lafoga lea e lagolago ai taua. Na fesili o ia: “Pe e tatau i tagatānuu ona faatagaina ē e faia tulafono, ina ia faia filifiliga lea e ao ona faia e le tagata lava ia e tusa ma lona lotofuatiaifo? O le ā la le aogā o le iai o se lotofuatiaifo i tagata taʻitoʻatasi?”

E tāua lenei mataupu i Kerisiano ona o loo aʻoaʻo manino mai i le Tusi Paia, e tatau ona latou maua pea se lotofuatiaifo mamā i mea uma. (2 Timoteo 1:3) I le isi itu, ua faailoa mai i le Tusi Paia, o loo iai i malo le pule e aoina ai lafoga. Ua faapea mai: “Ia gauaʻi tagata uma i faipule silisili [malo faaletagata], auā e leai se pule pe a lē mai i le Atua; o faipule o loo iai nei, ua faatagaina e le Atua e pule i o latou tulaga eseese. O le mea lea ua tatau ai ona outou gauaʻi, e lē gata ona o lenā toʻasā, ae ona o o outou lotofuatiaifo. O le mea foʻi lea, ua outou totogi ai lafoga; auā o i latou o auauna a le Atua, o loo faia pea la latou tiute tauave. Ia avatu i tagata uma mea e tatau iā i latou, ia totogi atu le lafoga i lē ua tatau i ai le lafoga.”—Roma 13:1, 5-7.

O le māfuaaga lea ua mātaulia ai Kerisiano o le uluaʻi senituri, ona o lo latou nofosauni e totogi lafoga, e ui o le vaega tele o na lafoga e lagolagoina ai vaegaʻau. E faapena foʻi Molimau a Ieova i aso nei. * O le ā le māfuaaga e totogi ai lafoga, pe afai o loo lagolagoina ai gaoioiga e lē faa-Kerisiano? Pe e tatau i se Kerisiano ona lē ano i lona lotofuatiaifo pe a oo ina totogi lafoga?

Lafoga ma le Lotofuatiaifo

O le mea moni, na alu uma i le vaegaʻau se vaega o lafoga lea na faatonuina Kerisiano o le uluaʻi senituri ina ia totogia. O le mataupu lenei e fitoitonu i le lotofuatiaifo, lea na tetee ai Gandhi ma Thoreau i le totogia o le lafoga.

Ia mātau, na usitaʻia e Kerisiano le faatonuga i le Roma mataupu e 13, e lē gata ina ia ʻalofia ai  le faasalaga, ae “ona o o [latou] lotofuatiaifo.” (Roma 13:5) Ioe, o le lotofuatiaifo o se Kerisiano e faamalosia ai o ia ina ia totogi lafoga, e tusa lava pe e lagolagoina ai gaoioiga e na te teena. Ina ia malamalama i lenei feteenaʻiga, e tatau ona tatou iloa le mea moni e uiga i o tatou lotofuatiaifo, o le leo o loo i totonu o i tatou lea e taʻu maia, pe e talafeagai a tatou gaoioiga pe leai foʻi.

E pei ona iloa e Thoreau, e tofu tagata uma ma le lotofuatiaifo, ae e lē faatuatuaina i taimi uma. Ina ia mafai ona faafiafiaina le Atua, e tatau ona ōgatusa o tatou lotofuatiaifo ma ana tapulaa. E masani ona manaʻomia le toe fetuunaʻi o o tatou mafaufauga ina ia ōgatusa ma le finagalo o le Atua, auā e sili atu ona manatunatuga i lo o i tatou. (Salamo 19:7) E tatau la ona tatou taumafai ina ia malamalama i le silafaga a le Atua i malo faaletagata. O le ā lana silafaga?

Ua tatou iloa na taʻua e le aposetolo o Paulo ia malo faaletagata o “auauna a le Atua.” (Roma 13:6) O le ā lona uiga? E uiga atu i le vaavaaia o le sologa lelei o mea ma faatino tiute tāua mo le lelei o tagata. E oo lava i malo e lē lelei pulega, e masani ona latou saunia auaunaga e pei o le tilivaina o meli, o aʻoga, fale fuimū, ma matagaluega o leoleo. E ui o loo malamalama lelei le Atua i tulaga leaga o pulega a tagata, ae ua faapalepale mai o ia ma faatonuina i tatou ina ia totogi lafoga, ina ia faaaloalogia ai lana faatulagaga, o le faatagaina lea o nei malo e pulea tagata.

Ua faatagaina e le Atua pulega a malo faaletagata mo na o sina taimi puupuu. E finagalo o ia e aveesea e lona Malo i le lagi ia malo faaletagata, ma toe faaleleia mea leaga uma ua oo i tagata mo le tele o senituri, ona o a latou pulega. (Tanielu 2:44; Mataio 6:10) Peitaʻi, i le taimi lenei, e lē o faatagaina e le Atua Kerisiano ina ia tetee i malo, e ala i le lē totogiina o lafoga po o se isi foʻi auala.

Ae ā pe afai o loo tatou manatu pea e pei o Gandhi e faapea, o le agasala le totogiina o lafoga e lagolagoina ai taua? E pei lava ona manino ma lelei la tatou vaai i se mea pe a maualuga le mea o loo tatou i ai, e mafai foʻi la ona fetuunaʻi o tatou manatu ina ia ōgatusa ma le finagalo o le Atua, e ala i le mafaufau i ona manatunatuga lea e sili ona maualuluga. Na fetalai le Atua e ala i le perofeta o Isaia: “E pei ona maualuga o le lagi i le lalolagi, e faapena ona maualuga o oʻu ala i o outou ala, ma oʻu manatu i o outou manatu.”—Isaia 55:8, 9.

Po ua Latou Maua le Pule Atoatoa?

O le aʻoaʻoga a le Tusi Paia e uiga i le totogiina o lafoga, e lē uiga atu e faapea ua pule atoatoa malo faaletagata i o latou tagatānuu. Na aʻoaʻo Iesu e faapea, ua tuu e le Atua i malo le pule e gata mai. Ina ua fesiligia Iesu pe e tatau ona totogi atu lafoga i le malo o Roma na pule i lenā taimi, na tali mai o ia ma le atamai: “Ia totogi atu mea a Kaisara iā Kaisara, a o mea a le Atua ia avatu i le Atua.”—Mareko 12:13-17.

O malo ia e faaāta mai e “Kaisara” e latou te gaosia, fuafuaina, ma faatumauina le maualuga o le tau o le tupe. I le silafaga la a Ieova, o loo iai i malo le aiā e toe maua ai na tupe e ala i  le totogiina atu o lafoga. Ae na faaalia e Iesu, o “mea a le Atua”—e aofia ai o tatou ola ma le tapuaʻiga—e lē mafai ona aiā iai se tagata. Pe a feteenaʻi tulafono a le Atua ma tulafono a tagata, e ao i Kerisiano ona “usiusitaʻi i le Atua o le pule, nai lo o tagata.”—Galuega 5:29.

E ono lē fiafia Kerisiano i auala o loo faaaogāina ai a latou lafoga, ae e latou te lē fia aiā fua i gaoioiga a malo, e ala i le tetee atu iā i latou pe mumusu e totogi lafoga. E atagia atu ai le lē faatuatua i le aumaia e le Atua o le vaifofō mo mafatiaga o tagata. Nai lo lea, e latou te faatalitali ma le onosaʻi i le taimi atofaina a le Atua e faalaa mai ai i faiga faapolotiki a tagata, e ala i le pule a lona Alo o Iesu, o lē na faapea mai: “O loʻu malo e lē mai le lalolagi lenei.”—Ioane 18:36.

Aogā o le Mulimuli i Aʻoaʻoga o le Tusi Paia

E tele aogā e te maua pe a mulimuli i aʻoaʻoga o le Tusi Paia e tusa ai ma le totogiina o lafoga. O le a e ʻalofia ai faasalaga mo ē e lē totogiina lafoga faapea ma le fefe ina neʻi maua. (Roma 13:3-5) Ae o le mea e sili ona tāua, o le a e maua pea se lotofuatiaifo mamā i luma o le Atua, ma faamamaluina o ia e ala i lou tausia o tulafono. E ui atonu o le a faalētonu lou tulaga tautupe pe a faatusatusa i ē o loo tetee, pe faaoleole foʻi i le totogiina o a latou lafoga, ae e mafai ona e faalagolago i le folafolaga a le Atua, e na te tausia ana auauna faamaoni. Na taʻua e Tavita, o se tusitala o le Tusi Paia: “Sa ou talavou, a o lenei ua ou toeaina, ae ou te leʻi iloa lava se tagata amiotonu ua tuulafoaʻiina, po o ana fanau o ʻaisi mo ni meaʻai.”—Salamo 37:25.

O le malamalama ma le mulimuli i faatonuga o le Tusi Paia i le totogiina o lafoga, o le a e maua ai le filemu o le mafaufau. E lē tuuaʻia oe e le Atua i le auala e faaaogāina ai e malo lau lafoga o loo e totogiina, e pei lava ona lē tuuaʻia oe i mea o loo faaaogā ai tupe o loo e totogiina atu i le tagata o loo e nofo mautotogi ai. A o leʻi aʻoaʻoina upu moni o le Tusi Paia, sa saʻili ai mo le tele o tausaga se tamāloa e igoa iā Stelvio, mo ni suiga i le faigāmalo o Europa i saute. Na ia taʻua le māfuaaga ua taofia ai ana taumafaiga: “Ou te taʻutino atu, e leai se tagata e mafai ona aumaia le faamasinogatonu, filemu, ma se ʻauuso autasi i le lalolagi aoao. Ua na o le Malo o le Atua e mafai ona aumaia ni suiga e sili atu ona lelei mo tagata.”

I le pei o Stelvio, pe afai e te faamaoni ma ʻtotogi atu mea a le Atua i le Atua,’ ona e mautinoa lea i le vaaia o le taimi o le a aumaia ai e le Atua le pulega amiotonu i le lalolagi atoa, ma faaleleia mea ua faaleagaina ma faiga lē tonu ua aumaia e pulega a tagata.

[Faaopoopoga i lalo]

[Ata i le itulau 22]

E manaʻomia ona fetuunaʻi o tatou mafaufauga ina ia ōgatusa ma le finagalo o le Atua, auā e sili atu ona manatunatuga i lo o i tatou

[Ata i le itulau 23]

E ala i le usiusitaʻi i le totogiina o lafoga, ua maua ai e Kerisiano se lotofuatiaifo mamā i luma o le Atua, ma faailoa atu ai lo latou maufaatuatuaina o lana tausiga

[Ata i le itulau 22]

“Ia totogi atu mea a Kaisara iā Kaisara, a o mea a le Atua ia avatu i le Atua”

[Ata i le itulau 22]

Copyright British Museum