Ita presiza selu impostu ka lae?

EMA uitoan deʼit mak gosta atu selu impostu. Ema barak hanoin katak sira-nia osan neʼebé sira selu ba governu saugati deʼit, tanba la uza ho didiʼak no halo korrupsaun. Liután neʼe, ema balu lakohi selu impostu tanba sira sente katak governu uza osan atu halo buat neʼebé la loos. Ema ida neʼebé hela iha rai arabi nian ida koʼalia kona-ba razaun tansá sira la selu impostu, hodi dehan: “Ami sei la fó osan atu halo kilat musan neʼebé oho ami-nia oan.”

Hanoin hanesan neʼe la’ós buat neʼebé foun. Ulun-naʼin indú nian ida naran Mohandas K. Gandhi fó sai tansá ninia laran la husik nia atu selu impostu, nia dehan: “Kuandu ema ida apoia tropa sira iha nasaun ida nia halo sala, maski nia halo ida-neʼe hodi hola parte iha tropa ka ajuda iha dalan seluk. Ema ida-idak, maski sira mak ema neʼebé idade ona ka sei joven, sira halo sala se sira selu impostu neʼebé apoia tropa.”

Nuneʼe mós, maizumenus tinan 160 liubá, matenek-naʼin ida naran Henry David Thoreau esplika katak nia sei la selu impostu tanba governu uza ida-neʼe atu apoia funu. Nia husu: “Ema neʼebé halo lei deʼit mak bele halo desizaun neʼebé sidadaun ida-idak bele halo rasik tuir sira-nia laran ka lae? Se ida-neʼe loos, neʼe katak saugati deʼit atu ema ida-idak iha kbiit atu hanoin, loos ka lae?”

Ema kristaun mós presiza hanoin kona-ba se sira tenke selu impostu ka lae. Tuir loloos, Bíblia hatete ho klaru katak ema kristaun tenke iha laran neʼebé moos kona-ba buat hotu. (2 Timoteo 1:3) Iha parte seluk, Bíblia hatete katak governu sira iha direitu atu simu impostu husi ninia povu. Bíblia hatete: “Ema ida-ida hamtaʼuk ukun-naʼin sira bá; ba la iha ukun neʼebé la mai husi Maromak; no Maromak mak foti ukun-naʼin sira. Neʼe duni, ita sei halo tuir, la’ós deʼit tan taʼuk ema nia laran-nakali, maibé mós tan ita rasik nia konxiénsia. Tan neʼe mak imi selu impostu, basá kbiit-naʼin sira mak Maromak nia atan, hodi serbisu kona-ba neʼe. Neʼe duni, selu imi-nia tusan hotu; impostu ba sira neʼebé simu impostu; serbisu ba sira neʼebé imi sei serbí; hamtaʼuk ba sira neʼebé imi sei hamtaʼuk, hawelok ba sira neʼebé imi sei hawelok.”—Roma 13:1, 5-7.

Tan razaun neʼe mak ema kristaun iha tempu uluk, no mós Testemuña ba Jeová ohin loron iha naran diʼak kona-ba selu impostu, maski sira hatene katak osan balu neʼebé sira selu, governu uza atu apoia tropa sira. * Entaun, tansá mak sira selu impostu se osan impostu nian uza atu apoia buat neʼebé ema kristaun la simu? Neʼe katak ema kristaun la presiza rona ba ninia laran kuandu nia selu impostu ka lae?

Impostu no ita-nia laran

Tuir loloos, iha apóstolu sira-nia tempu osan balu neʼebé ema kristaun selu nuʼudar impostu, governu uza atu apoia tropa sira. Tan razaun neʼebé hanesan mak ikusmai Gandhi no Thoreau deside atu la selu impostu.

Ema kristaun halo tuir mandamentu iha Roma kapítulu 13 la’ós deʼit tanba taʼuk atu hadook  an husi kastigu, maibé mós tanba sira “rasik nia konxiénsia”. (Roma 13:5) Tuir loloos, laran ka konxiénsia mak lian iha laran neʼebé fó-hatene ita katak ita-nia hahalok mak loos ka sala. Sin, ema kristaun nia konxiénsia ka laran haruka sira atu selu impostu, maski impostu neʼe governu uza atu apoia atividade sira-neʼebé ema kristaun la simu. Karik ida-neʼe susar atu komprende, maibé ita tenke rekoñese buat neʼebé importante kona-ba ita-nia laran.

Hanesan Thoreau hatete, ema hotu iha konxiénsia ka laran, maibé diʼak atu hanoin-hetan katak ita-nia laran dala ruma fó avizu neʼebé sala. Atu ita bele halo Maromak kontente, ita tenke treinu ita-nia laran tuir Maromak nia matadalan sira. Dala barak ita presiza hadiʼa ita-nia hanoin hodi bele tuir Maromak nian, tanba ninia hanoin mak diʼak liu ita-nian. (Salmo [Mazmur] 19:7) Tan neʼe, ita presiza hakaʼas an atu komprende Maromak nia hanoin kona-ba ema nia governu. Entaun, saida mak nia hanoin kona-ba neʼe?

Apóstolu Paulo bolu ema nia governu nuʼudar “Maromak nia atan”. (Roma 13:6) Neʼe katak sá? Tuir loloos ida-neʼe katak sira halo lei ba komunidade no halo buat diʼak seluk tan ba ema. Klaru katak governu neʼebé aat mós halo buat diʼak balu ba ema. Porezemplu sira harii korreius, harii eskola, organiza bombeiru, no tau matan ba lei. Maski Maromak hatene katak sira iha sala oioin, maibé nia husik sira ba tempu balu no haruka ema atu selu impostu hodi hatudu respeitu ba ninia arranju atu husik governu sira hanesan neʼe atu ukun ema.

Maibé Maromak sei la husik governu sira atu ukun ba nafatin. Maromak nia hakarak mak atu troka ema nia governu hotu ho ninia Governu husi lalehan, no ninia Governu sei halakon buat aat hotu neʼebé ema nia ukun hamosu ba ema durante tinan atus ba atus ona. (Daniel 2:44; Mateus 6:10) Maibé antes tempu neʼe, Maromak la haruka ema kristaun atu kontra ukun-naʼin sira-neʼe hodi la selu impostu ka halo buat seluk.

Maibé, oinsá se ita sente hanesan Gandhi iha tempu uluk, neʼebé hanoin katak selu impostu neʼebé apoia funu mak buat neʼebé sala? Hanesan kuandu ita saʼe ba fatin neʼebé aas ita bele haree buat hotu ho moos, ita mós bele troka ita-nia hanoin atu tuir Maromak nian hodi fiar katak Maromak nia dalan mak diʼak liu fali ita-nian. Liuhusi profeta Isaías Maromak hatete: “Hanesan lalehan aas liu fali rai, nuneʼe mós haʼu-nia dalan sira aas liu fali imi-nia dalan sira, no haʼu-nia hanoin aas liu fali imi-nia hanoin.”—Isaías (Yesaya) 55:8, 9.

Governu iha kbiit tomak ka lae?

Bíblia nia hanorin kona-ba selu impostu ba governu la dehan katak governu iha kbiit tomak atu kontrola ninia povu. Jesus hanorin katak Maromak fó deʼit kbiit balu ba ema nia governu. Kuandu ema husu Jesus kona-ba saida mak Maromak nia hakarak kona-ba selu impostu ba governu Roma nian neʼebé ukun iha tempu neʼebá, Jesus hatán hodi dehan: “Fó fali ba César buat neʼebé César nian; no ba Maromak buat neʼebé Maromak nian!”—Marcos 12:13-17.

“César” mak reprezenta governu sira-neʼebé ukun. Governu sira mak halo osan no kontinua tau matan atu osan neʼe iha folin nafatin. Entaun tuir Maromak nia haree, governu sira mós iha direitu atu husu ninia povu selu fali osan neʼe liuhusi impostu. Maibé Jesus hatudu katak  governu sira la iha direitu atu husu “buat neʼebé Maromak nian”, hanesan ita-nia moris no ita-nia adorasaun. Kuandu ema nia lei kontra Maromak nia lei, ema kristaun tenke “halo tuir Maromak nia hakarak liu ema sira-nian”.—Apostolu 5:29.

Maski ema kristaun ohin loron bele sente triste kona-ba dalan neʼebé governu uza osan impostu nian neʼebé sira selu, maibé sira la koko atu kontra governu hodi la selu impostu ka halo buat aat seluk. Tanba se sira halo ida-neʼe, sira hatudu katak sira la tau fiar tomak ba Maromak atu halakon susar hotu neʼebé ema hasoru. Tuir loloos, sira ho pasiénsia hein ba tempu neʼebé Maromak sei hadiʼa buat hotu liuhusi ninia Oan, Jesus, nia reinu, ka ukun. Jesus dehan: “Haʼu-nia reinu la’ós raiklaran neʼe nian.”—Joao 18:36.

Bensaun hodi halo tuir Bíblia nia hanorin

Ita bele hetan bensaun barak hodi halo tuir Bíblia nia hanorin kona-ba selu impostu. Ita sei la hetan kastigu tanba la kontra lei no mós la taʼuk atu ema kaer ita. (Roma 13:3-5) Buat neʼebé importante liu mak ita sei iha laran neʼebé moos iha Maromak nia oin no ita sei hahiʼi nia tanba ita halo tuir lei. Maski ita bele hasoru problema ekonomia balu se kompara ho sira neʼebé la selu impostu ka sira neʼebé bosok kona-ba sira-nia impostu, maibé ita bele fiar ba Maromak nia promete atu tau matan ba ninia atan sira-neʼebé laran-metin ba nia. Hakerek-naʼin ida iha Bíblia laran naran David hatete: “Uluk haʼu mak mane klosan ida, agora haʼu sai idade ona, maski nuneʼe haʼu seidauk haree ema ida neʼebé loos la hetan ajuda, ka ninia oan sira buka paun.”—Salmo 37:25.

Liután neʼe, komprende no halo tuir buat neʼebé Bíblia hatete kona-ba selu impostu bele halo ita sente dame iha laran tanba ita hatene katak Maromak sei la duun ita kona-ba buat neʼebé governu sira halo ho osan impostu nian neʼebé ita selu. Ida-neʼe hanesan lei sei la fó sala ba ita kona-ba osan neʼebé ita selu ba uma-naʼin, se uma-naʼin uza sala osan neʼe. Antes aprende kona-ba lia-loos husi Bíblia, mane ida naran Stelvio, ba tinan barak hola parte iha polítiku neʼebé nia hanoin bele troka situasaun iha Europa súl. Nia esplika kona-ba tansá nia la hola parte tan iha polítiku, hodi dehan: “Haʼu presiza rekoñese katak ema la bele lori justisa, dame, no domin ba malu nuʼudar maun alin iha mundu neʼe. Só Maromak nia Ukun deʼit mak bele lori buat sira-neʼe no halo ema nia moris sai diʼak liu.”

Hanesan Stelvio, se ita ho laran-metin ‘selu ba Maromak buat neʼebé Maromak nian’, ita mós bele fiar katak ita sei haree ho matan rasik kuandu Maromak lori mai ukun neʼebé loos atu ukun mundu tomak, hodi halakon buat aat hotu no buat la loos neʼebé ema nia ukun hamosu.

[Nota–rodapé]

[Liafuan ne’ebé foti husi 29]

Ita presiza hadiʼa ita-nia hanoin hodi bele tuir Maromak nian tanba ninia hanoin mak diʼak liu ita-nian

[Liafuan ne’ebé foti husi pájina 30]

Hodi selu impostu, ema kristaun bele iha laran neʼebé moos iha Maromak nia oin no hatudu katak sira tau fiar ba Maromak atu tau matan ba sira-nia presiza

[Dezeñu iha pájina 29]

“Fó fali ba César buat neʼebé César nian; no ba Maromak buat neʼebé Maromak nian!”

[Dezeñu iha pájina 29]

Copyright British Museum