Takis Yu Ting Yu Mas Baim?

I NO gat planti man i amamas long baim takis. Ol i ting olsem gavman i save mekim nabaut long takis, olsem ol i no yusim gut, paulim mani, o ol i stilim. Tasol sampela narapela i no laik baim takis, long wanem, gavman i save mekim wok nogut long en. Sampela manmeri i sindaun long wanpela taun long Midel Is ol i stori long as na ol i no laik baim takis olsem: “Mipela i no inap baim takis bilong helpim gavman long baim ol bulet i save kilim i dai ol pikinini bilong mipela.”

Planti man i holim kain tingting olsem, na dispela i no nupela tingting. Mohandas K. Gandhi, bipo em i lida bilong ol Hindu, em i kamapim tingting bilong maus bilong bel bilong em olsem: “Man o meri husat i sapotim wanpela Gavman em ami i bosim, em i helpim wok bilong sin. Olgeta man, maski ol i yangpela o lapun, ol i mekim sin taim ol i baim takis bilong helpim wok bilong Gavman.”

Olsem tasol, saveman Henry David Thoreau husat i bin stap long yia 1850 samting, em i tok olsem em i laik bihainim stretpela pasin, olsem na em i no laik baim takis em gavman i yusim bilong sapotim woa. Em i askim olsem: “Olsem wanem? Man i mas larim gavman i wokim disisen long ol samting we maus bilong bel bilong em yet inap stiaim em long mekim disisen? Sapos olsem, orait bilong wanem olgeta man i gat maus bilong bel?”

Ol Kristen i mas tingim gut dispela samting, long wanem, Baibel i kamapim klia olsem ol i mas holimpas klinpela maus bilong bel long olgeta samting. (2 Timoti 1:⁠3) Tasol Baibel i tokaut tu olsem ol gavman i gat rait long kisim takis. Em i tok: “Olgeta man i mas aninit long ol gavman. Long wanem, bai i no gat wanpela gavman i stap sapos God i no larim em i stap. Olgeta gavman i stap, God yet i putim ol na ol i stap. Olsem na i gat as tru na yupela i mas aninit long gavman. I no bilong abrusim strafe tasol, nogat. Em bilong helpim maus bilong bel bilong yupela tu. Long dispela as tu yupela i baim takis. Long wanem, ol gavman ol i stap olsem ol pablik sevan bilong God, na oltaim ol i save mekim wok bilong ol. Wanem samting yupela i mas givim long ol man, orait yupela i mas givim long ol. Man i singaut long takis, orait givim takis long em.”​—⁠Rom 13:​1, 5-7.

Long dispela as, ol Kristen bilong pastaim i gat nem long baim takis, maski bikpela hap bilong dispela mani i helpim wok bilong ami. a Ol Witnes Bilong Jehova long nau tu i mekim olsem. Bilong wanem ol Kristen i baim takis sapos dispela mani i helpim ol wok em ol Kristen yet i no ken insait long en? Yu ting wanpela Kristen i mas sakim maus bilong bel bilong em taim em i mas baim takis?

Takis na Maus Bilong Bel

I klia tru olsem hap mani bilong takis em ol Kristen bilong pastaim i bin baim i helpim wok bilong ami. Em long dispela as tasol na Gandhi na Thoreau i no laik baim takis.

Tingim olsem ol Kristen i bihainim tok bilong Rom sapta 13, long wanem, ol i laik abrusim strafe, na tu, ol i mekim olsem bilong “helpim maus bilong bel” bilong ol. (Rom 13:⁠5) Tru tumas, maus bilong bel bilong wanpela Kristen i kirapim  em long baim takis, maski gavman i yusim dispela mani bilong helpim ol wok em Kristen yet i no orait long en. Bilong kliagut long dispela tingting, yumi mas luksave long wok tru bilong maus bilong bel bilong yumi​—⁠em i bilong helpim yumi long skelim wanem pasin i stret na wanem pasin i no stret.

Olgeta man i gat maus bilong bel, olsem Thoreau i tok, tasol i no olgeta taim maus bilong bel i save wok gut. Bilong yumi ken amamasim God, maus bilong bel bilong yumi i mas stret wantaim ol lo bilong God long stretpela pasin. Planti taim yumi gat wok long stretim tingting bilong yumi na bai i stret wantaim tingting bilong God, long wanem, tingting bilong em i antap moa winim bilong yumi. (Song 19:⁠7) Olsem na yumi mas wok strong long kliagut long tingting bilong God long ol gavman bilong graun. Wanem tingting bilong God?

Pol i kolim ol gavman bilong dispela graun olsem “ol pablik sevan bilong God.” (Rom 13:⁠6) Dispela i makim wanem samting? Dispela i makim olsem ol gavman i save stretim gut ol samting na mekim ol wok bilong helpim sindaun bilong ol man. Maski sampela gavman i gat planti pasin korapsen, planti taim ol i save givim yet ol sevis olsem pos ofis, skul, lain paiaman, na polis samting. God i save long ol pasin nogut ol gavman i save mekim, tasol em i larim ol i stap inap sampela haptaim, na em i laik yumi mas baim takis bilong kamapim olsem yumi rispek long rot God i makim​—⁠em i larim ol kain gavman olsem long bosim ol man.

Tasol God i larim ol gavman bilong graun i bosim ol man inap sampela haptaim tasol. Em laik bilong God long rausim olgeta gavman bilong graun na Kingdom bilong em long heven bai pinisim olgeta samting nogut em ol dispela gavman i bin kamapim long ol man inap planti handret yia. (Daniel 2:44; Matyu 6:10) Tasol long dispela haptaim i stap yet, God i no laik ol Kristen i sakim lo bilong gavman long baim takis.

Olsem wanem sapos yu gat tingting olsem Gandhi, na yu ting pasin bilong baim takis i sapotim woa na em i wanpela sin? Sapos yumi go antap long wanpela maunten na lukluk yumi inap lukim gut moa wanpela ples, olsem tasol, em i isi moa long yumi long senisim tingting bilong yumi na bai i stret wantaim tingting bilong God, sapos yumi tingim olsem tingting bilong em i antap moa long yumi. Long rot bilong profet Aisaia, God i tok: “Skai i stap antap tru long graun, olsem tasol ol pasin bilong mi na tingting bilong mi i winim tru ol pasin bilong yupela na tingting bilong yupela.”​—⁠Aisaia 55:​8, 9.

Bosim Olgeta Samting?

Ol tok bilong Baibel long pasin bilong baim takis i no makim olsem gavman i gat rait long bosim olgeta samting bilong ol man i stap aninit long ol. Jisas i skulim ol man olsem God i larim ol dispela gavman long bosim tasol sampela samting bilong ol man. Taim ol Farisi i askim Jisas sapos i stret long ai bilong God long baim takis i go long gavman Rom bilong dispela taim, Jisas i bekim tok long ol olsem: “Ol samting bilong Sisar, givim long Sisar, na ol samting bilong God, givim long God.”​—⁠Mak 12:​13-17.

Ol gavman​—⁠em “Sisar” i makim​—⁠i bin wokim mani o prinim ol pepa mani na givim strong long en. Olsem na long tingting bilong God, ol i gat rait long kisim bek dispela mani long rot bilong takis. Tasol Jisas i kamapim olsem ol gavman i no  inap askim long kisim “ol samting bilong God”​—⁠em laip na lotu bilong yumi. Taim lo bilong gavman o ol samting ol i askim yumi long mekim i pait wantaim ol lo bilong God, orait ol Kristen “i mas bihainim tok bilong God tasol, na [ol] i no ken bihainim tok bilong ol man.”​—⁠Aposel 5:⁠29.

Ating ol Kristen long nau i bel hevi long sampela wok em gavman i mekim long takis bilong ol, tasol ol i no traim long stiaim o pasim wok bilong gavman long rot bilong sakim pasin bilong baim takis. Sapos ol i mekim olsem, dispela bai soim olsem ol i no bilip long rot bilong God long stretim olgeta hevi bilong ol manmeri. Ol i wet long taim God yet i bin makim bilong pinisim pasin nogut bilong dispela graun long rot bilong Pikinini bilong em, Jisas, husat i bin tok: “Kingdom bilong mi i no bilong dispela graun.”​—⁠Jon 18:⁠36.

Gutpela Samting i Kamap Long Rot Bilong Bihainim Tok Bilong Baibel

Yu inap kisim sampela gutpela samting sapos yu bihainim ol tok bilong Baibel long pasin bilong baim takis. Yu bai abrusim strafe i save painim ol man husat i brukim lo, na tu, yu no inap pret long gavman bai painimaut rong bilong yu. (Rom 13:​3-5) Na bikpela samting moa, yu bai gat klinpela maus bilong bel long ai bilong God, na pasin bilong yu long bihainim lo bai givim ona long em. Maski yu bai lusim sampela mani, em ol man husat i no baim olgeta takis o i no baim stret takis ol i no lusim, yu ken bilip long tok promis bilong God olsem em bai lukautim ol gutpela wokman bilong em. Man bilong raitim Baibel, em Devit, i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.”​—⁠Song 37:⁠25.

Sapos yu kliagut na yu bihainim ol tok bilong Baibel long baim takis, dispela bai givim bel isi long yu. Yu bai no gat asua long ai bilong God long ol wok em gavman i mekim long takis yu bin baim, wankain olsem lo i no inap kotim yu long wok em papa bilong haus i mekim long mani yu baim olsem rent bilong haus. Wanpela man, nem bilong em Stelvio, paslain long em i kisim save long tok i tru bilong Baibel, inap planti yia em i bin wok strong long kamapim ol senis long wok politik long sauten Yurop. Em i stori long as na em i lusim dispela wok, em i tok: “Mi luksave olsem ol man i no inap kamapim stretpela pasin, bel isi, na pasin wanbel long graun. Kingdom Bilong God tasol inap kamapim gutpela sindaun long olgeta hap bilong graun.”

Olsem Stelvio, sapos yu ‘givim bek samting bilong God long God,’ yu tu bai lukim gutpela samting i kamap. Bai yu stap long dispela taim we God bai kamapim stretpela wok bos bilong em long olgeta hap bilong graun, na em bai pinisim tru ol samting nogut na pasin i no stret em gavman bilong ol man i bin kamapim.

[Futnot]

[Rait long pes 22]

Yumi mas stretim tingting bilong yumi na bai i stret wantaim tingting bilong God, em tingting i antap moa

[Rait long pes 23]

Taim ol Kristen i bihainim lo na baim takis, ol i gat klinpela maus bilong bel na soim olsem ol i bilip tru olsem God bai helpim ol

[Ol Piksa long pes 22]

“Ol samting bilong Sisar, givim long Sisar, na ol samting bilong God, givim long God”

[Kredit Lain]

Copyright British Museum