Lalaki nga Inanamongan ti Puso ni Jehova

ANIA ti mapanunotmo no pagsasaritaan ti karakter iti Biblia a ni David? Ti kadi panangabakna iti higante a Filisteo a ni Goliat? Ti kadi panaglemmengna iti let-ang gapu iti pananganup kenkuana ni Ari Saul? Ti kadi basolna ken Bat-seba ken dagiti dakes nga imbungana? Wenno, ti kadi naipaltiing a daniwna a nailanad iti Salmo a libro ti Biblia?

Naaddaan ni David iti adu a pribilehio, balligi, ken parikut. Ngem ti kinuna ni mammadto Samuel maipapan kenkuana ti nangnangruna a pakaawisantayo​—agbalinto a “naanamongan iti puso [ni Jehova].”​—1 Samuel 13:14.

Natungpal ti padto ni Samuel idi agtutubo pay ni David. Kayatmo met kadi ti agbalin a naanamongan iti puso ni Jehova? Ania ngarud ti masursurom iti biag ni David, nangruna idi agtutubo pay, a makatulong kenka nga agbalin a naanamongan? Dayta ti usigentayo.

Pamilia ken Trabahona

Ni Jesse, nga ama ni David ken apoko da Ruth ken Boaz, ket matalek nga adipen ni Jehova. Idi ubing pay ni David, agraman ti pito a kabsatna a lallaki ken dua a babbai, insuro kadakuada ni Jesse ti Linteg ni Moises. Iti maysa kadagiti salmo nga insurat ni David, tinukoyna ti bagina kas anak ti babai nga ‘adipen’ ni Jehova. (Salmo 86:16) Gapuna, adda dagiti agkuna a ti inana a di nainaganan iti Biblia ket nakatulong met iti nasayaat nga espiritualidadna. Kuna ti maysa nga eskolar: “Mabalin a  damo a nangngeg ni David ken nanangna ti estoria ti pannakilangen ti Dios iti ilina,” a pakairamanan ti pakasaritaan da Ruth ken Boaz.

Damo a nadakamat ni David kas agtutubo a pastor a mangbambantay kadagiti karnero ni amana. Ramanen daytoy ti adu nga aldaw ken rabii nga agmaymaysa iti nawayang a kataltalonan. Padasem nga iladawan ti kasasaadna.

Agnanaed ti pamilia ni David iti nanumo nga ili ti Betlehem iti katurturodan ti Juda. Adu ti maapit a bukbukel kadagiti nadam-eg a nabato a kataltalonan iti aglawlaw ti Betlehem. Adu ti kaolibuan, kaubasan, ken agbunga a kaykayo kadagiti bakras ken tanap. Idi kaaldawan ni David, dagiti di mataltalon a turod ti pakaipaspastoran dagiti dinguen. Matannawagan met sadiay ti let-ang ti Juda.

Medio napeggad ti trabaho ni David. Kadagitoy ngamin a turod ti nakirangetanna iti leon ken oso a nangitaray kadagiti tarakenna a karnero. a Kinamat daytoy natured nga agtutubo dagita a narungsot nga animal, pinapatayna ida, ken insalakanna dagiti karnerona. (1 Samuel 17:34-36) Nalabit iti daydi a gundaway a nagbalin ni David a nalaing a pumapallatibong. Saan nga adayo manipud iti ilina ti teritoria ti tribu ni Benjamin, a sadiay ti ayan dagiti pumapallatibong a kabaelanda a puntaan “agingga iti kaingpis ti maysa a buok ket saan[da] nga agmintis.” Kasta met idi ti kalaing ni David nga agpallatibong.​—Uk-ukom 20:14-16; 1 Samuel 17:49.

Saan a Nasayang a Panawen

Kaaduanna a naulimek ken agmaymaysa nga agbantay ti pastor. Ngem saan nga impalubos ni David a makatuok dayta kenkuana, ta nagut-utob bayat ti naulimek a panagmaymaysana. Mabalin a ti sumagmamano nga inlanad ni David kadagiti pinutarna a salmo ket mainaig iti kapadasanna idi agtutubo pay. Nalabit nga iti panagmaymaysa ni David, inut-utobna no ania ti kaimudingan ti tao iti  sapasap nga urnos ti Dios ken dagiti nakaskasdaaw a parsua iti langit​—ti init, bulan, ken bitbituen, ‘dagiti aramid ti ramramay ni Jehova.’ Posible met a bayat ti kaadda ni David iti kataltalonan iti aglawlaw ti Betlehem, inut-utobna ti maipapan iti nadam-eg a daga, an-animal, tumatayab ken “dagiti animal iti nawayang a tay-ak.”​—Salmo 8:3-9; 19:1-6.

Sigurado a ti kapadasan ni David kas pastor ti nangtignay kenkuana a mangapresiar iti dungngo ni Jehova kadagiti matalek nga adipenna. Inkanta ni David: “Ni Jehova ti Pastorko. Saanakto nga agkurang iti aniaman. Kadagiti naraber a pagaraban pagiddaennak; iti igid dagiti nasayaat-pannakapadanumna a lugar a paginanaan idalannak. Uray no magnaak iti ginget ti napuskol a kinasipnget, saanak nga agbuteng iti dakes, ta sikukuyogka kaniak; ti baston ken sarukodmo isuda ti bambanag a mangliwliwa kaniak.”​—Salmo 23:1, 2, 4.

Nalabit maisaludsodmo no ania ti maitulong kenka daytoy a salaysay. Addaan ni David iti nasinged a relasion ken Jehova ken naibilang a “naanamongan iti pusona” gapu iti panangut-utobna iti ar-aramid ni Jehova ken iti relasionna iti Dios. Kastaka kadi met?

Natignayka kadin a mangidayaw iti Namarsua kalpasan nga inut-utobmo dagiti parsuana? Nagutugotka kadin nga ad-adda a mangayat ken Jehova gapu kadagiti imparangarangna a kualidadna iti pannakilangenna iti sangatauan? Siempre tapno maapresiarmo ti ar-aramid ni Jehova, masapul nga iwayaam ti agkararag iti Dios iti naulimek nga aglawlaw ken utobem ti Saona ken dagiti parsuana. Makatulong ti kasta a panagpampanunot tapno ad-adda a maam-ammom ni Jehova ken matignayka a mangayat kenkuana. Agtutubotayo man wenno nataenganen, addaantayo amin iti kasta a pribilehio. Sigurado a nasinged ni David ken Jehova sipud kinaubingna. Kasano nga ammotayo dayta?

Napulotan ni David

Idi saanen a maikari ni Ari Saul kas lider iti Israel, kinuna ni Jehova ken mammadto Samuel: “Kasanonto kabayag ti panagleddaangmo gapu ken Saul, idinto ta siak, iti sabali a bangir, linaksidko nga agturay kas ari iti Israel? Punnuem ta saram iti lana ket mapanka. Ibaonkanto ken Jesse a Betlehemita, agsipud ta impaayak ti bagik iti maysa nga ari iti annakna.”​—1 Samuel 16:1.

Idi nakadanon idiay Betlehem, ti mammadto ti Dios, pinaayabanna ti annak a lallaki ni Jesse. Asino ngata kadakuada ti pulotan ni Samuel kas ari? Idi nakitana ti nataer nga inauna a ni Eliab, impagarup ni Samuel a daytan ti pilien ni Jehova. Ngem imbaga ni Jehova ken Samuel: “Dika kitaen ti langana ken ti kangato ti taktakderna, ta isu linaksidko. Ta saan nga iti  wagas nga ikikita ti tao ti wagas nga ikikita ti Dios, agsipud ta ti maysa laeng a tao kitaenna no ania ti agparang kadagiti mata; ngem no maipapan ken Jehova, kitaenna no ania ti puso.” Linaksid met ni Jehova da Abinadab, Sammah, ken ti uppat pay a kakabsatna. “Kamaudiananna,” kuna ti salaysay, “ni Samuel kinunana ken Jesse: ‘Dagitoy kadi aminen dagiti lallaki?’ Iti daytoy kinunana: ‘Ti inaudian saan pay a naisango agingga ita, ket, adtoy! ipapaarabna dagiti karnero.’”​—1 Samuel 16:7, 11.

Arigna a kinuna ni Jesse: ‘Imposible a ni David ti birbirokem.’ Kas inaudi ken kanunumuan iti pamilia, nadutokan ni David a mangaywan kadagiti karnero. Ngem isu ti pinili ti Dios. Makita ni Jehova ti adda iti puso, ken nalabit adda nakapatpateg a nakitana iti daytoy nga agtutubo. Isu nga idi pinaayaban ni Jesse ti inaudi, imbaga ni Jehova ken Samuel: “‘Tumakderka, pulotam, ta isu daytoy!’ Iti kasta innala ni Samuel ti sara ti lana ket pinulotanna ni David iti tengnga ti kakabsatna. Ket ti espiritu ni Jehova nangrugi nga agtignay ken David manipud iti dayta nga aldaw ken agpatpatuloy.”​—1 Samuel 16:12, 13.

Saan a naibaga no mano ti tawen ni David idi napulotan. Di nagbayag, nagbalin a kameng ti buyot ti Israel ti tallo a manongna a da Eliab, Abinadab, ken Sammah. Nalabit saan a mabalin nga agsoldado dagidiay lima ta ubbingda pay. Posible nga awan pay 20 a tawenda, ti edad a mabalinen nga agsoldado dagiti Israelita a lallaki. (Numeros 1:3; 1 Samuel 17:13) Nakaub-ubing ngarud ni David idi pinili ni Jehova. Ngem agparang a napateg idin ken David ti relasionna iti Dios, a napatanorna babaen ti panangut-utobna iti bambanag nga ammona maipapan iti Dios.

Kasta met koma ti aramiden ita dagiti agtutubo. Gapuna, dakayo a nagannak, parparegtaenyo kadi dagiti annakyo a mangutob iti naespirituan a bambanag, mangapresiar kadagiti parsua ti Dios, ken mangadal iti kunaen ti Biblia maipapan iti Namarsua? (Deuteronomio 6:4-9) Ket dakayo nga agtutubo, ar-aramidenyo kadi dagiti nadakamat? Makatulong kadakayo dagiti naibatay-Biblia a publikasion kas iti magasin b a Pagwanawanan ken Agriingkayo!

Nalaing nga Agtokar iti Arpa

Ti sasao ken musika iti adu kadagiti salmo ni David salaysayenda ti kabibiagna kas maysa a pastor. Siempre, ditay ammo dagiti musika nga orihinal a naibuyog kadagitoy sagrado a kanta. Ngem ti laeng ammotayo ket nalaing a musikero ti nangputar kadagita. Kinapudnona, gapu ta nalaing ni David nga agtokar iti arpa, naayaban manipud panagpastorna tapno agserbi iti sanguanan ni Ari Saul.​—1 Samuel 16:18-23. c

Sadino ken kaano a napatanor ni David ti laingna nga agtokar? Nalabit bayat ti panagipastorna kadagiti karnero iti kataltalonan. Saan a nalabes a kunaentayo nga uray idi ubing pay ni David, naimpusuan nga indaydayawnan ti Diosna babaen iti kanta. Ti makagapu a pinili ken dinutokan ni Jehova ket ti nauneg a panagayatna iti Dios.

Nagtalinaed ni David a nasinged ken Jehova agingga idi lakayen. Ngem ti nagbalin a pakabigbiganna iti intero a panagbiagna ket ti kapadasanna idi ubing pay iti kataltalonan ti aglawlaw ti Betlehem. Panunotem ti panangikantana ken Jehova kadagitoy a sasao: “Linagipko dagiti aldaw ti nabayagen a tiempo; minennamennak ti isuamin nga aramidmo; situtulokak a nangut-utob iti aramid dagiti bukodmo nga ima.” (Salmo 143:5) Ti regta nga ipamatmat daytoy a salmo ken ti adu pay a salmo ni David ti pakatignayan koma ti amin nga agtarigagay a maanamongan iti puso ni Jehova.

[Footnotes]