Umuntu Ovumelana Nehliziyo KaJehova

KHUYINI efika engqondwenakho newucabanga ngoDavidi okukhulunywa ngaye eBhayibhilini? Ucabanga ngokuhlula kwakhe ikakaramba emFilisti uGoliyadi? Ukubalekela kwakhe emangweni ngebanga lokuhloywa yiKosi uSawule? Isono sakhe noBhathisheba nangobudisi aqalana nabo ngebanga laso? Namtjhana ngeenkondlo zakhe eziphefumulelweko ezisencwadini yeBhayibhili yamaRhalani?

UDavidi waba namalungelo amanengi, waphumelela begodu wavelelwa ziinhlekelele. Kodwana ngaphezu kwakho koke, okusikarako ngaye ngilokho umporofidi uSamuweli akutjhoko ngaye—wathi uzokuba ‘mumuntu ovumelana nehliziyo’ kaJehova.—1 Samuweli 13:14.

Isiporofido sakaSamuweli sazaliseka uDavidi asesemncani. Angekhe uthande na ukuhlathululwa njengomuntu ovumelana nehliziyo kaJehova? Ngalokho, khuyini ekuphileni kwakaDavidi, khulukhulu nasesemutjha, okungakusiza bona ube mumuntu onjalo? Akhe sibone.

Umndeni Nomsebenzakhe

UJese, usoDavidi nomzukulu kaRude noBhowazi, kungenzeka bekazinikele kuJehova. Lokha uDavidi, abanakwabo abalikhomba nabodadwabo ababili basesebancani, uJese wabafundisa ngoMthetho kaMosisi. Kelinye lamarhalanakhe, uDavidi waqalisa kuye njengendodana “yencekukazi” kaJehova. (IRhalani 86:16) Lokhu kwenza abanye baphethe ngokobana umma kaDavidi, ongabizwa ngebizo eBhayibhilini,  naye waba nomthelela ekholweni lakhe. Esinye isazi sathi: “Kungenzeka bona bekusemlonyenakhe lapho kokuthoma ezwa khona ngeendaba ezirarako zokusebenzelana kokuthoma kwakaZimu nabantu bakhe,” kuhlanganise umlando kaRude noBhowazi.

Lapho sitjelwa khona kokuthoma ngoDavidi, bekamsanyana onomthwalo wokulusa izimvu zakayise. Umsebenzi lo bewubandakanya ukuhlala amalanga nobusuku obunengi obunesizungu emangweni. Linga ukucabanga ngendaba le.

Umndeni wekhabo lakaDavidi bewuhlala eBhetlehema, phezu kwamaphethelo wombundu wakwaJuda. Indawo enamatje ebhode iBhetlehema beyithela okusanthoro okuhle. Imithi yeenthelo, imithi yama-oliva namasimu wamadribe bekugubuzese indawo ethabaleleko neneenkhisi. Ngesikhathi sakaDavidi, iindawo ezingakalinywa bezisetjenziselwa amadlelo. Ngale kwayo bekunomango wakwaJuda.

Umsebenzi kaDavidi bewuyingozi. Bekuphakathi kweembundu le lapho ahlangana khona nebhubezi nebhere ebezilinga ukuthatha imvu emhlambini. * Umsana onesibindi lo walandela iimbandana ezidla ezinyezi wazibulala, waphulusa izimvu zakhe emlonyenazo. (1 Samuweli 17:34-36) Mhlamunye bekungesikhathesi lapho uDavidi athuthukisa khona ikghono lakhe lokujikijela ngesarayi. Eduze nedorobho lekhabo bekunenarha yakwaBhenjamini. Amadoda akorolako wesitjhabeso bekangaphosa amatje ‘angakhuthi ngitjho nesihluthu.’ UDavidi naye bekakorola njalo.—AbaHluleli 20:14-16; 1 Samuweli 17:49.

Isikhathi Esasetjenziswa Kuhle

Nokho, ukulusa bekumsebenzi onokuthula nesizungu. Kodwana uDavidi akhenge  azivumele bona aphathwe sizungu. Ngokuphambene nalokho, ukuthulokho kwamnikela amathuba amanengi wokuzindla. Kubonakala kwanga eminye iimbono uDavidi ayihlanganisa emarhalaninakhe bekuyizinto ebekacabanga ngazo ebutjheni bakhe. Bekuhlangana nesikhathi sokuzindlesi na lapho acabanga khona ngomnqopho wokuba khona komuntu neemangaliso zemazulwini—ilanga, inyezi neenkwekwezi, lokho uJehova ‘akubumbileko’? Bekusemasimini abhode iBhetlehema lapho azindla khona ngenarha ethelako, iinkomo, iinkunzi, iinyoni “neembandana”?—IRhalani 8:3-9; 19:1-6.

Akunakuzaza bona okuhlangabezanwe nakho kwakaDavidi njengomelusi kwamenza wezwa isirhawu sakaJehova esikhulu ebantwini Bakhe abathembekileko. Ngalokho, uDavidi wabhina: UJehova ‘unguMelusi wami, angizokutlhoga litho. Uyangilalisa emadlelweni ahlaza, angidosele emanzini apholileko. Namtjhana ngikhamba ngerharheni lethunzi lokufa, angizukusaba okumbi, ngombana wena ukimi; intonga yakho nedondolo lakho kuyangivikela.’—IRhalani 23:1, 2, 4.

Ungazibuza bona wena ikuthinta njani indaba le. Ipendulo libanga elenza uDavidi wathabela ukutjhidelana noJehova begodu wabizwa bona ‘mumuntu ovumelana nehliziywakhe’ nokobana wazindla ngokudephileko ngeemsebenzi kaJehova nangobuhlobo bakhe noZimu. Kungatjhiwo okufanako nangawe?

Ngemva kokuqala izinto uJehova azenzileko, wakhe wazizwa utjhukumiseleka bona ubuke bewudumise uMbumbi? Wakhe wezwa ihliziywakho izala ithando ngoJehova ngokubona iimfanelo ezibonakala ekusebenzelaneni kwakhe nesintu? Ngokwemvelo, bona ube nethando elinjalo ngoJehova, kufuze uzinikele isikhathi sokuba sendaweni ethulileko, ngomthandazo ucabange ngeLizwi lakaZimu nangezinto azibumbileko. Ukuzindla okunjalo kungakusiza bona umazi eduze uJehova—begodu umthande. Ilungelweli ngelabo boke, abancani nabakhulu. Kubonakala kwanga uDavidi bekaseduze noJehova kusukela ebuntwaneni. Sazi njani?

UDavidi Ungozesiweko

Lokha iKosi uSawula izibonakalisa ingasakufanelekeli ukudosa abantu bakaZimu phambili, uJehova wathi kumporofidi uSamuweli: “Kuzabe kube nini ulilela uSawula, kukulapho mina, ngakelinye ihlangothi, ngimalile bona abuse njengekosi phezu kwaka-Israyeli? Zalisa iphondo lakho ngamafutha ukhambe. Ngizokuthuma kuJese weBhetlehema, ngombana ngizilungiselele ikosi hlangana namadodanakhe.”—1 Samuweli 16:1.

Umporofidi kaZimu nekafika eBhetlehema, watjela uJese bona abize amadodanakhe. Ngiyiphi hlangana nawo uSamuweli egade azoyizesa bona ibe yikosi? Nekabona izibulo u-Eliyabe aqaleka, uSamuweli wacabanga: ‘Lo yena, nguye.’ Kodwana uJehova wathi kuSamuweli: “Ungaqali ukubonakala kwakhe kwangaphandle  nobude bakhe, ngombana ngimalile. Ngombana indlela abantu ababona ngayo akusiyo indlela uZimu abona ngayo, ngombana abantu baqala okubonakala emehlweni; kodwana uJehova yena, ubona okusehliziyweni.” Ngendlela efanako, uJehova wamala u-Abhinadaba, uShama, nabanye abanakwabo abane. Ukulandisa kuragela phambili, “Ekugcineni, uSamuweli wathi kuJese: ‘Baphelele abasanaba?’ Yena wathi: ‘Bekube nje omncani kunabo boke nguye oseleko begodu, qala! ulusa izimvu.’”—1 Samuweli 16:7, 11.

Ipendulo kaJese izwakala kwanga ithi: ‘Angeze kwenzeke bona kube nguDavidi omfunako.’ Njengombana bekabuphetjhani begodu angatjhejeki kangako emndenini, uDavidi bekalusa izimvu. Kodwana bekunguye uZimu amkhethileko. UJehova ubona okusehliziyweni, ngokukhanyako wabona okuthileko okuhle khulu emsaneni lo. Ngalokho uJese nekathumela bona uDavidi ayokubizwa, uJehova wathi kuSamuweli: “‘Sikima, mzese, ngombana nguye lo!’ Ngalokho uSamuweli wathatha iphondo lamafutha wamzesa hlangana nabanakwabo. Begodu umoya kaJehova wathoma ukusebenza phezu kwakaDavidi kusukela mhlokho ukuya phambili.”—1 Samuweli 16:12, 13.

Bona gade angangani uDavidi nekwenzeka lokhu, akutjhiwa. Nokho, ngokukhamba kwesikhathi, abanakwabo abathathu abakhulu, u-Eliyabe, u-Abhinadaba noShama, bebasebuthweni lepi lakaSawula. Mhlamunye abanye abahlanu bebabancani khulu bona bangakhamba nabo. Kungenzeka bona hlangana nabo bekangekho oneemnyaka ema-20, iimnyaka amadoda wakwa-Israyeli ebekaya ngawo epini. (Numeri 1:3; 1 Samuweli 17:13) Kunanyana ngikuphi, uDavidi bekamncani khulu uJehova namkhethako. Nokho, kubonakala kwanga uDavidi besele amumuntu ongokomoya. Kuyakhanya bona bekanobuhlobo obuseduze noJehova, abuthuthukisa ngokuzindla ngalokho egade akwazi ngoZimu.

Abantu abatjha namhlanje kufuze bakhuthazwe bona benze okufanako. Ngalokho, babelethi, niyabakhuthaza abantwabenu bona bazindle ngezinto ezingokomoya, bathabele indalo kaZimu, bafunde nangalokho iBhayibhili ekutjhoko ngoMbumbi? (Duteronomi 6:4-9) Nina batjha, niyazenzela ngokwenu lokhu? Iincwadi ezisekelwe eBhayibhilini ezinjengabomagazini ISithalasokulinda ne-Phaphama! * zenzelwe ukunisiza.

Bekanekghono Lokubetha Isidonodono

Njengombana amezwi amanengi wamarhalani kaDavidi asitjela okuthileko ngesikhathi sakhe njengomelusi, kungokufanako nangombhinwakhe. Yiqiniso, awukho umbhino wekuthomeni ogade ukhambisana neengoma ezicwengekilekwezi owahlala bekube sesikhathini sethu. Nokho, siyazi bona umtlami weengomezi gade ambhini omuhle khulu. Eqinisweni, ibanga lokobana uDavidi abizwe ekwaluseni bona azokuba neKosi uSawula kungombana bekanekghono lokubetha isidonodono.—1 Samuweli 16:18-23. *

Kukuphi begodu kunini lapho uDavidi athuthukisa khona ikghonweli? Kungenzeka bekungesikhathi asihlala emangweni alusa izimvu. Kunengqondo ukukholelwa bona ngitjho nanyana bekasesemncani, uDavidi besele avumela uZimakhe amarhalani asuka ehliziyweni. Ngaphezu kwakho koke lokhu, uJehova wamkhetha bewamthuma ngebanga lokuzinikela nokuba nekholo kwakhe.

UDavidi nalokha asele amdala waba nobuhlobo obuseduze noJehova. Kodwana lokho aba ngikho kikho koke ukuphila kwakhe kuvezwa mamezwi wokuhlangabezanwe nakho kwakhe okungenzeka wakufumana nasesemncani emangweni ebhode iBhetlehema. Akhucabange uDavidi abhinela uJehova: “Ngikhumbula amalanga wekadeni; ngizindle ngawo woke umsebenzakho; ngizimisele ukuhlala ngiwutjheja umsebenzi wezandla zakho.” (IRhalani 143:5) Umfutho werhalaneli namanye amarhalani kaDavidi amanengi asikhuthazo kibo boke abakhanuka ukuvumelana nehliziyo kaJehova.

[Imitlolo yaphasi]