Monna yo a Kwanago le Pelo ya Jehofa

KE ENG seo se tlago monaganong wa gago ge o nagana ka monna wa ka Beibeleng yo a bitšwago Dafida? Na o nagana ka go fenya ga gagwe tšitširipa ya Mofilisita e lego Goliata? Na o nagana ka go tšhabela ga gagwe lešokeng ka baka la go swarwa gampe ke Kgoši Saulo? Na o nagana ka sebe sa gagwe le Batseba le ditlamorago tšeo a ilego a lebeletšana le tšona? Goba na mohlomongwe o nagana ka direto tša gagwe tše buduletšwego tšeo di bolokilwego ka pukung ya Beibele ya Dipsalme?

Bophelo bja Dafida bo be bo tletše ka ditokelo, diphenyo gotee le masetlapelo. Lega go le bjalo, seo se re kgahlago ka yena go feta tšohle ke seo moporofeta Samuele a se boletšego ka Dafida—o be a tla itlhatsela e le “monna yo a kwanago le pelo ya [Jehofa].”—1 Samuele 13:14.

Boporofeta bja Samuele bo phethagetše ge Dafida e be e sa le mofsa. Na o be o ka se rate go hlaloswa o le motho yo a kwanago le pelo ya Jehofa? Ka gona, ke’ng seo o ka ithutago sona bophelong bja Dafida, kudukudu nywageng ya gagwe ya bofsa, seo se ka go thušago go ba motho yo bjalo? Anke re boneng.

Lapa le Mošomo

Go ka direga gore Jese, e lego tatago Dafida le setlogolo sa Ruthe le Boase, e be e le monna yo a ineetšego. Ge Dafida, barwarragwe ba šupago gotee le dikgaetšedi tša gagwe tše pedi e be e sa le ba banyenyane, Jese o ile a ba ruta Molao wa Moše. Go e nngwe ya dipsalme tša gagwe, Dafida o ile a ipitša gore ke morwa wa “lekgoba la [Jehofa] la mosadi.” (Psalme 86:16) Se se dirile gore ba bangwe ba phethe ka gore mmago Dafida,  yo go sa bolelwego leina la gagwe ka Beibeleng, le yena o ile a ba le tutuetšo e botse bomoyeng bja gagwe. Seithuti se sengwe se re: “Go ka direga gore ke mmagwe yo a mmoditšego la mathomo ka kanegelo e kgahlišago ya mabapi le ditirišano tša nakong e fetilego tša Modimo le batho ba gagwe,” go akaretša le histori ya Ruthe le Boase.

Ge re botšwa ka Dafida la mathomo, e be e sa le mošemanyana wa modiši yo a nago le boikarabelo bja go hlokomela dinku tša tatagwe. Go ka direga gore kabelo ye e be e akaretša go fetša nako e ntši, matšatši le mašego a lešago bodutu nageng. Leka go bona tiragalo ye ka leihlo la kgopolo.

Lapa labo Dafida le be le dula Betlelehema, e lego motsana o lego tlhoreng le metheogeng ya meboto ya Juda. Mašemo a nago le maswika go dikologa Betlelehema a be a tšweletša dibjalo tše dibotse tša mabele. Dirapa tša dienywa, mehlware le dirapa tša merara di be di apešitše metheoga le meedi. Mehleng ya Dafida, go ka direga gore naga yeo e bego e le godingwana e be e dirišwa e le mafulo. Ka kua ga naga go be go ena le lešoka la Juda.

Mošomo wa Dafida o be o ena le dikotsi tša wona. E be e le magareng ga meboto ye moo a ilego a lwa le tau le bere tšeo di bego di leka go hlasela mohlape wa dinku. * Mofsa yo yo a nago le sebete o ile šala dibata tšeo morago, a di bolaya le go hlakodiša dinku tša gagwe molomong ya tšona. (1 Samuele 17:34-36) Mohlomongwe e be e le nakong ye ya bophelo bja Dafida moo a ilego a ithuta go diriša seragamabje. Kgauswi le motse wa gabo go be go ena le naga ya Benjamini. Babetši ba moloko woo ba be kgona go betša maswika ka diragamabje ba “itia kgomo lenaka gomme [ba] sa foše.” Dafida le yena o be a sa foše ka seragamabje.—Baahlodi 20:14-16; 1 Samuele 17:49.

Nako Yeo e Dirišitšwego Gabotse

Nakong e ntši, go diša e be e le mošomo wa  boiketlo le o lešago bodutu. Eupša Dafida ga se a itumelela gore a lewe ke bodutu. Go e na le moo, tikologo e homotšego e ile ya mo nea dibaka tše dintši tša go naganišiša. Go bonagala eka dikgopolo tše dingwe tša Dafida tšeo di tšwelelago dipsalmeng tša gagwe ke ditaba tšeo a bego a naganišiša ka tšona ge e be e sa le mofsa. Na e be e le nakong ya ge a nnoši ge a be a naganišiša ka boemo bja motho thulaganyong ya legohle le dimakatšo tša magodimo—letšatši, ngwedi le dinaledi, e lego “mediro ya menwana ya [Jehofa]”? Na a ka ba a be a le mašemong a Betlelehema ge a be a naganišiša ka naga e tšweletšago, dikgomo le dipholo, dinonyana le “diphoofolo tša nageng”?—Psalme 8:3-9; 19:1-6.

Ga go pelaelo gore phihlelo ya Dafida e le modiši e mo dirile gore a kwe ka mo go tseneletšego kamoo Jehofa a hlokomelago bahlanka ba gagwe ba botegago ka gona. Ka baka leo, Dafida o opetše ka gore: “Jehofa ke Modiši wa ka. Nka se hloke selo. O nkhutamiša mafulong a matala; o nkiša mafelong a boikhutšo a nago le meetse a mantši. Gaešita le ge ke sepela moeding wa kgampi ya leswiswi, ga ke boife selo se sebe, gobane wena o na le nna; molamo wa gago le lehlotlo la gago ke dilo tšeo di nkhomotšago.”—Psalme 23:1, 2, 4.

O ka ba o ipotšiša gore taba ye e go kgoma bjang. Karabo ke gore le lengwe la mabaka ao a dirilego gore Dafida a thabele segwera le Jehofa le go bitšwa ‘monna yo a bego a kwana le pelo Jehofa’ ke gore o ile a naganišiša ka mo go tseneletšego ka mediro ya Jehofa le tswalano ya gagwe le Modimo. Na go ka bolelwa se se swanago le ka wena?

Na o kile wa ikwa o tutueletšega go tumiša le go tagafatša Mmopi ka morago ga go hlahlobišiša dikarolo tše dingwe tša tlholo ya gagwe? Na o kile wa kwa o rata Jehofa le go feta ka morago ga go bona dika tša gagwe tšeo di bonagalago ditirišanong tša gagwe le batho? Ka tlhago, gore o ikwe ka mokgwa woo ka Jehofa, go nyakega gore o beele nako ka thoko ya go naganišiša ka Lentšu la Modimo le ka tlholo ya gagwe. Go dira bjalo go tla go thuša go ba le tswalano ya kgauswi le Jehofa—gaešita le go mo rata. Ba banyenyane le ba bagolo le bona ba ka ba le tokelo ye. Go bonagala eka Dafida o be a le kgauswi le Jehofa go tloga bofseng bja gagwe. Re tseba bjang?

Dafida o a Tlotšwa

Ge Kgoši Saulo a be a itlhatsela gore o palelwa ke go etelela batho ba Modimo pele, Jehofa o ile a botša moporofeta Samuele gore: “O tlo llela Saulo go fihla neng, mola nna ke mo tlošitše gore a se sa hlwa a eba kgoši ya Isiraele? Tlatša lenaka la gago ka makhura o sepele. Ke tla go roma go Jese wa Betlelehema, ka gobane ke ikgethetše yo e tlago go ba kgoši gare ga barwa ba gagwe.”—1 Samuele 16:1.

Ge moporofeta wa Modimo a be a fihla Betlelehema, o ile a laela Jese gore a tliše barwa ba gagwe. Ke mang gare ga bona yo Samuele a bego a tla mo tlotša bjalo ka kgoši? Ge Samuele a be a bona Eliaba yo a bogegago, yo mogolo go  bona ka moka, o ile a nagana gore: ‘Yo ke yena.’ Eupša Jehofa a botša Samuele gore: “O se ke wa lebelela ponagalo ya gagwe le leemo la gagwe ka ge nna ke mo ganne. Tsela yeo motho a bonago ka yona ga se yeo Modimo a bonago ka yona, ka gobane motho o bona ponagalo ya ka ntle; eupša Jehofa yena o bona dipelo.” Ka tsela e swanago, Jehofa o ile a gana Abinadaba, Shaama le barwarrago bona ba bangwe ba bane. Pego e tšwela pele ka gore: “Mafelelong, Samuele a re go Jese: ‘Na ba ke bona bašemane ba gago ka moka?’ Jese yena a re: ‘Yo monyenyane go bona ga a gona mo, o ile go diša dinku.’”—1 Samuele 16:1-11.

Go bonagala karabo ya Jese e be e umaka gore: ‘Ga go kgonege gore Dafida e be yena yo o mo nyakago.’ Ka ge e be e le yo monyenyane le yo a sego bohlokwa kudu ka lapeng, Dafida o be a neilwe mošomo wa go hlokomela dinku. Eupša e be le yena yo Modimo a bego a mo kgethile. Jehofa o bona dipelo, gomme ga go pelaelo gore o ile a bona selo se sengwe se bohlokwa go mofsa yo. Ka gona ge Jese a re go bitšwe Dafida, Jehofa o ile a botša Samuele gore: “‘Ema o mo tlotše, ka gobane yo ke yena!’ Samuele a tšea lenaka la makhura a tlotša yena gare ga bana babo. Moya wa Jehofa wa hlahla Dafida go tloga letšatšing leo go ya pele.”—1 Samuele 16:12, 13.

Ga re botšwe gore Dafida o be a ena le nywaga e mekae ge se se be se direga. Lega go le bjalo, nakwana ka morago bomogolo’agwe ba bararo e lego Eliaba, Abinadaba le Shaama, ba ile ba hlankela madireng a Saulo. Go ka direga gore ba bangwe ba bahlano e be e le ba banyenyane kudu go ka yo hlankela le bona. Go ka direga gore ka moka ga bona ba be ba se ba hlwa ba eba le nywaga e 20, e lego nywaga yeo banna ba bego ba tsena madireng a Isiraele ka yona. (Numeri 1:3; 1 Samuele 17:13) Go sa šetšwe seo, Dafida e be e le yo monyenyane kudu ge Jehofa a be a mo kgetha. Lega go le bjalo, go be go bonagala eka Dafida e be e šetše e le motho yo a sekametšego dilong tša moya. Ga go pelaelo gore o be a ena le tswalano ya kgauswi le Jehofa, yeo a bilego le yona ka go naganišiša ka dilo tšeo a bego a di tseba ka Modimo.

Bafsa lehono ba swanetše go kgothaletšwa go dira se se swanago. Ka gona, batswadi, na le kgothaletša bana ba lena go naganišiša ka dilo tša moya, go leboga tlholo ya Modimo le go ithuta seo Beibele e se rutago ka Mmopi? (Doiteronomio 6:4-9) Gomme lena bafsa, na le dira se ka bolena? Dikgatišo tšeo di theilwego Beibeleng tše bjalo ka dimakasine tša Morokami le Phafoga! * di hlametšwe go le thuša.

O be a Ena le Bokgoni bja go Letša Harepa

Bjalo ka ge mantšu a dipsalme tše dintši tša Dafida a re botša se sengwe ka mehla ya gagwe e le modiši, go swanetše go ba go le bjalo le ka mmino wa gagwe. Ke therešo gore ga go mmino wa mathomong wo o bego o dirišwa le dikoša tše tše kgethwa woo o sa dutšego o le gona mehleng ya rena. Lega go le bjalo, re tseba gore mohlami wa wona e be le sekgwari sa mmino. Ge e le gabotse, lebaka la gore Dafida a bitšwe moo mafulong gore a tle go Kgoši Saulo ke ka gobane o be a ena le bokgoni bja go letša harepa.—1 Samuele 16:18-23. *

Dafida o hlagoletše bokgoni bjo kae le gona neng? Go ka direga gore o bo hlagoletše nakong ya ge a be a le madišong a dišitše dinku. Go a kwagala go dumela gore gaešita le ge e be e sa le mofsa, Dafida o be a šetše a opelela Modimo ditumišo go tšwa pelong. Go feta moo, na Jehofa ga se a mo kgetha le go mo fa ditaelo ka baka la boineelo le bomoya bja gagwe?

Tsela yeo Dafida a ilego a phela ka yona nywageng ya ka morago e bontšha gore o be a sa dutše a ena la tswalano ya kgauswi le Jehofa. Moya woo a ilego a o bontšha bophelong bja gagwe ka moka o bonagala dilong tšeo a bego a naganišiša ka tšona nakong ya ge a le madišong kua Betlelehema. Nagana ka Dafida a opelela Jehofa a re: “Ke gopotše mehla ya kgalekgale; ke naganišišitše ka mediro ya gago ka moka; ke ile ka nagana ka modiro wa diatla tša gago.” (Psalme 143:5) Borutho bja psalme ye gotee le bja dipsalme tše dingwe tše dintši tša Dafida, ke kgothatšo go bohle bao ba kganyogago go kwana le pelo ya Jehofa.

[Mengwalo ya tlase]