Wan man di Yehovah ben lobi

SAN na a fosi sani di yu e denki te yu e prakseri a man David fu Bijbel? Yu e denki a fasi fa a ben wini a Filisteaman Goliat? Noso yu e denki a ten di a ben go kibri na ini a sabana, fu di Kownu Saul ben wani du en ogri? Kande yu e prakseri a sondu di a ben du nanga Batseiba èn den someni broko-ede di a sani dati tyari kon gi en. Noso kande yu e prakseri den puwema di a skrifi nanga yepi fu santa yeye èn di de fu feni na ini a Bijbel buku Psalm.

David ben kisi a grani fu du furu prenspari sani gi Gado, a ben kisi furu blesi, ma a ben kisi furu problema tu. Ma san wi lobi trutru fu David, na a sani di a profeiti Samuel ben taki fu en. Samuel ben taki dati David ben o de „wan man di [Yehovah] lobi”.​—1 Samuel 13:14.

A profeititori fu Samuel kon tru di David ben yongu ete. Yu no ben o breiti te sma ben o taki dati yu na wan sma di Yehovah lobi? Sobun, sortu sani na ini a libi fu David, spesrutu na ini den yongu yari fu en, kan yepi yu fu kon de so wan sma? Meki wi go luku.

A famiri fu en nanga a wroko di a ben e du

Soleki fa a sori, dan Isai, di ben de a papa fu David èn sosrefi a granpikin fu Rut nanga Boas, ben de wan man di ben e dini Gado fayafaya. Di David, den seibi brada, nanga den tu sisa fu en ben yongu ete, Isai ben e leri den sani di skrifi na ini a Wèt di Gado ben gi Moses. Na ini wan fu den psalm, David e kari ensrefi a manpikin fu na „umasrafu” fu Yehovah (Psalm 86:16). Na fu a sani disi ede meki son  sma e prakseri taki a mama fu David, di Bijbel no e kari na en nen, ben yepi en tu fu tron wan mati fu Gado. Wan sabiman e taki dati „a ben musu de so taki en mama ben de a fosi sma di fruteri en fu den wondru di Gado ben du gi a pipel fu en fositen”, sosrefi fu a tori fu Rut nanga Boas.

A fosi leisi te Bijbel e taki fu David, dan a de wan yongu skapuman di ben kisi a frantwortu fu luku den skapu fu en papa. A kan taki a ben musu tan en wawan heri dei èn heri neti na ini den weigron. Pruberi fu si fa sani ben de na ini a ten dati.

A famiri fu David ben e libi na ini Betlehem, wan pikin foto na a lanki fu den bergi fu Yuda. Den gron lontu Betlehem di ben lai ston, ben bun fu prani sani soleki tarwe nanga groto. Na den presi disi di ben de moro hei, te go na den lagi presi, yu ben abi froktudyari, presi nanga olèifbon, nanga droifidyari. Na ini a ten fu David, den heipresi na mindri den bergi pe sma no ben e prani gron, ben de presi pe meti ben kan waka nyan grasi. Baka a kontren disi yu ben e kisi Yuda-sabana.

Son leisi problema ben e miti David te a ben e du a skapumanwroko fu en. Na mindri den pikin bergi disi a pasa wan leisi taki wan lew nanga wan beer pruberi fu gowe nanga wan fu den skapu fu en. * A yonkuman disi di no ben frede, ben puru den skapu fu en na a mofo fu den ogri meti disi (1 Samuel 17:34-36). A kan taki na a ten disi David leri fa fu slenger ston. Krosibei fu a foto fu en, yu ben abi a kontren fu den Benyaminsma. Den man fu a lo dati di ben sabi slenger ston, ben man du dati „so soifri, taki den no ben e misi noiti”. Te David ben e slenger ston, dan a no ben e misi tu.​—Krutuman 20:14-16; 1 Samuel 17:49.

A ben e gebroiki en ten bun

A skapumanwroko ben de wan wroko pe furu tron a skapuman ben e de pî èn a ben e de en wawan. Ma David ben e sorgu taki a no ben  e fruferi. Na presi fu dati a ben gwenti gebroiki den tiri momenti te a ben e de en wawan fu denki dipi fu sani. Soleki fa a sori dan sonwan fu den prakseri fu David di skrifi na ini den Psalm, na sani di abi fu du nanga den yongu yari fu en. Kande a ben e gebroiki den momenti dati fu prakseri sortu presi libisma abi na ini den sani di Gado seti na ini hemel èn na grontapu. Noso kande a ben e denki dipi fu den tumusi moi sani na hemel soleki a son, a mun, nanga den stari, di a kari „den sani di [Yehovah] meki”. Kande a ben de na ini den weigron lontu Betlehem di a ben e denki dipi fu a gron di Gado meki, fu den ipi-ipi kaw nanga den mankaw, den fowru nanga den „meti fu busi”.​—Psalm 8:3-9; 19:1-6.

A no de fu taki dati den sani di David srefi ben ondrofeni leki skapuman ben yepi en fu kon frustan moro bun fa Yehovah lobi den sma di e tan gi yesi na En. David ben singi: „Yehovah na mi Skapuman. Mi no sa mankeri noti. A e meki mi didon na ini wei pe furu grasi e gro. A e tyari mi go rostu na presi pe furu watra e lon. Awinsi mi e waka na ini a lagipresi di dungru pikapika, toku mi no e frede nowan ogri, bika yu de nanga mi. Na yu skapuman-tiki e trowstu mi.”​—Psalm 23:1, 2, 4.

Ma kande yu e aksi yusrefi san den sani disi abi fu du nanga yu. We, David ben abi wan bun matifasi nanga Yehovah èn a ben de ’wan man di Gado ben lobi’. Fu san ede dati ben de so? Na fu di a ben e denki dipi èn seryusu fu den sani di Yehovah du èn fu a matifasi di a ben abi nanga Gado. Na so a de tu nanga yu?

Oiti yu ben firi fu prèise a Mekiman èn fu gi en grani, baka di yu ondrosuku wan fu den moi sani di a meki? Oiti yu firi taki yu ati kon furu nanga lobi gi Yehovah baka di yu kon si den moi fasi di a e sori nanga den bun sani di a du gi libisma? A no de fu taki dati efu yu wani kon abi a lobi dati gi Yehovah, dan yu musu meki ten fu begi èn fu denki dipi fu Gado Wortu nanga den sani di a meki. Te yu e du dati, dan dati kan yepi yu fu kon abi wan bun matifasi nanga Yehovah. Na so yu o kon lobi en. Yonguwan nanga owruwan abi a grani disi. A musu de so taki David ben abi wan bun matifasi nanga Yehovah, sensi di a ben de wan yongu boi. Fa wi du sabi dati?

Den e salfu David

Di a ben de krin taki Kownu Saul no ben fiti moro fu de fesiman fu a pipel fu Gado, dan Yehovah taigi a profeiti Samuel: „O langa yu o tan row gi Saul? Yu sabi taki mi no wani taki Saul musu tiri moro leki kownu fu Israel. Teki wan tutu èn poti oli na ini. Dan mi o seni yu go na Isai, wan man fu Betlehem, bika na wan fu den manpikin fu en mi wani poti leki kownu.”​—1 Samuel 16:1.

Di a profeiti fu Gado doro na Betlehem, dan a meki Isai seni kari den manpikin fu en. Sortuwan fu den Samuel ben musu salfu leki  kownu? Di a si Eliab, di ben de a moro bigiwan èn sosrefi wan moi man, dan Samuel prakseri na ensrefi: ’A musu de en.’ Ma Yehovah taigi Samuel: „No luku fa a de, noso fa a langa, bika a no en mi wani. Gado no e si sani soleki fa libisma e si sani, bika libisma e si soso san na ai e si. Ma Yehovah e si fa na ati de.” Na so Yehovah sori tu taki a no ben wani Abinadab, Sama, nanga den fo tra brada fu David. Bijbel e taki moro fara: „Te fu kaba Samuel aksi Isai: ’Na ala den boi fu yu de dyaso?’ Isai piki en: ’Na soso a moro yonguwan mi no kari ete. A de na dorosei e luku den skapu.’”​—1 Samuel 16:7, 11.

A ben gersi leki Isai ben wani taki: ’Mi no denki taki na David yu e suku.’ Fu di David ben de a moro pikinwan na ini a famiri, meki a ben kisi a wroko fu luku den skapu. Ma na en Gado ben teki. Yehovah e si fa na ati de èn soleki fa a sori a ben si wan moi sani na ini a yongu boi disi. Sobun, di Isai seni kari David, dan Yehovah taigi Samuel: „’Opo, salfu en, bika na en mi teki!’ Dati meki Samuel teki a tutu di ben abi oli na ini, dan a salfu a boi na fesi den brada fu en. Sensi a dei dati, a yeye fu Yehovah ben de na tapu David.”​—1 Samuel 16:12, 13.

Bijbel no e taki omeni yari David ben abi di a sani disi pasa. Ma wan pisi ten baka dati, den dri bigi brada Eliab, Abinadab, nanga Sama ben de na ini a legre fu Saul. Kande den tra feifi brada ben yongu tumusi fu go tu. A kan taki nowan fu den ben doro 20 yari ete, fu di na a yari disi mansma ben musu abi fu man go na ini a legre (Numeri 1:3; 1 Samuel 17:13). David ben yongu srefisrefi di Yehovah teki en leki kownu. Ma a ben o kon na krin taki David ben lobi Gado. Soleki fa a sori, a ben abi wan bun matifasi nanga Gado, fu di a ben gwenti denki dipi fu den sani di a ben sabi fu Gado.

Yonguwan na ini a ten disi musu kisi deki-ati fu teki na eksempre fu David. Sobun, papa nanga mama, unu e gi den pikin fu unu deki-ati fu denki dipi fu sani di abi fu du nanga Gado? Unu e gi den deki-ati fu sori warderi gi den sani di Gado meki èn fu ondrosuku san Bijbel e taki fu a Mekiman? (Deuteronomium 6:4-9) Yonguwan, fa a de nanga unu? Unu e du den sani disi tu te unu de unu wawan? Den tijdschrift soleki a Waktitoren nanga na Ontwaakt!, * di e taki fu Bijbel tori, meki spesrutu fu yepi unu.

A ben sabi prei harpu heri bun

Furu fu den psalm fu David e fruteri wi pikinso fu a ten di a ben de wan skapuman èn kande den poku fu den psalm disi ben o du dati tu. Nowan sma na ini a ten disi sabi fa den ben e prei den owruten poku dati. Ma san wi sabi na taki a sma di ben meki den poku disi ben de wan koni pokuman. Fu taki en leti, na fu di David ben man prei a harpu so bun, meki den kari en komoto na ini den gron fu go prei gi Kownu Saul.​—1 Samuel 16:18-23. *

O ten David ben leri a sani dati èn pe a ben leri en? A kan taki a ben leri prei harpu na a ten di a ben de na ini den weigron e luku den skapu. A no ben o fruwondru wi efu a ben de so taki yonguyongu kaba David ben e singi moi prèisesingi gi a Gado fu en. Fu taki en krin, na fu di David ben e dini Gado nanga en heri ati èn fu di a ben lobi En, meki Gado teki en leki kownu, a no so?

Na ini na artikel disi, wi no poti prakseri na a man di David tron bakaten. Ma a fasi fa a ben e libi e kon na krin na ini den wortu fu wan psalm di ben kan abi fu du nanga a ten di a ben e wroko leki skapuman na ini den gron lontu Betlehem. Pruberi fu si fa David ben e singi den wortu disi gi Yehovah: „Doronomo mi e memre owruten. Mi denki dipi fu ala den sani di yu du. Mi ondrosuku den sani di yu meki nanga yu eigi anu” (Psalm 143:5). Den switi wortu fu a psalm disi èn fu furu tra psalm fu David, de leki wan deki-ati gi ala sma di wani taki Yehovah lobi den.

[Futuwortu]