Mane neʼebé monu loos ba Jeová nia laran

SAIDA mak mosu iha ita-nia neon kuandu ita hanoin kona-ba mane ida iha Bíblia laran naran David? Karik ita hanoin kona-ba oinsá nia oho jigante ida naran Golias. Ka karik ita hanoin kona-ba tempu neʼebé nia subar an iha rai-fuik maran tanba Liurai Saul odi nia. Karik ita hanoin mós kona-ba ninia sala ho Batseba no susar sira-neʼebé mosu tanba sala neʼe. Ka karik ita hanoin kona-ba ninia poezia sira-neʼebé Maromak leno no sei iha hela iha Bíblia laran iha livru Salmos.

Iha David nia moris nia halo serbisu espesiál ba Maromak, manán funu oioin, no mós hasoru susar barak. Maibé, buat neʼebé ita gosta liu kona-ba David mak buat neʼebé profeta Samuel fó-hatene nanis katak David sai “ema neʼebé monu loos ba [Jeová nia] laran”.—1 Samuel 13:14.

Samuel nia liafuan sira-neʼe sai loos kuandu David sei joven hela. Ita mós hakarak atu ema dehan katak Ita mak ema neʼebé monu loos ba Maromak nia laran ka lae? Entaun, saida mak akontese iha David nia moris, liuliu kuandu nia sei kiʼik, neʼebé ajuda nia atu sai ema neʼebé monu loos ba Maromak nia laran? Mai ita koʼalia kona-ba neʼe.

Ninia família no serbisu

David nia aman Jessé mak Rute no Booz nia bei-oan, no ita bele fiar katak David nia aman mak ema neʼebé fiar metin ba Maromak. Jessé hanorin David, ninia maun naʼin-hitu, no biin naʼin-rua kona-ba Moisés nia Ukun-Fuan kuandu sira sei kiʼik. Oinsá ho ninia inan? Iha David  nia salmu ida, nia koʼalia kona-ba ninia an hodi dehan katak nia mak oan husi Jeová nia “atan feto” ida. (Salmo [Mazmur] 86:16) Ida-neʼe halo ema balu hanoin katak David nia inan, neʼebé naran la fó sai iha Bíblia laran, mós hola parte atu ajuda David atu iha relasaun diʼak ho Maromak. Matenek-naʼin ida hatete: “Karik husi feto neʼe nia ibun mak ulukliu nia rona istória furak kona-ba oinsá Jeová tau matan ba ninia povu,” ida-neʼe karik inklui istória kona-ba Rute no Booz.

Dala primeiru neʼebé Bíblia temi kona-ba David, nia mak bibi-atan joven ida neʼebé iha responsabilidade atu tau matan ba ninia aman nia bibi. Atu halo knaar neʼe, karik nia presiza uza tempu naruk no mesamesak iha kalan no loron iha fatin luan. Mai ita hanoin toʼok kona-ba situasaun neʼe.

David nia família hela iha Belém, sidade kiʼik ida iha foho leten iha Judá. Rai sira iha Belém iha fatuk barak, maski nuneʼe fó moris ba trigu no buat barak seluk tan. Ai-fuan barak, inklui ai-oliveira no tua-uvas hun moris iha foho-leet sira. Iha David nia tempu, fatin aas neʼebé ema la halo toʼos baibain uza atu tau matan ba bibi. La dook husi fatin neʼe ita bele hetan rai-fuik maran Judá nian.

David nia serbisu iha perigu barak. Karik iha foho kiʼik sira-neʼe nia leet mak nia hasoru leaun no ursu neʼebé koko atu han ninia bibi sira. * Maski nia mak mane joven deʼit, maibé nia hatudu aten-brani hodi duni tuir no oho animál sira-neʼe atu salva ninia bibi sira. (1 Samuel 17:34-36) Karik durante tempu sira-neʼe mak David aumenta ninia matenek atu tuda fatuk ho tali. Ninia hela-fatin besik rai Benjamim. Ema funu-naʼin husi suku neʼe iha matenek atu bele tuda fatuk ho tali no maski sira tuda ba buat kiʼik, maibé sira bele tuda kona ida-neʼe. David mós iha matenek atu halo ida-neʼe ho didiʼak.—Juízes (Hakim-Hakim) 20:14-16; 1 Samuel 17:49.

Nia uza tempu ho didiʼak

Baibain bibi-atan sira halo sira-nia knaar dook husi ema seluk. No nuʼudar bibi-atan, David uza  didiʼak tempu neʼebé nia mesamesak. Tuir loloos, fatin neʼebé kalma fó oportunidade ba nia atu hanoin kleʼan. Karik buat balu neʼebé David hakerek iha salmu mak ideia balu neʼebé nia hanoin iha ninia tempu joven. Porezemplu, karik kuandu nia mesamesak mak nia hanoin kona-ba ema nia pozisaun iha raiklaran no mós kona-ba buat furak iha lalehan hanesan loro-matan, fulan, no fitun sira, “neʼebé [Jeová nia] liman mak halo”. No mós karik iha rai-luan besik Belém mak nia hanoin kona-ba rai neʼebé fó fuan barak, kona-ba animál sira, manu sira no mós kona-ba “animál fuik iha rai-luan”.—Salmo 8:3-9; 19:1-6.

Ita bele fiar katak, esperiénsia nuʼudar bibi-atan book David nia laran atu hafolin oinsá Maromak Jeová hatudu domin ba ninia atan sira-neʼebé laran-metin. Tan neʼe, David kanta: “Jeová mak haʼu-nia bibi-atan. Haʼu sei la kuran buat ida. Iha fatin neʼebé iha duʼut barak mak nia hatoba haʼu; nia lori haʼu atu deskansa iha fatin neʼebé iha bee barak. Maski haʼu laʼo iha foho leet neʼebé nakukun, haʼu la taʼuk buat aat, tanba Ita hamutuk ho haʼu; Ita-nia ai-tonka no Ita-nia ai-dona mak buat sira neʼebé fó-kmaan mai haʼu.”—Salmo 23:1, 2, 4.

Karik Ita hanoin: ‘Oinsá mak informasaun neʼe bele ajuda haʼu?’ Ita hatene katak David iha relasaun diʼak ho Maromak no bele bolu nuʼudar “ema neʼebé monu loos ba ninia laran”. Ida-neʼe akontese tanba nia hanoin kleʼan ona kona-ba buat neʼebé Maromak Jeová halo no mós kona-ba ninia relasaun ho Maromak. Ita mós bele halo ida-neʼe ka lae?

Dala ruma kuandu Ita hanoin didiʼak kona-ba buat neʼebé Maromak kria, Ita-nia laran mós book Ita atu hahiʼi no fó glória ba Maromak ka lae? Dala ruma kuandu Ita hanoin kona-ba oinsá Maromak tau matan ba ema no kona-ba ninia hahalok furak, Ita-nia laran sai nakonu ho domin ba Jeová ka lae? Tuir loloos, atu bele sente hanesan neʼe, Ita presiza uza tempu atu mesamesak hodi hanoin kleʼan kona-ba Maromak nia Liafuan no ninia kriasaun. Hodi halo ida-neʼe bele ajuda Ita atu hakbesik liután ba Maromak Jeová no neʼe book Ita atu hadomi nia. Ema hotu, joven no ferik-katuas iha oportunidade atu halo ida-neʼe. Klaru katak David hakbesik ba Jeová husi kiʼik kedas. Oinsá ita hatene kona-ba neʼe?

Maromak hili David

Bainhira Liurai Saul la halo tuir Maromak no la merese ona atu ukun Maromak nia povu, Maromak Jeová hatete ba profeta Samuel dehan: “Ba tempu hira tan mak ó sei tanis kona-ba Saul, kuandu haʼu la simu ona nia atu ukun Israel nuʼudar liurai? Enxe mina iha dikur no bá. Haʼu sei haruka ó ba Jessé, ema Belém, tanba haʼu hili ona liurai ida husi ninia oan sira ba haʼu-nia an rasik.”—1 Samuel 16:1.

Kuandu Maromak nia profeta toʼo iha Belém, nia haruka Jessé atu halibur nia oan-mane sira. Entaun, Jessé nia oan ida neʼebé mak Samuel sei kose mina nuʼudar liurai? Kuandu nia haree Eliab, oan primeiru neʼebé bonitu, Samuel hanoin: “Nia mak neʼe.” Maibé Maromak Jeová hatete ba  Samuel: “Labele haree ba buat neʼebé ó haree husi liʼur kona-ba nia ka nia ain-aas oinsá, tanba haʼu la simu nia. Basá dalan neʼebé ema haree, la hanesan ho dalan neʼebé Maromak haree, tanba ema haree deʼit buat neʼebé matan bele haree; maibé kona-ba Jeová, nia haree ema nia laran.” Iha dalan neʼebé hanesan Jeová mós la simu Abinadab, Samá, no ninia maun naʼin-haat seluk. “Ikusmai Samuel hatete ba Jessé: ‘Ó-nia oan sira mak neʼe deʼit ka?’ Ba ida-neʼe nia hatete: ‘Ida neʼebé ikun seidauk sura hamutuk ho sira, no haree! Nia hein hela bibi sira.’”—1 Samuel 16:7, 11.

Jessé nia resposta hatudu katak nia hanoin: ‘David idade kiʼik liu no nia bibi-atan deʼit. Klaru katak nia la’ós ida-neʼebé Jeová hili, loos ka lae?’ Nuʼudar ida neʼebé ikun no ladún importante ba família, David hetan knaar atu tau matan ba bibi sira. Maski nuneʼe, nia mak ida neʼebé Maromak hili ona. Maromak Jeová haree buat neʼebé iha ema nia laran, no klaru katak Jeová haree buat neʼebé folin boot iha mane joven neʼe nia laran. Ikusmai, Jessé haruka ema atu bolu David, no Maromak Jeová hatete ba Samuel: “‘Hamriik bá, kose mina ba nia, tanba nia mak ema neʼe!’ Entaun Samuel foti dikur ho mina no kose mina neʼe ba nia iha ninia maun sira-nia leet. No Jeová nia espíritu hahú apoia David husi tempu neʼe ba oin.”—1 Samuel 16:12, 13.

Bíblia la fó sai David nia tinan kuandu ida-neʼe akontese. Maibé, tempu balu depois neʼe, ninia maun naʼin-tolu neʼebé boot liu, Eliab, Abinadab, no Samá, tama Saul nia tropa. Karik Jessé nia oan naʼin-lima seluk seidauk bele tama tropa tanba tinan kiʼik liu. Entaun iha tempu neʼebé Samuel hili David, karik Jessé nia oan sira hotu seidauk toʼo tinan 20, tinan neʼebé mane iha Israel tama tropa. (Números [Bilangan] 1:3; 1 Samuel 17:13) Maski ita la hatene ho loos, maibé klaru katak David sei joven loos kuandu Maromak Jeová hili nia. Maski nuneʼe, ita bele fiar katak David mak ema neʼebé sempre hanoin uluk kona-ba Maromak. Tuir loloos nia iha ona relasaun diʼak ho Jeová, tanba nia hanoin kleʼan ba buat neʼebé nia hatene kona-ba Maromak.

Diʼak ba joven sira ohin loron atu halo buat neʼebé hanesan. Tan neʼe, inan-aman sira, Ita fó laran-manas ba Ita-nia oan sira atu hanoin kona-ba sira-nia relasaun ho Maromak, atu hafolin buat neʼebé Maromak kria, no atu estuda buat neʼebé Bíblia fó sai kona-ba ita-nia kriadór ka lae? (Deuteronômio [Ulangan] 6:4-9) No oinsá ho imi joven sira? Imi rasik mós hakaʼas an atu halo buat sira-neʼe ka lae? Livru sira-neʼebé esplika kona-ba Bíblia, hanesan Livru Haklaken no Sedarlah! * halo atu ajuda imi.

Nia matenek atu toka arpa

Hanesan David nia poezia sira-neʼebé hakerek iha livru Salmos bele esplika mai ita kona-ba ninia moris nuʼudar bibi-atan, nuneʼe mós ho múzika neʼebé nia halo. Maski loos katak ohin loron ita la hatene oinsá David kanta knananuk santu sira-neʼe, maibé ita hatene katak, ema neʼebé halo múzika sira-neʼe mak ema neʼebé matenek duni kona-ba múzika. Tuir loloos, razaun tansá Liurai Saul bolu David husi rai-luan atu ba ninia palásiu mak tanba David matenek atu toka arpa.—1 Samuel 16:18-23. *

Horibainhira no iha neʼebé mak David haburas matenek neʼe? Karik nia halo ida-neʼe durante tempu neʼebé nia hein bibi iha rai-luan. Ita bele fiar katak maski David sei joven hela, maibé nia gosta ona atu kanta hodi hahiʼi Jeová ho laran. Sin, Jeová hili nia tanba nia laran-metin no hafolin ninia relasaun diʼak ho Maromak.

Klaru katak buat neʼebé David halo kuandu nia idade ona mós hatudu katak nia iha relasaun diʼak ho Maromak. Tuir loloos, David nia liafuan neʼebé hakerek iha livru Salmos fó sai hahalok neʼebé nia hatudu durante ninia moris tomak no liafuan sira-neʼe koʼalia barak kona-ba esperiénsia sira-neʼebé nia hetan nuʼudar joven iha Belém. Hanoin toʼok David kanta ba Jeová hodi dehan: “Haʼu hanoin fali kona-ba loron sira husi tempu uluk; haʼu hanoin kleʼan kona-ba Ita-nia hahalok hotu; ho hakarak rasik haʼu hanoin kona-ba serbisu neʼebé Ita halo ho Ita-nia liman.” (Salmo 143:5) Sin, salmu neʼe no mós David nia salmu seluk book duni ema hotu neʼebé hakarak atu monu loos ba Jeová nia laran.

[Nota–rodapé]