Bibilo I Ôron Ka Kwagh U Nan Mo Agee Ken Uma Wam cii

KWAGHÔRON U MARCEAU LEROY

MKAANEM ma ken Bibilo ma yange m hii ôron ma myer ken iyou yam yô, lu ma ma kaa ér: “Sha hiihii Aôndo gba Sha man tar” la. Er nan ve m lu ôron Bibilo ken myere? Lu kwagh u mayange terem, u lu ornyimanaôndo la una lumun a takerada u m lu ôron la ga yô.

Er i gba je m lu a vande ôron Bibilo ga, nahan mkaanem ma hiihii ma ken Genese la kpiligh mo iyol saa her. Nahan m gba henen mer, ‘Ka ityôkyaa i í ne ve atindi a igbetar a kwagh u a ngu a kpiligh mo iyol ne a eren kwagh ken mzough je ne!’ Er maam iyol yô, m hii u ôron Bibilo sha ahwa anigheni a utu zan zan ahwa anyiin sha use. Maa lu mhii u ieren yam i ôron Mkaanem ma Aôndo ken uma wam jimin cii je la. De m pase er Bibilo i ôron i lu kwagh u nan mo agee ken uma wam cii yô.

“A Gba u Ú Ôron U Hanma Iyange”

Yange i marem ken inyom i 1926, hen angar u Vermelles, ape i dughun awen a i yer a ér coal, ken imbusutarimese i tar u France la. Shighe u i lu nôngon Ityav Mbi Tar Cii Mbi sha Uhar la, coal lu kwagh u vesen ken tar la kpen kpen. Nahan er m dughun coal shin inya yô, i lumun ér nana de ze shoja ga. Nahan cii kpa, er m soo u hemban lun ken mkpeyol yô, m hii u henen kwagh u redio man usu u latriki, man tom ne wasem u kaven er atindi a igbetar kpishi a eren tom ken mzough yô. Shighe u m lu anyom 21 la, wanyemakeranta ugen u se lu klase môm yô, nam Bibilo yam i hiihii, a kaa ér: “Ka takerada u u doo u ôron kpishi yô.” Yange m er i̱ m been yô, wanger mo er Bibilo i lu Mkaanem ma Aôndo, shi i lu mpase u Aôndo hen uumace yô.

Er m hen mer mbawanndor a mo kpa a maa ve iyol u ôron Bibilo yô, m ngohol ukôpi anigheni. Kpa kwagh gema er u kpiligh mo iyol yô, ve gema ve lu nahan mo tar shi hendan a mo. Anmgbianev av mba ve na jighjigh a kwagh u mbatsav yô, kaa ér: “Ú hiin u ôron takerada la yô, a gba u ú ôron u hanma iyange!” Man shi m ôr u kpa keng, kpa mayange m vaa afanyô ga cii. Maa hingir kwagh u m eren keke yô.

Mbawanndor a mo mbagenev mba nengen ér kwagh u Bibilo gbam ishima yô, ve nam ityakerada i Mbashiada mba Yehova igen i ve vande ngohol yô. Ityakerada er One World, One Government (Tar môm, Gomoti môm) * (ken zwa French) nahan pase er i hii ve Bibilo i tese ér ka Tartor u Aôndo tseegh ua sôr uzayol mba uumace yô. (Mat. 6:10) Yange m kange ishima mer me pase mbagenev kwagh u ishimaverenkeghen ne.

Môm ken ior mba ve hii ngohol Bibilo hen a mo yô, lu Noël, ijende yam i uye. Er zaan adua u fada taveraa yô, a sôr ian sha er se za lam a orgen u lu henen makeranta u fada yô. Kwagh  ne yange cier mo iyol, nahan cii kpa, m-er u m ôr Pasalmi 115:4-8 man Mateu 23:9, 10 la wasem u fan er Aôndo a vende u civir un a ieev kua u yilan mbahemenev mba kwaghaôndo sha atiatom a ve yô. Kwagh ne nam ishimataver i paan jighjigh u nan wam u he ne iyol. Kwagh ne na yô, Noël ngohol mimi, man zan zan nyian kpa, ngu Orshiada u jighjigh her.

Shi anngôm u kwase u vesen kpa yange m za un inya. Nom na lu a ityakerada kpishi i sha kwagh u mbaimev, nahan ujijingi mba bov nzughul a na. Hiihii la, lum er me kôrcio u eren ma kwagh ga nahan, kpa avur a Bibilo er Mbaheberu 1:14 nahan nam vangertiôr ér mbatyomov mba Yehova mba suen mo. Shighe u wonom dondo akaawan a Bibilo shi haa hanma kwagh u gba zua a kwagh u mbaimev cii kera yô, a kôrcio u osough sha ikyev i ujijingi mbabov kera. Un kua ingyôr yam cii ve hingir Mbashiada mba tseen asema.

Ken inyom i 1947 la, Orshiada ugen u lu marnya u tar u Amerika, u i yilan un ér Arthur Emiot yô, va hen ya wam. Er saan mo iyol kpishi yô, m pine un ape Mbashiada kohol yô. A kaa a mo ér annongo ugen ngu ken gar u Liévin, gba ica nôngo u kuman er ukilomita pue nahan. Sha ayange la kwagh taver ishe, je ikyekye kpa lu ican u yamen, nahan m zenden angahar m zaan mkombo shi m hiden, kuma iwer imôngo. Yange i cir tom u Mbashiada mba Yehova wase ken tar u France kuma anyom anigheni. Mbashiada mba ken tar la jimin cii lu iorov 2,380 tseegh, mbakpishiv lu marnya u tar u Poland, mba ve va shir ken tar u France yô. Kpa sha iyange i Setemba 1, 1947 yô, i shi i na Mbashiada mba Yehova ian i eren tom ve ken tar u France. Yange i bugh afishi a branci ken gar u Paris, hen Villa Guibert. Er pania môm kpa lu a lu ken tar u France ga yô, Tom Wase ú Tartor u i yilan sha ayange la ér Informant, u Disemba 1947 la, due a zamber sha u taver ior asema ér ve tôô pania u keke ve pasen kwagh ahwa 150 hanma uwer. (Ken inyom i 1949 la, i pande ahwa la hingir 100.) Yange i erem batisema ken inyom i 1948, ka ker ken inyom i 1949 yô, m hingir pania u keke, er mkaanem ma Yesu ma i nger ken Yohane 17:17 ma kaa nahan vough.

M Due Purusu M Hide hen Gar u Dunkerque

Ijiir i hiihii i m er tom her yô, lu haregh u Agen, u a lu ken imbusutariyan i tar u France la, kpa m ngôôr her ga. Er m undu ijiir i dughun coal shin inya la yô, i kaa ér mo m za shoja. Kpa m venda u zan shoja, nahan i wuhen ken purusu. Shin er i lumun ér m lu a Bibilo ga nahan kpa, m zua a upeeji mba takerada u Pasalmi kpuaa. Yange mea ôr ve nahan ishima i taver mo kpen kpen. Mba va pasen mo mba toho yô, gba u me tsua kwagh u me er yô: M de tom u pasen kwagh hanma shighe la, m vôso kwase m tser tsomboroo? Kwa ne kpa, kwagh u m ôr ken Bibilo la wasem. Yange m gbidye kwar sha mkaanem ma Paulu ma i nger ken Mbafilipi 4:11-13 la: “M ngu a agee a eren akaa cii je ken Un u A taver mo ne.” Nahan m tsua mer me za hemen a tom pania her. Ken inyom i 1950 la, i shi i tindim hen gar u Dunkerque, ape m vande pasen kwagh la.

Shighe u m za nyôr hen gar ne la, m lu a kwagh môm ga. Ityav Mbi Tar Cii Mbi sha Uhar la vihi gar ne kpishi, nahan ijiir i tsan taver u zuan a mi. M za hen tsombor ugen u yange m vanden pasen u kwagh yô, kwagh ne doo kwaseya la kpen kpen, a kaa ér: “Melaba, Leroy, i pase u nahan doo! Orya wam kaa ér ior er we nahan vea lu kpishi yô, ityav mbi nôngon ma mbi lu ga.” Ve lu a iyou sha ci u mbavannya, nahan ve nam ijiir i tsan zan zan kuma sha shighe u ior zenden nengen ajiir a doonashe. Sha iyange shon i môm, anmgbian u Arthur Emiot, u i yilan ér Evans la nam tom. * Yange lu ortafinta hen ihyongo i agirgi a mnger, nahan lu keren or u nana kuran igirgi igen tugh yô. Yange za a mo hen môm ken mbakangenyav mba nengen sha igirgi mnger la. Shighe u m due ken purusu la, m uma m hingir kpukô kpukô. Evans pasen er hii ve m kande yô, orkangenyav la kaa ér kwaghyan ngu ken friiji, nahan mo m za ya. Sha iyange la i môm, m zua a ijiir i tsan man tom man kwaghyan! Nahan m seer lun a vangertiôr ken mkaanem ma Yesu ma i nger ken Mateu 6:25-33 la.

Shighe u ior zenden nengen ajiir a doonashe la kom yô, gba u mo man ikyarem ken tom pania,  Simon Apolinarski, se ker ijiir igen, kpa se kange ishima ser se za hemen a tom u se lu eren la. Yange i na se ijiir i tsan ken ityôugh nyinya i tse, se yaven sha katifa u i er un sha toho yô. Yange se pase kwagh iyange jimin. Se pase or u lu a ityôugh nyinya la kwagh, nahan hingir môm ken ior kpishi mba ve ngohol mimi yô. Ica kera gba ga tsô, i due a ngeren ken pipaabaver i hen ityônya sha u tan ior i Dunkerque icin ér “Mbashiada mba Yehova mough a ityom ve hen haregh la.” Man gema lu mo man Simon kua mbapasenkwagh mbagenev kpuaa tseegh se lu hen ijiir la ye! Er se tagher a ican nahan kpa, se zua a ishimataver sha u gbidyen kwar sha ishimaverenkeghen yase i Mbakristu la shi henen sha gbenda u Yehova vande nengen sha a vese la. Mbapasenkwagh yange ve lu ken Dunkerque nôngo u kuman iorov 30, shighe u i musan tom wam ken inyom i 1952 la.

M zua a Ishimataver I Eren Ityom i He

M eren tom ken gar u Amiens shighe kpuaa yô, i tsuam m hingir ikpur pania, i tindim hen Boulogne-Billancourt, anjiir u lu sha kpe u gar u Paris yô. M hen Bibilo a ior kpishi, man mbagenev ken a ve va hingir u eren tom pania man tom mishen. Gumor ugen, u i yilan un ér Guy Mabilat yô, yange ngohol mimi shi vese va hingir ortamen u sôron atôônanongo, shi va hingir ortamen u nengen sha haregh kpaa. Shighe kar yô, va lu ityough sha m-maa u i lu maan ijiir i gberen ityakerada yase i shin Betel u ken gar u Louviers, u a we gban ica a gar u Paris la. Er m lamen a ior sha kwagh u Bibilo ken tom u pasen kwagh la hanma shighe yô, kwagh la na mkaanem ma Aôndo varem ken ishima, shi nam iember shi wasem m hemba fan u tesen ior kpaa.

Ica i gbe ga yô, i tsuam ken inyom i 1953 la ér m lu ortamen u sôron atôônanongo, ken Alsace-Lorraine, haregh u tar u Jamani ngohol un lu sha ikyev i u kwa har, hii ken inyom i 1871 zan zan 1945 yô. Nahan gba u me shi me hen zwa Jamani. Shighe u m hii tom u sôron atôônanongo la, umato man televishen man akeke a gberen kwagh lu hen haregh la kpuaa tseegh, shi m lu a redio u cuku shin ukômputa ga. Nahan kpa, m ban a msaanyol shin akaa a hange hange ken uma wam ga. Jighilii yô, lu shighe u hemba saan mo iyol je la. Yange or a dondon kwaghwan u Bibilo u a kaa ér se ‘ver ishe yase jighilii’ la yô, akaa a danen nan u civir Yehova a kera ngee er a ngee nyian nahan ga.—Mat. 6:19-22.

Mkohol u yange i er ken gar u Paris ken inyom i 1955, lu a itinekwagh ér “Triumphant Kingdom” la ka kwagh u hungur mo ga. Lu heen ne m zua a Irène Kolanski, u va hingir kwase wam la ye. Un vande hiin tom u pasen kwagh hanma shighe la a mo. Mbamaren nav lu marnya mba tar u Poland, shi ve lu Mbashiada mba tseen asema. Er ve va ken tar u France la, Anmgbian Adolf Weber za ve inya. Anmgbian ne lu or u eren tom ken sule u anmgbian Russell, kpa mough va ken Yuropa sha u va pasen loho u dedoo. Yange m vôso Irène ken  inyom i 1956, nahan a kohol mo ken tom u sôron atôônanongo la. Ken anyom a a kar ne cii, a suem sha gbenda u injaa kpen kpen!

Anyom ahar nga karen yô, kwagh u injaa ugen shi lu keghen mo, i tsuam m hingir ortamen u nengen sha haregh. Nahan cii kpa, m za hemen u eren tom u sôron atôônanongo la kpa her sha ci u anmgbianev mba eren tom ne yina. Tom yange ngeem shighe ne kpen kpen! Dugh u pasen kwagh ahwa 100 hanma uwer la kera yô, shi i gba u me na akaaôron hanma kasua, shi me sôr iniongo i henen takerada itiar, shi me nenge sha ripoti man akaa agen, shi me nger ripoti kpaa. A er nan man shi me kôrcio u yamen shighe u ôron Mkaanem ma Aôndo? Mhen vam ken ityough, m tsua upeeji mbagen ken Bibilo i tse igen, m luun a mi. Hanma shighe u yange a gba u me kegh or u se lumun u zuan mape cii yô, m dugh upeeji mban m ôr. Ashighe a yange m ôron Bibilo shighe kpuaa ne yange wasem u kangen ishima u eren tom wam la her.

Ken inyom i 1967 la, i lôhôm vea Irène ér se za hingir mba eren tom shin Betel u ken Boulogne-Billancourt la. M hii u eren tom hen Gbaatom u nengen sha Tomshiren, man er anyom a kar hegen i kom 40 nahan kpa, m ngu eren tom ne her. Vegher môm ken tom u m eren la u a doom yum yô, ka u nan mbamlumun sha mbampin mba ior ve nger washika ve pin sha kwagh u Bibilo la. “Mpaleghyol u Loho u Dedoo” man u tôvon sha mi vighe vighe la ka kwagh u maan mo iyol kpen kpen! (Fil. 1:7) Shi ka i saan mo iyol u hemen mcivir u pepe sha u timen ken Bibilo cii ve se mase yan kwaghyan u pepe ye. Ken inyom i 1976 la, i tsuam ér m lu môm ken Kômatii u Nengen sha Branci ken tar u France.

Gbenda u Uma Ú Hemban Doon Cii

Shin er m tagher a ashighe a ican nahan kpa, shighe u hemban taver mo cii ken uma wam yô, ka hegen er iyolbeen man uzayol mbagen ve ne mo man Irène se kera fetyô u eren tom kpishi ga ne. Nahan cii kpa, er se er Bibilo shi se henen i imôngo yô, ishimaverenkeghen yase ngi yeghen a yegh. Ka i doo se u nyôron bôôsu zan hen haregh wase za pasen mbagenev kwagh u ishimaverenkeghen ne. Aluer i zom anyom a se er tom u pasen kwagh hanma shighe la cii yô, a hemba anyom 120. Mfe u se zough a mi ken tom ne la mgbegha se u wan hanma or u nan soo u eren tom u saan iyol man u nan nan iember man u lun a inja ken uma cii kwagh ser, nana er tom u pasen kwagh hanma shighe la. Shighe u Tor Davidi nger mkaanem ma ken Pasalmi 37:25 la, yange “bee iyol,” kpa er yange ôr nahan, mo kpa “m ngu a nenge i ta orperapera kera ga.”

Ken uma wam cii, Yehova nam agee sha Mkaanem nam. Anmgbianev av yange ve kaa anyom 60 ken ijime ér Bibilo i ôron ia lu ieren yam i keke. Yange ve kaa vough. Bibilo i ôron ka ieren yam i ayange ayange, man m vaa afanyô sha ieren ne ga cii!

[Ngeren mba shin kpe]

[Foto u sha peeji 5]

Mo vea Simon

[Foto u sha peeji 5]

Shighe u m lu eren tom u ortamen u nengen sha haregh yô

[Foto u sha peeji 5]

Bibilo i lun ér i̱ m hii lun a mi la nahan

[Foto u sha peeji 6]

Sha iyange i ivese yase

[Foto u sha peeji 6]

Mo vea Irène se mba er Bibilo shi se mba henen i imôngo