Jehovah Aye Obedo Dul Ma Kipokka

“An en ame abedo dul ame meri kede gin ame inwongo me bedo meri i akina jo Icrael.”​—WEL 18:20, Baibul me leb Lango.

1, 2. (a) Lulevi onongo gitye nining i lok ma dok i kom ginaleya me ngom ma kipoko? (b) Gen ango ma Jehovah omiyo bot Lulevi?

 I KARE ma jo Icrael gumayo pol pa Lobo ma Kiciko Pire, Yocwa oketo tamme i poko ngom kun kibolo kwir. En otimo tic man kun gitiyo gin ki Lalamdog Madit Eleajar kacel ki lutel wi kaka acel acel. (Wel 34:13-29) Ento Lulevi, pe kipoko botgi ginaleya me ngom calo kit ma kaki mukene gunongo. (Yoc. 14:1-5) Pingo Lulevi pe gunongo ngom pi kakagi, nyo dul ma kipoko botgi, i Lobo ma Kiciko Pire? Gin mono dong kiwekogi aweka niyak?

² Wanongo lagamme i lok ma Jehovah owaco bot Lulevi. Me nyuto ni pe kiwekogi ata, Jehovah owaco botgi ni: “An en ame abedo dul ame meri kede gin ame inwongo me bedo meri i akina jo Icrael.” (Wel 18:20) Lok ni: “An en ame abedo dul ame meri” obedo lok ma kelo gen adada! In onongo ibiwinyo nining ka Jehovah owaco lok meno boti? Lapeny ma romo bino mukwongo i wi twero bedo ni, ‘An mono apore pi Won Twer Ducu me loko lok ma kit meno bota?’ Nyo bene iromo penye ni, ‘Jehovah tika ada twero bedo dul ma kipoko bot Lakricitayo mo keken ma tye ki roc i kare-ni?’ Lapeny magi mako kom in ki joni me amara. Dong omyero waniang tyen lok man. Meno bikonyowa me niang kit ma Jehovah twero bedo dul ma kipoko bot Lukricitayo i kare-ni. En twero bedo dul ma meri, kadi bed itye ki gen me kwo i polo nyo i paradic i lobo.

Jehovah Omiyo Jami ma Mitte Bot Lulevi

3. Ngo ma omiyo Lubanga okwanyo Lulevi pi tiyo ticce?

³ Ma peya Jehovah omiyo Cik bot Luicrael, co ma gubedo wegi odi aye onongo gitiyo calo lulamdog. I kare ma Lubanga omiyo Cik, en oketo yub pi kaka pa Levi wek gubed lulamdog ki lukony kor lulamdog. Man ocakke nining? Ocakke i kare ma Lubanga oneko lutino kayo pa jo Ejipt, en olonyo lutino kayo pa Luicrael kun pokogi woko ki i kin lutino mukene-ni, wek gubed mere. Ci Lubanga owaco pi alokaloka man ni: “Atyeko kwanyo jo pa Levi . . . Ma ka lutino kayo ducu ma i kin jo Icrael.” Kit ma kwano wel dano onyuto ni lutino kayo pa jo Icrael dwong loyo wel jo Levi, kiculo ginkok me pongo wi  ka ma orem-mi. (Wel 3:11-13, 41, 46, 47) Pi meno Lulevi onongo dong gitwero tiyo ticgi pi Lubanga pa Icrael.

4, 5. (a) Te lokke ngo pi Lubanga me bedo dul ma kipoko bot Lulevi? (b) Lubanga omiyo jami ma mitte bot Lulevi nining?

⁴ Tic man onongo te lokke ngo bot Lulevi? Jehovah owaco ni en aye ebibedo dul ma kipoko botgi pi tyen lok ni, me ka nongo ginaleya me ngom, gin gimiyo botgi mot me tic ma welle dit. Bedo “ajwagi [lulamdog] pa Rwot [Jehovah]” aye ginaleyagi. (Yoc. 18:7) Lok ma orumo ka nget Wel 18:20 nyuto ni man pe oweko Lulevi gubedo lucan ma lubbe ki jami me kom. (Kwan Wel 18:19, 21, 24.) Kimiyo bot Lulevi “dul acel me apar i kom jami pa jo Icrael me bedo megi pi culo ticgi ma gitiyo.” Gin onongo ginongo acel me apar me jami ma Icrael puru kacel ki medde pa wel leegi. Lulevi bene onongo gimiyo acel me apar me jami “mabecone” ma ginongo, wek okony lulamdog. * (Wel 18: 25-29) Lulamdog bene onongo kimiyogi “gityer maleng ducu” ma Luicrael gikelo bot Lubanga i kabedo me woro. Lulamdog onongo gitye ki tyen lok matir me bedo ki niye ni Jehovah bimiyogi jami ma mitte.

⁵ Nen calo Cik pa Moses oketo ni myero kimi dul acel me apar tyen aryo, dok me aryone-ni onongo kigwoko bedo pat me konyo jo ducu me ot ki dok me acama i kare me gure maleng i mwaka acel acel. (Nwo. 14: 22-27) Ento, i tum pa mwaka me adek ki abicel me cabat ma bedo i mwaka me abiro ducu, dul acel me apar man onongo kiketogi i dog gang pi konyo lucan kacel ki Lulevi. Pingo Lulevi bene gubedo i kin jo ma gamo dul man? Pien gin onongo gipe ki “dul lobo nyo ka mo ma guleyo” i Icrael.​—Nwo. 14:28, 29.

6. Kadi bed Lulevi onongo gipe ki ngom i Icrael, gin onongo gibedo kwene?

⁶ Iromo bedo ki ur ni, ‘Ka Lulevi onongo gipe ki ngom ma kimiyogi, ci gin onongo gibedo kwene?’ Lubanga pe owekogi ata. En omiyogi gangi 48 kacel ki olet ma orumo ngetgi. Man onongo tye iye gangi abicel me laro lunek dano. (Wel 35:6-8) Dong, Lulevi onongo gitye ki kabedogi ka gipe ka tic i ot pa Lubanga. Jehovah omiyo jami ma mitte pi jo ma gumine i tiyo ticce. Pi meno, Lulevi onongo gitwero nyuto ni Jehovah obedo dul ma kipoko botgi ka giketo gengi i kom mitine kacel ki tekone me miyogi jami ma mitte.

7. Ngo ma onongo mitte ki bot Lulevi wek Jehovah obed dul ma kipoko botgi?

⁷ Cik-ki onongo pe oketo kit pwod mo pi Laicrael ma pe omiyo dul acel me apar. Ka dano pe gumiyo dul acel me apar, kwo onongo doko tek bot lulamdog ki Lulevi. Meno otimme i kare pa Nekemia. Macalo adwogine, Lulevi gucako tic i potigi kun giweko ticgi woko. (Kwan Nekemia 13:10.) Dong, yo me pite pa Lulevi onongo cung i kom kwo me cwiny pa jo Icrael. Medo i kom meno, lulamdog ki Lulevi onongo mitte ni gubed ki niye i kom Jehovah ki dong i kom yone me miyo jami ma mitte pigi.

Jehovah Obedo Dul ma kipoko bot Ngat Acel Acel

8. Tit kong peko ma Lalevi Acap obedo kwede.

⁸ Jehovah onongo obedo dul ma kipoko bot Lulevi macalo kaka kulu. Pire tek me ngeyo ni, Lalevi acel acel onongo tiyo ki lok  ni “Rwot [Jehovah] aye dul ma gipokka” me nyuto ni en tye ki gen dok jenge i kom Lubanga. (Koko 3:24) Lalevi acel ma kumeno obedo lawer dok lacor wer bene. Wabilwonge ni Acap, kadi bed ni en onongo oromo bedo lamemba me doggola pa Acap, Lalevi ma otelo wi luwer pa Kabaka Daudi. (1 Tekwaro 6:31-43) I Jabuli 73 wakwano ni Acap (nyo lakware mo acel) obedo ki ur. En ogomo lutim maraco ma onongo gitye ka kwo kwo me lonyo dok en owaco ni: “Abedo ma cwinya leng mere nono, dok alwoko cinga ma pe abalo.” En nen calo onongo dong pe tye ka neno motte me tic; en pe opwoyo ni Jehovah aye obedo dul ma kipoke. En obedo ki peko i yo me cwiny nio ka ocito i “ot maleng pa Lubanga.”​—Jab. 73:2, 3, 12, 13, 17.

9, 10. Pingo Acap owaco ni Lubanga obedo ‘dul ma kipoke pi naka’?

⁹ Ki i ot maleng pa Lubanga, Acap ocako neno jami kit ma Lubanga neno kwede. Oromo bedo ni gwok nyo in bene iwinyo kit meno. Nyo gwok i kare mo pe ibedo ka neno ber pa mot me cwiny kun iketo tammi tutwal i nongo jami me kom ma ipe kwede. Ento i kare ma icako kwano Lok pa Lubanga kacel ki cito i cokke pa Lukricitayo, icako neno jami kit ma Jehovah neno kwede. Acap oniang gin ma onongo bitimme i kom lutim maraco. En otamo i kom kwone ci oniang ni Jehovah bimako cinge tung lacuc kun telo en. Acap owaco bot Jehovah ni: “Pe tye gin mo i lobo kany ma amito twatwal makato in.” (Jab. 73:23, 25) I ngeye en owaco ni Lubanga obedo dul ma kipoke. (Kwan Jabuli 73:26.) Kadi bed ‘dul kom ki adunu,’ pa laco Jabuli-ni oling woko, Lubanga pud bedo ‘dul ma kipoke pi naka.’ Laco Jabuli-ni onongo tye ki gen ni wi Jehovah bipo i kome macalo larem. Wiye pe biwil i kom ticce ma etiyo ki gen. (Latit. 7:1) Meno pud dong nen calo okweyo cwiny Acap ya! En owero ni: “Ki tung bota, bedo cok ki Lubanga aye ber; in Rwot Lubanga aye dong idoko kalarrena.”​—Jab. 73:28.

¹⁰ Bedo pa Lubanga macalo dul ma kipoko bot Acap onongo pire tek bot Acap makato jami me kom ma kimine macalo Lalevi. Gin ma en tye ka lok iye-ni onongo obedo mot me ticce kacel ki watte ki Jehovah, lurem ma en odongo i kingi ki Ngat Mamalo Twal. (Yak. 2:21, 23) Pi gwoko wat meno, laco Jabuli man ogwoko niyene i kom Jehovah, kun geno en. Acap obedo ki gen ni adwogi me kwone bibedo maber ka ekwo ma lubbe ki cik pa Lubanga. In bene itwero bedo ki gen acel-lu i kom Won Twer Ducu.

11. Lapeny ango ma Jeremia obedo kwede, dok kigamo nining?

¹¹ Lanebi Jeremia bene obedo Lalevi ma owaco ni Jehovah obedo dul ma kipoko bote. Kong wanen gin ma en onongo tye ka lok iye i kare ma en owaco kumeno. Jeremia okwo i Anatot, gang pa Lulevi ma tye cok ki Jerucalem. (Jer. 1:1) I kare mo, Jeremia obedo ki ur ni: Pingo lutim maraco gilony kun jo ma kitgi beco gibedo lupeko? (Jer. 12:1) I nge neno jami ma tye ka timme i Jerucalem  ki Juda, en owinyo ni myero ecwal ‘kokone’ i kom gin ma eneno. Jeremia onongo ngeyo ni Jehovah kite atir. I ngeye, gin ma Jehovah omiyo Jeremia oloko macalo lanebi ki kit ma En ocobo kwede lok meno omiyo lagam mucwiny i kom lapeny pa lanebi-ni. Ma lubbe ki lok pa lunebi, jo ma gulubo tira pa Jehovah ‘kwogi obedo botgi,’ ento lutim maraco ma gulony gucayo cik ma kicikogi kwede ci guto.​—Jer. 21:9.

12, 13. (a) Ngo ma oweko Jeremia owacci: “Rwot [Jehovah] aye dul ma gipokka,” dok cwiny ango ma onongo en tye kwede? (b) Pingo kaki ducu me Icrael onongo myero gubed ki cwiny me kuro Lubanga?

¹² Lacen, i kare ma Jeremia oneno wi obwur me lobogi, en owinyo marac calo etye ka wot i col piny. Onongo bedo calo Jehovah oweko en ebedo “calo dano muto yam wa con.” (Koko 1:1, 16; 3:6) Jeremia onongo owaco bot jo me lobone ma wigi otang ni gudwog cen bot Wongi me polo, ento balgi onongo dong oo ka ma Lubanga oweko ni omyero kitur Jerucalem ki Juda. Man ocwero cwiny Jeremia, kadi bed en onongo pe ki bal. I kare ma cwinye tye ka cwer, wi lanebi-ni opo pi kica pa Lubanga. En owaci gin mumiyo gin pe gitum-mi pien “Kicane bene pe tum.” Dong, kica pa Jehovah bedo nyen i odiko ducu! I kare meno aye Jeremia owaco ni: “Rwot [Jehovah] aye gin ma gipokka.” En omedde ki bedo ki mot me tic calo lanebi pa Jehovah.​—Kwan Koko 3:22-24.

¹³ Pi mwaki 70, Luicrael onongo gibibedo labongo pacogi. Onongo obedo wi obur. (Jer. 25:11) Ento lok pa Jeremia ni “Rwot [Jehovah] aye gin ma gipokka” onyuto genne i kica pa Lubanga, omiyo en obedo ki cwiny me ‘kuro en.’ Kaki ducu me Icrael onongo dong gurwenyo ginaleyagi, dok onongo mitte ni gubed ki cwiny calo pa lanebi-ni. Jehovah keken aye onongo obedo gengi. I nge mwaki 70, kidwoko jo pa Lubanga i lobogi kun gibedo ki mot me tic pire.​—2 Tekwaro 36:20-23.

Jo Mukene Onongo Gitwero Weko Jehovah Bedo Dul ma Kipokigi

14, 15. Mapat ki Lulevi, anga ma oweko Jehovah obedo dul ma kipoke, dok pingo?

¹⁴ Acap ki Jeremia onongo gia ki i kaka pa Levi, ento mono Lulevi keken aye onongo gitwero bedo ki mot me tic pi Jehovah? Pe kumeno! Daudi, ma onongo tye ka kuro bedo kabaka pa jo Icrael, owaco ni Lubanga aye “dul ma gipokka i lobo pa jo makwo.” (Kwan Jabuli 142:1, 5.) I kare ma Daudi ocoyo Jabuli man, en onongo pe i gang kal nyo i ot. En onongo tye i boro, ka kanne ki bot lukworre. Tyen aryo kulu, Daudi okanne i boro​—acel obedo cok ki Adulam ki mukene-ni obedo i tim me En-gedi. En nen calo ocoyo Jabuli 142 ki i boro acel i kingi.

¹⁵ Ka Daudi ocoyo Jabuli man ki i boro acel i kin boro magi, ci onongo en tye ka kanne ki bot Caulo. Daudi okanne i boro ma donyo iye tek adada. (1 Cam. 22:1, 4) I kabedo mukane man, onongo dong romo nen ki i wang Daudi ni lareme mo pe i ngete ma romo konyo kore. (Jab. 142:4) I kare meno aye Daudi okok iye bot Lubanga.

16, 17. (a) Tyen lok mene ma oweko Daudi owinyo marac adada? (b) Nga ma Daudi onongo twero lokke bote pi kony?

¹⁶ I kare ma Daudi ocoyo Jabuli 142, en onongo nen calo ongeyo gin ma otimme i kom Lalam Dog Madit Akimelek, ma onongo omiye kony i kare ma en ngweco ki bot  Caulo. Kabaka Caulo ma lanyeko-ni omiyo kineko Akimelek ki jo me ode ducu. (1 Cam. 22:11, 18, 19) Daudi otero ni alii me to pa joni tye i wiye. Onongo bedo calo en oneko lalam dog ma okonyo en. Ka onongo in Daudi, onongo mono ibiketo alii man i wi? Medo i kom peko pa Daudi, en onongo pe twero ywe pien Caulo onongo tye ka ryemo kore.

¹⁷ I nge meno lanebi Camuel owiro Daudi me bedo kabaka i anyim, ci en oto. (1 Cam. 25:1) Man oromo bedo ni omiyo Daudi obedo ka winyo marac adada. Ento, Daudi ongeyo nga ma en etwero lokke bote pi nongo kony​—bot Jehovah. Daudi onongo pe tye ki mot me tic calo pa Lulevi, ento onongo kityeko wire me tiyo tic mukene, me bedo kabaka pa jo pa Lubanga. (1 Cam. 16:1, 13) Pi meno, Daudi oloko lok ma i cwinye bot Jehovah kun kuro tira ki bot Lubanga. In bene itwero dok myero iwek En obed dul ma kipoko boti ki kalareni kun iyelle matek i ticce.

18. Jo ma waloko i komgi i pwony man gunyuto ni Jehovah obedo dul ma kipokigi nining?

¹⁸ Jo ma wabedo ka lok i komgi-ni onongo guweko Jehovah obedo dul ma kipokigi i yo ni, kimiyogi gin atima i ticce. Gujenge i kom Lubanga pi nongo jami me kwo ka gitye i ticce. Lulevi kacel ki jo me kaki mukene me Icrael, calo Daudi, onongo gitwero weko Lubanga bedo dul ma kipokigi. In kono itwero weko Jehovah bedo dul ma kipoki nining? Wabinyamo lokki i pwony ma lubo man.

[Lok ma tye piny]

Itwero Gamone Nining?

• I yo ango ma Jehovah obedo dul ma kipoko bot Lulevi?

• Ngo ma Acap, Jeremia, ki Daudi gutimo me nyuto ni Jehovah onongo obedo dul ma kipokigi?

• Kit ango ma myero ibed kwede wek Lubanga obed dul ma kipoki?

[Peny me Kwan]

[Boro buk i pot karatac 11]

Lulevi pe gunongo ngom me bedo ginaleyagi. Ento, Jehovah aye onongo obedo dul ma kipokigi, pien gin onongo gitye ki tic madit i ticce

[Cal ma tye i pot karatac 10]

Jehovah onongo obedo dul ma kipoko bot lulamdog ki Lulevi nining?

[Cal ma tye i pot karatac 12]

Ngo ma okonyo Acap me medde ki weko Jehovah bedo dul ma kipoke?