Si Jehova Amo ang Akon Bahin

“Ako amo ang imo bahin kag imo panublion sa tunga sang katawohan sang Israel.”—NUM. 18:20.

1, 2. (a) Kon parte sa palanublion nga duta, ano ang natabo sa mga Levinhon? (b) Ano nga pasalig ang ginhatag ni Jehova sa mga Levinhon?

SANG dali na lang matapos sang mga Israelinhon ang pagsakop sa Ginsaad nga Duta, ginbahinbahin ni Josue ang duta paagi sa papalad. Ginhimo niya ini upod sa Mataas nga Saserdote nga si Eleazar kag sa mga pangulo sang tribo. (Num. 34:13-29) Apang ang mga Levinhon wala sing palanublion nga duta. (Jos. 14:1-5) Ngaa wala sing bahin ang mga Levinhon? Ginpabay-an bala sila?

² Makita naton ang sabat sa pasalig ni Jehova sa mga Levinhon. Agod ipakita nga wala sila ginpabay-an, sia nagsiling: “Ako amo ang imo bahin kag imo panublion sa tunga sang katawohan sang Israel.” (Num. 18:20) Mabakod gid ini nga pasalig: “Ako amo ang imo bahin”! Ano ang batyagon mo kon ikaw ang ginsilingan sini ni Jehova? Ayhan mamangkot ka, ‘Takus bala ako nga hatagan sang amo sini nga pasalig sang Labing Gamhanan?’ Basi maghunahuna ka, ‘Posible bala nga si Jehova mangin amo ang bahin sang bisan sin-o nga di-himpit nga mga Cristiano?’ Ikaw kag ang imo mga pinalangga nadalahig sa sini nga mga pamangkot. Gani hibaluon naton kon ano ang buot silingon sining pinamulong sang Dios. Makabulig ini nga mahangpan naton kon paano si Jehova mangin amo ang bahin sang mga Cristiano. Labaw sa tanan, mahimo sia mangin amo ang imo bahin, sa langit man ang imo paglaum ukon sa paraiso sa duta.

Gin-amanan ni Jehova ang mga Levinhon

3. Paano nakuha sang Dios ang mga Levinhon para mag-alagad sa iya?

³ Antes ginhatag ni Jehova ang Kasuguan sa mga Israelinhon, ang mga ulo sang pamilya amo ang nagaalagad subong ila mga saserdote. Sang yara na ang Kasuguan, nagpili ang Dios sang bug-os tion nga mga saserdote kag mga kabulig nila halin sa tribo ni Levi. Paano ini natabo? Sang ginpatay sang Dios ang panganay sang mga Egiptohanon, ginpakabalaan niya ang panganay sang mga Israelinhon, nga nagapain sa ila subong iya pagkabutang. Nian ginhimo sang Dios ining daku nga pagbag-o: “Ginkuha ko ang mga Levinhon . . . sa baylo sang tanan nga panganay nga una maggowa sa taguangkan sa katawohan sang Israel.” Pero nakita sa sensus nga mas madamo ang panganay sang mga Israelinhon sangsa mga Levinhon, gani gingawad ang sobra sa ila. (Num. 3:11-13, 41, 46, 47) Amo nga masugdan na sang mga Levinhon ang ila asaynment sa pag-alagad sa Dios sang Israel.

4, 5. (a) Ano ang buot silingon nga ang Dios amo ang bahin sang mga Levinhon? (b) Paano ginaamanan sang Dios ang mga Levinhon?

⁴ Ano ang buot silingon sini nga asaynment para sa mga Levinhon? Si  Jehova nagsiling nga sia amo ang ila bahin sa kahulugan nga sa baylo sang duta nga palanublion, gintugyanan sila sang wala tupong nga pribilehiyo sang pag-alagad. Ang “pag-alagad kay Jehova bilang mga saserdote amo ang ila palanublion.” (Jos. 18:7, NW) Ginapakita sang konteksto sang Numeros 18:20 nga indi sila mag-imol bangod sini. (Basaha ang Numeros 18:19, 21, 24.) Ang mga Levinhon hatagan sing “tanan nga ikapulo sa Israel subong nga panublion, nga balus sa ila pag-alagad.” Makabaton sila sang 10 porsiento sang patubas sang Israel kag sang mga kahayupan. Pero ang mga Levinhon dapat man mag-amot sang ikapulo sa ila mabaton, ang ‘pinakaali,’ agod sakdagon ang pagkasaserdote. * (Num. 18:25-29) Ginahatag man sa mga saserdote “ang tanan nga halad-nga-binayaw sang mga butang nga balaan” nga ginadulot sang mga Israelinhon sa Dios sa iya duog sang pagsimba. Gani makasalig gid ang mga saserdote nga amanan sila ni Jehova.

⁵ Ang iban nagapati nga may isa pa gid ka ikapulo nga ginapatuman ang Mosaikong Kasuguan para sakdagon ang panimalay kag ang balaan nga mga pagtinipon kada tuig. (Deut. 14:22-27) Apang, sa katapusan sang kada ikatlo kag kada ikan-um nga tuig sang pito ka tuig nga inugpahuway, ini nga ikapulo dapat ibutang sa gawang para sa mga imol kag sa mga Levinhon. Ngaa nalakip ang mga Levinhon? Bangod “wala [sila] sing bahin ukon palanublion” sa Israel.—Deut. 14:28, 29, NW.

6. Diin maistar ang mga Levinhon kay wala sila sing palanublion sa Israel?

⁶ Mahimo ka mamangkot, ‘Diin maistar ang mga Levinhon kay wala sila sing duta?’ Ginhatagan sila sang Dios sing 48 ka siudad nga may mga halalban. Lakip sa sini ang anom ka siudad nga dalangpan. (Num. 35:6-8) Gani may pulian sila kon wala sila nagaalagad sa santuaryo sang Dios. Bugana nga ginaamanan ni Jehova ang mga nagaalagad sa iya. Mapakita gid sang mga Levinhon nga si Jehova amo ang ila bahin paagi sa pagsalig sa kahanda kag gahom sang Dios sa pag-aman sa ila.

7. Ano ang dapat himuon sang mga Levinhon agod si Jehova mangin amo ang ila bahin?

⁷ Ang Kasuguan wala sing ginapatuman nga silot sa mga indi makahatag sang ila ikapulo. Pero kon pasapayanan sang katawhan ang paghatag sing ikapulo, daku ang epekto sini sa mga saserdote kag mga Levinhon. Natabo ini sang tion ni Nehemias. Gani ang mga Levinhon nagbalik sa ila mga latagon kag ginpabay-an ang ila asaynment. (Basaha ang Nehemias 13:10.) Makapadayon lamang sa pag-alagad ang mga Levinhon kon sakdagon sila sang bug-os nga pungsod. Dugang pa, ang mga saserdote kag mga Levinhon dapat magtuo kay Jehova kag sa iya paagi sa pagsakdag sa ila.

Mga Indibiduwal nga si Jehova Amo ang Ila Bahin

8. Ano ang problema sang Levinhon nga si Asaf?

⁸ Subong isa ka tribo, si Jehova amo ang bahin sang mga Levinhon. Apang talalupangdon nga may pila ka Levinhon nga nagpabutyag sang ila debosyon kag pagsalig sa Dios paagi sa pagsiling, “Ang GINOO ang akon bahin.” (Pan. 3:24) Ang isa sa ila manug-amba kag kompositor. Tawgon naton sia nga si Asaf, bisan mahimo nga miembro lang sia sang panimalay ni Asaf, ang Levinhon nga nanguna sa mga manug-amba sang panahon ni Hari David. (1 Cron. 6:31-43) Mabasa naton sa Salmo 73 nga si Asaf (ukon isa sang iya kaliwat) nagpalibog kag nahisa sa malauton nga nagmanggaranon. Nakasiling pa gani sia: “Sa pagkamatuud walay pulus  ang pagtinlo ko sang akon tagiposoon kag ang paghinaw ko sang akon mga kamut sa pagkawalay sala.” Posible nga nadula ang iya pukos sa pribilehiyo niya sa pag-alagad; kag wala niya maapresyar nga si Jehova amo ang iya bahin. Nagluya gid sia sa espirituwal “tubtub nga nagsulud [sia] sa santuario sang Dios.”—Sal. 73:2, 3, 12, 13, 17.

9, 10. Ngaa ginpatuhuyan ni Asaf ang Dios nga amo ang iya ‘bahin sa gihapon’?

⁹ Nagbag-o ang pagtamod ni Asaf sang nakasulod sia sa santuaryo. Mahimo nga nakaeksperiensia ka man sini. Ayhan kon kaisa nagakadula man ang imo apresasyon sa imo mga pribilehiyo sa espirituwal kag nagahandum sang mga butang nga wala sa imo. Apang paagi sa pagtuon sa Pulong sang Dios kag pagtambong sa mga miting, napahisuno mo ang imo pagtamod sa pagtamod ni Jehova. Nahantop ni Asaf kon ano ang madangatan sang mga malauton. Ginhunahuna niya ang iya kahimtangan kag narealisar nga kaptan ni Jehova ang iya tuo nga kamot kag tuytuyan sia. Gani makasiling si Asaf parte kay Jehova: “Wala ako sing ginahandum sa duta luwas sa imo.” (Sal. 73:23, 25) Dayon nagsiling sia nga ang Dios amo ang iya bahin. (Basaha ang Salmo 73:26.) Bisan nga ang ‘unud kag tagipusoon sang salmista nagaluya,’ ang Dios ‘mangin bahin niya sa gihapon.’ Nagasalig ang salmista nga dumdumon sia ni Jehova subong abyan. Ang iya katutom indi malipatan. (Man. 7:1) Makapaumpaw gid ini kay Asaf! Nag-amba sia: “Maayo sa akon nga magpalapit sa Dios; ginhimo ko nga akon dalangpan ang Ginoong DIOS.”—Sal. 73:28.

¹⁰ Gani sang nagsiling si Asaf nga si Jehova amo ang iya bahin, wala niya ginapatuhuyan ang materyal nga mga butang nga iya ginabaton subong Levinhon kundi ang iya pag-alagad kag pagpakig-abyan sa Labing Mataas. (Sant. 2:21-23) Agod mahuptan ina nga kaangtanan, dapat padayon sia nga magtuo kag magsalig kay Jehova. Dapat magsalig sia nga maayo ang iya madangatan kon sundon niya ang talaksan sang Dios. Makasalig ka man sing amo sini sa Labing Gamhanan.

11. Ano ang pamangkot ni Jeremias, kag paano ini nasabat?

¹¹ Ang manalagna nga si Jeremias isa man ka Levinhon nga nagakilala nga si Jehova amo ang iya bahin. Binagbinagon naton kon ngaa nakasiling sia sini. Si Jeremias nagapuyo sa Anatot, isa ka siudad sang mga Levinhon malapit sa Jerusalem. (Jer. 1:1) Isa ka bes, nakapamangkot sia: Ngaa nagauswag ang mga malauton samtang nagaantos ang mga matarong? (Jer. 12:1) Sang nakita niya ang nagakatabo sa Jerusalem kag Juda, nakareklamo sia. Nahibaluan niya nga matarong si Jehova. Nasabat ang iya pamangkot paagi sa ginpatagna ni Jehova sa iya kag kon paano gintuman ni Jehova ini nga mga tagna. Bilang katumanan sini, ang mga nagtuman sa sugo ni Jehova nakabaton sang ila ‘kabuhi subong ila inagaw,’ samtang nalaglag ang mainuswagon nga mga malauton kay wala nila ginsapak ang paandam.—Jer. 21:9.

12, 13. (a) Ngaa nakasiling si Jeremias nga: “Ang GINOO ang akon bahin,” kag ano ang iya panimuot? (b) Ngaa dapat maglaum ang tanan nga tribo sang Israel?

¹² Sang ulihi, samtang ginatan-aw ni Jeremias ang kagulub-an sang ila siudad, pamatyag niya daw nagalakat sia sa kadudulman. Daw  subong bala nga ‘ginpapungko sia ni Jehova kaangay sang tawo nga madugay na nga napatay.’ (Pan. 1:1, 16; 3:6, NW) Ginsilingan ni Jeremias ang batinggilan nga pungsod nga manumbalik sa ila Amay sa langit, pero sobra na gid sila kalaut gani gintugutan sang Dios nga malaglag ang Juda kag Jerusalem. Tuman ang kasubo ni Jeremias, bisan pa indi sia ang balasulon sa sini. Walay sapayan sang iya ginbatyag, gindumdom sang manalagna ang kaluoy sang Dios. “Wala kita pagpapasa,” siling niya. Huo, ang kaluoy ni Jehova bag-o kada aga! Dayon nagsiling si Jeremias: “Ang GINOO ang akon bahin.” Padayon sia nga nag-alagad kay Jehova subong manalagna.—Basaha ang Panalabiton 3:22-24.

¹³ Sa sulod sang 70 ka tuig, ang duta sang mga Israelinhon mangin mamingaw. (Jer. 25:11) Apang ang ginsiling ni Jeremias nga “ang GINOO ang akon bahin” nagapakita sang iya pagsalig sa kaluoy sang Dios, kag may rason gid sia nga ‘maglaum.’ Nadula sang tanan nga tribo ang ila palanublion, gani dapat man nila ilugon ang panimuot sang manalagna. Si Jehova lamang ang ila paglaum. Pagkatapos sang 70 ka tuig, nagbalik sila sa ila duta kag may pribilehiyo nga alagaron sia.—2 Cron. 36:20-23.

Mahimo Man sang Iban nga si Jehova Amo ang Ila Bahin

14, 15. Magluwas sa mga Levinhon, sin-o pa ang naghimo kay Jehova nga amo ang iya bahin, kag ngaa?

¹⁴ Sanday Asaf kag Jeremias mga Levinhon, apang ang mga Levinhon lang bala ang may pribilehiyo nga mag-alagad kay Jehova? Indi! Ang lamharon nga si David, ang palaabuton nga hari sang Israel, nagtawag sa Dios nga iya “bahin sa duta sang mga buhi.” (Basaha ang Salmo 142:1, 5.) Sang ginkomposo niya ini nga salmo, wala sia sa palasyo ukon sa balay. Yara sia sa kueba nga nagapanago sa iya mga kaaway. Indi magkubos sa duha ka beses nga nagpanago si David sa kueba—ang isa malapit sa Adullam kag ang isa sa kamingawan sa En-gedi. Mahimo nga ginkomposo niya ang Salmo 142 sa isa sining kueba.

¹⁵ Ayhan amo ini ang tion nga ginalagas ni Hari Saul si David kay luyag niya sia patyon. Nalagyo si David sa isa ka kueba nga mabudlay kadtuan. (1 Sam. 22:1, 4) Sa sining malayo nga duog, mahimo nga wala sia sing abyan nga magaamlig sa iya. (Sal. 142:4) Gani, nangayo sia sing bulig sa Dios.

16, 17. (a) Ano ang mga rason kon ngaa nagbatyag si David nga wala sia sing mahimo? (b) Kay sin-o makapangayo sing bulig si David?

¹⁶ Sang ginkomposo ni David ang Salmo 142, mahimo nabalitaan niya ang pagpatay kay Ahimelec, ang Mataas nga Saserdote nga nagbulig sa iya. Wala makahibalo ang saserdote nga nagapalagyo si David kay Saul. Ginpapatay sang mahisaon nga si Hari Saul si Ahimelec kag ang iya bug-os nga panimalay. (1 Sam. 22:11, 18, 19) Nagbatyag si David nga sia ang balasulon sang ila kamatayon, kag nga daw sia mismo ang nagpatay sa saserdote nga nagbulig sa iya. Kon ikaw ang sa lugar ni David, amo man bala sina ang imo batyagon? Nabudlayan pa gid si David kay wala untat ang paglagas ni Saul sa iya.

¹⁷ Dayon, napatay si Samuel, ang manalagna nga nagtangdo kay David nga mangin hari. (1 Sam. 25:1) Pamatyag ni David daw wala na sia sing mahimo. Apang nahibaluan niya nga makapangayo sia sing bulig kay Jehova. Ang pribilehiyo ni David indi pareho sa mga Levinhon, apang gintangdo na sia sa isa ka sahi sang pag-alagad, ang mangin hari sang katawhan  sang Dios. (1 Sam. 16:1, 13) Gin-ula ni David ang iya tagipusuon kay Jehova kag padayon nga nagpatuytoy sa Iya. Mahimo mo man si Jehova nga amo ang imo bahin kag dalangpan samtang nagapadayon ka sa pag-alagad sa iya.

18. Paano ginpakita sang mga tawo nga ginbinagbinag naton sa sini nga artikulo nga si Jehova amo ang ila bahin?

¹⁸ Para sa mga alagad ni Jehova nga ginbinagbinag naton, ano ang buot silingon nga si Jehova amo ang ila bahin? Sila tanan ginhatagan sing asaynment sa pag-alagad sa iya. Nagsalig sila nga amanan sila sang Dios samtang nagaalagad sila sa iya. Ang mga Levinhon kag ang halin sa iban nga tribo sang Israel, pareho ni David, nakahimo kay Jehova nga amo ang ila bahin. Paano mo man mahimo si Jehova nga amo ang imo bahin? Binagbinagon naton ina sa masunod nga artikulo.

[Nota]

Ano ang Imo Sabat?

• Sa ano nga kahulugan nga si Jehova amo ang bahin sang mga Levinhon?

• Ano ang ginhimo nanday Asaf, Jeremias, kag David agod ipakita nga si Jehova amo ang ila bahin?

• Ano nga kinaiya ang kinahanglan agod mahimo mo ang Dios nga amo ang imo bahin?

[Mga Pamangkot sa Pagtinuon]

[Blurb sa pahina 8]

Wala sing duta nga palanublion ang mga Levinhon. Si Jehova amo ang ila bahin bangod may daku sila nga pribilehiyo nga alagaron sia

[Retrato sa pahina 7]

Paano si Jehova nangin amo ang bahin sang mga saserdote kag mga Levinhon?

[Retrato sa pahina 9]

Ano ang nakabulig kay Asaf agod si Jehova mangin amo ang iya bahin sa gihapon?