Iehova be Egu Ahuna

“Lau Lohiabada sibona be oiemu ahuna namona.”​—NUM. 18:20.

1, 2. (a) Iehova ese Israela taudia dekenai tano ia haria neganai, Levi iduhuna be edena bamona? (b) Levi iduhu dekenai Iehova ena gwauhamata be dahaka?

ISRAELA taudia ese Gwauhamata Tanona idia abia murinai, Iosua, Hahelaga Tauna Eleasara bona iduhu gunalaia taudia be iduhu ta ta dekenai tano idia haria. (Num. 34:​13-29) Iehova ese iduhu ibounai dekenai tano ia henia, to Levi iduhuna dekenai tano ia henia lasi. (Ios. 14:​1-5) Dahaka dainai Levi iduhu be Gwauhamata Tanona ena kahana ta idia abia lasi? Iehova ese idia ia laloaboio, a?

² Iehova ese Levi iduhuna dekenai ia gwauraia herevana ese unai ia haerelaia. Ia gwau: “Lau Lohiabada sibona be oiemu ahuna namona.” (Num. 18:20) Iehova ia gwauhamata idia do ia rakatania lasi, bona unai ese idia ia hagoadaia. Bema Iehova be oi dekenai unai bamona ia hereva, emu hemami be edena bamona? Reana matamanai do oi gwau, ‘Lau hegeregere Iehova be egu ahuna ai lau halaoa totona, a? Hari, goevadae lasi Keristani tauna ta ese Iehova be ena ahuna ai ia halaoa diba, a?’ Oi bona emu lalokau taudia dekenai unai henanadai be mai anina bada. Herevana iseda helaro be guba o tanobada paradaisona ai, to inai stadi ese ita do ia durua Iehova be eda ahuna ai ita halaoa ena anina ita diba namonamo totona.

Iehova ese Levi Taudia Ia Naria

3. Edena dala ai Dirava ese Levi iduhuna amo hahelaga taudia ia abia hidi?

³ Iehova ese Israela taudia dekenai Taravatu ia do henia lasi neganai, ruma bese kwaradia be edia ruma bese totona hahelaga gaukara idia karaia. To, Iehova ese Taravatu ia henidia neganai, Levi iduhuna amo hahelaga taudia bona durua taudia ia abia hidi. Edena dala ai unai ia karaia? Iehova ese Aigupito edia vara guna natuna memerodia ia hamasea neganai, Israela taudia edia vara guna natudia ia abia, bona ia gwau “idia be helaga.” Anina be iena hesiai gaukara do idia karaia. To gabeai, Iehova be unai ia haidaua bona ia gwau: “Lau ese Levi taudia lau abia, idia ese Israela taudia edia vara guna natudia edia gabu do idia abia.” To, Israela ena iduhu ma haida edia vara guna natuna memerodia ese Levi taudia edia namba ia hanaia. Unai dainai Iehova ia gwau, unai natudia ta ta totona “edia davana be siliva moni 5” do idia henia Levi taudia dekenai. (Num. 3:​11-13, 41, 46, 47) Unai murinai, Levi taudia ese Dirava ena hesiai gaukara idia karaia matamaia.

4, 5. (a) Levi taudia edia ahuna be dahaka? (b) Edena dala ai Dirava ese Levi taudia ia naria?

⁴ Iehova ese Levi taudia ia abia hidi neganai, edena dala ai ia be edia  ahuna ai ia lao? Idia dekenai tano ia henia lasi to mai anina bada gaukara ta ia henidia. Bona unai gaukara be “Lohiabada ena hahelagaia taudia do idia lao.” (Ios. 18:7) Numera karoa 18 amo ita itaia idia be tauanina durua gaudia dekenai do idia dabu lasi. (Numera 18:​19, 21, 24 duahia.) Israela taudia ese ‘karoa ta be Levi taudia dekenai idia henia, edia gaukara ena davana.’ Anina be aniani bona animal edia karoa 10 amo karoa ta idia henidia. Bena Levi taudia ese idia abia gaudia amo karoa 10 ena karoa ta, “gau namo hereadia sibona,” be hahelaga taudia dekenai idia henia. * (Num. 18:​25-29) Israela taudia ese dubu helaga dekenai idia mailaia “harihari gaudia helagadia” be hahelaga taudia dekenai idia henia danu. Unai dainai, hahelaga taudia idia diba momokani Iehova be idia do ia naria.

⁵ Toana be Israela taudia ese karoa 10 amo karoa ma ta idia atoa siri. Lagani ta ta edia hebou idauidau ai mai moale ida unai aniani bona inuinu gaudia idia gaukaralaia. (Deu. 14:​22-27) To, badina ma ta dainai unai karoa idia atoa siri. Lagani namba 7 ibounai Israela taudia be Sabati laganina idia hahelagaia. To, lagani namba 3 bona 6 edia dokonai, Israela taudia be idia atoa siri karoa idia gaukaralaia ogogami taudia bona Levi taudia idia durua totona. Dahaka dainai unai taravatu ese Levi taudia ia gwauraia danu? Badina Israela ai “idia be kohu lasi bona tano lasi.”​—Deu. 14:​28, 29.

6. Ena be Levi taudia be tano lasi, to edeseni idia noho?

⁶ Bema Levi taudia be tano lasi, vadaeni edeseni idia noho? Dirava ese idia ia naria. Idia dekenai hanua 48 bona edia animal idia ubua gabudia danu ia henidia; hanua 6 be heau mauri hanuadia. (Num. 35:​6-8) Levi taudia be dubu helaga ai idia gaukara lasi neganai, unuseniai idia noho. Vadaeni, Levi taudia be edena dala ai idia hahedinaraia Iehova be edia ahuna? Idia diba momokani Iehova be mai ena siahu idia ia naria bona edia dabu gaudia do ia henia.

7. Levi taudia ese Iehova be edia ahuna ai idia halaoa totona, dahaka idia karaia be namo?

⁷ Bema Israela tauna be Levi taudia dekenai karoa ta ia henia lasi, Taravatu ia gwau lasi ia do idia panisia. To, Iehova ena Taravatu hegeregerena edia harihari gaudia idia henia lasi neganai, hahelaga bona Levi taudia idia dabu. Nehemia ena nega ai unai ia vara dainai, Levi taudia be edia gaukara helagana idia rakatania bona uma idia karaia. (Nehemia 13:10 duahia.) Israela taudia be Iehova ena Taravatu idia badinaia neganai, Levi taudia be tauanina dalanai idia dabu lasi. To danu, namona be hahelaga taudia bona Levi taudia ese Iehova idia abidadama henia bona idia abia dae ia ese do ia naridia.

Iehova be Edia Ahuna ai Idia Halaoa Tatau Rua

8. Asapa be dahaka dainai ia lalohekwarahi?

⁸ Levi iduhuna edia ahuna be Iehova. To, Levi taudia ta ta ese edia hetura karana Dirava ida idia herevalaia neganai, idia gwau “egu durua tauna [o ahuna] be tamona, Lohiabada sibona.” (Lal. 3:24) Hegeregere, ane ia torea bona abia Levi tauna ta be Baibel ese  ia sivarailaia. Ia be reana Asapa o ena bese tauna ta, bona King Davida ena nega ai ane abia taudia ia gunalaia. (1 Siv. 6:​31-43) Salamo 73 ese ia hahedinaraia, Asapa ia itaia kara dika taudia be mauri namona idia moalelaia, bona ia mama. Ia gwau: “Lau kara kava, a? Nega ibounai lauegu lalona lau hagoevaia, bona kara dika ta lau karaia lasi. Inai kara dekena amo namo ta lau davaria, a?” Toana be Asapa ia laloaboio Iehova ese ia henia gaukarana be mai anina bada. Danu, ia laloaboio Iehova be ena ahuna. Ia lalohekwarahi momo ela bona dina ta ‘Dirava ena Dubu Helaga dekenai ia vareai.’​—Sal. 73:​2, 3, 12, 13, 17.

9, 10. Dahaka dainai Asapa ese Salamo 73:26 ena hereva ia gwauraia?

⁹ Dubu helaga dekenai Asapa be lalohadai maorona ia abia. Reana oi dekenai unai ia vara danu. Reana, oi danu be oi ura abia kohu oi laloa momo bona emu hesiai gaukara namona oi laloaboio. To, Baibel oi stadilaia bona Keristani heboudia dekenai oi lao karana ese oi ia durua Iehova ena dala oi badinaia lou totona. Asapa be kara dika taudia dekenai do ia vara gauna ia lalopararalaia. Ia gwau Iehova ese iena imana idibana do ia dogoatao bona do ia hakaua. Bona Iehova dekenai ia gwau “tanobada dekenai, gau ta lau ura henia lasi, oi sibona.” (Sal. 73:​23, 25; Salamo 73:26 duahia.) Ia diba Iehova be turana ta bamona ia do ia laloatao noho bona ia karaia hesiai gaukarana do ia laloaboio lasi. (Had. 7:1) Unai ese Asapa ena lalona ia hagoadaia bada. Ia gwau: “Lau be Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani.”​—Sal. 73:28.

¹⁰ Unai dainai Asapa ia gwau “lau be hegeregere momokani” neganai, ia be tauanina durua gaudia sibona ia herevalaia lasi. To ia be ena hesiai gaukara bona iena hetura karana Atai Momokani Diravana ida ia herevalaia. (Iam. 2:​21-23) Asapa be Iehova ia tura henia noho totona, namona be Iehova ia abidadama henia. Bona ia diba bema Iehova ia kamonai henia, ia ese do ia hanamoa. Namona be oi danu oi abia dae momokani, Iehova ese oi do ia hanamoa.

11. Ieremia ena henanadai be dahaka? Bona Iehova ese edena dala ai ia haere henia?

¹¹ Levi tauna ma ta, peroveta tauna Ieremia ia gwau Iehova be iena ahuna. Iena hereva ena anina mani ita herevalaia. Ia be Ierusalema kahirakahira ia noho hanuana Anatoto dekenai ia noho. (Ier. 1:1) Ieremia be Ierusalema bona Iuda dekenai idia vara gaudia dainai, Iehova dekenai ia maumau. Ia gwau: “Badina dahaka kara dika taudia edia dala be ia namo lao noho? Bona dahaka dainai kara koikoi taudia edia noho ia namo lao noho?” (Ier. 12:1) Ieremia ia diba Iehova be kara maoromaoro Diravana. Iehova ese Ieremia ena henanadai ia haerelaia totona, ia hamaoroa Ierusalema ena moru do ia harorolaia, bena Iehova ese unai peroveta herevana ia hagugurua. Idia kamonai taudia idia  roho mauri, to idia kamonai lasi taudia idia mase.​—Ier. 21:9.

12, 13. (a) Dahaka dainai Ieremia ia gwau Iehova be “egu durua tauna” bona dahaka ia karaia? (b) Dahaka dainai Israela taudia ibounai ese Ieremia idia tohotohoa be namo?

¹² Gabeai, Ieremia ese ena hanua ia itaia, idia hadikaia momokani bona taunimanima idia noho lasi neganai, ia mamia ia be ‘idaunegai ia mase tauna bamona’ dibura ai ia raka. (Lal. 1:​1, 16; 3:6) Unai ia do vara lasi neganai, Ieremia ese Israela taudia ia hamaoroa edia guba Tamana dekenai do idia giroa lou. To edia kara be ia dika momokani dainai, Iehova ese Ierusalema bona Iuda hanuadia ia hadikaia. Ieremia ia lalohisihisi to ia diba Iehova ia karaia karana be maoro, bona ia laloparara ia bona ma haida idia roho mauri badina Iehova ena hebogahisi karadia be idia doko diba lasi, “daba ibounai idia be matamata.” Unai nega ai Ieremia ia gwau: “Egu durua tauna be tamona, Lohiabada sibona.” Oibe, Ieremia be ena peroveta gaukara ia do karaia noho, unai be iena ahuna.​—Lalohisihisi ena Ane 3:​22-24 duahia.

¹³ Lagani 70 lalonai Israela taudia edia tano be taunimanima ese do idia noholaia lasi. (Ier. 25:11) To, Ieremia ia gwau Iehova be “egu durua tauna” neganai, ia hahedinaraia ia be ‘Dirava dekenai iena abidadama ia atoa,’ bona Iehova ia naria kara ta ia karaia totona. Israela taudia ibounai be edia ahuna o tano idia haboioa, unai dainai Ieremia idia tohotohoa be namo. Badina Iehova sibona ese idia ia durua diba. Lagani 70 murinai, edia tano dekenai idia giroa bona Iehova idia hesiai henia lou.​—2 Siv. 36:​20-23.

Ma Haida ese Iehova be Edia Ahuna ai Idia Halaoa

14, 15. Levi taudia sibona ese Iehova be edia ahuna ai idia halaoa, a? Dahaka dainai?

¹⁴ Momokani Asapa bona Ieremia be Levi taudia, to Levi taudia sibona ese Iehova idia hesiai henia lasi. Hegeregere, mero matamata Davida, gabeai Israela ena king ai ia lao be ia gwau: “Egu mauri dinadia ibounai lalonai, lau ura oi sibona lau dekenai do oi noho.” (Salamo 142:​1, 5 duahia.) Davida be unai hereva ia torea neganai, ia be ruma ta dekenai ia noho lasi, to kohua lalonai ena inai taudia amo ia komu. Kohua ta be Adulama kahirakahira ia noho bona ma ta be Ene Gedi tano gagaena ai. Reana Salamo 142 be unai kohua ta lalonai ia torea.

¹⁵ Bema Davida be kohua lalonai unai salamo ia torea, anina be ia be King Saulo amo ia komu noho. Saulo ia ura Davida ia hamasea dainai, Davida be taunimanima idia lao diba lasi gabunai ia komu. (1 Sam. 22:​1, 4) Unai gabu ai, Davida ia mamia ia do ia durua tauna ta be lasi, unai dainai Dirava ia guriguri henia.​—Sal. 142:4.

16, 17. (a) Dahaka dainai Davida ia mamia ena durua tauna ta be lasi? (b) Heduru totona Davida be daika ia noia?

¹⁶ Reana Davida ese Salamo 142 ia do torea lasi neganai, Hahelaga Tauna Badana Ahimeleka ena sivarai ia kamonai. Ahimeleka be Davida ia heau boio ena badina ia diba lasi, to Davida ia durua. Unai dainai, King Saulo ia mama bona Ahimeleka mai ena bese ida ia hamasedia. (1 Sam. 22:​11, 18, 19) Davida ia mamia iena kerere dainai idia mase. Unai be hegeregere ia ese unai hahelaga  tauna ia hamasea. Bema oi be Davida, unai bamona do oi laloa danu, a? Danu, Davida ia laga-ani namonamo lasi, badina Saulo ese ia alaia totona ia do tahua noho.

¹⁷ Ahimeleka ia mase murinai, peroveta tauna Samuela ia mase. Ia ese Davida ia horoa king ai ia lao totona. (1 Sam. 25:1) Davida be ia lalohisihisi bada, badina ia mamia ena durua tauna ta be lasi. To, ia diba Iehova ese ia do ia durua. Iena gaukara be Levi taudia bamona lasi, to Iehova ese ia horoa mai anina bada gaukara ma ta ia karaia totona. Unai be Dirava ena taunimanima do ia lohiaia. (1 Sam. 16:​1, 13) Davida ese ena hemami bona lalohekwarahi gaudia be Iehova dekenai ia gwauraia bona Iehova dekenai ia tabekau. Oi danu ese Iehova be emu ahuna ai oi halaoa diba. Ia oi hesiai henia noho lalonai, namona be ia dekenai oi tabekau.

18. Levi taudia bona iduhu taudia ma haida be edena dala ai idia hahedinaraia Iehova be edia ahuna?

¹⁸ Inai stadi lalonai ita herevalaia taudia ese Iehova be edia ahuna ai idia halaoa ena anina be dahaka? Anina be idia ibounai be Iehova ese ia abia hidi ena hesiai gaukara idia karaia totona. Bona idia abia dae momokani Iehova ese idia do ia naria. Levi taudia bona iduhu taudia ma haida hegeregere Davida, ese Dirava be edia ahuna ai idia halaoa. Vadaeni, edena dala ai ita ese Iehova be eda ahuna ai ita halaoa diba danu? Vaira wiki ena stadi ai unai do ita herevalaia.

[Footnote]

Edena Bamona Do Oi Haere?

• Edena dala ai Iehova be Levi iduhuna edia ahuna?

• Asapa, Ieremia, bona Davida be edena dala ai idia hahedinaraia Iehova be edia ahuna?

• Dirava be emu ahuna ai ia lao totona, dahaka oi karaia be namo?

[Study Questions]

[Blurb on page 8]

Levi taudia be tano ta idia abia lasi. To, Iehova be edia ahuna badina idia dekenai mai anina bada gaukara ta ia henia

[Picture on page 7]

Edena dala ai Iehova be hahelaga taudia bona Levi taudia edia ahuna?

[Picture on page 9]

Dahaka ese Asapa ia durua Iehova be ena ahuna ai ia halaoa totona?