Yehova Diyi Iseka Dami

“Iseka deyi yami wuswana weyi yami mukachi kawanyana kaIsarela.”—KUCH. 18:20.

1, 2. (a) Chumanyi chamwekeni kudi aLevi hiyadiña nakuyazañena wuswana wetuña dachikaninu? (b) Yehova wayikonkomweneni nindidi aLevi?

 CHELILI aIsarela anatambuli dehi chibalu cheneni Chetuña daChikaninu, Yoshuwa watachikili kwanzañana ituña nachinjikijilu chakusakula nachu. Hakwanzañana, wazatili hamu naKapristu Muneni Eleyazari niakulumpi janyichidi. (Kuch. 34:13-29) Ilaña aLevi, hiyayinkeluhu wuswana wetuña datambwili nyichidi yikwawuku. (Yosh. 14:1-5) Muloñadi aLevi chabulililuwu kuyinka iluña Mwituña Dachikaninu hela iseka? Komana ayivulameneni hohu?

² Tukuwana ñakwilu mumazu ayilejeluwu aLevi kudi Yehova. Ilukenu chikupu nenu hiyayivulameneni hohuku, Yehova wayilejeli nindi: “Iseka deyi yami wuswana weyi yami mukachi kawanyana kaIsarela.” (Kuch. 18:20) Wayikanini chikupu nindi: “Iseka deyi yami”! Munateli kutiya ñahi, neyi yenu alejeluwu awa mazu kudi Yehova? Hadaha mukushikena dakuhosha nenu, ‘Ami hinashikilamu kunkana kudi Watwesha yejima munjila yamuchidiwuku?’ Munateli cheñi kuhosha nenu, ‘Mwalala Yehova nateli kwikala iseka damukwaKristu wabula kuwanina makonu?’ Awa malwihu anakundami kudenu niantaña jenu imwakeña. Tushinshikenu dinu mwatalisha awa mazu ajila. Muloña chikutuleñela kwiluka Yehova chinateli kwikalayi iseka dawakwaKristu makonu. Sweje-e dinu, nateli kwikala iseka denu, chili mwachiñejaña kuya mwiwulu hela munakutalila wuumi wamuparadisa hamaseki.

Yehova Wayakameneni Alevi

3. Chumanyi chaleñeleli Nzambi yatondi aLevi ekali akwakukalakala mudimu windi?

³ Henohu Yehova kanda yahani Lushimbi kudi aIsarela, nyitu yayisaka diwu akalakeleña neyi atupristu mukachi kawu. Nzambi chayinkeliyi Lushimbi, wayinkeli atupristu niankwashi akumuchidi waLevi. Chumichi chamwekeni ñahi? Chajilumwiniyi Nzambi awedi amuEjipitu, wajilikili awedi amuIsarela, ekalili antu jindi, akukalakala nyidimu yindi. Nzambi wafuukwiluhu nindi: “Nanonumu aLevi nayihiñishi mudi awedi awanyana kaIsarela ejima.” Chineli kuchinda kwamwekesheli nawu awedi awamayala awaIsarela abadikili kuvula aLevi, aheneni ifutu damuloña kulonda awanishi naambala yakeheli. (Kuch. 3:11-13, 41, 46, 47) Dichi aLevi atachikili kuzata mudimu wawu wakukalakela Nzambi yawaIsarela.

4, 5. (a) Chatalishili mudihi hakwila nawu aLevi amwilishi Nzambi yekali iseka dawu? (b) Indi Nzambi wayakameneni ñahi aLevi?

⁴ Indi mudimu wayinkeluwu aLevi watalishili mudihi? Yehova wahosheli nindi wateleli kwikala iseka dawu munjila yakwila nawu chatela ayinki wuswana wetuña dachikaninu, ayinkeli mudimu wasweja kulema. “Wupristu waYehova” diwadiña wuswana wawu.  (Yosh. 18:7) Nsona yaKuchinda 18:20 yatukwashaña kwiluka netu atwalekeluhu kwikala nayuma yakumujimba yakeñeleñawu. (Tañenu Kuchinda 18:19, 21, 24.) Alevi ateleleli kuyinka “yamwikumi yamuIsarela yiikali wuswana wawu, nanyidimu yawu.” Ayinkeleña yamwikumi yayuma yadimineñawu aIsarela niayimuna amavulu. Kuhiñahu, aLevi ateleleli kuhana mulambu wamwikumi wayuma yatambwilileñawu, “yoyuma yaswejamu kuwaha,” kulonda kukwasha nachu mudimu wawupristu. * (Kuch. 18:25-29) Atupristu ayinkeleña cheñi “nyilambu yakuleleka yejima yayuma yajila” yaleteleñawu anyana kaIsarela kudi Nzambi heluña dindi dakudifukwila. Dichi atupristu ateleleli kukuhwelela nawu Yehova wukuyakamena.

⁵ Antu amakwawu akuhwelela nawu aIsarela ahanineña yamwikumi yamuchiyedi. Dichi yisaka yawaIsarela azatishileña iyi yamwikumi hakulandamu yakudya, yakunwa, niyuma yakudiluñisha nachu hakupompa kwajila kwahachaaka. (Kuhit. 14:22-27) Hela chochu, iyi yamwikumi ayizatishileña cheñi munjila yikwawu. A Isarela adiña nakwanakana sabata hakumana kwachaaka chamuchitanu nachiyedi. Hakumana kwachaaka chamuchisatu nichamuchitanu nachimu, aIsarela azatishileña yamwikumi hakukwasha atuzweñi niaLevi. Muloñadi aLevi chayibombeleluwu munilu lushimbi? Muloña hiyadiña ‘neseka hela wuswana’ muIsarelaku.—Kuhit. 14:28, 29.

6. Hela chakwila hiyadiña nawuswana weseka detuña muIsarelaku, indi aLevi ashakamineña kudihi?

⁶ Hadaha munateli kutoñojoka nenu, ‘Indi aLevi ashakamineña kudihi chineli hiyayinkeluhu iseka dawu mwituña dachikaninuku?’ Nzambi wadiña nakuyakamena. Wayinkeli nyikala 48 nimaha adiña kwakwihi naniyi nyisumba. Wayinkeli cheñi ninyikala yitanu nawumu yakupulukilamu. (Kuch. 35:6-8) Dichi, aLevi adiña nanyikala mwakushakama hampinji yabulileñawu kukalakala mumalala aNzambi. Yehova wadiña nakwakamena chikupu antu adihanini nakukalakala mudimu windi. Eñañi, aLevi amwekesheli chikupu nawu Yehova wadiña iseka dawu kuhitila mukukuhwelela ñovu yindi yakukeña kuyakamena.

7. Chumanyi chateleli kwilawu aLevi hakwila nawu Yehova yekali iseka dawu?

⁷ Munshimbi hiyashimwini nawu kaIsarela wabulili kuhana yamwikumi ateleleli kumubabeshaku. Hampinji yabulileñawu antu kwovwahila lushimbi lwaYehova lwakuhana yamwikumi, atupristu niaLevi akabakeneña. Ichi chamwekeni mumafuku aNehemiya. Chafuminumu, aLevi atachikili kuzata mumahawu, nakudiwula mudimu wawu wakushimwina. (Tañenu Nehemiya 13:10.) Eñañi, yakudya yahandilileña muchidi wawaLevi yashindameneni hawuspiritu wanyunza. Kubombelahu, atupristu niaLevi ateleleli kumukuhwelela Yehova ninjila yindi yakuyiloñeshela yuma yakankililuwu.

Antu Amumweneña Yehova Nawu Diyi Iseka Dawu

8. Shimunenu kukala kwamweniyi kaLevi wejina daAsafwi.

⁸ Muchidi wawaLevi amumweneña Yehova nawu diyi iseka dawu. Ilaña, chalema kwiluka netu aLevi hamuntu hamuntu azatishili mazu akwila nawu “Yehova diyi iseka dami” hakumwekesha kudihana kwawu kudi Nzambi nikushindamena hadi yena. (Mukeŋa 3:24) Chakutalilahu, Bayibolu yahosha hadi kaLevi mukwakwimba nawa nsoneki wahosheli nindi Yehova diyi iseka dindi. Tukumutena netu Asafwi, hadaha wadiña muntu mukwawu wamuchisaka  chaAsafwi, kaLevi walombweleña añimbi mumpinji yaMwanta Davidi. (1 Kushi. 6:31-43) Mumukanda waMasamu 73 twatañaña netu Asafwi watachikili kutiyila ichima antu atama nawa helukili chaleñeleli ekaleña nachihandilu chachiwahiku. Wahosheli nindi: “Chalala nadikabishi tuhu kwami nakuditookesha mumuchima wami, nakwisuka kumakasami nibuli muloña.” Hadaha, wakañenyi kwiluka nindi mudimu windi wadiña walema nankashi; nawa wakañenyi kwiluka nindi Yehova diyi iseka dindi. Waneñeli ‘nicheñililiyi mumalala aNzambi.’—Mas. 73:2, 3, 12, 13, 17.

9, 10. Muloñadi Asafwi chamuteneniyi Nzambi nindi diyi ‘iseka dindi nyaka yejima’?

⁹ Chashikiliyi mumalala, Asafwi watachikili kumona yuma neyi chayimonañayi Nzambi. Hadaha ninenu mwamonahu dehi kukala kwokumu. Hekwawu mpinji yimu mwalekeli kulemesha mudimu wumwamukalakelaña Yehova nawa mwatachikili kutoñojoka hayuma yakumujimba yimwabula. Ilaña kuhitila mukudiza Izu daNzambi nikuya kukupompa kwawakwaKristu, mwatachikili kumona yuma neyi chayimonañayi Yehova. Asafwi welukili chuma chikayimwekena antu atama. Nkumininaku wahosheli nindi Yehova wakamukwata kuchikasa chindi chachidiilu nawa wakamulombola. Dichi Asafwi wahosheli kudi Yehova nindi: “Hanu hamaseki kwosi wacheñi inukukeñaku, chiña yeyi hohu.” (Mas. 73:23, 25) Wamuteneni Nzambi nindi diyi iseka dindi. (Tañenu Masamu 73:26.) Hela chakwila ‘mujimba nimuchima wañimbi yamasamu wamukumini,’ Nzambi wekalili ‘iseka dindi nyaka yejima.’ Ñimbi yamasamu welukili chikupu nindi Yehova wakamwanuka chineli hibwambu dindi. Hamba kajimbala mudimu windi wakalakeliyi nakashinshuku. (Mukwa. 7:1) Awa mazu atela amukolesheli chikupu Asafwi! Wembeli nindi: “Ami kwami chachiwahi kukundama kwakwihi naNzambi; namwila dehi Mwanta Yehova nami dimu mwami mwakubatamina.”—Mas. 73:28.

¹⁰ Dichi Asafwi chahosheliyi nindi Yehova diyi wadiña iseka dindi, hahosheleña hohu hamaheta atambwilili hakwikala kaLeviku. Wadiña nakuhosha hamudimu wamukalakeleliyi Yehova nihawubwambu windi naMukwakubadika. (Yak. 2:21-23) Hakwila nawu yatwalekuhu nawubwambu windi, ñimbi yamasamu wateleli kutwalekahu kumukuhwelela Yehova. Asafwi wateleli kwiluka nindi Yehova wakamukiswila wakekala nachihandilu chachiwahi kumbidi neyi wamwovwahilili Yehova. Anenu nawa mwatela kwiluka nenu Mukwakubadika wukayikiswila.

11. Indi Yeremiya wamwihwili Yehova nindidi, nawa amwakwili ñahi?

¹¹ Kaprofwetu Yeremiya diyi kaLevi mukwawu wahosheli nindi Yehova diyi iseka dindi. Tutalenu mwatalishiliyi hampinji yahosheliyi awa mazu. Yeremiya washakamineña muAnatoti, mumusumba wawaLevi wadiña kwakwihi naYerusalema. (Yere. 1:1) Mpinji yimu, Yeremiya wenhwili nindi: Muloñadi antu atama chahetelañawu ilaña aloña amoneña ihuñu? (Yere. 12:1) Chamweniyi yuma yamwekeneña muYerusalema nimuYuda, ‘wamutopekeli’ Yehova. Yeremiya welukili nindi Yehova waloña. Yehova wakwili lwihu lwaYeremiya kuhitila mukumuleja nindi yayi nakushimuna nsañu yakujilumuna nawa iwu wuprofwetu  washikijeweli. Antu amwovwahilili Yehova apulukili, ilaña antu atama abulili kutiyilila afwili.—Yere. 21:9.

12, 13. (a) Chumanyi chaleñeleli Yeremiya yahoshi nindi: “Yehova diyi iseka dami,” nawa chililwinyi chamwekesheliyi? (b) Muloñadi nyichidi yawaIsarela yejima chiyateleli kwikala nachikuhwelelu?

¹² Nkumininaku Yeremiya chamweniyi mahembi amukala mwashakamineñayi, watoñojokeli nindi wadiña nakwenda mumwidima. Chamwekeni neyi Yehova wamuleñeleli yashakami “neyi antu afwili dehi chachikulu.” (Mukeŋa 1:1, 16; 3:6) Yeremiya walejeli nyunza yawantu atama kufunta kudi Tata yawu wamwiwulu, ilaña kutama kwawu kwaswejeli nawa kwaleñeleli Nzambi yajilumuni musumba waYerusalema niYuda. Chamuneñesheli chikupu Yeremiya, hela chakwila havulumwinuku. Hampinji yaneñeliyi, iwu kaprofwetu wanukili luwi lwaNzambi. Wahosheli nindi, “Chanabuli kutunuñununawu.” Eñañi, wushona waYehova wabalumukaña wawiha habudidi habudidi! Dihafumini Yeremiya hakuhosha nindi: “Yehova diyi iseka dami.” Watwalekeluhu kumukalakela Yehova neyi kaprofwetu.—Tañenu Mukeŋa 3:22-24.

¹³ Mukala wawaIsarela wakashala mahembi hadi yaaka 70 nawa akawukisañana. (Yere. 25:11) Ilaña mazu ahosheli Yeremiya akwila nindi “Yehova diyi iseka dami” amwekesheli nawu wakuhweleli muluwi lwaNzambi, nawa chamuleñeleli yamwekeshi ‘kukuhwelela.’ Nyichidi yejima yawaIsarela yajimbesheli wuswana wawu, dichi ateleleli kwikala nayililu neyi yadiña naniwu kaprofwetu. Adiña hohu nakumuchiñeja Yehova. Chimwahitili yaaka 70, antu jaNzambi afuntili cheñi kunyikala yawu nawa atwalekeluhu kumukalakela.—2 Kushi. 36:20-23.

Antu Amakwawu Amumweni Yehova Nawu Diyi Iseka Dawu

14, 15. Kufumishaku aLevi, hinyi wamumweni Yehova nindi diyi iseka dindi, nawa muloñadi?

¹⁴ Asafwi niYeremiya afumini kumuchidi waaLevi, komana aLevi hohu diwu adiña nakukooleka kwakumuzatila Yehova? Inehi! Mukwenzi Davidi, wekalili mwanta muIsarela, wamuteneni Nzambi nindi diyi “iseka dami danañambwiluwu munu mwituña dawakwakuhanda.” (Tañenu Masamu 142:1, 5.) Hampinji yasonekeli Davidi idi isamu, hadiña muchipañu hela mwitalaku. Wadiña mwiyeñu, waswamini ayilumbu jindi. Davidi wabatamini kapampa kayedi mwiyenu, katachi kukamwihi nakuAdulami nawa kamuchiyedi muchinkalampata chakuEngedi. Watela wasonekeleli mukanda waMasamu 142 mwiyeñu dimu.

¹⁵ Neyi Davidi wasonekeli iwu mukanda waMasamu mwiyeñu, dikwila nawu wadiña nakutemuka Mwanta Sawulu. Sawulu wakeñeleña kumujaha Davidi, dihafumini hakuswama mwiyeñu mwaswamanyika. (1 Sam. 22:1, 4) Imu mwiyeñu mwaswamanyika, Davidi wamweni nindi hadiña nebwambu dindi wateleli kumukiñaku. (Mas. 142:4) Iyi diyi mpinji yalombeliyi Davidi kudi Nzambi nindi yamukwashi.

16, 17. (a) Yumanyi yamuleñeleli Davidi yatoñojoki nindi hadiña nawakumukwashaku? (b) Davidi walombeli wukwashu kudinyi?

¹⁶ Hampinji yasonekeliyi Davidi Masamu 142, hadaha watiyili chuma chamumwekeneni Kapristu Muneni Ahimeleki, wamukwashili chakadi kwiluka hampinji yamutemukileñayi Sawulu. Mwanta Sawulu wechima wamujahili Ahimeleki nichisaka chindi chejima. (1 Sam. 22:11, 18, 19) Davidi watoñojokeli nindi diwaleñeleli  ayijahi. Wamweni neyi wamujahili kapristu wamukwashili. Neyi yenu mwamweni kukala kwamumwekeneni Davidi, mwadi kutoñojoka neyi chatoñojokeliyi Davidi? Davidi hamweni hakunookelaku, muloña Sawulu watwalekeluhu nakumuhaña.

¹⁷ Chimwahitili mpinji yantesha kaprofwetu Samweli amujahili, wamuwayishili Davidi kulonda yakekali mwanta. (1 Sam. 25:1) Ichi chamuleñeleli Davidi yasweji kutoñojoka nindi hadiña nawakumukwashaku. Ilaña, Davidi welukili kwateleleli kulombayi wukwashu, kudi Yehova. Davidi hadiña namudimu neyi wazatileña aLeviku, ilaña wadiña amuwayisha dehi kulonda yazati mudimu wukwawu, wakwikala mwanta wawantu jaNzambi. (1 Sam. 16:1, 13) Dichi, Davidi walombeli kudi Yehova namuchima wejima nawa watwalekeluhu nakukuhwelela wunlomboli waNzambi. Anenu nawa mwatela kumumona Yehova nenu diyi iseka denu nikumukuhwelela hampinji yimunakutwalekahu nakudikita mumudimu windi.

18. Indi antu itunahanjekuhu muchinu chibaaba amwekesheli ñahi nawu Yehova wadiña iseka dawu?

¹⁸ Antu itunahanjekuhu amumweneña Yehova nawu diyi iseka dawu muloña wayinkeli mudimu wakukalakala. Akuhweleleli cheñi nawu Nzambi wukuyakamenaña hampinji yadiña nakumukalakelawu. Alevi niantu amakwawu amunyichidi yamuIsarela, adi neyi Davidi, amumweneña Nzambi nawu diyi iseka dawu. Komana ninenu mwatela kumumona Yehova nenu diyi iseka denu? Iyi diyi nsañu yitukahanjekahu muchibaaba chinahiñuhu.

[Tumazu twaheshina]

Mukwakula Nenudi?

• Munjilanyi mwekaliliyi Yehova iseka dawaLevi?

• Chumanyi cheliliyi Asafwi, Yeremiya, niDavidi, chamwekesheli nawu amumweneña Yehova nawu diyi iseka dawu?

• Mwatela kwikala nachililu chamuchidinyi hakwila nawu Nzambi yekali iseka denu?

[Malwihu aKuzatisha haKudiza]

[Mazu ekoku adi hefu 8]

Alevi hiyayinkeli wuswana wetuñaku. Ilaña, Yehova diyi wadiña iseka dawu, muloña adiña nakukooleka kweneni kwakumukalakela

[Mwevulu wudi hefu 7]

Indi Yehova wekalili ñahi iseka dawatupristu niaLevi?

[Mwevulu wudi hefu 9]

Chumanyi chamukwashili Asafwi kutwalekahu kumumona Yehova nindi diyi iseka dindi?