Si Jehova so Apag Ko

“Siak so apag mo tan tawir mo ed utel na saray anak na Israel.”​—NUM. 18:20.

1, 2. (a) Antoy situasyon na saray Levita no nipaakar ed apagan na dalin? (b) Antoy impaseguro nen Jehova ed saray Levita?

KAYARIN asakop na saray Israelita so baleg a kabiangan na Insipan a Dalin, inggapo la nen Josue ya apag-apagen so dalin panamegley na pampapalaranan. Kaiba toy Atagey a Saserdoten si Eleazar tan saray pangulo na kada tribu. (Num. 34:13-29) Naikdan so amin a tribu, puera labat ed saray Levita. (Jos. 14:1-5) Akin et anggapoy teritorya odino apag na tribu nen Levi? Kasin nikaindan ira?

² Naromog tayoy ebat ed samay imbaga nen Jehova ed saray Levita. Pian paneknekan ya agto ra inkaindan, oniay imbaga to: “Siak so apag mo tan tawir mo ed utel na saray anak na Israel.” (Num. 18:20) Agaylay abig a panamaseguro: “Siak so apag mo”! Antoy naliknam no ontay ibagad sika nen Jehova? Nayarin isipen mon tampol ya, ‘Makanepegan ak kasid satan?’ Ompan isipen mo met ya, ‘Talaga kasin posible a magmaliw ya apag na saray agperpekton Kristiano si Jehova?’ Sika tan saray inad-arom et nalalanor ed sarayan tepet. Kanian nepeg tayon amtaen no antoy kabaliksan na satan ya imbaga na Dios. Ontulong itan pian natalosan tayo no panon a magmaliw ya apag na saray Kristiano si Jehova. Tan nagkalalo la, natalosan mo no panon a sikan mismo et magmaliw ya apag mo si Jehova, balanglan say ilalom et manbilay diad tawen odino diad paraison dalin.

Intaryaan nen Jehova Iray Levita

3. Panon a ginmapo so betang na saray Levita diad panaglingkor ed Dios?

³ Antis ya inikdan nen Jehova na Ganggan iray Israelita, say ulo na pamilya so saserdote na dilin pamilya to. Balet sanen inter na Dios so Ganggan, Sikatoy amili diad tribu nen Levi na saray manlingkor bilang saserdote tan saray katulongan da. Panon a ginmapo iyan uksoyan? Sanen pinatey na Dios so amin a panguloan na Ehipto, “pinasantos” to iray panguloan na Israel, ya imbiig to ra bilang kayarian to. Balet ta oniay pananguman ya imbaga na Dios: “Inalak so saray Levitas . . . a salat na saray panguloan ed nanleleetan na saray anak na Israel.” Sanen naamtaan diad sensus a saray panguloan ya anak a laki na Israel et mas dakel nen saray lalakin Levita, nambayar iray Israelita pian dondonen iramay sulok. (Num. 3:11-13, 41, 46, 47) Diad satan la ginmapo so betang na saray Levita diad panaglingkor ed Dios.

4, 5. (a) Akin et nibagan say Dios so apag na saray Levita? (b) Panon ya intaryaan na Dios iray Levita?

⁴ Sanen inter nen Jehova itan a kimey ed saray Levita, panon a sikatoy nagmaliw ya apag da? Imbes ya ikdan  ira nen Jehova na tawir a dalin, inmatalek tod sikara so mabmablin pribilehyo. “Say inkasaserdote ed Jehova” so tawir odino apag da. (Jos. 18:7) Ipapanengneng na konteksto na Numeros 18:20 ya agmet ira manirap lapud satan. (Basaen so Numeros 18:19, 21, 24.) Naawat na saray Levita so “amin a kakaplo ed Israel ya onkana a sakey a tawir a magnayon, ya ombales ed kimey ya impanlingkor da.” Kabaliksan na saya ya onlad sikara so 10 porsiento na ani tan say idakel na ayayep na interon Israel. Iter met balet na saray Levita so “kamaomaongan” a kakaplo na naawat da pian nasuportaan so inkasaserdote. * (Num. 18:25-29) Naawat met na saray saserdote so ‘amin a masanton apay’ ya iyapay na saray Israelita ed Dios diad pasen a pandadayewan dad sikato. Makapanmatalek sirin iray saserdote ya itarya nen Jehova iray pankaukolan da.

⁵ Mapatnag a diad Mosaikon Ganggan et wala ni sananey a kakaplo ya igagana na kada pamilya na saray Israelita parad pankaukolan da legan na saray tinaon a pandaragup, diad ontan et napanggayagaan da iratan. (Deu. 14:22-27) Balet, wala ni arum ya usar na sayan kakaplo. Seselebraan na saray Israelita so taon na Sabaton kada komapiton taon. Diad kada sampot na komatlo tan komanem a taon legan na sayan peryodo na pitoy taon, igagana na saray Israelita iyan kakaplo parad saray mairap tan saray Levita. Akin et kaiba iray Levita ed saray naikdan? Ta ‘anggapoy apag o tawir da’ diad Israel.​—Deu. 14:28, 29.

6. Anggano anggapoy apag a dalin na saray Levita, iner so panayaman da?

⁶ Nayarin isipen mon, ‘No anggapoy dalin na saray Levita, iner so panayaman da?’ Angitarya so Dios parad sikara. Inikdan to ra na 48 a syudad, pati saray panagpastolan ya akapaliber ed satan. Kaibad satan so anemiran syudad a salimbengan. (Num. 35:6-8) Kanian walay napanayaman na saray Levita sano ag-ira manlilingkor diad santuaryo na Dios. Talagan inter nen Jehova so pankaukolan na saramay sigpot-puson manlilingkor ed sikato. Panon sirin a nipanengneng na saray Levita a si Jehova so apag da? Diad panmatalek da ya aglabat sarag nen Jehova ya iter so pankaukolan da, noagta labalabay to met itan a gawaen.

7. Antoy nepeg ya ipanengneng na saray Levita pian nibagan si Jehova so apag da?

⁷ Diad Ganggan, anggapoy nabasan nadusa so Israelitan agmangiter na kakaplo. Balet, sano ag-unoren na saray Israelita iyan ganggan nen Jehova, apektado iray saserdote tan Levita. Agawa itan diad panaon nen Nehemias. Bilang resulta, nankimey iray Levita diad saray uma kanian apaulyanan da laingen so panaglingkor da. (Basaen so Nehemias 13:10.) Mapatnag sirin a say panuportad saray Levita et akadepende ed espiritualidad na nasyon. Tan nepeg a mismon saray saserdote tan Levita et mabiskeg so pananisia rad si Jehova tan ed paraan na pangiiter toy pankaukolan da.

Saray Indibidual a Nagmaliw ya Apag Da si Jehova

8. Antoy akagonigonan na Levitan si Asaf?

⁸ Si Jehova so apag na saray Levita bilang tribu. Balet, wala met iray indibidual a Levita ya angibagan, “Si Jehova so apag ko” pian ibalikas so debosyon tan talek dad Dios. (Tag. 3:24) Say alimbawad satan et sakey a Levitan komakansion tan kompositor. Diad Biblia et sikatoy tinukoy ed ngaran ya Asaf, ingen ta nayarin sikatoy  kabiangan na sankaabungan nen Asaf, samay Levitan angidaulo ed saray komakansion diad panaon nen Arin David. (1 Awa. 6:31-43) Diad Salmo 73, nabasa tayon si Asaf (odino sakey ed saray ilalak to) et inmibeg ed saray mauges tan agto natalosan no akin a maaligwas so bilay da. Imbaga to ni ingen ya: ‘Kaapaan so impanlinis kod pusok tan ed impanguras kod limalimak ed kasalanan.’ Mapatnag ya nakal so apresasyon tod pribilehyo to. Alingwanan ton si Jehova so apag to. Sikatoy agonigon, ya ‘anggad sanen linmoob ed santuaryo na Dios.’​—Sal. 73:2, 3, 12, 13, 17.

9, 10. Akin et nibaga nen Asaf a say Dios so “nabebetangan [to] lawas”?

⁹ Dimad santuaryo, kalkalnan anguman so panmoria nen Asaf. Nayarin asalim met la itan. Ompan wala imay panaon a nakal so apresasyon mod saray pribilehyom tan naisip mo ray bengatlan anggapod sika. Balet diad intupleg mod Salita na Dios tan inyatendim ed Kristianon pantitipon, apakiwas kan moriaen iray bengatla unong ed panmoria nen Jehova. Amoria met lanlamang nen Asaf so pansumpalan na saray mauges. Dinalepdep toy kipapasen to tan imbaga ton aliling to et sankabembenan nen Jehova so kawanan a lima to, a mangigigiyad sikato. Kanian oniay imbaga nen Asaf ed si Jehova: ‘Anggapo lay arum a pampirawatan ko ed tapew na dalin noag say sika.’ (Sal. 73:23, 25) Insan to imbagan si Jehova so nabebetangan odino apag to. (Basaen so Salmo 73:26.) Anggano ‘onkapuy so laman tan puso to,’ say Dios so “nabebetangan [to] lawas.” Matalek iyan salmista a sikatoy nodnonoten nen Jehova bilang kaaro to, tan agbalot lingwanan nen Jehova so matoor a panlilingkor to. (Ecl. 7:1) Seguradon aligliwan maong si Asaf! Inkanta to: “Maong ed siak so ondere ed abay na Dios; inyan ko so panagmatalek ko ed Jehova a Dios.”​—Sal. 73:28.

¹⁰ Sanen imbaga nen Asaf a si Jehova so nabebetangan to, agto labat iisipen iray materyal a naaawat to bilang Levita. Say manunan sankanonot to et say pribilehyo ton manlingkor ed si Jehova tan say pikakaaro tod Sankatagyan. (Sant. 2:21-23) Pian mansiansian kaaro nen Jehova, kaukolan a lawas manmatalek tan manisia si Asaf ed Sikato. Kaukolan a walay kompiyansa to a maabig so pansumpalay bilay to no unoren toy Jehova. Makapanmatalek ka met a tumangan ka nen Jehova no ontan so gawaen mo.

11. Antoy nitepet nen Jeremias, tan panon itan ya inebatan nen Jehova?

¹¹ Si propetan Jeremias so sakey nin Levita ya angibagan, “Si Jehova so apag ko.” Ikonsidera tayo pa no antoy labay ton ibaga sanen imbalikas to itan. Si Jeremias et tagad Anatot, sakey a syudad na saray Levita ya asingger ed Jerusalem. (Jer. 1:1) Wala met imay panaon ya tinepetan nen Jeremias si Jehova no akin et main-inaway bilay na saray mauges balet ta maniirap iray matunong. (Jer. 12:1) Sanen naobserbaan toy nagagawad Jerusalem tan ed Juda, sikatoy nanreklamod si Jehova. Balet, amta nen Jeremias a si Jehova et matunong. Inebatan nen Jehova si Jeremias diad  impangiganggan ed sikaton ipropesiya tan ipulong so mensahe na kadederal, tan tinoor nen Jehova itan a propesiya. Akaliktar iramay tinmulok ed si Jehova, balet ta inatey iramay mauges ya ag-angimanod pasakbay.​—Jer. 21:9.

12, 13. (a) Antoy amakiwas ed si Jeremias ya ibagan: “Si Jehova so apag ko,” tan anton awawey so impanengneng to? (b) Akin et nepeg a manilalod si Jehova so amin a tribu na Israel?

¹² Diad saginonor, sanen sankanengneng nen Jeremias so nasyon to ya adera-deral, say pakalikna to et sikatoy manaayam ‘ed ambilbilunget a pasen a singa sakey a toon abaybayag lan inatey.’ (Tag. 1:1, 16; 3:6) Pinasakbayan la nen Jeremias iyan benger a nasyon ya ompawil irad Ama rad tawen, balet ta alablabas lay inkauges da kanian inyabuloy na Dios a naderal so Jerusalem tan Juda. Anggano agmet itan kasalanan nen Jeremias, agaylay ermen to. Diad sayan paneermen to, ninodnonot na propeta so panangasi na Dios. “Ag-itayo naupot,” so kuan to. Imbaga ton say panangasi nen Jehova et “balo a kinabuasan”! Insan diad satan to imbagan: “Si Jehova so apag ko.” On, wala nin siansiad sikato so mabmablin pribilehyo to, say kimey to bilang propeta nen Jehova.​—Basaen so Tagleey 3:22-24.

¹³ Say dalin na saray Israelita et agnapanayaman diad loob na 70 taon. (Jer. 25:11) Diad samay imbaga nen Jeremias ya “si Jehova so apag ko,” impanengneng ton sikatoy matalek ed panangasi na Dios, tan wala siri’ rason ton “manilalo” ed si Jehova. Abalang na amin a tribu na Israel so tawir da, kanian kaukolan da met ya aligen itan ya awawey nen Jeremias. Si Jehova labat so alenleneg ya ilalo ra. Kayari 70 taon, pinmawil irad nasyon da tan wala lamet so pankanawnawa ran lingkoran si Jehova ditan.​—2 Awa. 36:20-23.

Posiblin Magmaliw Met ya Apag na Arum si Jehova

14, 15. Nilikud ed saray Levita, siopay angipasen ed si Jehova bilang apag odino nabebetangan to, tan akin?

¹⁴ Si Asaf tan Jeremias et parehon nanlapud tribu nen Levi, balet kasin saray Levita labat so awalaan na pribilehyon lingkoran si Jehova? Siempre andi. Imbaga na kalangweran nin si David a say Dios so “nabebetangan [to] ed dalin na saray mabilay.” (Basaen so Salmo 142:1, 5.) Sanen insulat nen David iyan salmo, sikato so onsublay ya ari na Israel, balet ta aliwan diad palasyo odino abung so kawalaan to. Sikatoy walad ungib, ta iyaamotan to ray kalaban to. Wala imay pankanawnawan sikatoy nanamot ed ungib ya asingger ed Adullam, tan diad sananey nin pankanawnawa et diad ungib ed kalawakan na En-gadi. Posiblin insulat toy Salmo 142 diad sakey ed sarayan ungib.

¹⁵ Say manguusil ed sikato et si Arin Saul. Labay nen Saul ya pateyen si David kanian tinmakas tan linmad ungib ya mairap ya nasabi na totoo. (1 Sam. 22:1, 4) Diad sayan nisulinek a pasen, nayarin alikna nen David ya anggapoy nailaloan ton kaaro ya manalimbeng ed sikato. (Sal. 142:4) Diad satan a panaon et kinerew nen David so tulong na Dios.

16, 17. (a) Akin et liknaen nen David a singano anggapoy nailaloan ton ontulong ed sikato? (b) Siopay nakerewan nen David na tulong?

¹⁶ Antis ya insulat nen David so Salmo 142, nayarin abalitaan to lay agawa ed Atagey a Saserdoten si Ahimelec, ya tinmulong ed sikato sanen ibabatikan toy Saul. Impapatey nen Arin Saul si Ahimelec tan say sankaabungan to. (1 Sam. 22:11, 18, 19) Liknaen nen David ya  sikato so makasengeg ed impatey da. Inisip ton singa sikaton mismo so amatey ed saserdote ya tinmulong ed sikato. No sikay walad situasyon nen David, ontan met kasi naliknam? Akaarum nid gonigon nen David so kesaw to ta ag-ontutunday Saul ed panguusil ed sikato.

¹⁷ Ag-abayag kayari na satan, inatey so propetan si Samuel, ya nanlana ed si David bilang onsublay ya ari. (1 Sam. 25:1) Posiblin akaarum itan ed pakaskasin liknaan nen David. Balet amta to no siopay nakerewan toy tulong​—si Jehova. Agnaikdan si David na pribilehyon miparad saray Levita, balet ta sikatoy alanaan pian sumpalen so sananey a klase na panaglingkor—​say pagmaliw ton ari na totoo na Dios. (1 Sam. 16:1, 13) Kanian imbesngaw tod si Jehova so walad puso to tan lawas nanmatalek ed panangigiya To. Nepeg mo met ya ipasen si Jehova bilang apag mo. Manmatalek kad sikato legan mon gagawaey anggaay nayarian mo a sikatoy lingkoran.

18. Panon ya impanengneng na saramay lingkor ya apantongtongan tayo a si Jehova so apag da?

¹⁸ Sarayan apantongtongan tayon lingkor et nagmaliw ya apag da si Jehova ta inikdan to ray pribilehyo diad panaglingkor ed sikato. Nanmatalek iran itarya nen Jehova iray pankaukolan da. Saray Levita tan ontan met ed saray kabiangan na arum a tribu na Israel a singa si David, et nagmaliw ya apag da si Jehova. Panon a magmaliw met ya apag mo si Jehova? Aralen tayo itan diad onsublay ya artikulo.

[Paimano ed leksab]

Antoy Ebat Mo?

• Akin et nibagan si Jehova so apag na saray Levita?

• Antoy ginawa nen Asaf, Jeremias, tan David a mangipapanengneng ya si Jehova so apag da?

• Anton kualidad so nepeg mon ipanengneng pian say Dios so magmaliw ya apag mo?

[Tepetepet Parad Panagaral]

[Blurb ed pahina 8]

Saray Levita et ag-akaawat na tawir a dalin. Imbes, si Jehova so apag da, ta inikdan to ra na espisyal a pribilehyo

[Litrato ed pahina 7]

Akin et nibagan si Jehova so apag na saray saserdote tan Levita?

[Litrato ed pahina 9]

Antoy akatulong ed si Asaf pian lawas ton ipasen si Jehova bilang apag to?