“Ami ta bo porshon i bo herensia meimei di e yunan di Israel.”​—NUM. 18:20.

1, 2. (a) Kon a para ku e levitanan ora Yehova a duna un porshon di e tera na tur e otro tribunan di Israel? (b) Ki siguransa Yehova a duna e levitanan?

DESPUES ku e israelitanan a konkistá un gran parti di e Tera Primintí, Josué, Sumo Saserdote Eleazar i e lidernan di e tribunan a tira lòt i a parti e tera pa kada tribu por a haña su porshon. (Num. 34:​13-29) Yehova a duna kada tribu un porshon di e tera ku eksepshon di e tribu di Levi. (Jos. 14:​1-5) Dikon e levitanan no a haña un teritorio, òf porshon, di e Tera Primintí? Yehova a lubidá riba nan?

² Loke Yehova a bisa Aaron tokante e levitanan ta yuda nos kontestá e preguntanan akí. Pa sigurá e levitanan ku lo e no a bandoná nan, Yehova a bisa nan: “Ami ta bo porshon i bo herensia meimei di e yunan di Israel.” (Num. 18:20) Ki un promesa maravioso! Kon lo bo sinti bo si Yehova hasi e promesa ei na bo? Kisas bo promé reakshon lo ta, ‘Mi meresé loke e Todopoderoso ta primintí mi?’ Podisé lo bo puntra bo mes tambe, ‘Yehova realmente por ta porshon di un kristian imperfekto manera ami? Realmente lo e perkurá pa mi?’ E preguntanan akí ta importante ya ku nan ta toka tantu abo komo bo sernan kerí. P’esei laga nos ban wak kiko e deklarashon divino ei ta nifiká. Esei lo yuda nos komprondé kon Yehova por ta e porshon di kristiannan awe. Ademas, nos lo mira spesífikamente kon e por ta bo porshon, sea ku bo tin speransa pa biba den shelu òf den Paradeis riba tera.

Yehova A Perkurá pa e Levitanan

3. Kon bin Yehova a skohe e levitanan pa su sirbishi?

³ Promé ku Yehova a duna e Lei na e israelitanan, kada kabes di famia tabata sirbi komo saserdote pa su propio famia. Pero ora Dios a duna e Lei na Israel, el a skohe algun israelita for di e tribu di Levi pa sirbi komo saserdote i asistente. Kiko a hiba na esei? Ora Dios a laga un angel mata e primogénitonan di Egipto, el a santifiká, òf apartá, pa su mes e primogénitonan di Israel. Esaki a nifiká ku nan tabata pertenesé na dje. Pero despues Yehova a hasi un ahuste importante: El a disidí di “tuma e levitanan . . . na lugá di tur e primogénitonan entre e yunan di Israel.” Pero debí ku e kantidat di yu hòmbernan mayó di e otro tribunan di Israel tabata surpasá e kantidat di levita, Yehova a bisa e otro tribunan ei pa paga un preis di reskate pa kada primogénito ku a surpasá e kantidat di levita. (Num. 3:​11-13, 41, 46, 47) Di e manera ei, e levitanan por a kuminsá kumpli ku e asignashon ku e Dios di Israel a duna nan.

4, 5. (a) Den ki sentido Yehova tabata e porshon di e levitanan? (b) Kon Yehova a perkurá pa e levitanan?

 ⁴ Ora Yehova a skohe e levitanan pa su sirbishi, kon el a bira nan porshon? Wèl, en bes di duna nan un teritorio komo herensia, Yehova a duna nan un trabou sumamente importante. “E saserdosio di SEÑOR” tabata nan herensia, òf porshon. (Jos. 18:7) Pero segun e konteksto di Numbernan 18:20, Yehova lo a perkurá pa nan nesesidatnan físiko tambe. (Lesa Numbernan 18:​19, 21 i 24.) E levitanan lo mester a haña “henter e diesmo den Israel komo un herensia [pa] nan sirbishi.” Pues, nan lo a risibí 10 porshento di loke e tera a produsí i di e oumento di e bestianan di krio. E levitanan, na nan turno, lo mester a duna 10 porshento di loke nan a haña, “esnan di mas mihó,” pa satisfasé e nesesidatnan di e saserdotenan. * (Num. 18:​25-29) Ademas, e saserdotenan tabata haña “tur e ofrendanan di e regalonan santu” ku e yunan di Israel tabata trese na Dios su lugá di adorashon. P’esei, e saserdotenan tabatin bon motibu pa kere ku Yehova lo a perkurá pa nan.

⁵ Ta parse ku segun e Lei di Moisés, famianan israelita mester a apartá un otro diesmo mas. Nan a usa esaki pa kuminda, bibida i pa disfrutá durante e konvokashonnan òf asambleanan santu ku a tuma lugá tur aña. (Deu. 14:​22-27) Sinembargo, na fin di kada tres i seis aña di un siklo sabátiko ku a dura shete aña, nan tabata usa e diesmo akí tambe pa yuda tantu e pobernan komo e levitanan. Dikon a inkluí e levitanan den e lei akí? Pasobra nan no tabatin “parti ni herensia” den Israel.​—Deu. 14:​28, 29.

6. Na unda e levitanan lo a biba ora nan no tabata sirbi na e santuario?

⁶ Pero kisas bo ta puntra bo mes, ‘Si e levitanan no a risibí un parti di e tera, ta na unda nan lo a biba?’ Wèl, Dios a perkurá pa nan. El a duna nan 48 stat i tambe e lugánan di yerba bèrdè ku tabatin rònt di e statnan ei. Esakinan a inkluí seis stat di refugio. (Num. 35:​6-8) Pues, e levitanan tabatin un lugá di biba ora nan no tabata sirbi na e santuario di Dios. Yehova a perkurá bon pa e nesesidatnan di esnan ku a dediká nan mes kompletamente na su sirbishi. Kon e levitanan por a demostrá ku Yehova tabata nan porshon? Nan mester a konfia ku Yehova tabata kier i por a perkurá pa nan.

7. Kiko e levitanan mester a demostrá pa nan por tabatin Yehova komo nan porshon?

⁷ No tabatin ningun kastigu pa un israelita ku no a duna diesmo. Pero si e israelitanan no a obedesé e lei di diesmo, e saserdotenan i e levitanan lo a sufri. Esei ta nèt loke a sosodé den tempu di Nehemias. Debí ku e israelitanan no a kumpli ku e lei di diesmo, e levitanan mester a traha den kunuku i neglishá nan sirbishi. (Lesa Nehemias 13:10.) E levitanan por a haña loke nan tabatin mester solamente ora e pueblo a obedesé Yehova su Lei. Anto e saserdotenan i e levitanan mester tabatin fe den Yehova i den e maneranan ku e tabata perkurá pa nan.

Algun Levita Ku Tabatin Yehova Komo Nan Porshon

8. Kiko a preokupá e levita Asaf?

⁸ Komo tribu, e levitanan tabatin Yehova  komo nan porshon. Pero ta remarkabel ku algun levita individual tambe a usa e frase “SEÑOR ta mi porshon” pa referí na nan amistat ku Dios i nan konfiansa den dje. (Lam. 3:24) Un di e levitanan ei tabata kantante i kompositor. Nos lo yam’é Asaf aunke kisas e no tabata Asaf sino un miembro di e kas di Asaf. E levita Asaf tabata e kantante prinsipal den tempu di Rei David. (1 Kró. 6:​31-43) Den Salmo 73 nos por mira ku Asaf (òf ún di su desendientenan) a kuminsá envidiá hende malbado i no por a komprondé dikon nan tabata prosperá. Asta el a bisa: “Siguramente ta en bano mi a tene mi kurason puru, i a laba mi mannan den inosensia.” Ta parse ku Asaf a lubidá pa un ratu ku e echo ku e tabata traha pa Yehova tabata un privilegio grandi; el a lubidá ku Yehova tabata su porshon. El a keda preokupá “te ora ku [el] a drenta den e santuario di Dios.”​—Sal. 73:​2, 3, 12, 13, 17.

9, 10. Dikon Asaf por a bisa ku Dios tabata su “porshon pa semper”?

⁹ Na e santuario, Asaf a kuminsá mira e asuntu for di Yehova su punto di bista. Podisé algu asina a yega di sosodé ku bo tambe. Kisas bo a lubidá pa un momento kon spesial bo sirbishi na Yehova ta i a kuminsá enfoká riba e kosnan material ku bo no tin. Pero ora bo a hasi bo estudio personal i a bai bo reunionnan kristian, bo a kuminsá pensa atrobe manera Yehova ta pensa. Asaf a bin komprondé loke finalmente lo a sosodé ku e malbadonan. El a kòrda kon bendishoná e tabata komo un sirbidó di Dios i a realisá ku Yehova tabata tene su man drechi i ku Yehova lo a sigui gui’é. P’esei Asaf por a bisa Yehova: “Fuera di bo mi no ta deseá nada riba tera.” (Sal. 73:​23, 25) Kaba el a bisa ku Yehova ta su porshon. (Lesa Salmo 73:26.) Maske Asaf su ‘karni i su kurason por a faya,’ Dios lo tabata su “porshon pa semper.” Asaf tabatin konfiansa ku Yehova lo a kòrd’é komo un amigu pa semper i ku lo e no a lubidá su sirbishi fiel. (Ekl. 7:1) Esta un konsuelo esei lo mester tabata pa Asaf! El a kanta: “Ma pa loke t’ami, ta bon pa mi keda serka di Dios; mi a hasi Señor DIOS mi refugio.”​—Sal. 73:28.

¹⁰ Ora Asaf a bisa ku Dios tabata su porshon, e no tabata djis referí na e kosnan material ku el a risibí komo levita sino prinsipalmente na su sirbishi na Yehova i su amistat ku e Haltísimo. (Sant. 2:​21-23) Pero pa Asaf por a mantené un bon relashon ku Dios, e mester a sigui mustra fe i konfia den Yehova. E mester tabatin konfiansa ku si el a obedesé Yehova, Yehova lo a rekompens’é ku un futuro briante. Abo tambe por tin e konfiansa ku e Todopoderoso lo hasi meskos pa bo.

11. Ki pregunta Jeremias tabatin, i kon Yehova a kontestá su pregunta?

¹¹ Un otro levita ku a bisa ku Yehova tabata su porshon ta profeta Jeremias. Laga nos ban wak kiko e tabata ke men ora el a bisa esei. Jeremias tabata biba na Anatot, un stat levita serka di Yerusalèm. (Jer. 1:1) Dado momento Jeremias tambe a puntra Yehova ta dikon e malbado tabata prosperá siendo ku e hustu  tabata sufri. (Jer. 12:1) Ora Jeremias a mira loke tabata sosodé na Yerusalèm i Huda, el a keha tokante e situashon. Jeremias tabata sa ku Yehova ta un Dios hustu. Pero kon Yehova a kontestá Jeremias su pregunta? Yehova a manda Jeremias bai prediká un mensahe di destrukshon i a kumpli ku loke Jeremias a profetisá. Di e manera ei Yehova a kontestá Jeremias. Esnan ku a obedesé Yehova a haña ‘nan bida komo botin,’ es desir nan a sobrebibí, pero esnan ku no a hasi kaso di e spièrtamentu a muri.​—Jer. 21:9.

12, 13. (a) Kiko a konmové Jeremias pa bisa: “SEÑOR ta mi porshon,” i ki aktitut el a desplegá? (b) Dikon tur e tribunan di Israel mester a siña “spera” ku pasenshi riba Yehova?

¹² Despues, ora Jeremias a mira kon ruiná su tera natal a keda, el a sinti komo si fuera e tabata kana den skuridat. Tabata komo si fuera Yehova a pon’é sinta manera “[hende] ku ta morto pa hopi tempu kaba.” (Lam. 1:​1, 16; 3:6) Jeremias a bisa e israelitanan pa bolbe serka nan Tata selestial, pero nan a bira asina malbado ku Yehova mester a laga destruí Yerusalèm i Huda. Esei a kousa Jeremias doló aunke e sí tabata hasi loke ta bon. Asta durante e tempu di tristesa ei, Jeremias a kòrda riba Yehova su miserikòrdia. El a bisa: ‘Yehova su miserikòrdia no ta kaba nunka. Tur mainta su miserikòrdia ta nobo.’ Ta e ora ei Jeremias a bisa: “SEÑOR ta mi porshon.” Sí, Jeremias a keda ku su privilegio di sirbi Yehova komo un profeta.​—Lesa Lamentashonnan 3:22-24.

¹³ Pa 70 aña, e tera natal di e israelitanan a keda desolá. (Jer. 25:11) Pero Jeremias su palabranan “SEÑOR ta mi porshon” a mustra ku e tabatin konfiansa den Yehova, i esei a motiv’é pa “spera” ku pasenshi riba dje. Tur e tribunan di Israel a pèrdè nan herensia, pues nan mester a kultivá e mesun aktitut ku Jeremias. Yehova tabata nan úniko speransa. Yehova no a bandoná esnan den Israel ku tabatiné komo nan porshon. Despues di 70 aña, nan a regresá nan patria i tabatin e privilegio di sirbié einan.​—2 Kró. 36:​20-23.

Otro Hende Tambe Por Tin Yehova Komo Nan Porshon

14, 15. Fuera di e levitanan, ken mas tabatin Yehova komo nan porshon i dikon?

¹⁴ Tantu Asaf komo Jeremias tabata di e tribu di Levi. Pero ta e levitanan so tabatin e privilegio di sirbi Yehova? Klaru ku nò! Tempu ku David e futuro rei di Israel tabata hóben, el a yama Dios su “porshon den e tera di e bibunan.” (Lesa Salmo 142:​1 i 5.) Ora David a skirbi e salmo akí, e no tabata den un palasio ni den un kas. E tabata skondí den un kueba. Por lo ménos dos biaha David a skonde den kueba pa su enemigunan: Un biaha serka di Adulam i un otro biaha den e desierto di En-gadi. Probablemente el a skirbi Salmo 142 den un di e kuebanan ei.

¹⁵ Si David tabata skonde den kueba, esei ta debí ku Rei Saul tabata busk’é pa mata. David tabata den un kueba ku tabata difísil pa yega na dje. (1 Sam. 22:​1, 4) Den e lugá isolá ei, David probablemente a sinti ku e no tabatin niun amigu pa proteh’é. (Sal. 142:4) Ta e ora ei David a pidi Dios yud’é.

16, 17. (a) Dikon David a sintié lomba kontra muraya? (b) Na ken David por a akudí pa yudansa?

¹⁶ Promé ku David a skirbi Salmo 142, kasi sigur lo el a tende loke a sosodé ku Sumo Saserdote Ahimelek. Sin sa ku David tabata hui pa Saul, Ahimelek a yuda David. Den su rabia Rei Saul a laga mata Ahimelek i henter su  famia. (1 Sam. 22:​11, 18, 19) David a sintié kulpabel pa nan morto. El a sinti komo si fuera ta é a mata e saserdote ku a yud’é. Si bo tabata na lugá di David, lo bo a sinti bo kulpabel? Pa kolmo, David no tabatin trankilidat pasobra Saul a sigui persiguié.

¹⁷ Komo si fuera no ta basta, djis despues di loke a sosodé ku Ahimelek, profeta Samuel, kende a ungi David pa bira rei, a muri. (1 Sam. 25:1) Esei lo por a pone David sintié lomba kontra muraya. Pero e tabata sa ku Yehova lo a yud’é. David no tabatin e mesun privilegio ku e levitanan, pero el a ser ungí pa rindi un otro tipo di sirbishi; el a ser ungí pa bira rei di Dios su pueblo. (1 Sam. 16:​1, 13) David a deshogá su mes serka Yehova i a sigui konfia den Yehova. Abo tambe por tin Yehova komo bo porshon. Bo por konfia den dje miéntras bo ta sigui hasi bo máksimo esfuerso den su sirbishi.

18. Kon e sirbidónan di Yehova ku nos a menshoná den e artíkulo akí a demostrá ku nan tabatin Yehova komo nan porshon?

¹⁸ Den ki sentido e sirbidónan di Yehova ku nos a menshoná den e artíkulo akí tabatin Yehova komo nan porshon? Wèl, esei a nifiká ku nan tur a haña un asignashon den su sirbishi. Ademas, nan a konfia ku Yehova lo a perkurá pa nan. Tantu e levitanan komo e otro israelitanan, manera entre otro David, por tabatin Yehova komo nan porshon. Kon abo tambe por tin Yehova komo bo porshon? Nos lo trata esei den e siguiente artíkulo.

[Nota]

Kon Lo Bo Kontestá?

• Den ki sentido Yehova tabata e porshon di e levitanan?

• Kiko Asaf, Jeremias i David a hasi pa demostrá ku Yehova tabata nan porshon?

• Ki kualidat bo mester tin pa Dios por ta bo porshon?

[Preguntanan di Estudio]

[Komentario na página 11]

E levitanan no a risibí un parti di e tera komo herensia. Yehova tabata nan porshon, pasobra nan a haña un trabou spesial

[Plachi na página 10]

Den ki sentido Yehova tabata e porshon di e saserdotenan i e levitanan?

[Plachi na página 12]

Kiko a yuda Asaf pa Yehova por a keda komo su porshon?