Yehovah na mi gudu

„Mi na a famirigudu fu unu èn a pisi di unu kisi na mindri den Israelsma.”​—NUM. 18:20.

1, 2. (a) San pasa nanga den Leifisma di Yosua bigin prati a kondre? (b) San Yehovah pramisi den Leifisma?

BAKA di den Israelsma teki wan bigi pisi fu a Pramisi Kondre abra, Yosua bigin seti sani fu prati a kondre. A ben du disi makandra nanga Granpriester Eleasar èn nanga den edeman fu den lo (Num. 34:13-29). Ma den Leifisma no ben o kisi wan pisi fu a kondre neleki fa den tra lo ben o kisi wan pisi (Yos. 14:1-5). Fu san ede den Leifisma no kisi wan famirigudu, noso wan pisi fu a Pramisi Kondre? Na frigiti den frigiti den?

² Wi kan feni a piki tapu na aksi disi te wi e luku san Yehovah taigi den Leifisma. Yehovah ben wani sori den taki a no ben o gowe libi den èn dati meki a taki: „Mi na a famirigudu fu unu èn a pisi di unu kisi na mindri den Israelsma” (Num. 18:20). Dati na wan moi pramisi a gi den di a taki: „Mi na a famirigudu fu unu”! Fa yu ben o firi efu Yehovah taigi yu a sani dati? Kande a fosi sani di yu ben o prakseri na: ’Na prenspari mi prenspari so, taki na Almakti Gado ben o pramisi mi so wan sani?’ Kande yu ben o prakseri tu: ’A de so trutru taki Yehovah kan de a gudu fu wan Kresten leki mi di de wan sondu sma?’ Den aksi disi prenspari, fu di den abi fu du nanga yu èn nanga den lobiwan fu yu. Sobun, meki wi go luku san den wortu disi fu Gado wani taki. Dan wi o frustan fa Yehovah kan de a gudu fu Kresten na ini ten disi. Fu taki en leti, a kan de yu gudu, awinsi yu abi a howpu fu libi na hemel, noso na ini wan paradijs na grontapu.

Yehovah sorgu gi den Leifisma

3. Fa a du kon taki den Leifisma bigin wroko gi Gado?

³ Fosi Yehovah gi den Israelsma a Wèt, den famiri-edeman ben de leki priester gi na osofamiri fu den. Di Gado gi den a Wèt, a teki den Leifisma fu wroko gi en leki priester èn leki yepiman. Fa a du kon taki disi pasa? Di Gado kiri den fosi pikin fu den Egeptesma, a meki den fosi pikin fu den Israelsma kon santa. Sobun, a poti den aparti leki sma di de fu en. Bakaten Gado teki a prenspari bosroiti disi: „Mi teki den Leifisma na presi fu ala den fosi pikin . . . fu Israel.” Di den teri a pipel, den kon si taki den fosi pikin fu den tra Israelsma ben furu moro den Leifisma. Dati meki Yehovah taki dati a pipel ben musu pai wan lusu-paiman gi den fosi pikin fu den Israelsma di ben de moro furu leki den Leifisma (Num. 3:11-13, 41, 46, 47). Baka dati den Leifisma ben kan bigin wroko gi a Gado fu Israel.

4, 5. (a) Den Leifisma ben abi Gado leki gudu, ma san dati ben wani taki gi den? (b) Fa Gado sorgu gi den Leifisma?

⁴ San a wroko disi ben wani taki gi den Leifisma? Yehovah no ben o gi  den wan pisi gron leki famirigudu. Na presi fu dati a taigi den taki na en ben o de a gudu fu den, fu di a ben gi den a bigi grani fu du wan prenspari wroko. A wroko „fu dini leki priester gi Yehovah” ben o de a famirigudu fu den (Yos. 18:7). Den tra vers na ini Numeri kapitel 18 e sori taki den no ben mankeri noti. (Leisi Numeri 18:19, 21, 24.) Den Leifisma ben o kisi ’a di fu tin pisi fu den sani di den Israelsma ben musu gi Gado. Dati na san den ben o kisi gi a wroko di den ben e du.’ Te den Israelsma ben koti nyanyan na den gron èn te den meti di den ben e kweki kisi pikin, dan den ben musu gi den Leifisma 10 procent fu dati. Fu ala den sani di den Leifisma ben e kisi fu den tra Israelsma, den ben musu gi a di fu tin pisi, sobun „a moro bun pisi” fu horibaka gi a priesterwroko * (Num. 18:25-29). Boiti dati, den priester ben e kisi „ala den santa sani” di den Israelsma ben e tyari gi Gado na a presi pe den ben e anbegi en. Sobun, den priester ben kan de seiker taki Yehovah ben o sorgu gi den.

⁵ Soleki fa a sori, dan a Wèt fu Moses ben taki dati den Israelsma ben musu teki ete wan di fu tin pisi fu den sani di den ben abi èn den ben musu poti dati na wan sei. Na osofamiri ben kan gebroiki dati te den ben o go na den santa konmakandra ibri yari (Deut. 14:22-27). Ma son leisi den ben musu gebroiki a di fu tin pisi disi na wan tra fasi. Ibri di fu seibi yari ben de wan Sabat-yari gi den Israelsma. Na a kaba fu a di fu dri yari èn a di fu siksi yari fosi a sabat-yari, den Israelsma ben musu gebroiki a di fu tin pisi disi fu yepi den pôti sma nanga den Leifisma. Fu san ede den ben musu gi den Leifisma tu? Bika den Leifisma no ben „kisi wan famirigudu” neleki den tra Israelsma.​—Deut. 14:28, 29.

6. Efu den Leifisma no ben kisi wan pisi fu a kondre, dan pe den ben o tan?

⁶ Kande yu e aksi yusrefi: ’Efu den Leifisma no ben kisi wan pisi fu a kondre, dan pe den ben o tan? Gado ben o sorgu gi dati. A ben gi den 48 foto nanga den weigron na den foto dati. Siksi fu den foto disi ben de loweman-foto (Num. 35:6-8). Na so den Leifisma ben abi wan presi fu tan te den no ben musu wroko na a santapresi fu Gado. Yehovah ben sorgu taki den wan di ben e dini en fayafaya, ben kisi ala san den ben abi fanowdu. Fa den Leifisma ben kan sori taki Yehovah na a gudu fu den? Den ben musu abi a frutrow taki Yehovah ben wani sorgu gi den èn taki a ben man gi den san den ben abi fanowdu.

7. San den Leifisma ben musu abi efu den ben wani taki Yehovah de a gudu fu den?

⁷ A Wèt no ben taki dati wan sma ben o kisi strafu te a no ben gi a di fu tin pisi fu den sani fu en. Ma te a pipel no ben gi a di fu tin pisi, dan den priester nanga den tra Leifisma ben e pina. Na dati pasa na a ten fu Nehemia. Dati meki den Leifisma ben musu go wroko na den gron fu den èn den no ben e du a wroko fu den na a santapresi moro. (Leisi Nehemia 13:10.) A de krin taki den Leifisma ben kan kisi san den ben abi fanowdu soso te a pipel ben e gi yesi na a Wèt fu Yehovah. Boiti dati, den priester nanga Leifisma ben musu bribi na ini Yehovah èn na ini a seti di a ben e gebroiki fu sorgu gi den.

Ibri Leifisma ben abi Yehovah leki gudu

8. San ben e trobi a Leifisma Asaf?

⁸ Leki lo den Leifisma ben abi Yehovah leki a gudu fu den. Ma a moi fu si taki son Leifisma ben taki fu densrefi tu: „Yehovah na a  gudu di mi musu kisi” (Sar. 3:24). Nanga den wortu disi den ben sori taki den gi densrefi abra na Gado èn taki den ben e frutrow na en tapu. Wan fu den Leifisma disi ben de wan singiman èn a ben skrifi singi tu. Wi sa kari en Asaf, ma a kan taki a ben de fu a famiri fu Asaf, wan Leifisma di ben de fesiman fu den singiman na a ten fu Kownu David (1 Kron. 6:31-43). Na Psalm 73 wi e leisi taki Asaf (noso wan fu den bakapikin fu en) ben dyarusu tapu den ogri sma èn a no ben man frustan fu san ede a gersi leki den abi wan switi libi. A taki srefi: „Na fu soso mi du muiti fu kon abi wan krin ati. Na fu soso mi wasi mi anu fu sori taki mi no du noti.” Soleki fa a sori, dan a no ben si a wroko fu en leki wan grani moro èn a ben frigiti taki Yehovah na en gudu. A sani disi ben e trobi en „teleki [a] go na ini a gran santa presi fu Gado.”​—Ps. 73:2, 3, 12, 13, 17.

9, 10. Fu san ede Asaf ben kan kari Gado ’a gudu fu en fu ala ten’?

⁹ Na a santapresi, Asaf kon si sani baka leki fa Gado e si sani. Kande so wan sani pasa nanga yu tu. Kande yu ben frigiti tu taki a de wan grani fu dini Yehovah èn kande yu bigin denki den gudu di yu ben kan abi. Ma di yu studeri Gado Wortu èn yu go na den Kresten konmakandra, yu kon si sani leki fa Yehovah e si sani. Asaf ben kon frustan san ben o pasa nanga den ogri sma te fu kaba. A prakseri fu den bun sani di a ben abi leki futuboi fu Yehovah. A taki dati Yehovah ben o hori en na en reti-anu èn tiri en. Dati meki a taigi Yehovah: „Boiti yu, nowan sma de na grontapu di e gi mi prisiri” (Ps. 73:23, 25). Dan a kari Gado a gudu fu en. (Leisi Psalm 73:26.) Aladi a psalm skrifiman ’en heri skin nanga en ati ben kon swaki’, toku Gado ben o de ’a gudu fu en fu ala ten’. A ben de seiker taki Yehovah ben o tan si en leki en mati. Yehovah no ben o frigiti a wroko di a ben du nanga en heri ati (Preik. 7:1). Disi ben musu fu gi Asaf furu trowstu. A singi: „A bun gi mi fu kon krosibei na Gado. Na a Moro Hei Masra Yehovah mi e si leki mi kibripe.”​—Ps. 73:28.

¹⁰ Sobun, a moro prenspari sani gi Asaf ben de taki a ben abi Yehovah leki en gudu. Den tra sani di a ben e kisi fu di a ben de wan Leifisma no ben de so prenspari gi en. Moro furu a ben e prakseri a grani di a ben abi fu wroko gi Yehovah èn a matifasi di a ben abi nanga a Moro Heiwan (Yak. 2:21-23). Efu a psalm skrifiman ben wani tan wan mati fu Yehovah, a ben musu tan bribi èn frutrow na ini en. A ben musu abi a frutrow taki te fu kaba Yehovah ben o blesi en efu a ben o gi yesi na En. Yu kan abi a srefi frutrow dati na ini na Almaktiwan.

11. Sortu aksi Yeremia ben abi èn fa a kisi piki tapu na aksi fu en?

¹¹ A profeiti Yeremia ben de wan tra Leifisma di taki dati Yehovah na en gudu. Meki wi luku san a ben wani sori di a taki dati. Yeremia ben e libi na Anatot, wan foto fu Leifisma, krosibei fu Yerusalem (Yer. 1:1). Wan pisi ten ben de taki Yeremia srefi no ben man frustan fu san ede den ogriwan ben abi wan switi libi, aladi den reti-ati sma ben e pina (Yer. 12:1). Baka di a luku san ben e pasa na Yerusalem nanga Yuda, a bigin ’krutu’ fu den sani di a si. Yeremia ben sabi taki Yehovah na wan reti-ati  sma. Yehovah piki Yeremia di a taigi en fu preiki taki a foto ben o kisi pori. Baka dati Yehovah meki a profeititori dati kon tru. Soleki fa Yehovah ben taki na ini a profeititori, dan den wan di gi yesi na en „tan na libi”, ma den ogriwan di ben abi wan switi libi èn di no arki a warskow lasi libi.​—Yer. 21:9.

12, 13. (a) Fu san ede Yeremia taki: „Yehovah na a gudu di mi musu kisi” èn sortu denki a ben abi? (b) Fu san ede ala den lo fu Israel ben musu leri fu wakti Gado?

¹² Bakaten di Yeremia luku en kondre di ben tron wan brokopresi, a ben e firi leki a e waka na ini dungru. A ben de neleki Yehovah meki a ’sidon leki wan man di dede langa ten kaba’ (Sar. 1:1, 16; 3:6). Yeremia ben taigi a trangayesi pipel fu drai go baka na den hemel Tata, ma den ogri di den ben e du ben kon de so furu taki Gado ben abi fu meki Yerusalem nanga Yuda kisi pori. A sani disi ben hati Yeremia, bika en srefi no ben e du ogri. Srefi na a ten dati di a ben e sari, a profeiti memre fa Gado e sori sari-ati. A taki: „A no kiri wi.” Iya, ibri mamanten baka Yehovah e sori sari-ati! Dan Yeremia taki: „Yehovah na a gudu di mi musu kisi.” Sobun, a ben abi a grani ete fu wroko gi Yehovah leki profeiti.​—Leisi Sari singi 3:22-24.

¹³ Seibitenti yari langa den Israelsma no ben o tan na ini den eigi kondre. A ben o de wan brokopresi (Yer. 25:11). Ma den wortu „Yehovah na a gudu di mi musu kisi” di Yeremia taki, e sori taki a ben de seiker taki Yehovah ben o sori den sari-ati. Dati meki a taki dati a ben ’o wakti en’ fu du wan sani. Ala den lo fu Israel ben lasi den famirigudu, sobun den ben musu leri fu abi a srefi denki leki a profeiti. Yehovah ben de a wan-enkri howpu fu den. Baka 70 yari, a pipel fu Gado drai go baka na a mamakondre fu den pe den ben abi a grani fu dini en baka.​—2 Kron. 36:20-23.

Srefi tra sma ben kan abi Yehovah leki gudu

14, 15. Suma boiti den Leifisma ben abi Yehovah leki gudu, èn fu san ede a ben e si Yehovah leki gudu?

¹⁴ Asaf nanga Yeremia ben de fu a lo fu Leifi, ma na soso den Leifisma ben abi a grani fu dini Yehovah? Nôno! A yongu man David di ben o tron kownu fu Israel ben kari Gado „a gudu fu mi na ini a kondre fu den wan di de na libi”. (Leisi Psalm 142:1, 5.) Na a ten di David skrifi a psalm disi a no ben de na ini wan kownu-oso. A no ben de na ini wan oso srefi. A ben de na ini wan bergi-olo e kibri gi den feanti fu en. Wi sabi taki sowan tu leisi a ben e kibri na ini bergi-olo. Wan leisi a ben de na ini wan bergi-olo na Adulam èn a tra leisi a ben de na ini wan bergi-olo na En-Gedi sabana. A kan taki na ini wan fu den bergi-olo dati a skrifi Psalm 142.

¹⁵ Efu David skrifi a psalm disi na ini wan bergi-olo, dan na fu di a ben e kibri gi Kownu Saul di ben suku fu kiri en. David ben lowe go na ini wan bergi-olo pe sma no ben man doro so makriki (1 Sam. 22:1, 4). Na a presi disi di ben de farawe, a kan taki David ben e firi leki a no abi nowan mati fu yepi en (Ps. 142:4). Na a ten dati David bari kari Gado fu yepi en.

16, 17. (a) Fu san ede David ben firi leki nowan sma ben de fu yepi en? (b) Na suma David ben kan go suku yepi?

¹⁶ Na a ten di David skrifi Psalm 142, a kan taki a ben yere kaba san pasa nanga Granpriester Akimeilek. Granpriester Akimeilek ben yepi David sondro fu sabi taki a ben e lowe gi Saul. Dati meki a dyarusu Kownu  Saul meki den kiri Akimeilek nanga en osofamiri (1 Sam. 22:11, 18, 19). David ben e firi leki na en meki taki den kiri ala den sma dati. A ben de leki na en kiri a priester di yepi en. Efu yu ben de David, yu ben o firi a srefi fasi tu? Ma san ben moro ogri, na taki David no ben man rostu fu di Saul ben de na en baka doronomo.

¹⁷ A no langa baka dati a profeiti Samuel di ben salfu David fu tron kownu, dede (1 Sam. 25:1). A kan taki disi meki David firi leki en wawan de èn nowan sma ben de fu yepi en. Ma David ben sabi taki Yehovah ben o yepi en. David no ben abi a srefi grani leki den Leifisma fu wroko gi Gado, ma a ben salfu fu du wan tra sortu wroko. Bakaten a ben o tron kownu fu a pipel fu Gado (1 Sam. 16:1, 13). Sobun, David fruteri Yehovah ala san ben de na tapu en ati èn a tan suku rai na en. Yu srefi kan èn musu abi Yehovah leki yu gudu. Yu kan frutrow na en tapu aladi yu e du muiti fu tan du a wroko fu en.

18. Fa den sma di wi taki fu den na ini artikel disi, sori taki den ben abi Yehovah leki gudu?

¹⁸ Den sma di wi taki fu den na ini na artikel disi, ben abi Yehovah leki gudu. Disi wani taki dati Yehovah ben gi den wan wroko fu du. Den ben abi a frutrow taki Gado ben o sorgu den aladi den ben e du a wroko fu den. Den Leifisma èn sma fu den tra lo fu Israel, soleki David, ben kan abi Gado leki a gudu fu den. Fa yu kan de leki den èn abi Yehovah leki yu gudu? Na dati wi o luku na ini a tra artikel.

[Futuwortu]

San yu ben sa piki?

• Den Leifisma ben abi Gado leki gudu. San dati ben wani taki?

• San Asaf, Yeremia nanga David du fu sori taki Yehovah ben de a gudu fu den?

• San yu musu abi efu yu wani taki Gado de yu gudu?

[Aksi fu a tori disi]

[Prenspari pisi na tapu bladzijde 8]

Den Leifisma no ben kisi wan pisi fu a kondre leki famirigudu. Na presi fu dati den ben abi Yehovah leki gudu, fu di den ben abi a grani fu wroko gi en

[Prenki na tapu bladzijde 7]

Fa Yehovah ben de a gudu fu den priester nanga den tra Leifisma?

[Prenki na tapu bladzijde 9]

San yepi Asaf fu tan abi Yehovah leki gudu?