Jéeobaeʼ k-herencia

«Teneʼ a tiaʼalen yéetel a [herenciaen].» (NÚM. 18:20)

1, 2. 1) ¿Baʼax úuch tiʼ u chʼiʼibal Leví le ka tʼoʼox le Luʼum Aʼalaʼan u Tsʼaʼabaloʼ? 2) ¿Baʼax tu yaʼalaj u tsʼáaik Jéeoba tiʼ le levitaʼoboʼ?

KA TSʼOʼOK u chʼaʼabal tumen le israelitaʼob u maas yaʼabil le Luʼum Aʼalaʼan u Tsʼaʼabaloʼ, tu tʼoxoʼob ichiloʼob. Lelaʼ beetaʼab tumen Josué, Eleazar, le nojoch j-kʼiinoʼ, yéetel u nuuktakil cada junpʼéel chʼiʼibal (Núm. 34:13-29). Letiʼobeʼ tu tsʼáajoʼob junxéetʼ tiʼ cada junpʼéel chʼiʼibaliʼ, baʼaleʼ tiʼ u chʼiʼibal Levieʼ maʼ tu tsʼáajoʼobiʼ (Jos. 14:1-5). ¿Baʼaxten? ¿Chéen wa tuʼubtiʼob, wa maʼ unaj u tsʼaʼabal u herenciaiʼ?

² U jaajileʼ Jéeobaeʼ maʼ u tukultmaj u pʼatik le levitaʼoboʼ. Letiʼeʼ u yaʼalmiliʼ tiʼ Aarón, u nojchil le chʼiʼibalaʼ: «Teneʼ a tiaʼalen yéetel a [herenciaen]» (Núm. 18:20). ¿Máasaʼ jach jatsʼuts le baʼax tu yaʼaloʼ? ¿Bix jeʼel k-uʼuyikba wa ka u yaʼaltoʼon Dios beyoʼ? Maʼ xaaneʼ jeʼel k-tuklikeʼ: «¿Kin náajaltik wa ka in kʼam Dios, le Máax yaan tuláakal páajtalil tiʼ, bey in herenciaeʼ? ¿Jeʼel wa u páajtal k-kʼamik bey k-herencia kex kʼebanoʼoneʼ?». Lelaʼ jach maʼalob ka k-tukle, tumen yaan yil yéetel k-kuxtal bey xan yéetel u kuxtal k-láakʼtsiloʼob. Le oʼolal yáaxeʼ yaan k-ilik baʼax u kʼáat u yaʼal u kʼaʼamal Jéeoba bey herenciaileʼ. Tsʼoʼoleʼ yaan k-ilik bix jeʼel k-kʼamik Jéeoba bey k-herencia, kex wa táan k-páaʼtik k-bin kuxtal teʼ kaʼanoʼ wa táan k-páaʼtik k-pʼáatal kuxtal way Luʼumeʼ.

Jéeobaeʼ ku kanáantik u chʼiʼibal Leví

3. ¿Bix úuchik u tsʼaʼabal u chʼiʼibal Leví u beet u j-kʼiinil?

³ Táanil tiʼ u tsʼaʼabal u Ley Moiseseʼ, cada taatatsil beetik le meyaj tsʼaʼab tiʼ le j-kʼiinoʼoboʼ. Baʼaleʼ le ka tsʼaʼab le Leyoʼ, pʼáat chéen u chʼiʼibal Leví beetik le meyajaʼ, tuláakal le xiiboʼob yaan ichil u chʼiʼibaloʼ yaan u beetik u j-kʼiiniloʼob wa yaan u yáantkoʼob le j-kʼiinoʼoboʼ. ¿Bix úuchik u chʼaʼtuklaʼal lelaʼ? Kʼaʼajaktoʼoneʼ, le ka kíimsaʼab le yáax paalaloʼob Egiptooʼ, Jéeobaeʼ tu yaʼaleʼ tsʼoʼok u junpáaykuntik u yáax paaliloʼob Israel wa tsʼoʼok u yéeyikoʼob utiaʼal u beetkoʼob junpʼéel meyaj tiʼ letiʼ. Baʼaleʼ ka máan kʼiineʼ tu chʼaʼtuklaj u junpáaykuntik le levitaʼob «utiaʼal u [kʼexik] u yáax paal [cada junpʼéel] naj» wa familia. Baʼaleʼ tumen maas yaʼab le yáax paalal tiʼ le levitaʼoboʼ, tu yaʼalaj ka boʼotaʼak u tojol le jaytúul ku bineltikoʼ (Núm. 3:11-13, 41, 46, 47). Desde teʼ kʼiin jeʼeloʼ, tu chʼiʼibal Leví jóokʼ le máaxoʼob tu beetaj u j-kʼiiniloʼob tu kaajil Israeloʼ.

4, 5. 1) ¿Baʼaxten ku yaʼalaʼal Jéeobaeʼ u herencia le levitaʼoboʼ? 2) ¿Bix úuchik u yáantaʼal le levitaʼob tumen Diosoʼ?

⁴ Jeʼex túun k-ilkoʼ, tiʼ u chʼiʼibal Levieʼ maʼ tsʼaʼab mix junxéetʼ luʼumiʼ; tumen u herenciaeʼ u beetik u «j-kʼiinil utiaʼal Yuumtsil», junpʼéel meyaj jach kiliʼich (Jos. 18:7). Le oʼolal  tiʼ Números 18:20, Jéeobaeʼ ku yaʼaliktiʼ: «Teneʼ a tiaʼalen». Baʼaleʼ ¿yaan wa túun u máanskoʼob óotsilil le levitaʼob tumen maʼ tsʼaʼab u luʼumoʼoboʼ? Le baʼax ku seguer u yaʼalik le tekstooʼ ku yeʼesikeʼ maʼatech (xokaʼak Números 18:19, 21, 24). Yoʼolal le meyaj tu beetoʼoboʼ, tu kʼamoʼob «le diezmo ku tsʼáaik le israelitaʼoboʼ», lelaʼ diez tiʼ cada cien tiʼ le baʼax ku jochkoʼoboʼ wa diez tiʼ cada cien baʼalcheʼob ku síijil. Le levitaʼob xanoʼ ku jóoʼskoʼob diez tiʼ cada cien tiʼ u maas maʼalobil le baʼax ku tsʼaʼabaltiʼob utiaʼal u tsʼaʼob tiʼ le j-kʼiinoʼoboʼ (Núm. 18:25-29). * Le j-kʼiinoʼob xanoʼ ku kʼamkoʼob «tuláakal le boʼolaloʼob ku junpáaykuntikoʼob le israelitaʼob» utiaʼal u kʼuboʼob tiʼ Jéeobaoʼ. Bey túunoʼ, tuláakal le j-kʼiinoʼoboʼ unaj u jach kʼubik u yóoloʼob yaan u tsʼaʼabal baʼaxoʼob kʼaʼabéettiʼob tumen Jéeoba.

⁵ U Ley Moisés xaneʼ ku yaʼalik kaʼacheʼ, tuláakal le familiaʼoboʼ unaj u junpáaykuntikoʼob uláakʼ diez tiʼ cada cien baʼaxoʼob ku jochkoʼob utiaʼal u jaantoʼob wa utiaʼal meyajtiʼob ken yanak kʼiinbesajoʼob tu kaajil Israel cada jaʼab (Deu. 14:22-27). Baʼaleʼ tu jóokʼbal u yóoxpʼéel yéetel u seis jaʼabil le siete jaʼaboʼob ku chíikbesaʼal tumen le sabadooʼ, le diezmo jeʼelaʼ ku meyajtiʼob utiaʼal u yáantkoʼob le óotsiloʼob yéetel le levitaʼoboʼ. ¿Baʼaxten tak tiʼ le levitaʼob ku tsʼáaikoʼoboʼ? Tumen letiʼobeʼ «maʼ tsʼaʼab u luʼumoʼob» jeʼex u maasil israelitaʼoboʼ (Deu. 14:28, 29).

6. ¿Tuʼux kajlaj le levitaʼob wa maʼ tsʼaʼab mix junxéetʼ luʼum tiʼoboʼ?

⁶ ¿Tuʼux túun kajlaj le levitaʼob wa maʼ tsʼaʼab mix junxéetʼ luʼum tiʼoboʼ? Jéeoba kanáantoʼob, tumen tu tsʼáaj tuʼux u kajtaloʼob. Tu tsʼáaj 48 kaajoʼob utiaʼal u yantaloʼob, ichiloʼobeʼ tiaʼan le seis noj kaajoʼob tuʼux ku bin le máaxoʼob ku kíimskoʼob wa máax maʼ taaliʼ tiʼoboʼ, teʼeloʼ tiʼ ku bin le levitaʼob wa maʼ u kʼiinil u meyajoʼoboʼ (Núm. 35:6-8). Lelaʼ ku yeʼesikeʼ Dioseʼ ku tsʼáaik tuláakal baʼax kʼaʼabéet tiʼ le máaxoʼob ku kʼubik u yóoloʼob u meyajtoʼ. ¿Bix jeʼel u yeʼeskoʼob kaʼach ku kʼamkoʼob Jéeoba bey u herenciaʼobeʼ? U jach creertikoʼob Jéeobaeʼ u kʼáat yéetel yaan u páajtalil u kanáantkoʼob.

7. ¿Baʼax unaj u yeʼesik le levitaʼob utiaʼal u kʼamkoʼob Jéeoba bey u herenciaʼobeʼ?

⁷ Yaan kʼiineʼ le israelitaʼoboʼ maʼatech u tsʼáaik u diezmoʼob. Kex maʼatech u yaʼalik le Ley ka castigartaʼakoʼob yoʼolal lelaʼ, ku beetkoʼob kʼaas tiʼ le levitaʼoboʼ yéetel tiʼ le j-kʼiinoʼoboʼ. Lelaʼ bey úuchik tu kʼiiniloʼob Nehemías. Le oʼolal kʼaʼabéetchaj u binoʼob meyaj teʼ luʼum tsʼaʼantiʼoboʼ, baʼaleʼ xuʼul u beetkoʼob le meyaj tsʼaʼantiʼob tumen Dios teʼ templooʼ (xokaʼak Nehemías 13:10). Tuláakal le máaxoʼob yanoʼob ichil u chʼiʼibal Levioʼ ku yantal baʼaxoʼob kʼaʼabéettiʼob wa tuláakal le kaaj ku tsʼáaik u diezmoʼoboʼ. Bey túunoʼ jach ku kʼaʼabéettal u kʼubik u yóoloʼob tiʼ Jéeoba bey xan tiʼ le baʼax u tsʼaamaj utiaʼal u kanáantkoʼoboʼ.

Levitaʼob tu kʼamoʼob Jéeoba bey u herenciaʼobeʼ

8. ¿Baʼax talamil tu aktáantaj Asaf?

⁸ Kex tuláakal u chʼiʼibal Leví tu kʼamaj Jéeoba bey u herenciaeʼ, yaan tiʼ letiʼobeʼ tu yaʼaloʼob: «Yuumtsileʼ letiʼ tuláakal baʼal kʼaʼabéetten», beyoʼ tu yeʼesoʼob jach tu kʼubaj u yóoloʼob tiʼ Dios (Lam. 3:24). Juntúul tiʼ letiʼobeʼ Asaf, le máax tsʼíibt le Salmo 73. Lelaʼ bey u kʼaabaʼ juntúul tiʼ le máaxoʼob nuʼuktik le levitaʼob ku kʼaayoʼob tu kʼiiniloʼob Davidoʼ,  baʼaleʼ maʼ xaaneʼ, táan u tʼaan tiʼ juntúul tiʼ u paalaloʼob Asaf ku kʼaay wa ku tsʼíibtik kʼaayoʼob kaʼachi (1 Cró. 6:31-43). Kex jeʼel máaxak tsʼíibt le salmoaʼ, u jaajileʼ lúub u yóol le ka tu yilaj bix u bin utsil tiʼ le kʼasaʼan máakoʼoboʼ. Tumen jach tu tsʼíiboltaj le baʼax yaantiʼoboʼ, letiʼeʼ tu yaʼalaj: «¡Mix baʼal u biilal u yantalten junpʼéel sak puksiʼikʼal yéetel ka in pʼoʼo in kʼaboʼob tiʼ tuláakal kʼaas!». Tuʼubtiʼeʼ le u meyajtik Jéeoba yéetel u yilik bey u herenciaeʼ letiʼe baʼax maas maʼalob jeʼel u yantaltiʼoʼ. Baʼaleʼ le ka ook «ichil u yotoch [Dioseʼ]» kʼexpaj u tuukul (Sal. 73:2, 3, 12, 13, 17).

9, 10. ¿Baʼaxten tu yaʼalaj Asaf «[Dioseʼ] [...] letiʼ u muukʼ in puksiʼikʼal»?

⁹ Ka ook Asaf teʼ templooʼ, tu yilaj tuláakal jeʼex u yilik Dioseʼ. Yaʼab máaxoʼob meyajtik Dios bejlaʼeʼ tsʼoʼok u yúuchultiʼob xan beyoʼ. Jeʼex úuchik tiʼ Asafeʼ, xuʼul u yilkoʼob jach jatsʼuts le meyaj tsʼaʼantiʼob tumen Diosoʼ ka chʼíikoʼob u kaxtoʼob chéen ayikʼaliloʼob. Baʼaleʼ u xakʼalxoktikoʼob le Biblia yéetel u binoʼob teʼ muchʼtáambaloʼoboʼ, le áantoʼob u kʼex bix u tuukuloʼob. Asafeʼ tu tsʼáaj cuentaeʼ le máaxoʼob beetik baʼaloʼob kʼaastakoʼ ku kʼuchul u kʼiinil u jochkoʼob baʼax ku pakʼikoʼob. Ka tuukulnaj tiʼ le utsiloʼob ku kʼamikoʼ, kʼuch u naʼateʼ yaan u nuʼuktaʼal yéetel yaan u kanáantaʼal tumen Jéeoba. Le oʼolal tu yaʼalajtiʼ: «¡Chéen teech! Maʼ in kʼáat luʼumkabil baʼaliʼ» (Sal. 73:23, 25). U yojel kex jeʼel baʼaxak ka úuchuk, kex ka kʼojaʼanchajak wa ka lúubuk u yóoleʼ, jeʼel u páajtal u yaʼalikeʼ: «[Dioseʼ] [...] letiʼ u muukʼ in puksiʼikʼal» (xokaʼak Salmo 73:26). Letiʼeʼ jach líikʼ u yóol úuchik u kʼaʼajsik bix u biskuba yéetel Jéeoba yéetel maʼ kun tuʼubsbil le meyaj ku beetkoʼ (Ecl. 7:1.) Le oʼolal tu kʼayaj: «Yaan in natsʼkinba tiʼ [Dios], tumen in tiaʼal teneʼ letiʼ u maʼalobil. Tiʼ teech kin taʼakbeskinba» (Sal. 73:28).

¹⁰ Le ka tu yaʼalaj Asaf u herencia Jéeobaeʼ, maʼ táan u tʼaan tiʼ le áantaj ku kʼamik tumen levitaoʼ. Baʼaxeʼ táan u tʼaan tiʼ le jatsʼuts páajtalil yaantiʼ u meyajtik Dios teʼ templooʼ yéetel u biskuba tu yéetel (Sant. 2:21-23). Utiaʼal maʼ u xuʼulul u biskuba yéetel Dioseʼ unaj u jach tsʼáaik u fe tiʼ Jéeoba yéetel u jach creertik yaan u bin utsil tiʼ wa ku yuʼubik u tʼaan. ¿Máasaʼ unaj u yantaltoʼon fe yéetel k-kʼubik k-óol tiʼ Dios jeʼex tu beetiloʼ?

11. ¿Baʼax chiʼichnakkúunt kaʼach Jeremías, yéetel baʼax aʼalaʼabtiʼ tumen Jéeoba?

¹¹ Jeremías, uláakʼ juntúul levitaeʼ, tu yaʼalaj xan: «Yuumtsileʼ letiʼ tuláakal baʼal kʼaʼabéetten». Koʼoneʼex ilik baʼax tu yóotaj u yaʼale. Letiʼeʼ tu kaajil Anatot kaʼach kajaʼan, junpʼéel tuʼux kajaʼan le levitaʼob yaan náatsʼ Jerusalenoʼ (Jer. 1:1). Juntéenjeakeʼ kʼuuxilnaj le ka tu yilaj bix u bin utsil tiʼ le kʼasaʼan máakoʼoboʼ, baʼaleʼ le máaxoʼob beetik baʼax utsoʼ jach yaʼab u muʼyajoʼob (Jer. 12:1). Letiʼeʼ u yojel toj baʼax ku beetik Jéeoba, le oʼolal tu yaʼalajtiʼ maʼ maʼalob u yilik baʼax ku yúuchul tu kaajil Jerusalén yéetel Judaiʼ. ¿Baʼax aʼalaʼabtiʼ tumen Jéeoba? Túuxtaʼab u kʼaʼayt tsʼoʼok u náatsʼal u kʼiinil u xuʼulskoʼob, yéetel tu yilaj u béeykuntik le baʼax tu kʼaʼaytaj le profetaoʼ: le máaxoʼob maʼ tu yuʼuboʼob tʼaanoʼ kíimoʼob, baʼaleʼ le máaxoʼob tu yuʼuboʼob tʼaanoʼ tu salvartubaʼob (Jer. 21:9).

12, 13. 1) ¿Baʼaxten tu yaʼalaj Jeremías: «Yuumtsileʼ letiʼ tuláakal baʼal kʼaʼabéetten», yéetel baʼax tuukulil yanchajtiʼ? 2) ¿Baʼaxten tuláakal u chʼiʼibalil Israel kʼaʼabéetchaj u kʼubik u yóoloʼob tiʼ Dios?

 ¹² Le kaajoʼ xuʼulsaʼabtiʼ yéetel mix máak pʼáat kajtaliʼ. Ka tu yilaj Jeremías bix yanileʼ, jach yaachaj u yóol, tu yuʼubaj bey táan u beetaʼal u xíimbal ich éeʼjochʼeʼenil tumen Jéeobaeʼ. Tu yuʼububa bey jeʼex «le máaxoʼob úuch kíimkoʼoboʼ» (Lam. 1:1, 16; 3:6). Jerusalén yéetel Judaeʼ xuʼulsaʼabtiʼob, tumen le israelitaʼoboʼ maʼ tu xulaj u beetkoʼob baʼax kʼaas utiaʼal u natsʼkubaʼob tu kaʼatéen yiknal Jéeoba, u Taataʼob yaan teʼ kaʼanoʼ. Jeremíaseʼ tu yaʼalajtiʼob baʼax ku taal u kʼiin, le oʼolal le baʼax úuchoʼ maʼ tiʼ letiʼ yaan u culpailiʼ, kex beyoʼ jach yaachaj u yóol. Baʼaleʼ tu tsʼáaj cuentaeʼ «u yaabilaj Yuumtsileʼ minaʼan u xuul» yéetel «tuláakal jaʼatskab kʼiineʼ ku túumbental», le oʼolal maʼ xuʼulsaʼab tiʼ tuláakal le kaajoʼ. Ka tu yaʼalaj: «Yuumtsileʼ letiʼ tuláakal baʼal kʼaʼabéetten». Leloʼ jaaj, tumen maʼ xuʼul u beetik u profetail tiʼ Diosiʼ (xokaʼak Lamentaciones 3:22-24).

¹³ Le ka tu yaʼalaj Jeremías: «Yuumtsileʼ letiʼ tuláakal baʼal kʼaʼabéetten[eʼ]», tu yeʼesaj jach ku creertik Dioseʼ ku chʼaʼik óotsilil, lelaʼ le áant utiaʼal maʼ u xuʼulul u kʼubik u yóol tiʼ letiʼ. Tuláakal u chʼiʼibalil Israeleʼ unaj u kʼubik u yóoloʼob xan tiʼ Dios, tumen tsʼoʼok u luʼsaʼal u luʼumoʼob, tsʼoʼoleʼ u kaajil Jerusaleneʼ yaan u máan setenta jaʼaboʼob mix máak kun kajtaliʼ (Jer. 25:11). Chéen Jéeoba jeʼel u páajtal u yáantkoʼobeʼ. Setenta jaʼaboʼob tsʼoʼokokeʼ tu beetaj u suutoʼob tu luʼumoʼob yéetel tu tsʼáaj u páajtalil u kaʼa adorartaʼaliʼ (2 Cró. 36:20-23).

Junpʼéel herencia maʼ chéen le levitaʼob jeʼel u kʼamkoʼoboʼ

14, 15. ¿Máax uláakʼ tu kʼamaj Jéeoba bey u herenciaeʼ, yéetel baʼaxten?

¹⁴ Baʼaleʼ ¿chéen wa túun le levitaʼob, jeʼex Asaf yéetel Jeremías, jeʼel u páajtal u meyajtikoʼob Diosoʼ? Maʼatech. Le oʼolal tak David, táanil tiʼ u káajal u beetik u reyil tu kaajil Israeleʼ, tu yaʼalaj tiʼ Jéeoba: «Teech [...] tuláakal baʼax yaanten tiʼ le kuxtalaʼ» (xokaʼak Salmo 142:1, 5). Le ka tu tsʼíibtaj David le salmoaʼ, maʼ tu palacio yaniʼ, mix tu yotochiʼ, baʼaxeʼ tiaʼan ichil junpʼéel sajkab, tuʼux u taʼakmuba tiʼ le máaxoʼob pʼekmiloʼ. Letiʼeʼ kaʼatéen ook u taʼakuba ich sajkab, juntéeneʼ naatsʼ tiʼ u noj kaajil Adulam yéetel uláakʼ juntéeneʼ tu desiertoil En-gadi. Maʼ xaaneʼ tiaʼan ichil junpʼéel tiʼ le sajkaboʼob ka tu tsʼíibtaj le Salmo 142.

¹⁵ Kʼaʼajaktoʼoneʼ letiʼeʼ táan u kaxtaʼal tumen rey Saúl utiaʼal kíimsbil. Le táan u púutsʼul Davidoʼ ook ichil junpʼéel sajkab talam u kʼuchul máakiʼ (1 Sam. 22:1, 4). Le tiaʼan ichiloʼ mix máak uláakʼ yaan utiaʼal áantik, mix u amigoʼob, le oʼolal tu kʼáataj u yáantaj Dios, le Máax kanáantikoʼ (Sal. 142:4).

16, 17. 1) ¿Baʼaxten Davideʼ yaan baʼax oʼolal u yuʼubikuba kaʼach chéen tu juunal? 2) ¿Máax tiʼ tu kʼubaj u yóol mantatsʼ?

¹⁶ Le ka tu tsʼíibtaj David le Salmo 142, maʼ xaaneʼ tsʼoʼok u yojéeltik kíimsaʼab Ahimelec. Kex maʼ u yojel wa táan u púutsʼul David kaʼacheʼ, letiʼeʼ tu yáantaj, le oʼolal jach kʼuuxilnaj Sauleʼ ka tu túuxtaj kíimsbil paʼteʼ yéetel u familia (1 Sam. 22:11, 18, 19). Davideʼ tu yuʼubaj tiʼ letiʼ yaan u culpail úuchik u kíimsaʼaloʼob. Tu yuʼubaj bey letiʼ kíims le j-kʼiin jach utsoʼ. ¿Máax maʼ tu yuʼubikuba jeʼex tu yuʼubiluba letiʼoʼ? U tsʼookeʼ minaʼan tuʼux u chʼaʼik u yiikʼ, tumen tsʼoʼok u náatsʼal rey Saúl teʼ tuʼux yaan kaʼachoʼ.

 ¹⁷ Baʼaleʼ maʼ chéen letiʼe baʼax tu muʼyajtoʼ. Maʼ úuch tiʼ leloʼ kíim profeta Samuel, le máax yéey utiaʼal u beetik u reyiloʼ (1 Sam. 25:1). Maʼ xaaneʼ jach yaachaj u yóol yoʼolal le baʼax úuchoʼ, kex beyoʼ Davideʼ maʼ tuʼubtiʼ wa jeʼel u yáantaʼal tumen Dioseʼ. Kex maʼ tsʼaʼantiʼ le meyaj ku beetik kaʼach le levitaʼoboʼ, yéeyaʼan utiaʼal u beet uláakʼ meyaj: utiaʼal u gobernart u kaajil Israel (1 Sam. 16:1, 13). Le oʼolal Davideʼ payalchiʼinaj tiʼ Dios yéetel tuláakal u puksiʼikʼal, tsʼoʼoleʼ tu kaxtaj u nuʼuktaj yéetel fe. Toʼon xaneʼ láayliʼ jeʼel u páajtal k-kʼamik le áantaj beyoʼ. Wa k-kʼamik Jéeoba bey k-herencia yéetel k-chaʼik u kanáantkoʼoneʼ, jeʼel u yáantkoʼon utiaʼal k-meyajtik tu jaajil k-óoleʼ.

18. ¿Bix úuchik u pʼáatal Jéeoba u herencia le máaxoʼob chúukpaj u yóoloʼob meyajtik úuchjeakiloʼ?

¹⁸ Teʼ xookaʼ tsʼoʼok k-ilkeʼ David yéetel le levitaʼob bey xan uláakʼ israelitaʼoboʼ tu yiloʼob Jéeoba bey u herenciaʼobeʼ. Lelaʼ u kʼáat u yaʼaleʼ tu kʼamoʼob le meyaj tsʼaʼabtiʼoboʼ yéetel tu kʼubaj u yóoloʼob yaan u yáantaʼaloʼob utiaʼal u beetkoʼob yéetel yaan u kanáantaʼaloʼob. Cada juntúul tiʼ toʼoneʼ jeʼel xan u páajtal u yaʼalikeʼ u herenciaeʼ Jéeoba. Teʼ tuláakʼ xookoʼ yaan k-kanik bix jeʼel u páajtal k-ilik beyoʼ.

[Tsolajil]

¿A wojel wa u núukil?

• ¿Baʼaxten u chʼiʼibal Levieʼ páajchaj u yaʼalik Jéeobaeʼ u herencia?

• ¿Bix úuchik u yeʼesik Asaf, Jeremías yéetel David u herenciaʼobeʼ Jéeoba?

• ¿Baʼax modosil unaj k-eʼesik wa k-kʼáat k-il Dios bey k-herenciaeʼ?

[U kʼáatchiʼiloʼob le xookoʼ]

[Uláakʼ baʼax ku tsoʼolol teʼ táan juʼun 8]

Le levitaʼoboʼ maʼ tsʼaʼab u luʼumoʼob bey herenciaileʼ, baʼaxeʼ tsʼaʼab u páajtalil u meyajtikoʼob Jéeoba

[Foto yaan teʼ táan juʼun 7]

¿Baʼaxten ku yaʼalaʼal Jéeobaeʼ bey u herencia le j-kʼiinoʼob yéetel le levitaʼoboʼ?

[Foto yaan teʼ táan juʼun 9]

¿Baʼax áant Asaf utiaʼal u seguer u yilik Jéeoba bey u herenciaeʼ?