?Zoova yɛ ɔ ti amun like liɛ mɔ amun le i ɔ?

“An dun mmua fa amun wun man Nyanmiɛn maan ɔ sie amun, yɛ an yo i klun sa’n, i sin ɔ́ wá fá ninnge sɔ’n kwlaa úka su mán amun.”​—MAT. 6:33.

1, 2. (a) ?Wan mun yɛ Galasifuɛ Mun 6:16 nun’n, be flɛ be “Izraɛlfuɛ nga be ti [Nyanmiɛn] liɛ sakpa’n” niɔn? (b) ?Wan mun yɛ Matie 19:28 nun’n, be flɛ be “Izraɛl nvle blu-nin-nnyɔn” mun’n niɔn?

 ?SƐ AMUN su kanngan Biblu’n nun naan be bo dunman Izraɛli su’n, wan yɛ amun bu i akunndan ɔn? Atrɛkpa’n, amun akunndan’n kɔ Izaaki i wa Zakɔbu mɔ i sin’n be wa kacili i dunman kɛ Izraɛli’n i su. Annzɛ kusu amun akunndan’n kɔ Zakɔbu i mma nin i anunman mɔ i sin be wa flɛli be Izraɛlifuɛ mun’n be su. Be nga be kpali be sieli be ngunmin’n, be tɔnnin be dunman Izraɛli wie. Be flɛ be “Izraɛlfuɛ nga be ti [Nyanmiɛn] liɛ sakpa’n.” Be yɛle sran 144.000 mɔ Ɲanmiɛn fɛli i wawɛ’n mannin be’n, mɔ bé dí famiɛn yɛ bé yó Ɲanmiɛn ɲrun jranfuɛ ɲanmiɛn su lɔ’n. (Gal. 6:16; Ngl. 7:4; 21:12) Sanngɛ Matie 19:28 nun’n, be kan Izraɛlifuɛ wie mun ekun be ndɛ. Be flɛ be Izraɛli nvle 12.

² Zezi seli kɛ: “Kɛ bé wá bó mɛn’n i uflɛ ekun’n, bɔ m bɔ n kacili Sran’n ń yí n famiɛn nglo bɔ ń trán m bia’n su’n, amun bɔ an suli n su’n, amun kusu án wá trán bia blu-nin-nnyɔn su, amún dí Izraɛl nvle blu-nin-nnyɔn’m be jɔlɛ.” Biblu’n i bue sɔ nun’n, “Izraɛl nvle blu-nin-nnyɔn” mun yɛle be nga bé wá trán mɛn klanman’n nun asiɛ’n su titi’n. Sran sɔ mun’n, Zezi i sɔnnzɔnfuɛ 144.000 nga Ɲanmiɛn fɛli i wawɛ’n mannin be’n bé dí be jɔlɛ. Yɛ Ɲanmiɛn i ɲrun jranlɛ junman nga sran 144.000 sɔ’m bé wá dí’n, bé ɲɛ́n i su mmlusuɛ.

3, 4. ?Ajalɛ kpa benin yɛ be nga be kpali be sieli ngunmin’n, be kle e ɔ?

 ³ Laa Ɲanmiɛn ɲrun jranfuɛ nin Levifuɛ’m be buli Ɲanmiɛn junman nga be di’n be cenjele like. Kɛ be nga be kpali be sieli be ngunmin’n be bu Ɲanmiɛn i junman nga be di’n i sɔ wie ɔ. (Kal. 18:20) Be sunnzunman kɛ Ɲanmiɛn wá mán be lika asiɛ’n su wa. Like nga be ɲin o i sin’n yɛle kɛ bé yó Ɲanmiɛn ɲrun jranfuɛ yɛ be nin Zezi Klist bé dí famiɛn ɲanmiɛn su lɔ. Bé dí i sɔ junman’n titi kɛ nga Sa Nglo Yilɛ 4:10, 11 fa kan’n sa.—Eze. 44:28.

⁴ Asiɛ’n su wa’n, be nga be kpali be sieli be ngunmin’n, be nantilɛ’n kle weiin kɛ Zoova ti be like liɛ nga be le i’n. Like fi timan cinnjin be ɲrun traman Ɲanmiɛn sulɛ’n. Akoto Piɛli seli kɛ: “I sɔ’n ti, an bu flɛlɛ nin falɛ bɔ Nyanmiɛn fali amun’n i akunndan kpa naan an jran kekle.” (2 Piɛ. 1:10) I sɔ yɛ be nga be kpali be sieli be ngunmin’n be yo ɔ. Yɛle kɛ be lafi e ti kpɔlɛ tɛ nga Klist yili’n su. Yɛ ndɛ kwlaa nga Zezi kannin’n, be nian nun be fa su titi. Ɔ ti su kɛ ɔ le kun nin i like liɛ m’ɔ si i yo ɔ, yɛ ɔ le kun nin i su afɛ liɛ. Sanngɛ be seman kɛ kekle m’ɔ o be su’n ti’n, bé cúɛncúɛn be ja ase Ɲanmiɛn junman dilɛ nun. I kpa bɔbɔ’n, be wla be wun ase be di Ɲanmiɛn junman’n ju kan be kwla di ju lɛ’n. Be nantilɛ’n kle be nga bé trán asiɛ’n su wa’n, be ajalɛ kpa.

5. ?Ngue yɛ Klistfuɛ’m be ngba be kwla yo naan Zoova w’a yo be like liɛ nga be le i’n niɔn? ?Ngue ti yɛ i sɔ yolɛ’n kwla yo kekle ɔ?

⁵ Sɛ e o be nga bé wá kɔ́ ɲanmiɛn su lɔ’n be nun wie o, annzɛ sɛ é ká asiɛ’n su wa o, ɔ fata kɛ e ngba’n e ‘klɛn e wun man [Klist], yɛ e sua e waka’n naan e su i su’ titi. (Mat. 16:24) Kɛ sran akpiakpi nga be wla o su kɛ bé trán mɛn klanman’n nun asiɛ’n su wa’n, be su Ɲanmiɛn sɔ ɔ. Yɛ kɛ be su Klist su sɔ wie ɔ. Sɛ be nian naan be kwla uka junman nga be di be man Ɲanmiɛn su’n, be uka su. Be seman kɛ laa liɛ nga be di’n ti kpa sɔ. I sɔ’n ti’n, be nun wie’m be yacili ninnge wie’m be yolɛ naan b’a kwla kaci atin bofuɛ. Afuɛ kwlaa nun’n, wie’m be fa anglo wie’m be di atin bolɛ junman’n. Be nga be kwlá yomɛn i sɔ’n, be wla be wun ase be bo jasin fɛ’n i kpa. Be yo kɛ Mali m’ɔ fali palifɛn guɛli i Zezi su’n sa. Zezi seli kɛ: “Like ng’ɔ yo mannin min’n ti kpa. [...] W’a yo ng’ɔ kwlɛ i yo’n.” (Mar. 14:6-8) Nga e kwlɛ i yo’n i yolɛ’n kwla yo kekle man e. Afin mɛn nga e o nun’n, Satan yɛ ɔ sie i ɔ. I sɔ’n ti’n, ɔ fata kɛ e kplin e ɲin kpa yɛ e fa e wla’n guɛ i Zoova su. Maan e nian wafa nga ninnge nnan nun’n e kwla yo i sɔ’n.

Maan e dun mmua fa e wun man Ɲanmiɛn naan ɔ sie e

6. (a) ?Ngue yɛ mɛn nunfuɛ’m be yo m’ɔ kle kɛ mɛn nga yɛ ɔ ti be like liɛ mɔ be le i’n niɔn? (b) ?Ngue ti yɛ ɔ flunman kɛ e yo kɛ Davidi sa ɔ?

⁶ Zezi seli i sɔnnzɔnfuɛ’m be kɛ be dun mmua fa be wun man Ɲanmiɛn maan ɔ sie be yɛ be yo Ɲanmiɛn i klun sa. Mɛn nga nunfuɛ’m be liɛ’n, be bɔbɔ be klunklo ninnge kunndɛlɛ’n yɛ ɔ ti be cinnjin ɔn. Afin “be like liɛ nga be le i’n yɛle mɛn nga, NW.” (An kanngan  Jue Mun 17:1, 13-15 nun.) Be ndɛ nunman Like Yifuɛ’n i ndɛ nun. Ɔ maan like nga be kwla yo naan b’a di mɛn’n kpa’n naan b’a ɲan bla nin ba mun naan sɛ be nunman lɛ kun be mma’m b’a kaman yalɛ nun’n, yɛ be wla be wun ase be yo ɔ. Be yo i sɔ afin be like liɛ nga be le i’n, yɛle mɛn nga. Davidi liɛ’n, like ng’ɔ yoli i cinnjin’n yɛle kɛ Zoova bo “i dunman kpa.” I sin’n, i wa’n seli sran’m be kwlaa be kɛ be yo i sɔ wie. (Aku. 7:1) Kɛ Azafu sa’n, Davidi wunnin i ekun kɛ sɛ sran kun tra Zoova i janvuɛ’n, i kpa tra i bɔbɔ i klunklo ninnge’m be kunndɛlɛ’n lele. Kɛ Davidi yoli sɔ’n, ɔ dili aklunjuɛ. Dɔ nga su’n, e niaan kpanngban be kle kɛ Ɲanmiɛn junman dilɛ’n ti be cinnjin tra be bɔbɔ be junman nga be di’n.

7. ?Kɛ mɔ aniaan kun dun mmua fɛli i wun mannin Zoova naan ɔ sie i’n ti’n, ye benin yɛ ɔ ɲɛnnin i ɔ?

⁷ I sɔ wie yɛ aniaan bian Zan Klodu yoli ɔ. Ɔ o nvle nga be flɛ i République centrafricaine i nun lɔ. Ɔ ti asɔnun kpɛnngbɛn yɛ ɔ le bla yɛ i sa nun ba nsan. Be lika’n nun lɔ’n, junman ɲanlɛ’n ti kekle. Ɔ maan be nga b’a ɲan junman’n, like kwlaa nga be kwla yo naan be junman’n w’a saciman’n yɛ be yo ɔ. Cɛn kun’n, Zan Klodu i junman su kpɛn kun seli i kɛ siɛn’n, ɔ di junman kɔnguɛ naan ɔ bo i bo nnɔsua nun dɔ 6 nin sin  su. Yɛ ɔ yo i sɔ Kisie lele Mɔnnɛn. Zan Klodu seli bian’n kɛ ɔ ti su kɛ ɔ fata kɛ ɔ mɛn i awlobofuɛ’m be aliɛ nin lawlɛ. Sanngɛ be Ɲanmiɛn ndɛ’n klelɛ’n kusu ti cinnjin wie. Ɔ kɛnnin i ekun kɛ ɔ fata kɛ ɔ suan asɔnun’n i bo. ?Kɛ i junman’n su kpɛn’n tili i sɔ’n, ɔ seli i sɛ? Ɔ seli i kɛ: “Mɛn nga w’a yo kekle yɛ nun’n, w’a ɲan junman. I ti, la Ɲanmiɛn i ase. Nán bu like uflɛ akunndan. Sɛ ɔ yi o, sɛ ɔ mma mun o, sɛ sa nga be o ɔ su mun o, nán fa ɔ ɲin sie be su. Like kunngba cɛ nga ɔ fata kɛ ɔ ɲin tran su titi’n, yɛle ɔ junman’n. ?Ɔ maan, á dí junman’n annzɛ á sú Ɲanmiɛn?” ?Sɛ e yɛ be usa e sɔ’n, é sé sɛ? Zan Klodu si kɛ sɛ be tu i junman nun’n, Ɲanmiɛn níɛn i lika. Kusu i sa su kanman ngbɛn Ɲanmiɛn junman’n i dilɛ nun. Yɛ Zoova úkɛ i naan w’a kwla niɛn i awlobofuɛ’m be lika wie. I sɔ’n ti’n, kɛ aɲia’n i cɛn’n juli’n, ɔ ɔli i bo. I sin’n, ɔ siesieli i wun naan ɔ́ kɔ́ junman. Nja, sɛ be tuli i junman’n nun o, annzɛ sɛ o, ɔ siman. Kɛ ɔ wieli i wun siesie’n yɛ i telefɔnu’n tɛli ɔ. Ɔ́ sɔ́ su ɔ, be waan be tuli i junman’n su kpɛn’n junman’n nun naan i liɛ’n, b’a tumɛn i.

8, 9. ?Ajalɛ benin yɛ Ɲanmiɛn ɲrun jranfuɛ nin Levifuɛ’m be fali mɔ e kwla nian su naan Zoova w’a yo e like liɛ mɔ e le i’n niɔn?

⁸ Atrɛkpa’n, sa kunngba’n tɔli amun nun wie’m be su. Kɛ ɔ yoli sɔ’n, amun usali amun wun kɛ: ‘?Sɛ min junman’n saci’n, ń yó i sɛ naan m’an nian min awlobofuɛ’m be lika?’ (1 Tim. 5:8) Wie nun kusu ɔ, nán sa kunngba’n yɛ ɔ ɲannin amun ɔn. Sanngɛ, sa ng’ɔ ɲannin amun kleli amun kɛ sɛ amun tra Ɲanmiɛn sulɛ’n nun cinnjin kpa naan Ɲanmiɛn yo amun like liɛ mɔ amun le i’n, ɔ su sokpaman amun. Zezi seli i sɔnnzɔnfuɛ’m be kɛ be dun mmua fa be wun man Nyanmiɛn maan ɔ sie be. Sanngɛ ɔ kan ukali su kɛ bé “wá fá ninnge sɔ’n kwlaa” yɛle kɛ aliɛ nin tralɛ’n, bé úka su mán be.—Mat. 6:33.

⁹ Amun e kan Levifuɛ mɔ b’a ɲanman asiɛ’n wie’n, be ndɛ kan. Ɲanmiɛn junman’n yɛ be fa cicili be ti ɔ. Ɔ maan, ɔ fata kɛ be lafi su kɛ Zoova yɛ ɔ́ nían be lika ɔ. Zoova seli be kɛ: “Min yɛ n ti ɔ lika liɛ bɔ a ko nyɛn i nin-ɔn.” (Kal. 18:20) Andɛ’n, e suman Ɲanmiɛn kɛ Levifuɛ nin Ɲanmiɛn ɲrun jranfuɛ’m be fa yoli i Ɲanmiɛn i sua’n nun laa’n sa. Sanngɛ kɛ be sa’n, e kwla lafi Zoova su kɛ ɔ́ nían e lika. E si kɛ, kɛ mɔ e faman e wun wlɛmɛn i Satan i mɛn’n nun’n ti’n, kɛ mɛn’n i awieliɛ’n mántan kɔ́’n, lika’n yó kekle kpa mán e. I sɔ’n kle e kɛ ɔ fata kɛ e fa e wla gua Ɲanmiɛn su tra laa’n naan e lafi su kɛ ɔ su yaciman e lɛ sa ngbɛn.—Ngl. 13:17.

Maan e dun mmua e yo Ɲanmiɛn i klun sa

10, 11. ?Junman ndɛ’n nun’n, wafa sɛ yɛ aniaan wie’m be fali be wla be guɛli i Zoova su ɔ? An fa sa kun be yiyi nun.

¹⁰ Asa ekun’n, Zezi seli i sɔnnzɔnfuɛ’m be kɛ titi’n be dun mmua “yo [Nyanmiɛn] i klun sa’n.” (Mat. 6:33) Ndɛ sɔ’n i bo’n yɛle kɛ, like nga Zoova se kɛ ɔ ti kpa annzɛ ɔ ti tɛ’n, i su yɛ ɔ fata kɛ e fa ɔ. Nán klɔ sran’m be liɛ’n su yɛ e fata kɛ e fa ɔ. (An kanngan Ezai 55:8, 9 nun.) Sran wie’m be di asra fie annzɛ be yo i atɛ laa. Annzɛ kusu be kle sran’m be alɛ kunlɛ annzɛ be yi alɛ ninnge be yo i atɛ. Sanngɛ kɛ be suannin Ɲanmiɛn Ndɛ’n, be yacili ninnge sɔ’m be yolɛ. Kpɛkun be kacili be nzuɛn’n yɛ be yoli be batɛmu.—Eza. 2:4; 2 Kor. 7:1; Gal. 5:14.

¹¹ I sɔ wie yɛ Andre yoli ɔ. Ɔ nin i yi be suannin Zoova su like yɛ be kunndɛli kɛ bé sú i. Andre klo junman nga ɔ di’n kpa, sanngɛ ɔ yacili i dilɛ. Ɔ yoli sɔ afin be ng’ɔ di junman man be’n be sa o alɛ kunlɛ nun. Kusu’n, ɔ kunndɛli kɛ ɔ́ fá Ɲanmiɛn klun sa yolɛ’n síe i like kwlaa ɲrun. Kɛ Andre tú junman’n nun’n nn ɔ le ba nɲɔn. Sika nga ɔ o i sa nun’n su kwlá diman anglo kpanngban naan w’a wie. Kɛ a nian be sa’n, a kwla se kɛ be ti kɛ Levifuɛ mɔ be leman asiɛ fi’n sa. Ɔ fɛli i wla’n guali Ɲanmiɛn su yɛ ɔ kunndɛli junman. Siɛn’n, kɛ ɔ nin i awlobofuɛ’m be bu  blɛ sɔ’n i akunndan’n, be kwla se kɛ sakpasakpa naan Zoova i sa’n timan tika. (Eza. 59:1) Kɛ mɔ Andre nin i yi be yacili ninnge wie’m be yolɛ’n ti’n, be kwla fali be wun wlɛli i blɛ kwlaa nun Ɲanmiɛn junman dilɛ’n nun. I waan: “Ɔ ju wie’n, sika nin e lawlɛ nin aunkpinndiɛ ndɛ nin kpɛnngbɛn mɔ e su yo’n ti’n, e kokoli. Sanngɛ Zoova w’a yiman e ase le. [...] E kwla kɛn i weinwein kɛ junman’n i kpafuɛ’n m’ɔ jɔ sran awlɛn’n, ɔ timan nɲɔn. Yɛle Zoova i sulɛ.” *—Aku. 12:13.

12. ?Ngue yɛ ɔ kwla uka amun naan Ɲanmiɛn i mmla’m be su falɛ’n w’a yo amun cinnjin w’a tra like kwlaa ɔ? Sɛ amun lika’n nun lɔ aniaan wie i su sa’n yi i sɔ’n i nglo’n, an bo su.

¹² Zezi seli i sɔnnzɔnfuɛ’m be kɛ: “Sɛ an lafi Nyanmiɛn su bɔ kaan b’ɔ ju kɛ mutard mma sa’n, an kwla se oka ng’ɔ o yɛ’n kɛ: ‘Tu ɔ bo wa kɔ le sa.’ Ɔ́ tú i bo, yɛ sa fi nun-man lɛ bɔ an su kwlɛ-mɛn i yo-ɔ.” (Mat. 17:20) ?Sɛ ndɛ wie nun ɔ fata kɛ amun dun mmua fa Ɲanmiɛn i mmla’n su naan kusu sɛ amun yo i sɔ’n kekle tɔ́ amun su’n, amún yó i sɛ? Sɛ amun bumɛn i kɛ amún kwlá fá Ɲanmiɛn i mmla’n su’n, amun usa aniaan mun be nian. Kɛ bé kán wafa nga Zoova ukali be’n i ndɛ’n, ɔ́ yó maan amún láfi Ɲanmiɛn su kpa.

Maan e si ninnge nga Zoova yo man e’n be su ye

13. ?Sɛ e tu e klun e su Zoova’n, ngue yɛ e kwla lafi su kɛ ɔ́ yó mán e i sulɛ nun ɔn?

¹³ Sɛ Zoova i sulɛ’n ti e cinnjin kpa’n, e kwla lafi su kɛ ɔ́ nían e lika kɛ nga Levifuɛ’m be liɛ’n su’n, ɔ fa yoli’n sa. Yɛle kɛ sɛ ɔ ti aliɛ o, sɛ tralɛ o annzɛ i wunsu like uflɛ o, ɔ́ fɛ́ i kwlaa mán e. Asa kusu i sulɛ’n nun like fi su mianman e sa. Maan e bu Davidi i aeliɛ’n i akunndan kan e nian. I nun nga ɔ fia yɛbuɛ buɛ nun’n, ɔ lafili su kɛ Ɲanmiɛn níɛn i lika. E kusu’n, sɛ ɔ yo e kɛ sran fi nunman lɛ naan w’a uka e’n, e kwla lafi Zoova su sɔ wie. Nán maan e wla fi kɛ, kɛ Azafu “wluli Nyanmiɛn i lika’n nun’n yɛ ɔ wunnin” sa ng’ɔ o i su’n i wlɛ ɔ. (Jue. 73:17) E kusu’n, ɔ fata kɛ e kpɛ e ɲin Ɲanmiɛn m’ɔ nian e lika i sulɛ’n nun’n i wun lɔ. Kɛ e yo i sɔ’n, ɔ kle kɛ Ɲanmiɛn sulɛ’n ti e cinnjin. Naan kannzɛ lika’n ti sɛ’n, e su yacimɛn i sulɛ le. I sɔ’n kusu kle kɛ Zoova ti e like liɛ mɔ e le i ɔ.

14, 15. ?Sɛ be yiyi Biblu’n i nun ndɛ wie’m be nun wafa uflɛ’n, wafa sɛ yɛ ɔ fata kɛ e sɔ nun ɔn? ?Ngue ti ɔ?

¹⁴ ?Kɛ Zoova maan be yiyi i “bɔbɔ i akunndan’n” ng’ɔ o Biblu’n nun’n i nun kle e’n, wafa sɛ yɛ e sɔ nun ɔn? (1 Kor. 2:10-13) I nun mɔ Zezi kannin ndɛ kun kleli sran mun’n, like nga Akoto Piɛli yoli’n kwla uka e kpa. Zezi seli kɛ: “Sɛ amu’an di-man m bɔ n kacili Sran’n min nnɛn’n, yɛ sɛ amu’an nɔn-man min mmoja’n, an su nyan-man nguan.” Zezi i sɔnnzɔnfuɛ wie’m be buli i kɛ, Zezi su se be kɛ be di i wunnɛn bɔbɔ’n ba’n naan be nɔn i mmoja’n. Ɔ maan be seli kɛ: “Ndɛ nga ti kekle. ?Wan yɛ ɔ kwla fa su-ɔ?” “Kɛ ɔ fin lɛ’n, i sɔnnzɔnfuɛ’m be nun kpanngban be tili be wun.” Sanngɛ Piɛli seli kɛ: “?Wan sin yɛ é kɔ́-ɔ? Ɔ ndɛ’n yɛ maan e nyan anannganman nguan-an.”—Zan 6:53, 60, 66, 68.

¹⁵ Ndɛ nga Zezi kannin’n, Piɛli w’a wunman i ngba wlɛ. Sanngɛ ɔ lafili su kɛ Ɲanmiɛn úkɛ i naan w’a si nanwlɛ’n. Ɔ ju wie’n, be kwla yiyi Biblu’n i nun ndɛ kun i nun wafa uflɛ. ?Sɛ be yo i sɔ’n, e kunndɛ sa ti mɔ be yoli sɔ’n? (Nya. 4:18) Klistfuɛ klikli’m be blɛ su’n, Bere lɔfuɛ’m “be fali Nyanmiɛn ndɛ’n su ndɛndɛ, cɛn kwlaa be fa Nyanmiɛn ndɛ nga be klɛli’n” be nian nun. (Yol. 17:11) Sɛ e yo kɛ be sa’n, é bú Zoova i sulɛ’n i like dan trá laa’n. Yɛ ɔ́ yó e fɛ ekun kɛ Zoova yɛ ɔ ti e like liɛ nga e le i’n niɔn.

Maan e aja’n yo e Min’n i liɛ’n su

16. ?Sɛ e waan é klé kɛ Ɲanmiɛn yɛ ɔ ti e like liɛ nga e le i’n, wafa sɛ yɛ ɔ fata kɛ e bu mmla ng’ɔ o 1 Korɛntfuɛ Mun 7:39 nun’n niɔn?

¹⁶ Wafa kun ekun ng’ɔ fata kɛ Klistfuɛ’m be kle kɛ Ɲanmiɛn klun sa yolɛ’n ti be cinnjin’n, yɛle kɛ be fa Biblu’n nun mmla yɛ’n su. Mmla’n sɔ’n waan maan be aja’n yo “e Min’n i klun su.” (1 Kor. 7:39) Aniaan wie’m be kunndɛman kɛ bé tɔ́n mmla sɔ’n ti’n, be kpɛli i kpo kɛ be su jaman bla annzɛ bian. Ɲanmiɛn niɛn i sɔfuɛ’m be lika klolɛ su. ?Kɛ ɔ yoli Davidi kɛ ɔ leman sran  ukɛmɛn i’n naan i ngunmin yɛ ɔ o’n, ngue yɛ ɔ yoli ɔ? Ɔ seli kɛ: “N koko sa ng’ɔ o min su’n n kle [Nyanmiɛn]. N fa nyrɛnnɛn ng’ɔ o min su’n n sie i nyrun.” (Jue. 142:2-4) Atrɛkpa’n, Zeremi m’ɔ suli Ɲanmiɛn cɛli kpa’n mɔ w’a jaman bla le’n, i wun yoli i sɔ wie.

17. ?Kɛ ɔ yo aniaan bla kun m’ɔ nin a jaman bian’n i kɛ i ngunmin yɛ ɔ o’n sa’n, ngue yɛ ɔ yo ɔ?

¹⁷ Aniaan bla kun m’ɔ o Amlɛnkɛn’m be mɛn’n nun lɔ’n seli kɛ: “M’an taman min wun nda le kɛ n su jaman bian. N seli min wun kɛ sɛ n ɲan bian kpa’n, ń jɛ́ i. Sanngɛ min manmin m’ɔ timan Zoova i sufuɛ’n jrannin min su cɔcɔcɔ kɛ sran kwlaa nga i waan ɔ́ já min’n, n kplin su. ?N usɛli i kɛ sɛ m’an jaman bian ng’ɔ ti kpa’n i sin ndɛ ng’ɔ́ bá’n, n fa guɛ i su? Kusu kɛ ɔ́ kɔ́ i ɲrun’n, ɔ wunnin i kɛ n le junman kpa n di naan n kwla nian min wun lika naan kusu n di aklunjuɛ. Ɔ maan, ɔ yacili min diin.” Sanngɛ ɔ ju wie’n, ɔ yo aniaan bla sɔ’n kɛ i ngunmin yɛ ɔ o sa. I waan: “Kɛ ɔ yo n sɔ’n, n kan min klun ndɛ n kle Zoova. I kusu i wla w’a fiman min su le.” ?Ngue yɛ ɔ ukɛli i naan w’a fɛ i wla’n w’a gua Zoova su ɔ? I waan: “Ɲanmiɛn srɛlɛ’n ɔ uka min maan n wun i kɛ Zoova o lɛ sakpa naan nán min ngunmin yɛ n wo ɔ. ?Kɛ mɔ Ɲanmiɛn m’ɔ o like’n kwlaa ti su’n yɛ ɔ tie min srɛlɛ’n, ngue ti yɛ min akunndan’n sánngan yɛ, yɛ ngue ti yɛ min wla bó yɛ?” Asa ekun’n, ɔ lafi su kɛ “sɛ a cɛ sran like’n, ɔ ti kpa tra kɛ be cɛ wɔ like’n.” I ti’n, ɔ seli kɛ: “M mian min ɲin n uka min wiengu. Kɛ n yo i sɔ’n, n kunndɛmɛn i sin like. Kɛ m bu wafa nga n kwla uka min wiengu’n i akunndan’n, min klun jɔ dan.” (Yol. 20:35) Zoova ti i like liɛ ng’ɔ le i’n sakpa. Yɛ i sulɛ’n m’ɔ ti i cenjele like’n, ɔ yo i fɛ dan.

18. ?Wafa sɛ yɛ Zoova kwla fa e yo i like liɛ m’ɔ le i’n niɔn?

¹⁸ Kannzɛ sa ng’ɔ e su’n ti sɛ ti sɛ’n, Ɲanmiɛn kwla yo e like liɛ mɔ e le i ɔ. Sɛ e kplin su kɛ Ɲanmiɛn yo e like liɛ nga e le i’n, é yó i sufuɛ nga be di aklunjuɛ’n be nunfuɛ wie. (2 Kor. 6:16, 17) Ɔ maan é yó Zoova i like liɛ ng’ɔ le i’n, kɛ laa’n i sufuɛ’m be sa. (An kanngan Mmla’n 32:9, 10 nun.) Izraɛlifuɛ’m be yoli Ɲanmiɛn i like liɛ nga ɔ le i’n. E kusu Zoova kwla fa e wie kɛ e yo i liɛ kpɛkun ɔ nian e lika klolɛ su.—Jue. 17:8.

[Ja ngua lɛ ndɛ’n]

?Amún tɛ́ su sɛ?

• ?Sɛ e waan é klé kɛ Zoova yɛ ɔ ti e like liɛ nga e le i’n, wafa sɛ yɛ é bú e wun m’ɔ fata kɛ e dun mmua fa man Ɲanmiɛn naan ɔ sie e’n nin i klun sa yolɛ’n niɔn?

• ?Sɛ e waan é klé kɛ Zoova yɛ ɔ ti e like liɛ nga e le i’n, wafa sɛ yɛ é yí e ye silɛ’n i nglo ɔ?

• ?Sɛ e waan é klé kɛ Zoova yɛ ɔ ti e like liɛ nga e le i’n, wafa sɛ yɛ é bú Ɲanmiɛn i mmla ng’ɔ se kɛ maan e aja’n yo e Min’n i klun su’n niɔn?

[Kosan mun]

[Ndɛ kwle, bue 16]

Sɛ e fa Zoova i junman’n e sie i like kwlaa ɲrun’n, ɔ́ yó e like liɛ mɔ e le i’n.

[Foto, bue 18]

Zeremi i su ndɛ’n wla min fanngan dan.