Gihimo Mo ba si Jehova nga Imong Bahin?

“Magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.”—MAT. 6:33.

1, 2. (a) Kinsay gitumong nga “Israel sa Diyos” sa Galacia 6:16? (b) Kinsay gitumong nga “napulog-duha ka tribo sa Israel” sa Mateo 19:28?

INIGBASA nimo sa ngalang Israel diha sa Bibliya, unsay imong mahinumdoman? Ang anak ba ni Isaac nga si Jacob, nga sa ulahi ginganlag Israel, o ang iyang mga kaliwat, ang karaang nasod sa Israel? Ang Bibliya naghisgot usab ug espirituwal nga Israel, o “Israel sa Diyos.” Sila ang 144,000 nga gidihogan sa balaang espiritu aron mahimong hari ug saserdote sa langit. (Gal. 6:16; Pin. 7:4; 21:12) Apan tagda ang linaing paghisgot sa 12 ka tribo sa Israel diha sa Mateo 19:28.

² Si Jesus miingon: “Sa paglalang-pag-usab, sa dihang ang Anak sa tawo molingkod sa iyang mahimayaong trono, kamo nga nagsunod kanako molingkod usab sa napulog-duha ka trono, nga magahukom sa napulog-duha ka tribo sa Israel.” Niining tekstoha, ang “napulog-duha ka tribo sa Israel” mao ang magpuyo sa Paraiso sa yuta sa walay kataposan. Ang 144,000 magsilbing ilang maghuhukom ug saserdote.

3, 4. Unsang maayong panig-ingnan ang gipakita sa matinumanong mga dinihogan?

³ Sama sa mga saserdote ug Levihanon kanhi, giisip sa mga dinihogan karon nga usa  ka pribilehiyo ang ilang pag-alagad. (Num. 18:20) Ang mga dinihogan wala maglaom nga hatagag teritoryo o luna dinhi sa yuta. Hinuon, ang Pinadayag 4:10, 11 nagpakita nga sila padayong mag-alagad kang Jehova sa langit ingong mga hari ug saserdote uban ni Jesu-Kristo.—Ezeq. 44:28.

⁴ Samtang ania pa sa yuta, makita sa pagkinabuhi sa mga dinihogan nga si Jehova ang ilang bahin. Ang pag-alagad sa Diyos maoy labing importante kanila. Sila nagpakitag pagtuo sa halad lukat ni Kristo ug padayong nagsunod kaniya, nga sa ingon ‘maseguro ang ilang pagkatinawag ug pagkapinili.’ (2 Ped. 1:10) Bisag magkalahi ang ilang kahimtang ug katakos, wala nila himoang pasangil ang ilang mga limitasyon aron diyutay ra ang ilang mahimo sa pag-alagad. Sa kasukwahi, giuna nila ang pag-alagad sa Diyos kutob sa ilang maarangan. Ug sila sulondan gayod niadtong naglaom nga mabuhi sa paraisong yuta.

5. Sa unsang paagi ang tanang Kristohanon makahimo kang Jehova nga ilang bahin? Nganong lisod tingali kana?

⁵ Langitnon man o yutan-on ang atong paglaom, angay natong ‘dumilian ang kaugalingon ug pas-anon ang atong estaka sa pagsakit ug magpadayon sa pagsunod kang Kristo.’ (Mat. 16:24) Milyonmilyon nga naglaom sa kinabuhi sa Paraiso sa yuta ang nagsimba sa Diyos ug nagsunod kang Kristo nianang paagiha. Sila dili kontento nga diyutay rag mahimo sa pag-alagad kon nahibalo sila nga labaw pa ang ilang mahimo. Daghan ang nagpasimple sa ilang kinabuhi ug nagregular payunir. Ang pipila nagpayunir ug pila ka bulan matag tuig. Ang uban, bisag dili makapayunir, nagpauswag sa ilang ministeryo. Sila sama kang Maria, nga nagbubo ug humot nga lana kang Jesus. Siya miingon: “Gibuhat niya ang usa ka maayong buhat alang kanako. . . . Gibuhat niya ang iyang maarangan.” (Mar. 14:6-8) Kita nagkinabuhi sa kalibotan nga gigamhan ni Satanas, busa mahimong lisod ang pagbuhat sa atong maarangan. Bisan pa niana, kinahanglang manglimbasog ug mosalig kita kang Jehova. Tagda ang upat ka paagi nga ato kanang mahimo.

Pangitaa Pag-una ang Gingharian sa Diyos

6. (a) Sa unsang paagi gipakita sa mga tawo sa kalibotan nga ang ilang bahin ania lang niining kinabuhia? (b) Nganong mas maayong sundogon si David?

⁶ Gitudloan ni Jesus ang iyang mga sumusunod sa pagpangita pag-una sa Gingharian ug sa pagkamatarong sa Diyos. Sagad unahon sa mga tawo sa kalibotan ang personal nga kaayohan kay sila “mga tawo niini nga sistema sa mga butang, kansang bahin ania niining kinabuhia.” (Basaha ang Salmo 17:1, 13-15.) Kay walay pagpabili sa Maglalalang, daghan ang naghunahuna lang sa pagbatog haruhayng kinabuhi, pamilya, ug sa pagbilig panulondon. Ang ilang bahin ania lang niining kinabuhia. Sa laing bahin, si David interesado sa paghimog maayong ngalan uban kang Jehova, ug kana usab ang giawhag sa iyang anak nga buhaton sa tanan. (Eccl. 7:1) Sama kang Asap, si David nahibalo nga ang pagkahimong higala ni Jehova mao ang labing hinungdanon sa kinabuhi. Kana nakapalipay kaniya. Karon, daghang Kristohanon ang nag-una sa ilang pag-alagad kay sa ilang trabaho.

7. Unsang panalangin ang nadawat sa usa ka brader tungod sa pag-una sa Gingharian?

⁷ Tagda si Jean-Claude sa Central African Republic, usa ka minyong ansiyano nga may tulo ka anak. Lisod mangitag trabaho sa maong nasod, ug himoon sa kadaghanan ang tanan aron magpabilin sa trabaho. Usa ka adlaw, si Jean-Claude giingnan sa manedyer nga panggabii na ang iyang trabaho—sugod sa 6:30, pito ka adlaw kada semana. Mipatin-aw si Jean-Claude nga gawas sa pagsuportar sa iyang pamilya sa materyal, kinahanglang atimanon niya ang ilang espirituwalidad. Siya  miingon usab nga may responsabilidad siya sa kongregasyon. Unsay tubag sa manedyer? “Kon naa kay trabaho, kalimti ang ubang butang, apil na ang imong asawa, mga anak, ug problema. Magpokus ka lang sa imong trabaho. Pagpili: relihiyon o trabaho.” Kon ikaw pay anaa sa maong kahimtang, unsay imong buhaton? Nahibalo si Jean-Claude nga kon mawad-an siyag trabaho, dili siya pasagdan sa Diyos. Daghan pa siyag buluhaton sa Ginoo, ug si Jehova motagana sa panginahanglan sa iyang pamilya. Busa mitambong gihapon siya sa tigom. Dayon nangandam siya aron motrabaho, bisag dili siya segurado kon may trabaho pa siya. Niadtong tungora, may mitelepono niya. Ang manedyer gipapahawa, apan siya nagpabilin sa trabaho.

8, 9. Sa unsang paagi nato masundog ang mga saserdote ug Levihanon sa paghimo kang Jehova nga atong bahin?

⁸ Ang pipila nga nakasinatig sama niana lagmit nabalaka, ‘Unsaon na nako pagsuportar sa akong pamilya?’ (1 Tim. 5:8) Nakasinati ka man niana o wala, makaseguro ka nga dili ka magmahay kon himoon nimo ang Diyos nga imong bahin ug unahon ang pag-alagad kaniya. Dihang giingnan ni Jesus ang iyang mga tinun-an nga pangitaon pag-una ang gingharian, siya mipasalig kanila: “Kining tanang ubang mga butang”—sama sa pagkaon, ilimnon, o besti—“igadugang ra kaninyo.”—Mat. 6:33.

⁹ Hunahunaa ang mga Levihanon nga walay napanunod nga yuta. Kay giuna nila ang putling pagsimba, kinahanglan silang mosalig kang Jehova alang sa ilang materyal nga panginahanglan, kinsa miingon: ‘Ako mao ang inyong bahin.’ (Num. 18:20) Bisag wala kita mag-alagad sa literal nga templo sama sa mga saserdote ug Levihanon, kita usab makasalig nga si Jehova motagana kanato. Samtang nagkaduol ang kataposan, mas hinungdanon nga mosalig kita sa gahom sa Diyos sa pagtagana kanato.—Pin. 13:17.

Pangitaa Pag-una ang Pagkamatarong sa Diyos

10, 11. Maylabot sa panarbaho, sa unsang paagi ang uban misalig kang Jehova? Paghatag ug pananglitan.

¹⁰ Si Jesus nag-awhag usab sa iyang mga tinun-an sa ‘pagpangita pag-una sa pagkamatarong sa Diyos.’ (Mat. 6:33) Kini nagpasabot nga atong sundon ang sukdanan ni Jehova bahin sa matarong ug daotan, dili ang sa tawo. (Basaha ang Isaias 55:8, 9.) May mga tawo kaniadto nga nananom ug tabako o namaligyag sigarilyo, nagbansay sa uban alang sa gubat, o nanggama ug namaligyag armas. Apan sa dihang nakakat-on sila sa kamatuoran, daghan kanila ang nag-usab sa ilang trabaho ug mikuwalipikar sa bawtismo.—Isa. 2:4; 2 Cor. 7:1; Gal. 5:14.

¹¹ Usa ka pananglitan niana si Andrew. Dihang siya ug ang iyang asawa nakakat-on bahin kang Jehova, sila midesisyon sa pag-alagad kaniya. Bisag ganahan kaayo si Andrew sa iyang trabaho, siya miundang. Ngano? Kay siya nagtrabaho sa usa ka organisasyon nga nalangkit sa gubat ug determinado siya nga unahon ang pagkamatarong sa Diyos. Sa pag-undang ni Andrew, siya may duha ka anak, ug ang iyang kuwarta igo lang sa pipila ka bulan. Sa panglantaw sa tawo, siya daw walay ‘panulondon.’ Siya misalig sa Diyos ug nangitag trabaho. Sa paghinumdom sa nangagi, siya ug ang iyang pamilya makapamatuod nga dili mubo ang kamot ni Jehova. (Isa. 59:1) Kay gipasimple ang ilang kinabuhi, si Andrew ug iyang asawa nakapayunir. May mga panahon nga sila nabalaka bahin sa kuwarta, puy-anan, panglawas, ug sa ilang pagkatigulang. Apan si Jehova kanunayng nagtabang nila. Sila  nakaingon gayod nga ang pag-alagad kang Jehova mao ang labing dungganon ug makapalipay nga karera. *—Eccl. 12:13.

12. Unsay gikinahanglan aron masunod ang mga sukdanan sa Diyos? Paghatag ug lokal nga kasinatian.

¹² Si Jesus miingon sa iyang mga tinun-an: “Kon kamo adunay pagtuo nga ang gidak-on ingon sa lugas sa mustasa, sultihan ninyo kining bukira, ‘Balhin gikan dinhi paingon didto,’ ug mobalhin kini, ug walay mahimong imposible alang kaninyo.” (Mat. 17:20) Imo ba gihapong sundon ang mga sukdanan sa Diyos bisag makahatag kanag kalisdanan kanimo? Kon dili ka segurado, pakigsulti sa ubang membro sa kongregasyon. Malig-on ka gayod sa ilang kasinatian.

Pabilhi ang Espirituwal nga mga Tagana ni Jehova

13. Kon pabilhan nato ang pribilehiyo sa pag-alagad kang Jehova, sa unsa kita makasalig?

¹³ Kon pabilhan nimo ang imong pribilehiyo sa pag-alagad kang Jehova, makasalig ka nga siya motagana sa imong pisikal ug espirituwal nga panginahanglan, sama sa iyang gihimo sa mga Levihanon. Hunahunaa si David. Bisag didto siya sa langob, siya misalig nga tabangan siya sa Diyos. Kita usab makasalig kang Jehova bisan pag daw wala nay laing makatabang nato. Hinumdomi nga sa dihang si Asap misulod “sa dakong sangtuwaryo sa Diyos,” iyang nasabtan kon unsay nakahasol niya. (Sal. 73:17) Sa susama, kita kinahanglang modangop kang Jehova alang sa espirituwal nga kalig-on. Sa ingon, atong gipabilhan ang atong pribilehiyo sa pag-alagad sa Diyos bisag unsa pay atong kahimtang. Busa atong ginahimo si Jehova nga atong bahin.

14, 15. Unsay atong buhaton dihang may kausaban sa pagsabot sa usa ka kamatuoran sa Bibliya, ug ngano?

¹⁴ Mosalig ba kita kang Jehova sa dihang tabangan niya kita sa pagsabot sa “lawom nga mga butang sa Diyos” diha sa Bibliya? (1 Cor. 2:10-13) Si apostol Pedro maoy maayong pananglitan niini sa dihang giingnan ni Jesus ang mga Hudiyo: “Gawas kon kamo mokaon sa unod sa Anak sa tawo ug moinom sa iyang dugo, kamo walay kinabuhi diha sa inyong kaugalingon.” Daghang tinun-an ang literal nga nagsabot niadto ug miingon: “Kining mga pulonga makapakugang; kinsa ang makapatalinghog niini?” Sila “namalik ngadto sa mga butang nga ilang gitalikdan.” Apan si Pedro miingon: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan.”—Juan 6:53, 60, 66, 68.

¹⁵ Si Pedro wala kaayo makasabot sa giingon ni Jesus. Apan siya misalig sa Diyos alang sa espirituwal nga katin-awan. Dihang may kausaban sa pagsabot sa usa ka kamatuoran sa Bibliya, naningkamot ka ba nga masabtan ang mga rason niana? (Prov. 4:18) Ang mga taga-Berea sa unang siglo midawat sa pulong “uban ang tumang kaikag sa hunahuna, nga sa adlaw-adlaw maampingong nagasusi sa Kasulatan.” (Buh. 17:11) Kon imo silang sundogon, mas mapabilhan nimo ang imong pribilehiyo sa pag-alagad kang Jehova, ang paghimo kaniya nga imong bahin.

Pagminyo Lamang Diha sa Ginoo

16. Maylabot sa sugo diha sa 1 Corinto 7:39, sa unsang paagi ang Diyos mahimong atong bahin?

¹⁶ Ang laing paagi diin angayng hinumdoman sa mga Kristohanon ang katuyoan sa Diyos mao ang pagsunod sa sugo nga magminyo “lamang diha sa Ginoo.” (1 Cor. 7:39) Daghan ang nagpabiling tagsaanon inay supakon ang maong sugo. Ang Diyos mahigugmaong nag-atiman kanila. Unsay gihimo ni David sa dihang siya mibating nag-inusara ug daw walay motabang kaniya? ‘Sa atubangan [sa Diyos] gibubo ko ang akong kabalaka,’ siya miingon. “Sa iyang atubangan gisugid ko ang akong kasakitan, sa diha nga ang akong espiritu naluya sa sulod nako.” (Sal. 142:1-3) Tingali  gibati usab kana ni propeta Jeremias, kinsa matinumanong nag-alagad sa Diyos sa daghang dekada ingong tagsaanon. Mahimo nimong tun-an ang iyang panig-ingnan diha sa kapitulo 8 sa librong Ang Mensahe sa Diyos Kanato Pinaagi ni Jeremias.

17. Unsay ginahimo sa usa ka tagsaanong sister sa dihang mobatig kamingaw?

¹⁷ “Wala gyod koy planong magpabiling tagsaanon,” matod sa usa ka sister sa Amerika. “Magminyo ko kon moabot ang brader nga angay nako. Gikombinsir ko sa akong di-magtutuong inahan nga dili na mamili kon kinsay minyoan. Ako siyang gipangutana kon siya bay manubag kon dili molampos ang akong kaminyoon. Sa ulahi, wala na ko niya apuraha kay nakita niya nga duna koy maayong trabaho, nag-atiman sa akong kaugalingon, ug malipayon.” Usahay mobatig kamingaw kini nga sister. Apan siya miingon: “Ako modangop kang Jehova. Wala gyod ko niya pasagdi.” Unsay nakatabang niya nga mosalig kang Jehova? “Ang pag-ampo nakatabang nako nga mobating tinuod ang Diyos ug wala ko mag-inusara. Mamati gayod ang Labing Hataas sa uniberso, busa kinsa may dili malig-on ug malipay ana?” Kay nahibalo nga “adunay labaw nga kalipay sa paghatag kay sa pagdawat,” siya miingon: “Naningkamot kong makatabang sa uban, nga dili magdahom ug balos. Dihang ako maghunahuna, ‘Unsay akong ikatabang ning tawhana?’ ako malipay na.” (Buh. 20:35) Oo, si Jehova mao ang iyang bahin, ug siya malipayong nag-alagad kaniya.

18. Sa unsang diwa nga himoon ka ni Jehova nga iyang bahin?

¹⁸ Bisag unsay imong kahimtang, imong mahimo ang Diyos nga imong bahin. Kon kanay imong himoon, mahiapil ka sa iyang malipayong katawhan. (2 Cor. 6:16, 17) Dayon himoon ka ni Jehova nga iyang bahin, sama sa mga alagad sa Diyos kanhi. (Basaha ang Deuteronomio 32:9, 10.) Ingon nga ang Israel nahimong bahin sa Diyos taliwala sa kanasoran, ikaw mahimong iyang bahin ug siya mahigugmaong mag-atiman kanimo.—Sal. 17:8.

[Footnote]

Unsay Imong Tubag?

Sa unsang paagi si Jehova mahimong imong bahin

• kon imong pangitaon pag-una ang Gingharian ug ang iyang pagkamatarong?

• kon imong pabilhan ang espirituwal nga pagkaon?

• kon imong sundon ang sugo nga magminyo lamang diha sa Ginoo?

[Mga Pangutana sa Pagtuon]

[Blurb sa panid 13]

Si Jehova mahimong atong bahin kon unahon nato ang pag-alagad kaniya

[Hulagway sa panid 15]

Makapadasig ang panig-ingnan ni Jeremias