Ka Filatä Jiowa pwe I Inetum?
Ka Filatä Jiowa pwe I Inetum?
‘Are eman a mochen etiei, epwe pölükü manauan, epwe mwärei an irään ninni o tapweto müri.’—MAT. 16:24.
1, 2. (a) Iö chon “ewe Israelin Kot” Kalesia 6:16 a kapas usun? (b) Iö “ekewe engol me ruu ainangen Israel” Mattu 19:28 a kapas usun?
MET ka ekieki atun ka älleani ewe it Israel lon ewe Paipel? Ka ekieki usun nöün Aisek we Jekop, ewe a pwal iteni Israel? Are, ka ekieki usun mwirimwirin kewe, ewe mwuun Israelin loom? Ewe Paipel a pwal kapas usun “ewe Israelin Kot.” A wewe ngeni ekkewe 144,000 mi kepit ren än Kot manaman mi fel pwe repwe wiliti king me samolfel lon läng. (Kal. 6:16, TF; Pwar. 7:4; 21:12) Nge mi wor pwal eü weween ewe it Israel. Sia älleani usun lon Mattu 19:28.
2 Jises a apasa: “Lupwen Nöün Aramas epwe mot lon an lenien motun king mi ling lon fansoun mettoch meinisin repwe försefäl, mürin ämi mi tapwela müri oupwe pwal mot won engol me ruu lenien motun king, pwe oupwe nemeni ekewe engol me ruu ainangen Israel.” Lon ei wokisin, “ekewe engol me ruu ainangen Israel,” a wewe ngeni chokkewe repwe manau tori feilfeilo chök lon Paratis woon fönüfan. Ekkewe 144,000 repwe wisen sou kapwüng me samolfel fän iter.
3, 4. Ifa ewe leenien äppirü mi mürinnö ekkewe mi kepit mi tüppwöl ra isetiw?
3 Chokkewe mi kepit lon ach ei fansoun ra akkaücheani ar angang ngeni Jiowa usun chök ekkewe samolfel me chon Lifai me loom. (Num. 18:20) Chokkewe mi kepit rese ekiekin angei och fönüer me woon fönüfan. Nge Pwarata 4:10,11 a affata pwe repwe sopwelo ar angang ngeni Jiowa lon läng ikewe repwe eti Jises Kraist le king me samolfel ie.—Is. 44:28.
4 Atun ekkewe mi kepit ra nom woon fönüfan, repwe manaueni ewe sokkun manau mi pwäri pwe Jiowa, i inetiir. Ar angang ngeni Kot a fokkun aüchea ngeniir lap seni meinisin. Ewe aposel Piter a apasa: “Oupwe fokun achocho le anüküchara ämi kö me fil.” (2 Pit. 1:10) Ekkewe mi kepit ra föri ei ren ar lükü än Kraist möön kepich me tattapwelo mwirin. A sokkofesen ar kewe tufich me nonnomun manauer, nge aükükün tufichiir kana rese akükkünalo ar angang ngeni Kot. Nge ra fen akkomwa ar angang ngeni Kot ükükün ar tufich. Me ra isetiw leenien äppirü fän iten chokkewe mi äpilükülükün manau woon fönüfan.
5. Ifa usun Chon Kraist meinisin repwe eäni Jiowa pwe i inetiir? Pwata esap mecheres?
5 Jises a apasa pwe Chon Kraist meinisin repwe ‘pennükü manauer me mwärei ar irään ninni’ me tattapwelo mwirin, ese lifilifil ika ra äpilükülükün manau lon läng are woon fönüfan. (Mt. 16:24) Fite million aramas mi äpilükülükün manau lon Paratis woon fönüfan ra fel ngeni Kot me tapwelo mwirin Kraist. Ra achocho le alapaalo ar angang ngeni Kot ika mi tufich. Chommong ra akükkünaalo ekkewe ekkoch angang ra föri fän iten ar repwe wiliti regular pioneer. Ekkoch ra achocho le auxiliary pioneer lon ekkoch maram iteiten ier. Ra usun chök Meri, ewe a epiti Jises lö. Jises a apasa: “A föri ngeniei eu föför mi fokun mürina. . . . Neminei a föri ükükün met a tongeni.” (Mark 14:6-8) Sia nonnom lon ei otot fän nemenien Setan, ina pwata epwe weires ach sipwe föri meinisin minne sia mochen föri. A lamot sipwe öttüres me lükülükü Jiowa. Iei sipwele käeö rüänü alen ach sipwe apwönüetä ekkena mettoch.
Kükkütta Akkomw Än Kot We Mwu
6. (a) Ifa usun aramas lon ei otot ra pwäri pwe manauer lon ei fansoun, ina chök inetiir? (b) Pwata epwe öch sipwe äppirü Tafit?
6 Jises a äiti ngeni nöün kewe chon äppirü le kükkütta akkomw ewe Mwu me än Kot pwüng. Aramas lon ei otot ra kan kükkütta met epwe öchiti pwisin iir. Ewe Paipel a erä pwe iir “aramas mi chök angei ar feiöch me lon ei fanüfan.” (Älleani Kölfel 17:1, 13-15.) Rese ekieki usun Jiowa. Ra chök mochen chei kinamween manauer, tümünü ar famili, me awora älemwirien nöür kewe. Manauer lon ei fansoun, ina chök inetiir. Nge Tafit a sokko seniir. A mochen an epwe ‘iteüöch’ me ren Jiowa. Mwirin, nöün we Salomon a erä pwe sipwe pwal ina usun. (SalAf. 7:1) Tafit a usun chök Asaf le silei pwe an chiechiöch me Jiowa a lamot lap seni meinisin me a atoto ngeni pwapwa. Lon ach ei fansoun, chommong Chon Kraist ra pwal pwäratä pwe ar angang ngeni Jiowa a fokkun lamot ngeniir lap seni ar angangen moni.
7. Ifa usun emön pwiich a küna feiöch ren an akkomwa ewe Mwu?
7 Lon eü fönü lon Afrika, a weires än aramas repwe künökün ar angangen moni, iwe, lap ngeniir repwe achocho pwe rete towu seni ar angang. Jean-Claude, i emön elter mi pwüpwülü nge ülümön nöün. Eü rän, nöün we meilap a ereni pwe epwele angang iteiten pwin, poputä kulok 6:30. Jean-Claude a ereni pwe ese chök awora tufichin manauen an famili nge a pwal älisiir le ririöch ngeni Kot. A pwal wisen älisi ewe mwichefel. Iwe, nöün we meilap a ereni: “Ka feiöch pun a wor om angang. Ina minne, kopwe likitalo ekiekin mettoch meinisin, pachelong pwülüwom, noum, me om kewe osukosuk. Kopwe fangolo unusen manauom ngeni om angang. Kopwe filatä lefilen om na lamalam are om angang.” Iwe, ika en ätena, met kopwe filatä? Jean-Claude a silei pwe ika epwe pöüt seni an angang, Jiowa epwe tümünü i. A filatä pwe epwe chüen akkangang ngeni Kot, me Jiowa epwe awora osupwangen an we famili. Ina popun, a feilo fiti mwich. Mwirin särin mwich, a anükünük pwe epwe lo angang inaamwo ika ese ffat ika epwe chüen angang. Ese mwo pwon nge emön a kökkö. Ewe meilap a katowu seni an angang, nge pwiich we a fen chüen angang.
8, 9. Ifa usun sipwe äppirü ekkewe samolfel me chon Lifai le eäni Jiowa inetich?
8 Eli a pwal fis ena sokkun ngeni ekkoch leimi. Eli ka aürek ika epwe ifa usun kopwe tümünü om famili ika a pöüt sonuk om angang. (1 Tim. 5:8) Ese lifilifil ika a fis ngonuk are ese fis, nge neman ka piin küna lon manauom pwe Kot ese elichippüngü chokkewe mi eäni i inetiir me akkomwa ar angang ngeni lon manauer. Atun Jises a ereni nöün kewe chon käeö pwe repwe “küttafichi lom an mwu,” a pwon ngeniir pwe Kot epwe awora ngeniir ekkewe ekkoch mettoch, usun choweän ener, ünümer, me üfer.—Mt. 6:33, TF.
9 Ekieki mwo ekkewe chon Lifai ese wor älemwirier fönü. Pokiten ra wisen emmweni ewe mwu lon fel mi limelimöch, repwe lükülükü pwe Jiowa, i inetiir, me epwe awora tufichin manauer. (Num. 18:20) Iwe, inaamwo ika sise akkangang lon eü imwenfel usun chök ekkewe samolfel me chon Lifai, nge sipwe pwal lükülük woon Jiowa. Atun sia akkarap ngeni ewe sopwoloon, a lallapolo lamoten ach sipwe lükülükü pwe Jiowa epwe tümünükich.—Pwar. 13:17.
Kükkütta Akkomw Än Kot Pwüng
10, 11. Ifa usun ekkoch ra pwäratä pwe ra lükülükü Jiowa lon ar angang? Apworausa pworausen emön.
10 Jises a pwal ereni nöün kewe chon käeö ar repwe kükkütta lom än Kot pwüng. (Mt. 6:33) Weween pwe sipwe eäni än Jiowa ekiek usun minne mi pwüng me mwääl, nge sap ekiekin aramas. (Älleani Aisea 55:8, 9.) Ekkoch aramas ra ffot are amömö suupwa, are ra äkkäiti aramas maun, are fför me amömö pisekin maun. Nge mwirin ar käeö ewe enlet, lape ngeniir ra filatä le siwili ar angang me a fich ar repwe papatais.—Ais. 2:4; 2 Kor. 7:1; Kal. 5:14.
11 A ina usun emön itan Antru. Iir me pwülüwan we ra käeö me filatä le angang ngeni Jiowa. Antru a fokkun sani an angangen moni, nge a pwisin towu seni. Pwata? Pun ewe kompeni Antru a angang ngeni a älisatä maun, nge i a mochen föri minne mi pwüng me ren Jiowa. Atun a towu seni an angang, a wor rüüemön nöün, me ewe moni a isoni a chök naf ngeni fitu maram. Usun itä nge ese wor älemwirian usun chök ekkewe chon Lifai. Nge a lükülük woon Jiowa me küt an angang. Iei, atun Antru me an famili ra chemeni ena fansoun, ra tongeni erä pwe mi pwüng ekkeei kapas: ‘Pöün Jiowa esap mochomoch.’ (Ais. 59:1) Antru me pwülüwan we ra pwal mwo nge tongeni pioneer pun ra nöünöüöchü nöür moni le kamö chök minne a lamot ngeni manauer. A erä pwe fän ekkoch ra aüreki nöür moni, imwer, pöchökkülen inisiir, me ar chinnapolo. Nge Jiowa a älisiir fansoun meinisin. Esor ar tipemwaramwar pwe ra feiöch seni ar angang ngeni Jiowa, me ina ewe wis mi aüchea lap seni meinisin.—SalAf. 12:13.
12. Met a lamot epwe nom rech fän iten ach sipwe kütta akkomw än Kot pwüng? Apworausa pworausen ekkoch seni leeniom.
12 Jises a ereni nöün kewe chon käeö: “Are epwe wor ämi lükülük mi nönnö ngeni eföü pwükilin irä mi fokun kükün, oupwe tongeni üreni ei chuk, ‘Kopwe mwöküt seni ikei o mwökütüla ikenan,’ iwe, epwe mwökut. Esap wor och mine ousap tufich ngeni.” (Mt. 17:20) Kopwe chüen kütta akkomw än Kot we pwüng ika epwe esilepa ngonuk weires? Ika a wor om tipemwaramwar usun ei mettoch, kapas ngeni chon ewe mwichefel. Pworausen än Jiowa älisiir epwe apöchökkülatä om lükü.
Kopwe Kilisou ren Minne Jiowa A Awora Ngonuk
13. Ika sia achocho lon ach angang ngeni Jiowa, met sipwe lükülükü?
13 Ika ka aücheani om angang ngeni Jiowa, kopwe lükülük pwe epwe ngonuk minne ka osupwangan, usun chök an a föri fän iten ekkewe chon Lifai. Ekieki usun Tafit. Inaamwo ika a op lon eü pokungo, nge a lükülük pwe Kot epwe älisi i. Sia pwal tongeni lükülükü Jiowa atun usun itä nge ese wor chon älillisich. Pwal chechchemeni pwe atun Asaf a ‘tolong lon ewe imwenfelin Kot,’ a lapolo an weweiti met a aosukosuka. (Kölf. 73:17) Iwe, sipwe pwal lükülükü pwe Jiowa epwe awora minne epwe anüküchara ach chiechiöch ngeni. Epwe pwäri pwe sia aücheani ach angang ngeni i ese lifilifil nonnomuch. A ina usun sia filatä Jiowa pwe i epwe inetich.
14, 15. Met sipwe föri atun a siwil äweween ekkoch wokisin? Iwe, pwata?
14 Ka lükülükü pwe Jiowa epwe älisikich le mirititi “ekewe ekiekin Kot mi alolol” lon Paipel? (1 Kor. 2:10-13) Ina met ewe aposel Piter a föri. Jises a ereni ekkewe chon Jus: “Are ousap mongö futuken Nöün Aramas o ünümi chaan, esap wor manau lomi.” Iwe, chommong chon käeö ra ekieki pwe Jises a kapas usun wesewesen futukan me chchaan, iwe, ra erä: “Ei afalafal a kon pöchökül. Iö a tongeni aüselinga?” Ra “kul seni o resap chüen mochen tapwela mürin.” Nge Piter a apasa: “Am Samol, iö aipwe feila ren? En ka eäni kapasen manau esemüch.”—Jon 6:53, 60, 66, 68.
15 Piter ese unusen weweiti alon Jises kana. Nge a lükülükü pwe Jiowa a nöünöü Jises le älisi aramas le weweiti ewe enlet. Iwe, atun a siwil äweween ekkoch wokisin lon Paipel, ka pwal tipemecheres le weweiti ekkewe popun an a siwil? (SalF. 4:18) Ekkewe chon Perea loom “ra etiwa ewe afalafal fän mochenin letiper. Iteiten rän ra kaiö lon ekewe Toropwe mi Pin.” (Fof. 17:11) Ika kopwe äppirüür, epwe lallapolo om aücheani om angang ngeni Kot. Kopwe enletin kilisou pwe Jiowa, i inetum.
Pwüpwülü Lon Chök Ewe Samol
16. Me ren 1 Korint 7:39, ifa usun ekkewe chon Kraist lipich ra filatä Kot pwe i inetiir?
16 Chon Kraist ra pwal akkamwöchü än Kot kokkot ren ar älleasochisi alon Paipel pwe repwe pwüpwülü “lon chok ewe Samol.” (1 Kor. 7:39, TF) Chommong ra filatä pwe repwe chök lipich pun rese mochen atai ei allük. Kot a tüttümünüür. Met Tafit a apasa atun a pwos pun usun itä nge esor chon älisi? A tingorei Jiowa an älillis. A apasa: “Üa uwato ren ai letipengau meinisin o asile ngeni ai kewe riaföü lupwen üa apilükingau.” (Kölf. 142:1-3) Iwe, pwal Jeremaia a tuppwöl le akkangang ngeni Kot lon an lipichittam. Eli a pwal meefi pwos.
17. Met emön föpwül mi lipich a föri atun a meefi pwos?
17 Emön pwiich föpwül lon Merika a erä pwe esap filian pwe epwe lipich. A mochen pwüpwülü ika a küna emön mi pölüwöch ngeni. Inan we, esap emön Chon Pwäratä Jiowa, ese pwal ekieki ika iö nöün we epwe pwülüweni. A chök mochen pwe nöün we epwe pwüpwülü. Ena föpwül a eisini inan na ika mi mochen epwe angei marataan ika a pwülüweni emön mi ngaw. Atun ewe inelap a küna pwe nöün we a eäni eü angang mi mürinnö, a tümünü pwisin i, me a pwapwa, iwe, ese chüen kon kakkapas ngeni nöün na ren an epwe pwüpwülü. Fän ekkoch, ei föpwül a meefi pwos. Iwe, a erä: “Ua achocho le eäni lükülük woon Jiowa. Esap fokkun likitieilo.” Met a älisi neminnei an epwe lükülük woon Jiowa? A apasa: “Iotek a älisiei le mirititi pwe Kot i wesewesen emön, me use äläemön chök. Ewe mi Unusen Tekia seni meinisin a aüseling ngeniei, iwe itä pwata usap meefi pwapwa me süföli?” A lükü met Paipel a apasa: “Sia feiöch ren ach fang lap seni ach angei mettoch.” Iwe, a achocho le älisi aramas nge ese ekiekin angei och seniir. A pwal apasa: “Ua pwapwa atun ua ekieki, ‘Ifa usun upwe tongeni älisi ei aramas?’” (Fof. 20:35) Jiowa i inetin, iwe, ei föpwül a pwapwa le angang ngeni.
18. Ifa usun kopwe wiliiti inetin Jiowa?
18 Ese lifilifil nonnomun manauom, nge ka tongeni filatä Jiowa pwe i epwe inetum. Ika ka föri ena, ka tongeni fit lein nöün kewe aramas mi pwapwa. (2 Kor. 6:16, 17) Ina atun, kopwe tongeni wiliti inetin Jiowa usun ekkoch nöün kewe chon angang me loom. (Älleani Tuteronomi 32:9, 10.) Usun chök Israel a wiliti inetin Jiowa me lein ekkewe ekkoch mwu, kopwe pwal tongeni fil me ren pwe kopwe wiliiti inetin, me I epwe tumunuk fän tong.—Kölf. 17:8.
Ifa Usun Kopwe Pölüweni?
• Ifa usun kopwe filatä Jiowa pwe i inetum ren om kütta akkomw an we Mwu me an pwüng?
• Ifa usun kopwe filatä Jiowa pwe i inetum ren om kilisou ren minne a awora ngonuk?
• Ifa usun kopwe filatä Jiowa pwe i inetum ren om älleasochisi an allük le pwüpwülü lon chök ewe Samol?
[Kapas Eis fán Iten ewe Lesen]
[Ekis Pwóróus lón pekin taropwe 16]
Jiowa a wiliiti inetich atun sipwe akkomwa ach angang ngeni lon manauach
[Sasing lon pekin taropwe 17]
Än Jeremaia leenien äppirü a eü minen apöchökkül
