Iehova Kö La Edrö i Epun?
Troa Xome La Ita Ne Thup Celë e 31 Okotropa Me Wiike Cili
Nyima 40 Me 85
Iehova Kö La Edrö i Epun?
“Pane thelejë nyipunie la baselaia i Akötesie, me thina ka meköti anganyidë ; nge troa hamëne fe koi nyipunie la nöjei ewekë cili.”—MAT. 6:33.
1, 2. (a) Drei lai “Isaraela i Akötesie” ngöne Galatia 6:16? (b) Drei la hna nyihatren hnene la “ite tribu i angete Isaraela ka luako” ngöne Mataio 19:28?
NEMENE la hnei epuni hna mekune ngöne la epuni a e hnine la Tusi Hmitrötr, la hnaewekë hna hape Isaraela? Maine jë epuni a mekune lo nekö i Isaaka, ene Iakobo, lo hna hëne fe ka hape Isaraela. Maine epuni jë pena a mekune lo itre matra i angeic, ene lo nöje Isaraela ka hekö. Hnei Tusi Hmitrötre fe hna hane qaja la Isaraela ngöne la ua, maine “Isaraela i Akötesie.” Ala 144 000 la ange hna iëne hnene la uati hmitrötre i Akötresie nyine itre joxu me itretre huje e hnengödrai. (Gal. 6:16; Hna ama. 7:4; 21:12) Ngo tro pe sa pane ce wange la hna qaja göi itre tribu ne Isaraela ka ala 12, ngöne Mataio 19:28.
2 Öni Iesu: “Ngöne la hna troa amelene hmaca mate lapaju hë la Nekö i ate hune la therone ne la lolo i angeic, ame nyipunieti angete xöte thenge ni, te, tro ha lapa fe hune la nöjei therone ka luako [truelof], troa amekötine la ite tribu i angete Isaraela ka luako.” Ame ngöne la xötre celë, tre, ame la “ite tribu i angete Isaraela ka luako,” tre, ange hna troa amekötine hnene la itretre drei Iesu, lo itre hna iën, nge itre ka troa kapa la mele ka tha ase palua kö ngöne la Paradraiso e celë fen. Tro angatr a kepe thangane la huliwa ne la itretre huj, ala 144 000.
3, 4. Nemene tulu ka lolo hna amamane koi së hnene la itre hna iën?
3 Ceitune hi lo itretre huje me angetre Levi ekö memine la itre hna iën enehila, laka angatr a xome ceitune la hnëqa i angatre me ketre manathith. (Num. 18:20) Matre pëkö hlapa maine ketre hnepa dro hna treqene troa kapa hnene la itre hna iën. Ngo angatre pe a treqene troa joxu me itretre huje me Keriso e hnengödrai. Tro angatr a catre nyihluei Iehova thenge la aqane amekötine koi itre hna iën e hnengödrai, tune la hna qaja hnei Hna Amamane 4:10, 11.—Ezek. 44:28.
4 Ame la angatre petre kö e celë fen, kola amamane hnene la itre hna iëne laka Iehova la edrö i angatr. Ame la huliwa i angatre koi Iehova, celë hi hnëqa ka sisitria ne la mele i angatr. Angatr a melëne la lapaune i angatre kowe la thupene mele i Keriso, me catre xötrethenge nyidrë; angatre hi lai ‘a anyipicine la hna hëne me ië angatr.’ (2 Pet. 1: 10) Isapengöne kö la aqane mele me hna atreine hnei angatr. Tha hnei angatre pe hna xome la itre ewekë cili nyine nyifegone la huliwa i angatre koi Akötresie. Ngo hnei angatre hna kuca asë la hnei angatre hna atrein matre tro pane pala hi la huliwa i Akötresie. Nge tulu ka loi la hnei angatre hna amamane kowe la itre ka tro pe a mele e celë fen.
5. Tro la nöjei Keresiano a amamane tune ka ka hape, edrö i angatre Iehova, nge pine nemene matre tha ewekë ka hmaloi kö lai?
5 Easë ju hë a troa mele e koho hnengödrai maine e celë fen, ngo ame la ka nyipi ewekë, tre, tro sa ‘xele së kö, me xome la satauro së kö, me xöte thenge Keriso fë.’ (Mat. 16:24) Hna ujë tune fe hi lai hnene la itre milio lo angetre mejiune ka troa mele ngöne la Paradraiso e celë fen, lo itre ka thili koi Akötresie, me xötrethenge Keriso. Tha hnei angatre kö hna huliwa hnö. Ala nyimu la itre ka ahmaloeëne la mele i angatre matre nyi göhnene la huliwa ne pionie. Ame itre xan, hnei angatr hna nyi göhnene la huliwa ne pionie e itre xa treu ne la macatre. Ngacama tha ijije pë hë koi itre xan troa hane xome la huliwa ne pionie, ngo angatr a ketre catre troa hane sine la huliwa ne cainöj. Ceitune hi la aqane huliwa i angatre me Maria, lo atre tha wakacu Iesu. Öni nyidrë: “Loi la hnei nyidoti hna kuca koi ni. . . . Ase hë nyidoti kuca la hnei nyidoti hna atein.” (Mar. 14:6-8) Tha ka hmaloi kö la troa kuca asë la hne së hna atrein, ke, easa mele fene la musi Satana. Ngo nyipi ewekë tro sa catre huliwa me amë la mejiune së koi Iehova. Aqane tro hi së lai a ujë ngöne la foa lao götrane celë.
Thele Panëne Jë La Baselaia i Akötresie
6. (a) Kola amamane tune ka hnene la itre atr laka, edrö i angatre la mele celë? (b) Pine nemene matre loi e tro sa hetrenyi la aqane waiewekë i Davita?
6 Hnei Iesu hna inine la itretre drei nyidrë troa thele panëne la Baselaia memine la thina ka meköti Akötresie. Kola thele panëne hnene la itre atre ne la fen la itre sipu aja i angatre kö, pine laka, “ange tene edö [hë] ngöne la mele celë.” (E jë la Salamo 17:1, 13-15.) Tha angatre fe kö a hane mekune la Atre Xupi angatr, ngo angatre pe a catre mele ne thele mo, me xupe la hnepe lapa i angatr, me hnëkë nyine mele ne la itre nekö i angatr. Celë hi lo edrö i angatre lai ngöne la fene celë. Ame pena ha Davita, tre, ka tru koi angeice la troa “hlemu loi” xajawa i Iehova, tune la ithuecatr hna qaja hnene la nekö i angeic. (Ate cai. 7:1) Tui Asafa, hnei Davita hna öhne laka, sisitria catre kö la troa xomi Iehova ceitu me Enehmu i angeic, hune la troa amë panëne la itre sipu aja i angeic ngöne la mele i angeic. Atraqatre la madrine i angeice troa ce tro me Akötresie. Ame ngöne la hneijine së, nyimutre la itre Keresiano ka amë panëne la itre huliwa i Iehova, nge pine pë hë la itre huliwa i maseta.
7. Nemene manathithi la hna kapa hnene la ketre trejine me easë, qa ngöne la hnei angeice hna thele panëne la Baselaia?
7 Tro sa ce wange la pengö i Jean-Claude qa Afrik. Qatre thupe ka faipoipo hë, nge ka köni kuku. Ame ngöne la nöje cili, jole catre e troa öhnyi huliwa, celë hi matre itre atr a isine troa thupëne catrëne la isa huliwa i angatr. Ame la ketre drai, kola qaja hnei maseta koi Jean-Claude ka hape, tro angeic a xeji huliwa e 18 h 30 e nöjei jidri ne la wiik. Jean-Claude pë hë a qejepengöne jë ka hape, tha hnëqa i angeice hmekuje kö troa thele xen kowe la hnepe lapa i angeic, ngo ka nyipi ewekë catre mina fe la hnëqa i angeice koi angatre ngöne la götrane la ua. Nge angeic a qaja fe ka hape, ketre hnëqa i angeice fe la troa sajuëne la ekalesia. Nemene ju hë la hna sa hnei maseta? “Manathithine ju hi ’ö la kola hetre huliwa i ’ö, nge the meku fö i ’ö kö me ha nekö i ’ö me itre xa jole i ’ö. Nge nue pi la mele i ’ö kowe la huliwa i ’ö. Iëne jë la ka loi koi ’ö: hmi maine huliwa.” Maine epuni ju lai, tro epuni a kuci nemen? Atre hi Jean-Claude laka, maine upi angeice ju hë, ngo tro kö Akötresieti a thupë angeic. Tru catre la huliwa nyine kuca koi Akötresie, nge tro kö Iehova a xatua angeice troa hamëne la ka ijije kowe la hnepe lapa angeic. Ngöne la wiike thupen, angeic a tro pi troa sine la icasikeu. E thupene hë, angeic a hnëkë troa huliwa me mekune ka hape, ma tro ha upi angeic. Telefone jë hi troa thuemacanyi angeice ka hape, ase hë upe la directeur, ngo lapa pe kö trejine me easë ngöne la hna huliwa hnei angeic.
8, 9. Tro sa nyitipune tune ka la itretre huje me itretre Levi e tro sa xomi Iehova nyine edrö së?
8 Ame la itre trejine ka cile kowe la jole celë, laka troa luzi la huliwa i angatr, tre, hnei angatre fe hna hane mekune tune la, me hape, ‘Tro angatr a ithuane tune ka elanyi la fami angatr?’ (1 Tim. 5:8) Traqa ju hë koi epuni la jole celë, maine pë pena kö, ngo ase hë epuni melëne laka, tha tro pi kö Akötresieti a nuetrije la itre atr ka xomi Nyidrë nyine edrö i angatr me amë panë Nyidrë ngöne la mele i angatr. Ame la Iesu a upe la itretre drei nyidrë troa pane thele la baselaia i Akötesie, tre, nyidrëti a qaja axeciëne koi angatr ka hape: “Troa hamëne fe koi nyipunie la nöjei ewekë cili,” ene la nyine troa xen, me nyine ij, me nyine hetrën.—Mat. 6:33.
9 Pane mekune ju së ekö lo itretre Levi: pë fe kö zi angatr. Pine laka angatre pe hi a troa huliwa kowe la hmi ka wië, hawe, nyipi ewekë tro angatr a mejiune laka tro Iehova a ithue nyine mele i angatr, tune lo hnei Iehova hna qaja koi angatre ka hape: “Ini la edö i ’ö.” (Num. 18:20) Ngacama tha easë hmaca fe kö enehila a troa hane nyihlue i Iehova hnine la ēnē, tune lo itretre huje me itretre Levi ekö, ngo loi e troa ceitune la aqane waiewekë së me angatr, me aqane mejiune së koi Iehova, nge eje hi lai laka, tro hë Nyidrëti a ithue nyine mele së. Easa easenyi catre trotro kowe la itre drai ne la pun, nge tha hmaloi kö e troa cile kowe la itre jole ka traqa; celë hi matre, nyipi ewekë troa catre la mejiune së kowe la aqane troa thupë së hnyawa hnei Akötresie.—Hna ama. 13:17.
Troa Amë Panëne La Thina Ka Meköti Akötresie
10, 11. Hnei itre xan hna amamane tune ka la mejiune i angatre koi Iehova ngöne la angatr a cile kowe la itre jole göi huliwa i maseta? Qaja jë la ketre tulu.
10 Hnei Iesu fe hna ithuecatre kowe la itretre drei nyidrë troa ‘pane thele la thina ka meköti Akötresie.’ (Mat. 6:33) Kolo lai a hape, tro sa tune la aqane waiewekë i Iehova matre atrepengöne la itre ewekë ka loi me ka ngazo, me trije pi la itre aqane waiewekë i atr. (E jë la Isaia 55:8, 9.) Ame la itre xa atr ekö qëmekene troa atre la nyipici, tre, itre ka tra drou me salemë sixa; maine inine la itre xa atre kuci isi, maine kuca me salemëne la itre jiane isi pena. Ngo atre jë hi angatre la nyipici, nge saze huliwa pi hi angatre matre troa hane xomi bapataiso.—Is. 2:4; 2 Kor. 7:1; Gal. 5:14.
11 Andrew la ketre tulu. Ame la angeic me föi angeic a atre Iehova, xecie ju hi koi nyidro troa nyihlue i Nyidrë. Ka lolo catre koi Andrew ekö la huliwa i angeic, ngo hnei angeic hna nu. Pine nemen? Pine laka angeic a huliwa ekö kowe la ketre organizasio ka lö hnine la itre isi, nge angeice hë a ajane troa kuca la ewekë ka meköti xajawai Iehova. Lue neköi Andrew la angeic a nue huliwa; pëkö ketre jëne manie i angeic, nge sine manie hi koi itre treu ka xalaith. E troa wange qenatrën, pë hë nyine mele thatraqane la lapa i angeic. Angeic a thele huliwa jë me mejiune koi Akötresie. E thupene hë, angeice pë hë me fami angeic a jele nyipicine la hna qaja e celë, ka hape: “Tha xoxopate kö la ime i Iehova.” (Is. 59:1) Hnene pe la hnei Andrew me fö i angeic hna triji ehnefene la mele i nyidro, ijiji nyidroti jë hi troa hane xome la huliwa ne cainöje ngöne la drai ka pexej. Öni angeic: “Hetrenyi la itre ijine nyiho a hnehengazo pine la itre ejolene göi mani, me uma, me sine mec, nge kola qatre trotro. Ngo hnei Iehova pala hi hna xatua nyiho. . . . Ka xecie hnyawa koi nyiho laka, ame la troa nyihluei Iehova, tre, celë hi manathith ka tru nyine tro la atr a nyipin.” a—Ate cai. 12:13.
12. Nemene la thina ka xatua së troa amë panëne la itre trepene meköti Akötresie? Qaja jë la itre tulu hna melëne ngöne la nöje i epun.
12 Öni Iesu kowe la itretre drei nyidrë: “Maine hetenyi nyipunie la lapaune tune la wene sinapi, tro nyipunie a qaja kowe la wete celë, ka hape, Kötejë qa la kowe lai ; ame hna kötepi ej ; nge pëkö ewekë hna troa tha ’teine hnei nyipunie.” (Mat. 17:20) Hapeu, tro pala kö epuni elanyi a cile catre koi Iehova, ngacama atre hi epuni laka, tro ha traqa la itre jole koi epun? Maine hetrenyi thei epuni la luelu, ce ithanatane ju memine la itre xa atrene la ekalesia. Tro fe la aqane melëne angatre la itre ewekë ka tune la a acatrene la lapaune i epun.
Kapa Madrine Jë Së La Itre Ewekë Ne La Ua Hna Hnëkëne Hnei Iehova
13. Maine ka catre së huliwa koi Iehova, nemene la hne së hna treqene göi ixatua ngöne la götrane ua?
13 Maine ka tru alamekene koi së la troa hmi koi Iehova, tha tro kö sa luelue laka tro Nyidrëti a sajuëne la itre aja së ngöne la ngönetrei me ngöne la ua, tune la hnei Nyidrëti hna kuca kowe la itretre Levi. Pane mekune jë lo pengö i Davita. Hnei Davita lo hna pane lapa fene ngönemenyi, ngo tha luelue kö Davita laka tro Akötresieti a hamë angeice la ixatua ka ijij. Ketre tu së mina fe, loi e tro sa mejiune koi Iehova e traqa ju la ketre jole ka pë nyin koi së. Meku Asafa ju fe hne së, lo angeic a traqa “kowe la ēnē i Akötesie;” hna canga tro mama ju hi koi angeice la itre ewekë hnei angeic hna hnehengazon. (Sal. 73:17) Ketre tune mina fe, nyipi ewekë tro sa canga ujë koi Akötresie, Qeqene la itre hne së hna ajane ngöne la götrane la ua. Aqane tro së hi lai a amamane la hni ne ole së pine la manathith ka eje the së qa ngöne la hna nyihluei Nyidrë, ngacama hna traqa ju hë koi së la itre jole ka tru. Aqane easë fe hi lai a xomi Iehova nyine edrö së.
14, 15. Tro sa ujë tune ka e sazene pi la aqane tro sa trotrohnine la itre xa xötre jëne la lai hna hamën, nge pine nemen?
14 Nemene la aqane ujë i epuni ngöne la kola thinane hnei Iehova, Qeqene la lai ne la ua, “la nöjei ewekë asë ga jui Akötesie” hnine la Tusi Hmitrötr? (1 Kor. 2:10-13) Hanawange la ketre tulu ka lolo catr, ene la aqane ujë i Peteru lo Iesu a qaja kowe la itretre drei Nyidrë ka hape: “Maine tha xeni kö nyipunie la ngönetei ne la Nekö i ate, me iji la madra i angeic’ tha hetenyi kö la mele e kuhu ite hni nyipunie.” Ame la kola drenge la itre hnaewekë celë, nyimutre la itretre dreng ka qaja ka hape: “Hace la tenge ewekë cili ; nge dei la ate ateine troa deng ?” Ame hnei angatre hna “hmaca pe.” Ngo öni Peteru: “Joxu, ithuëti nyihunieti koi deti ? thawai cilieti la nöjei wesi ula ne shewengönie ka tha ase palua kö.”—Ioane 6:53, 60, 66, 68.
15 Tha nyipi trotrohnine kö Peteru la Iesu a qaja ka hape, troa xeni la ngönetrei me iji la madra i nyidrë. Ngo hnei angeice pe hna mejiune kowe la ixatua hna hnëkëne hnei Akötresie. Ame la kola traqa trotro koi së la lai ne la ua, hne së kö hna thele la kepine matre hetrenyi la itre xa aqane trotrohnine ka hnyipixe ngöne la itre xötre ne la Tusi Hmitrötr? (Ite edomë 4:18) Ame ngöne lo hneijine i Iesu, “hna kapa [hnene la itretre Berea] la wesi ula hnene la hni ka ajan, me thele o drai la ite hna cinyihan.” (Ite hu. 17:11) Maine tro sa xötrethenge la tulu i angatr, tro hmaca kö a sisitria catre koi së la itre huliwa i Akötresie, nge tro fe hë a atraqatre catre la hni ne ole së pine laka Iehova la edrö së.
Troa Faipoipo Thei Joxu Hmekuje Hi
16. Nemene la aqane tro epuni a xomi Akötresie nyine edrö tune la hna qaja ngöne 1 Korinito 7:39?
16 Ame la ketre aqane tro la itre Keresiano a amamane ka hape, angatr a wangatrune la aja i Akötresie, tre, ene la tro angatr a trongëne la hna amekötine hnei Tusi Hmitrötr, troa faipoipo “göi Joxu hmekuje hi.” (1 Kor. 7:39) Pine laka tha ajane kö la itre atr troa xanadrone la hna amekötine celë, ene pe angatr a iëne troa lapa pë föe. Tro kö Akötresieti a thupë angatr. Nemene lo hna kuca hnei Davita ngöne lo angeice casi pë hë, ceitu me ketre atr hna nuetrij? Öni angeic, ka hape: “Ini a nengenenge xajawa i [Akötresie] la mekuneng ; ini a qaja la akötenge xajawa i nyidë.” (Sal. 142:1-3) Hna traqa mina fe la mekune celë koi Ieremia perofeta, lo ketre ka pë föen me ka nyihluei Iehova kowe la itre macatre. Loi e tro fe epuni a inine la tulu i angeic; hna qaja la pengö i angeice ngöne la mekene 8 ne la itus Dieu nous parle par Jérémie.
17. Nemene la hna kuca hnene la ketre trejine föe ngöne la itre ijine angeic a lapa hmekuj?
17 Önine la ketre trejine föe e Etazini ka hape: “Tha hnenge pi kö hna mekune troa lapa pë fö. Eni hi a treqene la ketre trahmanyi ka loi koi ni. Ngo pine laka ame thineng, tre, tha ka ce hmi kö nyiho, öni eahlo, tha nyipi ewekë kö troa ië trahmany. Eni a hnyingë eahlo ju ka hape, ue elanyi e ngazo ju la faipoipong, madrine kö eahlo e qaja jë ka hape eahlo la zön. Tro ju pë hë la itre drai, nge eahlo a öhne laka hetre huliwang, nge lolo hi la meleng, nge ka madrine pala hi ni. Tha qeje ejolene hmaca kö eahlo la pengöng.” Ame itre xa ijin, kösë angeic a drenge laka angeice hmekuje hi. Matre öni angeice jë hi ka hape: “Eni a thele Iehova jë matre tro ni a fe koi Nyidrë la ga sihngödri ne la hning. Tha hnei Nyidrëti pi kö hna nuetriji ni.” Nemene la ka xatua angeice troa mejiune koi Iehova? “Hnene la thithi hna xatua ni troa atrehmekune la sipu pengö i Akötresie, tha ka nuetriji ni kö. Pine la hna drei ni hnene la ka Sisitria ne la hnengödrai memine la fene hnengödrai, hapeu, tha manathithi kö lai koi ni me jëne madrineng?” Ka xecie hnyawa koi angeic laka, “sisitia la manathithi e troa hame hune la troa kapa,” hawe öni angeice jë hi: “Nyipi ewekë tro ni a xatuane la itre atr, nge tha göi thupene kö. E mekune mina ha ni ka hape, ‘Nemene la nyine tro ni a kuca matre tro ni a xatuane la ketre atr?’ ngöne la ijine cili, kola elë la trenge madrineng.” (Ite hu. 20:35) Nyipici, Iehova la edrö i angeic, nge atraqatre la madrine i angeic troa nyihluei Nyidrë.
18. Kola hapeue la kola hape, tro Iehova a xomi epuni nyine edrö i Nyidrë?
18 Ngöne la nöjei pengöne aqane mele i epun, epi xomi Akötresieti pala hi nyine edrö i epun. Hawe, tro fe hë epuni a hane nyi atrene lo nöje i Nyidrë hna amanathithin. (2 Kor. 6:16, 17) Tro hë epuni a kepe manathithi qa ngöne la hna xomi Iehova nyine edrö i epun, tune lo hna kapa hnene la itre hlue i nyidrëti ekö. (E jë la Deuteronomi 32:9, 10.) Tune lo aqane nyi edröne Isaraela hnei Akötresie nyipine la nöjei ethen, tro fe Nyidrë a ië epuni nyine edrö i Nyidrë me thupë epun.—Sal. 17:8.
[Ithueamacany]
a Wange ju la Réveillez-vous ! ne Nofeba 2009, götrane 12-14.
Tro Epuni a Sa Tune Ka?
Nemene la aqane tro epuni a xomi Iehova nyine edrö i epun
• ngöne la epuni a thele panëne la Baselaia i Akötresie memine la thina ka meköti Nyidrë?
• ngöne la epuni a amamane la hni ne ole i epun kowe la xeni ne la ua?
• ngöne la epuni a trongëne la eamo, ene la troa faipoipo göi Joxu hmekuje hi?
[Thying]