Jarekópa Jehovápe ñane erénsiaramo?

‘Pemotenonde meméke Ñandejára rréino ha ihustísia, ha koʼã mbaʼe peikotevẽva oñemeʼẽta avei peẽme.’ (MAT. 6:33, NM)

1, 2. a) Mávarepa oñeñeʼẽ Gálatas 6:16-pe heʼívo ‘Israel Ñandejára mbaʼéva’? b) Mávapa hína ‘umi 12 trívu oĩva Israélpe’ oñeñeʼẽha Mateo 19:28-pe?

MBAʼE rehépa ñapensa jaleévo la Bíbliape pe ñeʼẽ Israel? Oiméne ñanemanduʼa oñehenói hague péicha Jacóbpe ha pe tetãme oúva iñemoñarégui. Avei Ñandejára Ñeʼẽme ojeporu pe téra Israel oñeñeʼẽ hag̃ua ambue mbaʼére. Pór ehémplo, ojeʼe jepi ‘Israel Ñandejára mbaʼéva’ umi 144.000 kristiánore Jehová oiporavovaʼekue ijespíritu rupive oservi hag̃ua rréi ha saserdóteramo yvágape (Gál. 6:16, JMP; Rev. 7:4; 21:12). Péro Mateo 19:28-pe ojeporu oñeñeʼẽ hag̃ua ótro grúpo rehe, ‘umi 12 trívu oĩva Israélpe’ (NM). Ñahesaʼỹijomína ko téysto.

² Jesús heʼi: ‘Ñandejára ombopyahupa jeýta opa mbaʼe pe Yvypóra Raʼy oguapývo itróno omimbipávape. Upérõ peẽ chemoirũvaʼekue peguapýta avei 12 trónope pehusga hag̃ua umi 12 trívu oĩva Israélpe’. Mávapa hína ‘umi 12 trívu oĩva Israélpe’? Umi tapicha ikatútava oikove opa ára ko yvy ape ári peteĩ lugár neporãvape. Chupekuéra ohusgáta Jesús remimboʼekuéra ojeporavovaʼekue oisãmbyhy hag̃ua hendive yvága guive. Koʼã 144.000 oipytyvõta yvyporakuérape ojapo haguéicha yma umi saserdóte.

3, 4. Mbaʼe ehémplopa omoĩ umi unhído?

³ Umi kristiáno unhído omombaʼeterei iservísio, ojapo haguéicha umi levíta ha saserdóte yma guare (Núm. 18:20). Haʼekuéra nohaʼarõi Jehová omeʼẽ chupekuéra peteĩ lugár imbaʼerã ko yvy ape ári, péro ohaʼarõitereíma og̃uahẽ pe ára oisãmbyhy hag̃ua Jesús ndive yvága guive rréi ha saserdóteramo. Ha heʼiháicha Revelación 4:10, 11, oho vove hikuái yvágape osegíta oservi Ñandejárape (Eze. 44:28).

⁴ Mbaʼéichapa ohechauka hikuái orekoha Jehovápe iñerénsiaramo oiko aja ko yvy ape ári? Koʼã kristiánope g̃uarã ndaipóri iñimportantevéva umi mbaʼe ojapóvagui Jehová servísiope, ha oiko lájare ojekuaa upéva.  Avei ojerovia Cristo sakrifísiore ha iñeʼẽrendu chupe. Upéicha haʼekuéra ‘oñehaʼã opyta hatãve ohóvo pe teko pyahúpe Ñandejára ohenói ha oiporavo haguépe chupekuéra’ (2 Ped. 1:10,ÑÑB). Haʼekuéra avei ohasa asy heta hendáicha, péro ndahaʼéi upe haguére ombaʼapoʼivéva Jehovápe g̃uarã, oñehaʼãmbaite katu hikuái ojapo ikatúva guive iservísiope. Ajépa ehémplo porãite umi ohaʼarõvape oiko opa ára g̃uarã ko yvy ape ári!

5. Mbaʼépa jajapovaʼerã jareko hag̃ua Jehovápe ñane erénsiaramo, ha mbaʼérepa sapyʼánte ijetuʼu upéva?

⁵ Opavave kristiáno, tahaʼe ohótava yvágape, térã opytátava ko yvy ape ári, ojapovaʼerã Jesús heʼivaʼekue: ‘Oĩramo chemoirũséva, toñembyesarái ijehegui, tohupi ijapére ijyvyra pohýi ha tachemoirũ tapiaite’ (Mat. 16:24, NM). Upévare hetaiterei ermáno ohaʼarõva oiko ko yvy ape ári, oñemeʼẽmbaite Jehová servísiope. Péicha ohechauka hikuái omombaʼeguasuha chupe ha omoirũha Crístope. Oĩ omboykéva heta mbaʼe ha ovyʼa orekomívarente ikatu hag̃uáicha ojapo iprekursorádo rregulár. Ambue katu ojapo iprekursorádo auxiliar heta vése káda áño. Ha umi ndahaʼéiva prekursór oñehaʼãmbaite avei ojapo ikatúva guive Jehová servísiope. Ojogua hikuái Maríape, omoĩvaʼekue Jesús akã rehe aséite hyakuã asýva. Mbaʼépa Jesús heʼivaʼekue upévare? ‘Iporãiterei ningo pe ojapóva cherehe. [...] Haʼe ningo ojapo pe ikatumíva’ (Mar. 14:6-8, NM). Ko múndo oĩ rupi Satanás poguýpe, sapyʼánte ijetuʼu ñandéve jajapo ikatúva guive Jehová servísiope, péro upéva nañandejokomoʼãi ñañehaʼã meméramo ha jajerovia ñande Ru yvagapeguáre. Ñahesaʼỹijomína mbaʼéicha javépa ikatu jahechauka upéva.

Ñamotenonde meme Ñandejára Rréino

6. a) Mbaʼérepa ikatu jaʼe hetápe g̃uarã ‘ko jeikovénte oĩha’? b) Mbaʼérepa ñahaʼangavaʼerã Davídpe?

⁶ Jesús omboʼe hemimboʼekuérape omotenonde hag̃ua pe Rréino ha Ñandejára hustísia. Ajépa ndojoguaiete ‘umi yvypóra koʼag̃aguápe’. Chupekuéra g̃uarã ‘ko jeikovénte oĩ’! (Elee Salmo 17:1, 13-15.) Haʼekuéra ndorekovéima mbaʼeve ohaʼarõvaʼerã. Mbaʼérepa? Imanduʼa rangue hikuái Ñande Apoharére, oñehaʼãnte iplatave, omenda ha oheja ifamíliape heta mbaʼerepy. Ñande katu jajoguase Davídpe. Haʼe ojapovaʼekue ikatúva guive ‘herakuã porã’ hag̃ua Jehová renondépe, ha itaʼýra Salomón heʼi avei jajapovaʼerãha upéicha (Ecl. 7:1, nóta). Jahecha haguéicha pe artíkulo ohasávape, Asaf ha David oikuaa porã vaʼekue iñimportantetereiha jareko Jehovápe ñane amígoramo ha ndaiporiha ñanembovyʼavéva upévagui. Heta kristiáno koʼag̃agua opensa avei haʼekuéraicha ha upévare omotenonde Ñandejára servísio opa mbaʼe ári, tomboyke jepe raʼe itraváho.

7. Mbaʼépa ohupyty peteĩ ermáno omotenonde haguére pe Rréino?

⁷ Jahechamína oikovaʼekue Jean-Claude rehe, peteĩ ansiáno República Centroafricanaygua. Haʼe ningo omendáva ha mbohapy ifamília. Peteĩ árape ihéfe heʼi chupe okambiataha chugui itraváho óra ha ombaʼapotaha káda día, kaʼarupytũ 6:30 guive, domingokue entéro. Hiʼarive upe tetãme ndaiporiguasúi traváho, ha umi hénte ojapo oimeraẽ mbaʼe ani hag̃ua oñemosẽ. Mbaʼépa ojapo Jean-Claude? Omombeʼu porã ihéfepe ndahaʼeiha plátante oikotevẽva, síno oñangarekovaʼerãha ifamíliare oservi porã hag̃ua Ñandejárape, ha avei orekoha hembiapo kongregasiónpe. Upépe ihéfe heʼi chupe: “Evyʼavaʼerã katu rejuhu haguére nde travahorã. Ha ikuentave remboyke ne rembireko, ne familiakuéra ha umi nde provléma. Embaʼapo katu ko emprésape ha ani epena mbaʼevére. Mbaʼépa reiporavóta: nde traváho, térãpa nde rrelihión”. Mbaʼépa jajapóne ojeʼéramo ñandéve upéicha? Jean-Claude oikuaa oñemosẽramo jepe itraváhogui, Jehová  oñangarekotaha hese. Upévare odesidi ombaʼapo meme chupe g̃uarã, ha ojerovia haʼe omeʼẽtaha ifamíliape hemikotevẽ. Jepiveguáicha ko ermáno oho rreunionhápe ha upéi ou ojeprepara oho hag̃ua itravahohápe. Haʼe ni ndoikuaái oñemosẽtapahína upe pyharépe. Upe jave, ipu iteléfono ha oñemombeʼu chupe oñemosẽ hague ihéfe. Amo ipahápe ko ermáno ndoperdéi jey itraváho.

8, 9. Mbaʼéichapa jahechaukáta jarekoha Jehovápe ñane erénsiaramo, ojapo haguéicha umi levíta ha saserdóte?

⁸ Heta ermáno oikuaávo ikatuha operde itraváho, opensa: “Mbaʼéicha piko amantenéta che família?” (1 Tim. 5:8). Oiméramo jahasa koʼã mbaʼére, jaikuaa porã Jehová ndohejareimoʼãiha umi orekóvape chupe iñerénsiaramo ha omombaʼéva iservísio. Avei katuete jahechakuaáma añeteha Jesús oprometevaʼekue: ‘Pemotenonde meméke Ñandejára rréino [...] ha koʼã mbaʼe peikotevẽva [hiʼupy ha ao] oñemeʼẽta avei peẽme’ (Mat. 6:33).

⁹ Ñapensami jeýna Leví trívure. Chupekuéra noñemeʼẽivaʼekue ijyvyrã, péro ohechakuaa hikuái Jehová oñangarekoha hesekuéra oñemeʼẽmbaite rupi iservísiope. Ñandejára heʼivaʼekue chupekuéra: “Che voi ningo ne [erénsia] Israel ñemoñarekuéra apytépe” (Núm. 18:20, ÑÑB). Ñande ndajaservíriramo jepe peteĩ santuáriope umi levíta ha saserdotekuéraicha, jajeroviavaʼerã Jehová omeʼẽtaha ñandéve ñane remikotevẽ, ha koʼýte jajeroviavaʼerã hese hiʼag̃ui rupi pe ára paha (Rev. 13:17).

Ñamotenonde meme Ñandejára hustísia

10, 11. Mbaʼéichapa heta tapicha ohechauka ojeroviaha Jehováre? Emoĩ peteĩ ehémplo.

¹⁰ Jesús omokyreʼỹ avei hemimboʼekuérape omotenonde meme hag̃ua Ñandejára hustísia (Mat. 6:33). Upévare jahecha raẽ vaʼerã mbaʼépa heʼi Jehová jaikuaa hag̃ua oĩ porã, térãpa oĩ vai umi mbaʼe jajapóva, ha ani ñahendu yvypóra opensávante (elee Isaías 55:8, 9). Pór ehémplo, ostudia mboyve la Biblia, heta tapicha oñotỹ térã ovendevaʼekue petỹ, ojapo térã ovende árma, ha oĩ avei militarvaʼekue. Péro upéi ohechakuaa hikuái tekotevẽha okambia itraváho ikatu hag̃uáicha ojevautisa (Isa. 2:4; 2 Cor. 7:1; Gál. 5:14).

¹¹ Andrew ha hembireko ostudia la Biblia ha odesidi oservi Jehovápe. Ándrewpe ogustaitereivaʼekue itraváho, péro ohejamantevaʼerã oservi porãséramo Jehovápe. Mbaʼérepa? Ohechakuaa rupi upépe ndojerrespetaiha la Biblia omboʼéva ha haʼe omotenondese Ñandejára hustísia. Oheja rire itraváho, ohechakuaa pe platami orekóva ndohupytymoʼãi chupe omantene puku hag̃ua umi mokõi ifamília. Jaʼekuaa hese opytaha umi levíta situasiónpe; haʼekuéra ningo ndaijyvyteeivaʼekue. Péro Andrew ojerovia Jehováre ha osẽ oheka itravahorã. Mbaʼépa oiko chuguikuéra upe rire? Ko família ohecha ‘Jehová po’ nambykyiha oporopytyvõ hag̃ua (Isa. 59:1). Avei oreko rupi umi mbaʼe oikotevẽmívante, Andrew ha hembireko oiporupaite itiémpo Jehová servísiope. Ko ermáno omombeʼu: “Sapyʼánte orepyʼapy moõpa roikóta, rohupytýtapa platami, orerasykatúrõ g̃uarã, ha hiʼarive ore edáma avei, péro akóinte rohechakuaa Jehová katuete oĩha ore ykére orepytyvõ hag̃ua. [...] Péro ropensa jave umi mbaʼe rohasavaʼekuére, rohechakuaa ndaiporiha ambue traváho iporãvéva ha omyengovia joʼa joʼáva oréve ore rembiapokue Jehová ojapoháicha”. * (Ecl. 12:13.)

12. Mbaʼépa ñaikotevẽ ñamotenonde meme hag̃ua Ñandejára hustísia? Emombeʼu mbaʼéichapa peteĩ ermáno nde reikuaáva ohechauka ojeroviaha Jehováre.

¹² Jesús heʼi hemimboʼekuérape: ‘Pende jerovia tuicháramo peteĩ mostása raʼỹicha  pejéta ko sérrope: “Tereho koʼágui amoite” ha ohóta, ndaiporimoʼãi ikatuʼỹvaʼerã pejapo’ (Mat. 17:20, NM). Upévare enterovéva iporã ñañeporandu: “Amotenondétapa Ñandejára hustísia ahasa asýtaramo jepe sapyʼánte?”. Oiméramo ndajaikuaái jajapónepa, ñaporanduvaʼerã ambue ermánope mbaʼéichapa Jehová oipytyvõ chupe. Katuete umi mbaʼe omombeʼúva ñandéve tuicha omombaretéta ñande jerovia.

Ñamombaʼevaʼerã Jehová omeʼẽva jaikuaave hag̃ua chupe

13. Mbaʼépa ohaʼarõkuaa umi oñehaʼãmbaitéva oservi Jehovápe?

¹³ Opavave omombaʼéva Jehová servísio ojeroviakuaa haʼe oñangarekotaha hesekuéra, ojapo haguéicha umi levítare. Ñandejára omeʼẽ hembiguaikuérape hemikotevẽ ha opa mbaʼe oikotevẽva oñemoag̃uive hag̃ua hese. Pór ehémplo David, oĩramo jepe peteĩ itakuápe, oikuaavaʼekue Jehová oipytyvõtaha chupe. Péicha avei, ndajaikuaái jave mbaʼéichapa ñasẽta ñane provlémagui, jajeroviavaʼerã Jehová ohechaukataha ñandéve mbaʼéichapa ikatu jagueropuʼaka. Ñanemanduʼákena Asaf rembiasakuére. Haʼe ‘oike rire Ñandejára róga guasúpe’ oipeʼavaʼekue iñakãgui umi mbaʼe oipyʼapýva chupe (Sal. 73:17, ÑÑB). Ñande avei ñanembaretevéta ñañemoag̃uíramo Jehováre. Ha jahasa asýramo jepe, jahechaukáta tuicha mbaʼeha ñandéve ñamombaʼeguasu ha jareko chupe ñane erénsiaramo.

14, 15. Mbaʼépa jajapovaʼerã oñemyesakãramo ambue hendáicha peteĩ mbaʼe oĩva la Bíbliape, ha mbaʼérepa?

¹⁴ Sapyʼánte oñemyesakã ñandéve ‘umi mbaʼe hypyʼũvéva Ñandejára rehegua’ (1 Cor. 2:10-13). Mbaʼépa jajapo Jehová ñanepytyvõ jave ñantende porãve hag̃ua Iñeʼẽ? Jajapovaʼerã Pedro ojapo haguéicha. Peteĩ jey Jesús heʼi umi ohendúvape chupe: ‘Ndapeʼúiramo pe Yvypóra Raʼy roʼo ha napemboyʼúiramo huguy, ndapeikovemoʼãi’. Oĩ oimoʼãva ojapovaʼerãha upeichaite, ha heʼi: ‘Ivaiete ningo upe heʼíva, máva piko ohenduséta chupe?’. Upévare heta hemimboʼe ‘ojevy umi mbaʼe ohejavaʼekuépe’. Péro mbaʼépa Pedro heʼi Jesúspe? ‘Máva rendápe piko rohóta? Ne ñeʼẽ ningo omeʼẽ jeikove opaʼỹva’ (Juan 6:53, 60, 66, 68, NM).

¹⁵ Añetehápe ningo Pedro nontendeivaʼekue mbaʼérepa Jesús heʼi ojeʼuvaʼerãha hoʼo ha huguy. Péro ndoipyʼapýi chupe oikuaa porãgui Jehová omyesakãtaha chupe upéva. Ha ñande, mbaʼépa jajapo oñemyesakãramo ambue hendáicha peteĩ mbaʼe oĩva la Bíbliape? Ñañehaʼãmbaitépa ñantende mbaʼérepa oñekambia? (Pro. 4:18.) Jajoguavaʼerã umi Bereayguápe, oikovaʼekue síglo primérope. Haʼekuéra ‘oguerohory voi ipyʼaite guive pe marandu porã, ha ára ha ára ohesaʼỹijo Ñandejára ñeʼẽ ohecha hag̃ua añetépa upe ojeʼéva’ (Hech. 17:11, NM). Ñahaʼangáramo chupekuéra, koʼýte ñamombaʼéta Jehová servísio ha jarekóta chupe ñane erénsiaramo.

Ñamenda Jehovápe oservívare

16. Mbaʼépa jajapovaʼerã ñakumpli hag̃ua 1 Corintios 7:39 heʼíva ha jareko Jehovápe ñane erénsiaramo?

¹⁶ La Biblia heʼi kristianokuérape omendavaʼerãha peteĩ ‘Jehováre ojeroviáva rehe’. Heta oĩ omombaʼéva ko mandáto ha ohaʼarõkuaa, topyta jepe raʼe soltéro (1 Cor. 7:39, BNP). Haʼekuéra ndahesarairivaʼerã Jehová ohayhuha chupekuéra ha katuete oñangarekotaha hesekuéra. Upéicha rupi, oñeñandúramo haʼeño térã naikyreʼỹvéi jave, oñembojavaʼerã Jehováre ha omombeʼu umi mbaʼe oipyʼapýva chupe. David ojapovaʼekue péicha ha heʼi: “Henondépe ahykuavo che pyʼa angata, henondépe amoĩne che rembiasa asykue. Nameʼẽvéimaramo jepe, nde reikuaa che rapykuere” (Sal. 142:1-3). Avei proféta Jeremías oñeñandúneraʼe upéicha. Amalisia haʼe nomendaivaʼekue ha heta tiémpore  ogueraha Ñandejára marandu umi héntepe haʼeño peteĩ. Hembiasakue tuicha ikatu oporomokyreʼỹ, ha upéva oñehesaʼỹijo lívro Dios nos habla mediante Jeremías, kapítulo 8-pe.

17. Mbaʼépa ojapo peteĩ ermána oñeñandu jave haʼeño?

¹⁷ Peteĩ ermána Estados Unidosgua omombeʼu mbaʼéichapa oñeñandu: “Ndahaʼéi ningo namendaséiva, ahaʼarõnte ajuhu peteĩ ermáno ahayhúva ha chepytyvõ porãtava. Che sy, ndahaʼéiva Testígo, oipota amenda oimeraẽvarentema. Upévare aporandu chupe: ‘Amendáramo ajuhu raẽvévare, piko nde reñerresponsavilisáta asẽ vaírõ?’. Upéi mama ohechakuaa ikatuha añemantene cheaño, añangareko chejehe ha avyʼaha aikoháichante. Upémarõ ndeʼivéi chéve mbaʼeve”. Mbaʼépa ojapo ko ermána oñeñandu jave haʼeño? Haʼe heʼi: “Añemoag̃ui Jehováre, haʼe arakaʼeve ndacherejareíri”. Mbaʼépa oipytyvõ chupe ojerovia hag̃ua Jehováre? Haʼete omombeʼu: “Añemboʼe meme ha añandu Jehová oĩha che ykére ha akóinte chepytyvõtaha. Mbaʼéicha piko ndavyʼamoʼãi che amígoramo pe Mburuvicha tuichavéva!” Jahechakuaa upéicharõ ‘javyʼaiteveha ñameʼẽvo, ñandéve oñemeʼẽ rangue’, upévare pe ermána heʼi: “Añehaʼãmbaite aipytyvõ che rapichakuérape ahaʼarõʼỹre mbaʼeve. Añeñandu porãiterei apensa jave mbaʼépa ikatu ajapo peteĩ tapicha rehehápe” (Hech. 20:35). Ojekuaa ko ermána omombaʼetereiha Jehová servísio ha orekoha chupe iñerénsiaramo.

18. Mbaʼépa jajapovaʼerã Ñandejára ñandereko hag̃ua iñerénsiaramo?

¹⁸ Opavave ikatu jareko Jehovápe ñane erénsiaramo, tahaʼe haʼéva upe jahasáva. Péicha añoite ñaiméta iñorganisasiónpe ha upéva tuichaiterei mbaʼe (2 Cor. 6:16, 17). Avei ikatu jareko Jehovápe ñane erénsiaramo heta tapicha yma guare oreko haguéicha chupe, ha Haʼe avei ikatúta ñandereko iñerénsiaramo (elee Deuteronomio 32:9, 10). Ajépa javyʼaite jaikuaávo Jehová oñangarekotaha ñanderehe haʼeramoguáicha imbaʼerepy, ojapo haguéicha umi Israelguáre! (Sal. 17:8.)

[Nóta]

Mbaʼépa ñaaprende?

Mbaʼéichapa jahechaukáta Jehová haʼeha ñane erénsia koʼã mbaʼépe:

• Ñamotenonde memévo Ñandejára Rréino ha ihustísia

• Ñamombaʼévo Jehová omeʼẽva jaikuaave hag̃ua chupe

• Ñamendávo ‘Jehováre ojeroviáva rehe’

[Porandu ñahesaʼỹijóva]

[Nóta oĩva taʼanga ndive páhina 15]

Jeremías rembiasakue ñanemokyreʼỹ