Iehova be Emu Ahuna, A?
Iehova be Emu Ahuna, A?
“Bema ta ia ura egu murinai ia raka, ia sibona ena ura ia dadaraia be namo, bona ena hisihisi auna do ia huaia bona egu murinai do ia raka noho.”—MAT. 16:24.
1, 2. (a) “Dirava ena Israela” be daidia? (b) “Israela ena iduhu 12” be daidia?
BAIBEL ai inai ladana Israela oi itaia neganai, dahaka oi laloa? Isako ena natuna Iakobo, gabeai idia gwauraia Israela oi laloa, a? Eiava iena tubudia, Israela besena oi laloa? Baibel ese “Dirava ena Israela” ia herevalaia danu. Idia be lauma helaga ese ia horoa 144,000 taudia, bona guba dekenai king bona hahelaga gaukara do idia karaia. (Gal. 6:16; Apok. 7:4; 21:12) To, Mataio 19:28 ai inai ladana Israela ena anina ma ta ia hedinarai.
2 Iesu ia gwau: “Gau ibounai hamatamataia negana ai, taunimanima ena Natuna be ena terona hairaina latanai do ia helai neganai, egu murinai umui raka taudia danu be terona 12 latanai do umui helai, bona Israela ena iduhu 12 do umui hahemaoro henia.” Unai siri ese ia herevalaia “Israela ena iduhu 12” be tanobada paradaisona ai mauri hanaihanai do idia abia taudia. Bona 144,000 taudia ese do idia karaia gaukara amo hahenamo idauidau do idia abia.
3, 4. Horoa taudia be dahaka haheitalai namona idia hahedinaraia?
3 Idaunegai hahelaga bona Levi taudia be Iehova ena hesiai gaukara idia laloa bada. (Num. 18:20) Unai hegeregerena, horoa taudia be edia hesiai gaukara idia laloa bada bona idia diba inai tanobada ai idia be ahuna lasi. Apokalupo 4:10, 11 ese ia hahedinaraia guba dekenai idia be Keriso ida king bona hahelaga gaukara do idia karaia.—Ese. 44:28.
4 Horoa taudia be tanobada ai idia do noho lalonai, edia kara amo idia hahedinaraia Iehova be edia ahuna bona edia hesiai gaukara idia laloa bada. Aposetolo Petero ia gwau: “Do umui gaukara goada Dirava ese umui ia boiria bona umui ia abia hidi karana umui hamomokania totona.” (2 Pet. 1:10) Idia hamomokania dalana be Keriso ena boubou gauna idia abidadama henia bona ia idia badinaia noho. Herevana idia haida be buruka momokani bona tauanina ia goada lasi, to unai ese idia ia koua lasi Dirava idia hesiai henia noho totona. Oibe, idia be haheitalai namona tanobada helarona idia abia taudia totona.
5. Edena dala ai Keristani taudia ese Iehova be edia ahuna ai idia halaoa? Dahaka dainai nega haida unai be auka?
5 Herevana, Keristani tauna ena helaro be guba o tanobada ai, to Iesu ia gwau namona be ‘sibona ena ura ia dadaraia, ena hisihisi auna do ia huaia’ bona ia murinai do ia raka. (Mat. 16:24) Tanobada Paradaisona ai idia ura noho taudia milioni momo be Dirava idia tomadiho henia bona Keriso murinai idia raka. Haida idia itaia edia hesiai gaukara idia habadaia diba. Unai dainai, momo be gau haida idia haidaua bona painia gaukara idia karaia. Ma haida be lagani ta ta ai heduru painia gaukara idia karaia. To ma haida be idia painia diba lasi dainai, edia haroro gaukara idia habadaia. Idia be Iesu ena kwarana ai bonana namo dehorona ia bubua hahinena Maria bamona. Iesu ia gwau: “Ia ese lau dekenai kara namona ia karaia. . . . Ia karaia diba gauna ia karaia.” (Mar. 14:6-8) Satani ese inai tanobada ia gunalaia dainai, nega haida ia auka kara maoromaoro ita badinaia totona. To, namona be ita gaukara goada bona Iehova dekenai ita tabekau. Mani unai ita karaia diba daladia foa ita herevalaia.
Dirava Ena Basileia Tahua Guna
6. (a) Edena dala ai tanobada taudia idia hahedinaraia edia ahuna be inai tanobada sibona amo? (b) Dahaka dainai Davida ita tohotohoa be namo?
6 Iesu ese ena hahediba taudia ia hadibaia Dirava ena Basileia bona ena kara maoromaoro do idia tahua guna. To, tanobada taudia be sibona edia namo idia laloa bada. Baibel ia gwau “inai taudia edia ura gaudia, bona edia ahuna danu, be inai tanobada sibona dekenai idia tahua noho.” (Salamo 17:1, 13-15 duahia.) Idia be Iehova idia laloa bada lasi, to mauri namona, bese idia havaraia, bona natudia dekenai do idia henia ahuna sibona idia laloa bada. Oibe, edia ahuna be inai tanobada gaudia sibona amo. To, Davida be idau, ia ura Iehova vairanai “ladana namona” ia abia. Gabeai, ena natuna Solomona ia gwau, ita ibounai be unai bamona ita karaia be namo. (Had. 7:1) Asapa hegeregerena, Davida ia diba Iehova tura henia karana be mai anina bada, bona unai ia moalelaia. Iseda nega ai, Keristani taudia momo be Iehova ena hesiai gaukara idia atoa guna, bona edia moni gaukara be gabeai. Unai amo idia hahedinaraia Iehova be edia ahuna.
7. Tadikaka ta be Basileia ia tahua guna dainai, dahaka hahenamo ia davaria?
7 Central African Republic ai, Jean-Claude be elda ta, bona ia be mai ena adavana bona natudia toi. Unuseniai, moni gaukara davaria be auka, bona momo be edia moni gaukara idia haboioa lasi totona, edia bosi edia hereva idia kamonai sibona. Dina ta Jean-Claude ena bosi ese ia hamaoroa hanuaboi ai do ia gaukara. Anina be dina ta ta ai hanuaboi 6:30 ena gaukara do ia matamaia. Jean-Claude ese ena bosi ia hamaoroa ena ruma bese be tauanina dalana sibona ia naridia lasi, to ia durudia Dirava idia tura henia totona. Bona ia hamaoroa kongrigeisen lalonai ia be mai ena maduna danu. Ena bosi ia gwau: “Inai gaukara oi dogoatao noho totona, namona be emu adavana, emu natudia, bona emu hekwakwanai ibounai oi laloaboio bona emu gaukara sibona oi laloa. Dahaka do oi abia hidi, emu tomadiho o moni gaukara?” Bema unai be oi, dahaka do oi karaia? Jean-Claude ia diba bema ena moni gaukara ia haboioa, Dirava ese ia bona ena ruma bese do ia naria. Bona Dirava ena hesiai gaukara lalonai maduna idauidau ia huaia diba. Unai dainai ena kongrigeisen hebouna dekenai ia lao. Unai murinai gaukara totona ia hegaegae lalonai, ta ia rini bona ia hamaoroa ena bosi be gaukara amo idia hadokoa. To, iseda tadikaka be ena moni gaukara ia haboioa lasi.
8, 9. Hahelaga bona Levi taudia bamona, edena dala ai Iehova be iseda ahuna ai ita halaoa diba?
8 Reana umui haida dekenai unai bamona ia vara danu. Reana, oi laloa momo bema emu moni gaukara oi haboioa, edena bamona emu ruma bese do oi naria. (1 Tim. 5:8) Herevana oi dekenai unai ia vara o lasi, to oi diba momokani Dirava ese ena hesiai taudia do ia rakatania diba lasi. Iesu ese ena hahediba taudia ia hamaoroa, bema ‘Dirava ena Basileia idia tahua guna,’ Dirava ese gau ibounai, hegeregere aniani, inua gaudia, bona dabua do ia henidia.—Mat. 6:33.
9 Mani Levi taudia ita laloa, idia be tano ta idia abia lasi. Tomadiho dalanai idia ese Israela besena idia gunalaia dainai, idia abia dae momokani Iehova ese tauanina durua gaudia do ia henia bona ia be edia ahuna. (Num. 18:20) Ena be dubu helaga dekenai hahelaga bona Levi taudia edia gaukara ita karaia lasi, to ita abia dae momokani Iehova ese ita do ia naria. Dokona ia kahirakahira momokani dainai, gau badana be ita abia dae momokani Dirava be ita do ia rakatania lasi.—Apok. 13:17.
Dirava Ena Kara Maoromaoro Tahua Guna
10, 11. Haida be moni gaukara idia abia hidi neganai, edena dala ai idia hahedinaraia Dirava idia abidadama henia? Haheitalai gwauraia.
10 Iesu ese ena hahediba taudia ia hamaoroa Dirava ena kara maoromaoro do idia tahua guna. (Mat. 6:33) Anina be Iehova ena lalohadai dahaka be maoro bona dahaka be kerere ita badinaia, bona tanobada ena lalohadai ita dadaraia. (Isaia 55:8, 9 duahia.) Guna haida be ami taudia, tuari kohudia idia karaia bona hoihoilaia o kuku bona buatau idia hadoa o hoihoilaia. To, hereva momokani idia diba neganai, momo be edia moni gaukara idia haidaua bona bapatiso idia abia.—Isa. 2:4; 2 Kor. 7:1; Gal. 5:14.
11 Andrew be unai bamona ia karaia. Ia bona ena adavana be Iehova idia dibaia neganai, edia lalona idia hadaia ia do idia hesiai henia. Ena be Andrew ese ena moni gaukara ia ura henia bada, to ia rakatania. Dahaka dainai? Badina ia ura Iehova ena kara maoromaoro ia tahua guna, to ia gaukara kampani be tuari ia durua. Andrew ese ena gaukara ia rakatania neganai, edia natuna be rua bona idia dekenai ia noho moni be hegeregere hua haida sibona lalonai aniani o gau ma haida idia hoia totona. Toana be Andrew be Levi taudia bamona, ia be ahuna lasi. To, Dirava ia abidadama henia bona moni gaukara ma ta ia tahua. Ia bona ena ruma bese be unai nega idia laloa lou neganai, idia abia dae momokani Iehova be idia ia naria. (Isa. 59:1) Kohu momo lasi maurina idia noholaia dainai, Andrew bona ena adavana be idia painia diba. Ia gwau nega haida moni, noho gabuna, edia helt, bona idia buruka idia lao dainai idia lalohekwarahi. To, nega ibounai Iehova ese idia ia durua. Idia diba Iehova hesiai henia karana be hahenamo badana. *—Had. 12:13.
12. Dirava ena kara maoromaoro ita tahua guna totona, dahaka kara ita hahedinaraia be namo? Emu gabu dekenai idia vara sivarai haida gwauraia.
12 Iesu ese ena hahediba taudia ia hamaoroa: “Bema emui abidadama be mastadi uhena bamona, inai ororo dekenai do umui gwau, ‘Inai gabu amo oi lao unuseniai,’ bena do ia lao, bona do umui hegeregere gau ibounai umui karaia totona.” (Mat. 17:20) Bema kara maoromaoro oi badinaia dainai hekwakwanai oi davaria, Dirava ena kara maoromaoro do oi tahua noho, a? Bema oi laloa unai oi karaia diba lasi, namona be kongrigeisen taudia ma haida ida oi herevahereva. Bona Iehova ese idia ia durua sivaraidia oi kamonai neganai, unai ese emu abidadama do ia hagoadaia.
Iehova ese Ia Henia Gaudia Laloa Bada
13. Bema Iehova ena hesiai gaukara ita goadalaia, ita diba momokani dahaka do ia karaia?
13 Bema Iehova hesiai henia karana oi laloa bada, oi diba momokani ia ese emu dabu gaudia ibounai do ia henia, Levi taudia dekenai ia karaia bamona. Davida mani oi laloa. Ena be kohua lalonai ia komu, to ia diba Dirava ese ia do ia durua. Ita danu bema ita mamia heduru tauna be lasi, Iehova ita abidadama henia be namo. Laloatao, Asapa be “Dirava ena Dubu Helaga” dekenai ia vareai neganai, ia lalohekwarahilaia gauna ia lalopararalaia. (Sal. 73:17) Unai hegeregerena, namona be Iehova ita abidadama henia, badina ita do ia hagoadaia, ita gini goada totona. Unai amo ita hahedinaraia, herevana iseda noho dalana be edena bamona, to Iehova hesiai henia karana ita laloa bada. Unai amo Iehova be iseda ahuna ai ita halaoa.
14, 15. “Dobu gaudia” edia anina idia hedinarai neganai, dahaka ita karaia bona dahaka dainai?
14 Iehova ese Baibel lalonai idia noho “dobu gaudia” edia anina ia hahedinaraia neganai, unai oi abia dae, a? (1 Kor. 2:10-13) Aposetolo Petero be unai bamona ia karaia. Iesu ese Iuda taudia ia hamaorodia: “Bema taunimanima ena Natuna ena tauanina umui ania lasi bona ena rara umui inua lasi, umui be mauri do umui abia lasi.” Hahediba taudia momo idia laloa Iesu be ena tauanina bona rara korikorina ia herevalaia dainai, idia gwau: “Inai be hereva metauna, daika ese do ia abia dae diba?” Unai dainai “momo be idia rakatania gaudia dekenai idia giroa lou.” To, Petero ia gwau: “Lohiabada e, daika dekenai do ai lao? Mauri hanaihanai herevadia be oi dekenai idia noho.”—Ioa. 6:53, 60, 66, 68.
15 Petero be Iesu ena hereva ia lalopararalaia lasi. To, ia abia dae momokani Iehova be Iesu amo taunimanima ia durua hereva momokani idia lalopararalaia totona. Hari, Baibel ena hereva momokani dekenai lalohadai matamata idia hedinarai neganai, idia haidaua ena badina oi lalopararalaia, a? (Aon. 4:18) Idaunegai Berea taudia be “mai edia ura bada ida Dirava ena hereva idia kamonai bona dina ta ta ai Toretore Helagadia idia tahua namonamo.” (Kara 17:11) Bema edia kara oi tohotohoa, emu hesiai gaukara do oi moalelaia, badina Iehova be emu ahuna.
Lohiabada Lalonai Sibona Headava
16. Edena dala ai singul Keristani taudia ese Iehova be edia ahuna ai idia halaoa diba?
16 Keristani taudia ese Dirava ena ura idia atoa guna dalana ma ta be, iena hahegani “Lohiabada lalonai sibona” do idia headava idia badinaia. (1 Kor. 7:39) Momo be unai hahegani idia badinaia dainai, idia do headava lasi. Dirava ese unai bamona taudia ia laloa bada. Davida be sibona ia noho dainai ia lalohisihisi, bona ia mamia ta ese do ia durua lasi neganai, dahaka ia karaia? Davida be heduru totona Iehova ia noia, ia gwau: “Egu lalohisihisi bona hekwarahi gaudia, be iena vairana dekenai lau gwauraia noho. Egu lalona ia metau momokani, bona lau laloa be dika do lau davaria.” (Sal. 142:1-3) Ieremia be ia headava lasi bona lagani momo lalonai Dirava ia hesiai henia. Reana ia danu be sibona ia noho dainai ia lalohisihisi. Iena sivarai be God’s Word for Us Through Jeremiah bukana ena karoa 8 dekenai oi duahia diba.
17. Taihu ta be sibona ia noho dainai ia lalohisihisi neganai, dahaka ia karaia?
17 United States ai taihu ta ia gwau: “Ena be lau do headava lasi, to unai be egu abia hidi lasi. Bema tadikaka namona ta lau davaria do lau headava. To, egu sinana be Witnes hahinena lasi bona daika do lau adavaia ia laloa bada lasi. Ia lau nanadaia, ‘bema lau headava bona hekwakwanai idia vara, lau do oi durua, a?’ Gabeai, ia itaia moni gaukara namona lau abia, sibona lau naria diba bona lau moale neganai, lau ia doria lasi headava totona.” Unai taihu be sibona ia noho dainai nega haida ia lalohisihisi. To, ia gwau: “Iehova dekenai lau tabekau bona ia be lau ia rakatania diba lasi.” Dahaka ese taihu ia durua Iehova dekenai ia tabekau totona? Ia gwau: “Guriguri karana ese lau ia durua bona lau mamia Dirava be ia noho momokani bona lau be sibona lau noho lasi. Atai Momokani Diravana be lau ia kamonai henia, lau dekenai unai be hahenamo badana.” Baibel ena hereva ia abia dae, ia gwau: “Henia kara ena moale be bada, to abia kara ena moale be maragi.” Unai dainai ia ese ma haida ia durua, bona ia ura lasi idia amo gau ta ia abia. Ia gwau: “Lau laloa bada gauna be, ‘lau be dahaka lau karaia diba ma haida lau durua totona?’ Unai gaudia lau karaia neganai lau moale.”—Kara 20:35.
18. Edena dala ai Iehova be emu ahuna ai oi halaoa diba?
18 Herevana oi dekenai dahaka ia vara, Dirava be emu ahuna ai oi halaoa diba. Unai oi karaia neganai, iena taunimanima ida oi moale diba. (2 Kor. 6:16, 17) Idaunegai Dirava ena hesiai taudia bamona, Iehova be oiemu ahuna ai oi halaoa diba. (Deuteronomi 32:9, 10 duahia.) Dirava ese Israela besena ia abia hidi bona ena ahuna ai ia halaodia hegeregerena, ia ese oi ia abia hidi diba bona oi do ia naria.—Sal. 17:8.
[Footnote]
^ par. 11 Awake! November 2009, rau 12-14 itaia.
Edena Bamona Do Oi Haere?
• Dirava ena Basileia bona ena kara maoromaoro oi tahua guna neganai, edena dala ai oi hahedinaraia Iehova oi abidadama henia?
• Edena dala ai oi hahedinaraia oi be Iehova ia henia gaudia oi laloa bada?
• “Lohiabada lalonai sibona” headava ena hahegani oi badinaia neganai, edena dala ai oi hahedinaraia Dirava oi abidadama henia?
[Study Questions]
[Blurb on page 13]
Iehova hesiai henia karana ita atoa guna neganai, ia be iseda ahuna ai ia lao
[Picture on page 15]
Ieremia ena haheitalai ese Dirava ena taunimanima ia hagoadaia
