Jehova agguagarsiaraajuk?
Jehova agguagarsiaraajuk?
“Naalagaaffik naapertuilluassuserlu taassuma pia siulliullugit noqqaassutigiuarsigit, taava tamakku tamaasa ilanngullugit ilissinnut tunniunneqarumaarput.” — MATTHÆUSI 6:33, NV.
1, 2. (a) Kikkut Galatiamiut 6:16-imi ‘Israeli Guutip pigisaatut’ eqqartorneqarpat? (b) “Israelip naggueqatigiissortai aqqaneq-marluusut” Matthæusi 19:28-mi eqqartorneqartut kikkuuppat?
BIIBILIMI ateq Israeli atuaraangakku suna eqqarsaatigisarpiuk? Iisaap ernera Jaaku, kingusinnerusukkut Israelimik ateqalersoq, eqqarsaatigisarpiuk? Taassumaluunniit kinguaavi, itsaq inuiaqatigiit Israelikkut, eqqarsaatigisarpigit? Biibilimi aamma 144.000-it qilammi kunngiusussatut palasiusussatullu anersaamik illernartumik taninneqartut anersaakkut Israelitut, ‘Israeli Guutip pigisaatut’, eqqartorneqarput. (Galatiamiut 6:16; Saqqummersitat 7:4; 21:12) Maluginiariarulli Israelip naggueqatigiissortaasa aqqaneq-marluusut Matthæusi 19:28-mi immikkut eqqartorneqarnerat.
2 Jiisusi silarsuassaq nutaaq pillugu ima oqarpoq: “Inuup Ernera naalannassutsimi issiavissaarsuanut ingippat, taava ilississaaq uannik malinnittusi issiavissaarsuarni aqqaneq-marlunni issiajumaarpusi Israelip naggueqatigiissortai aqqaneq-marluusut eqqartuullugit.” Versimi “Israelip naggueqatigiissortai aqqaneq-marluusut” tassaapput nunarsuarmi paratiisiusumi naassaanngitsumik inuulerumaartut. Taakkua iluaqutigissavaat 144.000-it eqqartuussisutut palasitullu kiffartornerat.
3, 4. Kristumiut tanitat aalajaatsut qanoq maligassaalluarpat?
3 Itsaq palasit Levikkullu pisimanerattut, ullumikkut tanitat Jehovamut kiffartornertik naleqangaartutut isigaat. (4 Mosesi 18:20) Naatsorsuutiginngilaat nunaammik namminneq pigisassaminnik tunineqarnissartik. Qilanaaraalli Jiisusi Kristusi peqatigalugu kunngiullutillu palasiunissartik. Saqqummersitat 4:10, 11-mit erserpoq taakku qilammukarpata Jehovamut kiffartornerat ingerlaannassasoq. — Ezekieli 44:28.
4 Tanitat nunarsuarmiinnerminni Jehovamik agguagarsiaqarnerminnik ersersitsisumik inooriaaseqarput. Guutimut kiffartornerat taakkununnga pingaarnerpaavoq. Apustili Petrusi ima allappoq: “[Ilungersorlusi] qaaqquneqarnersi qinerneqarnersilu aalajangersarniarsigit.” (2 Petrusi 1:10) Taamaaliorput Kristusip utertitsissutitut pilliutaanik upperinninnermikkut taassuminngalu malinnittuarnermikkut. Tanitat pissutsit atugaat periarfissaallu assigiinngilluinnarput. Pisinnaasamilli killeqarnerat Guutimut kiffartornerminni iliuuseqalaaginnarnissamut utoqqatsissutitut atunngilaat. Guutimut kiffartornertik pingaarnerpaatillugulu sapinngisartik tamaat iliorput. Taamaalillutik nunarsuarmi naassaanngitsumik inuunissamik neriugisalinnut maligassaalluarput.
5. Kristumiut tamarmik Jehova qanoq agguagarsiarisinnaavaat, qanorlu tamanna imaannaanngila?
5 Qilaliarnissamik nunarsuarmiluunniit inuunissamik neriugisaqaraluarutta ‘imminut isumakkiissaagut’, nappagarlu anniartitaaffik ‘ersussavarput’ Kristusilu ‘malittuassallugu’. (Matthæusi 16:24) Taamatut inuit millionillit nunarsuarmi paratiisiusumi inuunissamik neriugisallit Guutimut kiffartortarlutillu Kristusi malittarpaat. Guutimut kiffartornerminni iliuuseqarnerusinnaagaangamik iliuuseqalaaginnarnissartik naammagiinnarneq ajorpaat. Kristumiorpassuit inooriaatsiminnik pisariillisaasimallutillu pionerinngorsimapput. Allat ilaannikkut ikiorti-pioneriusinnaasarput. Allat pioneriunngikkaluarlutik sapinngisartik tamaat oqaluusseqataasarput. Taakku Mariatut ikiuiumatuutut Jiisusip niaquanut uuliamik tipigissumik kuisisutut ipput. Jiisusi Maria pillugu ima oqarpoq: “Ajunngitsumimmi iliorfigaanga. . . . Pisinnaanini naapertorlugu iliorpoq.” (Markusi 14:6-8) Silarsuarmi Saatanimit naalakkersorneqartumi sapinngisarput tamaat iliuuseqassagutta ilungersortariaqarlutalu Jehova tatigisariaqarparput. Jehovamik tatiginninnitsinnut tunngassuteqartut sisamat sammilaariartigit.
Guutip naalagaaffia siulliullugu noqqaassutigiuk
6. (a) Silarsuarmiut qanoq ersersippaat inuunermi matumaniinnaq agguagarsiassaqarlutik? (b) Sooq Daavitut isiginnittaaseqarnissaq pitsaanerua?
6 Jiisusip ajoqersukkani ajoqersorpai Guutip naalagaaffia naapertuilluassuserlu taassuma pia siulliullugit noqqaassutigeqqullugit. Silarsuarmiut namminneq soqutigisatik siulliullugit noqqaassutigisarpaat. Taamaattumik Biibilimi ‘angutitut pissutsit aaqqissuussaanerannit matumannga pisutut inuunermi matumani agguagarsiaqartutut’ taaneqarput. (Tussiaat 17:1, 13-15, NV) Inuppassuit Pinngortitsisoq eqqarsaatiginngilluinnartarpaat, ilorrisimaarnartumillu inooriaaseqarnissartik, ilaqutaqalernissartik kingornussarsiassaqartitsinissartillu pingaartittarpaat. Inuunermili matumaniinnaq agguagarsiassaqarput. Daavi allaalluinnarpoq; Jehovamimmi ‘ajunngitsumik tusaamaneqarusuppoq’. Kingusinnerusukkut taassuma ernerata Salomop inuit tamaasa kajumissaarpai ‘ajunngitsumik tusaamaneqalerniarlutik’ iliuuseqaqqullugit. (Oqaluussisartup oqaasii 7:1) Asafip pisimaneratut, Daavip nalunngilaa Jehovamik ikinnguteqarneq inuunermi pingaarnerpaasoq. Jehovamik saqeqateqarnini nuannaarutigaa. Ullumikkuttaaq kristumiorpassuit sammisassatik anersaakkut ittut suliffimminnit pingaarnerutippaat.
7. Qatanngutip Guutip naalagaaffia siulliukkamiuk qanoq pilluaqquneqarpa?
7 Jean-Claude Afrikami Qiterlermi Kunngiitsuuffimmi najugaqartoq utoqqaanertaavoq aappalik pingasunillu meeralik. Nunami tassani suliffissarsinissaq sapernartarpoq, inuillu amerlanersaat suliffimminniiginnarniarlutik qanorluunniit iliorumasarput. Ullut ilaanni naalagaasap Jean-Claude unnuarsiortuusaleqquaa. Ullut tamaasa unnukkut arfineq-marloqeqqanut suliartortassaaq. Jean-Claude nassuiaavoq ilaquttami timikkut pilersornerisa saniatigut anersaakkut pisariaqartitaannik isumassuisussaalluni. Aamma oqarfigaa ilagiinniittunik ikiuisarnissaq akisussaaffigalugu. Naalagaasarli ima oqarpoq: “Suliffeqaravit iluanaaqaatit, suut tamaasa — aamma nuliat, meeqqatit ajornartorsiutitillu — puiortariaqarpatit. Suliffinnut piffissat tamaat atortariaqarpat. Taava sorusuppit: upperisat suliffiilluunniit?” Illit qanoq iliorsimassagaluarpit? Jean-Claudep nalunngilaa suliffeerukkuni Guutip isumassorumaaraani. Guutimut kiffartornermi suli suliassaqaqaaq, ilaquttamilu timikkut pisariaqartitaannik isumassuinerani Jehovamit ikiorneqarumaarpoq. Taamaattumik tullianik ataatsimiittussanngoramik ataatsimiigiarpoq. Ataatsimiinnerup kingorna suliartornissaminut piareersarpoq soraarsitaasimanerluni nalullugu. Taava telefoni sianerpoq. Naalagaasaq soraarsitaasimavoq — qatanngutittalu suliffini suli suliffigaa.
8, 9. Palasit Levikkullu Jehovamik pissarsiaqarnermut tunngatillugu qanoq ilaarsinnaavavut?
8 Suliffeeruteqqajaasorigaanni immaqa ima eqqarsartoqarsinnaavoq: ‘Ilaquttakka qanoq pilersorsinnaassavakka?’ (1 Timotheusi 5:8) Suliffeerukkaluaruit suliffeqaannaraluaruilluunniit nammineq misigisimassagunarpat Jehova imminik agguagarsiaqartunik imminullu kiffartornermik inuunermi siulliussisunik pakatsisitsinngisaannartoq. Jiisusip ajoqersukkani oqarfigamigit ‘naalagaaffik siulliullugu noqqaassutigiuaqqullugu’ ima neriorsorpai: “Tamakku tamaasa” — assersuutigalugu nerisassat atisassallu — “ilanngullugit ilissinnut tunniunneqarumaarput”. — Matthæusi 6:33, NV.
9 Eqqarsaatigeriakkit Levikkut nunaammik kingornuttaqattaagassamik tunineqanngitsut. Pallorfiginninnermik ilumoortumik ulapputiginnikkamik upperisariaqarpaat Jehovap pisariaqartitaminnik pilersuinissaa. Taannami ima oqarpoq: ‘Illit pissarsiarissavarma.’ (4 Mosesi 18:20) Palasit Levikkullu naalaffimmi kiffartornerattut kiffartunngikkaluarluta taakkua Jehovamik tatiginninnerattut Jehova tatigisinnaavarput. Naggatissaq qanilliartortillugu naatsorsuutigisinnaavarput nersutip qaasuttup ‘aqqanik nalunaaqutserneqarusunnginnerput’ pissutigalugu atugarliulernissarput. Taamaattumik Guutip uagutsinnik pilersuisinnaallunilu pilersuiumaneranik upperinninnerput pingaaruteqarnerujartuinnartussaavoq. — Saqqummersitat 13:17.
Naapertuilluassuseq Guutip pia siulliullugu noqqaassutigiuk
10, 11. Ilaasa suliffimminnut tunngatillugu Jehova qanoq tatigisimavaat? Assersuuteqarit.
10 Aamma Jiisusip ajoqersukkani kajumissaarpai ‘naapertuilluassuseq Guutip pia siulliullugu noqqaassutigeqqullugu’. (Matthæusi 6:33, NV) Tamanna ima paasisariaqarpoq Jehovap suut eqqortuunerannik suullu eqqunngitsuunerannik najoqqutassiaasa malinnissaat inuit najoqqutassiaasa malinnissaannit pingaaruteqarnerusut. (Atuakkit Esaja 55:8, 9). Ilaat sallusuissut ilikkanngikkallaramikku tupassanik naatitsisarsimallutilluunniit tupanik tuniniaasarsimapput, sorsunnissamut sungiusaasarsimallutilluunniit sakkussanik sanaartoqataasarsimallutilluunniit sakkunik tuniniaasarsimapput. Sallusuissulli paasigamikku taakkua amerlanersaat suliffittaarniarlutik aalajangerput kuisisinnaalerniassagamik. — Esaja 2:4; 2 Korinthimiut 7:1; Galatiamiut 5:14.
11 Assersuuteqariarta. Andrew nulialu Jehova ilisarisimaneruleramikku aalajangerput taassumunnga kiffartorniarlutik. Andrewip suliffini tulluusimaarutigaa, taamaakkaluartorli suliffigiunnaarpaa. Sooq? Sakkutooqarnerup iluani suligami naapertuilluassuserlu Guutip pia siulliullugu noqqaassutiginiarlugu aalajangersimagami. Andrewip suliffini suliffigiunnaaramiuk marlunnik meeraqarpoq, isertitaqanngilaq, aningaasaateqarporlu ilaqutariit qaammatialuinnarni inuussutigisinnaasaannik. Inuit isiginnittaasiat naapertorlugu suuteqanngilaq. Guuti tatigalugu suliffissarsiorpoq. Andrewip ilaqutaasalu tamanna eqqarsaatigigaangamikku Jehovap taliata naapallaannginnera uppernarsarsinnaasarpaat. (Esaja 59:1) Andrew nulialu pilimanianngitsumik inuugamik allaat pioneriusinnaasimapput. Andrew ima oqarpoq: “Ilaannikkut aningaasaqarnerput, ineqarnerput peqqissuserput — ilaannikkullu utoqqalinerput kisiat — isumakuluutigisarpavut.” Imali nangippoq: “Jehovap najortuarpaatigut. . . . Qularnata oqarsinnaavugut Jehovamut kiffartorneq inuit noqqaassutigisinnaasaannit allanit tamanit ataqqinaataanerpaallunilu iluaqutaanerpaasoq.” * — Oqaluussisartup oqaasii 12:13.
12. Naapertuilluassuseq Guutip pia siulliullugu noqqaassutigiumallugu suna pisariaqarpa? Ilagiissinneersumik assersuuteqarit.
12 Jiisusip ajoqersukkani ima oqarfigai: “Siinuppip naatsiiassartaatut atsigisumik uppersuseqaraluarussi qaqqaq una oqarfigisinnaassavarsi: Uanngaanniit ikunga nuugit! taava nuussagaluarpoq. Sunaluunniillu ilissinnut ajornassanngikkaluarpoq.” (Matthæusi 17:20) Guutip najoqqutassiaanik malinninnerit pissutigalugu ajornartorsiuteqalissagaluaruit naapertuilluassuseq Guutip pia siulliullugu noqqaassutigiuassagaluarpiuk? Taamaaliorsinnaanerit qularigukku ilagiinniittunik oqaloqateqarit. Allat Jehovamit ikiorneqarsimanerminnik misigisimasaat illit uppernikkut nakussatsissutigissavatit.
Jehovap tunissutai anersaakkut ittut qujamasuutigikkit
13. Jehovamut kiffartornerput ulapputigigutsigu suna qularutiginngilluinnarsinnaavarput?
13 Jehovamut kiffartornerit pingaartikkukku qularutiginngilluinnarsinnaavat Jehovap Levikkut pisariaqartitaannik isumassuisimanermisut illit timikkut anersaakkullu pisariaqartitannik isumassuinissaa. Daavi eqqarsaatigiuk. Allaat qaarusummiikkaluarluni Guutip imminik isumassuinissaa naatsorsuutigaa. Uaguttaaq ajornartorsiummut aaqqissutissaqarpasinngikkaluartoq Jehova tatigisinnaavarput. Eqqaamajuk Asafi “Guutip illernartuutaanut” pigami aatsaat paatsiveerusimaarunnaartoq. (Tussiaat 73:17) Uaguttaaq Jehovamut anersaakkut inuussutissanik pisariaqartitatsinnik pilersuisumut ikiortissarsiortariaqarpugut. Taamaalilluta ersersissinnaavarput atukkavut qanorluunniit ikkaluarpata Jehovamut kiffartornerput pingaartillutigu. Taava Jehova agguagarsiarissavarput.
14, 15. Allassimaffinnik aalajangersimasunik paasinninnitsinnut tunngatillugu allannguisoqaraangat qanoq isiginnittaaseqartariaqarpugut, aamma sooq?
14 ‘Guutip itissusiinik’ Biibilimiittunik Jehova paasinarsisitsigaangat illit upperisarpiuk? (1 Korinthimiut 2:10-13) Uppernermut tunngatillugu apustili Petrusi maligassaalluarpoq. Jiisusip juutit ima oqarfigai: “Inuup Ernerata uinnga nerinngikkussiuk aavalu iminngikkussiuk ilissinni inuuneqassanngilasi.” Ajoqersugarpassuit paasinngilaat Jiisusip assersuutit atorlugit oqaluukkaatik. Taakku ima oqarput: “Oqaasii sakkortoqaat; kikkut taamaattut tusarnaarumasinnaavaat?” Taava “qimappaat”. Petrusili ima oqarpoq: “Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit.” — Johannesi 6:53, 60, 66, 68.
15 Petrusip paasilluanngilai Jiisusip uinini aannilu pillugit oqaasii. Upperaali Jehovap Jiisusi atorlugu inuit sallusuissummik paasinninnissaannut ikiussagai. Ullumikkut Biibilimik paasinninnitsinnut tunngatillugu allannguisoqaraangat tunngavilersuutit Biibilimeersut paasiniarsarisarpigit? (Ussatit 4:18) Ukiuni hundredelinni siullerni Berøamiut “oqaaseq kajumeqalutik ilassivaat, ullullu tamaasa Allakkat misissuiffigisarpaat”. (Apustilit Suliaat 17:11) Taakkua maligassiaat malikkukku Guutimut kiffartornerit pingaartinnerulissavat, Jehovamillu agguagarsiaqarnerit qujamasuutigilissavat.
Taamaallaat Naalakkami katigit
16. Kristumiut peqqussummik Korinthimiunut allakkani siullerni 7:39-miittumik malinninnermikkut qanoq Guuti agguagarsiarisinnaavaat?
16 Kristumiut Jehovamik tatiginnittariaqarnerannut tunngassuteqartoq alla tassaavoq taamaallaat “Naalakkami” katinnissamik peqqussummik malinninneq. (1 Korinthimiut 7:39) Kristumiorpassuit Jehovap peqqussutaa tamanna naalanngikkumanagu aalajangersimapput aappaqanngiinnarniarlutik. Jehovap taakku isumassorluarpai. Daavi kiserliorami ikiortissaqanngitsutullu misigigami qanoq piva? Ima oqarpoq: “[Guuti] kappialassutinnik aniatitsiffigaara, annikilliuutinnik eqqartuiffigalugu.” (Tussiaat 142:2-4) Jeremia ukiuni qulikkuutaani Guutimut aappaqarnani kiffartortoq kiserliortarsimasinnaavoq. Taassuma maligassiaa atuakkami Gud taler til os gennem Jeremias-imi kapitali 8-mi misissorsinnaavat. Aamma takuuk Napasuliaq Alapernaarsuiffik 1. februaari 2011-moortumi qupp. 19-23.
17. Qatanngut arnaq aappaqanngitsoq kiserlioraangami susarpa?
17 Qatanngut arnaq USA-meersoq ima oqarpoq: “Aalajangernikuunngilanga aappaqanngitsuuniarlunga. Katikkusuppunga uannut tulluartumik naapitsissagaluaruma. Anaanama, Jehovamut nalunaajaasuunngitsup, katitsikkusungaaraminga apeqqutaatinngilaa kimut katinnersunga. Aperaara aappartaaruma aappariinnerput ingerlanerliulissagaluarpat akisussaarusussanersoq. Naggataatigulli suliffigissarnera imminullu paaralunga inuunera nuannaarutiginerarpai katinnissaralu eqqartorunnaarlugu.” Ilaannikkulli qatanngut arnaq taanna kiserliulaartarpoq. Ima oqarpoq: “Taavali Jehova tatiginiartarpara. Imminiiginnanngisaannarpaanga.” Qatanngutip arnap Jehovamik tatiginninnissaminut suna iluaqutigaa? “Guutimut qinugaangama misigisarpunga ilumut najoraanga, kisimiittutut misigiunnaartarpunga. Qilammi nunamilu Qutsinnerussaartup tusarnaartarmanga nuannaartuullungalu pingaartinneqartutut misigivunga.” Qatanngutip qularutiginngilluinnarpaa ‘tunisineq pilluarnarnerusoq tigusinermit’. Taamaattumik allanik ikiuisarpoq taakkunannga ikiorneqarnissani naatsorsuutiginagu. Ima nangippoq: “Eqqarsaraangama una unaluunniit ikiorniarlugu susinnaanerlunga qamuuna nuannaalertarpunga.” (Apustilit Suliaat 20:35) Aap, taassuma Jehova agguagarsiaralugulu taassumunnga kiffartornini nuannaarutigaa.
18. Illit qanoq ilillutit Jehovamit agguagarsiarineqarsinnaavit?
18 Atukkatit qanorluunniit ikkaluarpata Guuti agguagarsiarisinnaavat. Jehova agguagarsiarigakku taassuma innuttaanut pilluartunut ilaavutit. (2 Korinthimiut 6:16, 17) Taamaalillutit illit Jehovamit agguagarsiarineqarsinnaavutit, soorlu allat itsaq agguagarsiarisarsimagai. (Atuakkit 5 Mosesi 32:9, 10). Soorlu inuiaqatigiit akornannit Jehovap Israelikkut agguagarsiamisut toqqarai illittaaq agguagarsiamisut toqqarsinnaavaatit asannittumillu isumassorlutit. — Tussiaat 17:8.
[Quppernerup ataani ilanngussaq]
^ imm. 11 Takuuk Vågn op! novembari 2009-moortoq, qupp. 12-14.
Qanoq akissavit?
Illit Jehova qanoq agguagarsiarisinnaaviuk . . .
• Guutip naalagaaffia naapertuilluassuserlu taassuma pia siulliullugit noqqaassutigalugit?
• anersaakkut inuussutissat qujamasuutigalugit?
• taamaallaat “Naalakkami” katinnissamik peqqussummik malinninnikkut?
[Atuaqqissaarnermi apeqqutit]
[Issuagaq 16-mi assiliartaq]
Jehovamut kiffartornerput pingaarnerpaatikkutsigu Jehova agguagarsiarissavarput
[Assiliartaq 18-mi assiliartaq]
Jeremiap maligassiaa kajumississutigisinnaavarput
