Nga Oyambulanga vo Yave Kakala Kunku Kiaku?
Nga Oyambulanga vo Yave Kakala Kunku Kiaku?
“Nutombel’ekulu e kintinu kiandi, ye ndungidi andi: ozevo e lekwa yayi yawonso ikunukudikilwa.”—MAT. 6:33.
1, 2. (a) E mvovo “Isaele a Nzambi” uyikwanga muna Ngalatia 6:16, nani usunzulanga? (b) E “makanda kumi ye zole ma Isaele” meyikwanga muna Matai 19:28, nani mesunzulanga?
ADIEYI osungamenanga vava otanganga e nkumbu a Isaele muna Nkand’a Nzambi? Nga osungamenanga Yakobo wa mwan’a Isaki, ona wavewa nkumbu a Isaele? Yovo zula kia Isaele yankulu osungamenanga, kina vo i mbongo andi? Adieyi tuvova mu kuma kia Isaele ya mwanda? Ezak’e ntangwa, e mvovo Isaele usadilwanga mu yika “Isaele a Nzambi,” i sia vo, 144.000 ana bakuswa muna mwand’avelela mu kituka s’atinu ye nganga kun’ezulu. (Ngal. 6:16; Lus. 7:4; 21:12) Kansi, badika mpila yakaka isadilwanga e mvovo makanda kumi ye zole ma Isaele muna Matai 19:28.
2 Yesu wavova vo: “Muna luwutuluku, ova kivwanda Mwan’a muntu vana kunda kia nkembo andi, oyeno nwavwanda vana kunda kumi ye zole, nwafundisang’o makanda kumi ye zole ma Isaele.” Muna sono kiaki, “makanda kumi ye zole ma Isaele” i awana besinga fundiswa kw’alongoki akuswa a Yesu. Wantu awaya bevwila moyo a mvu ya mvu muna Paradiso ova ntoto. Bevwa nluta mia salu kia kinganga kisalwa kwa 144.000.
3, 4. Nkia mbandu ambote besonganga Akristu akuswa?
3 Nze anganga ye Anelevi kuna nz’ankulu, Akristu akuswa o unu bebadikilanga e salu besalanga vo kiamfunu kikilu. (Nta. 18:20) Akuswa ke bevingilanga ko vo bavewa kunku kia ntoto s’evwa diau. Kansi, bena ye vuvu kia kala s’atinu ye nganga kun’ezulu kumosi yo Yesu Kristu. Nze una wasonama muna Lusengomono 4:10, 11, akuswa bekwamanana sadila Yave nze atinu ye nganga kun’ezulu.—Yez. 44:28.
4 Ekolo bena ova ntoto, Akristu akuswa bafwete songa muna zingu kiau vo Yave i kunku kiau. O sadila Nzambi i diambu disundidi o mfunu kwa yau. Besonganga lukwikilu muna kimenga kia lukûlu kia Kristu yo zindalala kunlanda. Muna mpila yayi, ‘besikidisanga e nsum’au ye nsolw’au.’ (2 Pet. 1:10) Akristu akuswa baswaswana muna ngangu ye mu mambu makaka ma zingu. Kana una vo i wau, ke bevavanga vakuba ko mu lembi sala kwayingi muna salu kia Nzambi. Bevanganga wawonso balenda mu sia salu kia Nzambi vana fulu kiantete muna zingu kiau. Muna mpila yayi, besonganga mbandu ambote kw’awana bena ye vuvu kia zingila muna paradiso ova ntoto.
5. Aweyi Akristu balenda kitulwila Yave se kunku kiau? Ekuma dilenda kadila diampasi?
5 Kiakala vo vuvu kia kwenda kun’ezulu tuna kiau yovo kia zingila ova ntoto, tufwete ‘kuyivanina nkalu, yo nat’e nti eto ampasi, yo landa Kristu.’ (Mat. 16:24) Mazunda ye mazunda ma wantu bena ye vuvu kia zingila muna Paradiso ova ntoto mu mpila yayi besadilanga Nzambi yo landa Kristu. Ke beyangalalanga ko vava ke besalanga kwayingi ko ekolo bazeye vo balenda vanga mayingi. Ayingi bevevolanga zingu kiau yo sala se aviti a nzila a ngonde ke ngonde. Akaka besianga ngolo za vaula ngonde zina besalanga salu kia kimviti a nzila konso mvu. Akaka ke belendanga sala nze aviti a nzila ko, kansi bekuyivananga muna salu kia umbangi. Betangininanga Maria ona wakusa Yesu mazi. Yesu wavova vo: “Salu kiambote kansadìdi. . . . Ovangidi una kalenda.” (Maku 14:6-8) Wau vo mu nza iyalwanga kwa Satana tuzingilanga, dilenda kala diampasi mu vanga wawonso tulenda. Divavanga vo twasia ngolo yo bund’e vuvu kieto muna Yave. Tubadika mpila yá tulenda wo vangila.
Nutombel’ekulu e Kintinu kia Nzambi
6. (a) Wantu ova nza aweyi besongelanga vo e kunku kiau mu zingu kiaki kaka kina? (b) Ekuma tufwete tanginina Davidi?
6 Yesu wavovesa alongoki andi batombel’ekulu Kintinu kia Nzambi ye ndungidi andi. Wantu ayingi ova nza bevavanga sia zolela ya yau kibeni va fulu kiantete nze ‘wantu a tandu kiaki, ana bena vo e kunku kiau muna zingu kiaki kina.’ (Tanga Nkunga 17:1, 13-15.) Wantu awaya ke bevwanga Mvangi au mfunu ko. Ayingi befuntukanga kimana bakala ye zingu kiambote, sansa wana yo kubasisila evwa. E kunku kiau mu zingu kiaki kaka kina. Nswaswani yo yau, Davidi watokanenanga kuyivangila “nkumbu ambote” vana meso ma Yave. Kuna kwalanda, mwan’andi wakasakesa awonso mu vanga diau adimosi. (Kim. 7:1) Nze Asafi, Davidi wazaya wo vo kala nkundi a Yave i diambu disundidi o mfunu muna zingu ke mu sia zolela yandi va fulu kiantete ko. Wayangalelanga kangala kumosi yo Nzambi. Mu lumbu yeto, Akristu ayingi besianga mambu ma mwanda va fulu kiantete ke mu salu yau ya nitu ko.
7. Nkia nsambu kavwa mpangi mosi wau katombel’ekulu Kintinu?
7 Tubadika nona kia Jean-Claude kuna República Centro Africana, una vo nkuluntu wasompa ye se dia wana tatu. Kuna nsi yayi, diampasi dikalanga mu bak’e salu. O wantu bevanganga mawonso kimana balembi katulwa muna salu. Lumbu kimosi, o mfidi andi a salu wavovesa Jean-Claude vo kayantika sala mu fuku e lumbu yawonso, tuka muna ola ya 18:30. Jean-Claude wamvovesa vo vana ntandu a lungisa e nsatu za nitu za esi nzo andi, divavanga mpe vo kalungisa e nsatu zau za mwanda. Wakudikila vo kiyekwa kena kiau kia sadisa nkutakani. O mfidi a salu wamvovesa vo: “Avo kuzolele katulwa mu salu ko, ofwete vilakana mambu makaka, kumosi yo nkaz’aku, wana ye mpasi zaku. Ofwete kuyivana emvimba muna salu, yo yambula mana masidi. Bak’e nzengo owau: Dibundu diaku yovo salu kiaku.” Kele vo ngeye, adieyi wadi vanga? Jean-Claude wazaya wo vo avo okatwilu muna salu, Nzambi okunlunga-lunga. Okwamanana kala ye salu kiayingi kia sala muna salu kia Nzambi. O Yave mpe okunsadisa mu lungisa nsatu za nitu za esi nzo andi. Muna kuma kiaki, wayenda kuna lukutakanu muna lumbu kialanda. I bosi, wayenda kuna salu, kana una vo kakala ye ziku ko vo okwamanana muna salu. Ke vavioka kolo ko, wabokelwa muna telefone. O mfidi a salu ndiona wakatulwa muna salu, kansi o mpangi eto kakatulwa mu salu ko.
8, 9. Aweyi tulenda tanginina anganga ye Anelevi muna kitula Yave se kunku kieto?
8 Awana benwananga ye diambu dia mpila yayi kuna salu nanga balenda kiyuvula: ‘Aweyi ndenda lungisila kiyekwa kiame kia lunga-lunga esi nzo avo bankatwidi muna salu?’ (1 Tim. 5:8) Kiakala vo diambu diadi onwananga diau yovo ve, nanga otomene wo zaya muna zingu kiaku vo Nzambi kalendi kuyambula ko avo unkitwidi se kunku kiaku yo sia mambu ma mwanda va fulu kiantete. Vava Yesu kavovesa alongoki andi vo batombel’ekulu e kintinu, wabasia nsilu vo: “E lekwa yayi yawonso” nze dia, nua yo vwata, ‘ikubakudikilwa.’—Mat. 6:33.
9 Badika nona kia Anelevi, ana ke batambula kunku ko muna nsi. Wau vo basianga nsambil’aludi va fulu kiantete, bakalanga ye vuvu vo Yave olungisa nsatu zau za nitu, kadi wabasia nsilu vo: “Omono i kunku kiaku.” (Nta. 18:20) Kana una vo ke tusadilanga mu tempelo ko nze una anganga ye Anelevi bavanganga, tulenda tanginina o vema kwau muna kalanga ye vuvu vo Yave olungisa e nsatu zeto. Ekolo e mbaninu ifinamanga, diamfunu twasiamisa vuvu kieto muna nkum’a Nzambi wa kutulunga-lunga.—Lus. 13:17.
Nutombel’ekulu e Ndungidi a Nzambi
10, 11. Aweyi akaka bebundilang’e vuvu muna Yave muna diambu dia salu? Yik’e nona.
10 Yesu wavovesa mpe alongoki andi vo ‘batombel’ekulu e ndungidi a Nzambi.’ (Mat. 6:33) Ediadi disongele vo tufwete landanga dina Yave kasikidisa mu kuma kia dina diambote y’edi diambi, vana fulu kia landa ngindu za wantu. (Tanga Yesaya 55:8, 9.) Nanga osungamene vo, entete ayingi bayivananga muna salu kia kuna yovo teka fomo, longa akaka o nwana vita, vanga yovo teka nkele mia vita. Vava balongoka e ludi, akaka basoba salu yau yo kuyifwanisa mu vubwa nze Akristu.—Yes. 2:4; 2 Kor. 7:1; Ngal. 5:14.
11 Andrew, mosi mun’awana bavanga wo. Vava Andrew yo nkaz’andi balongoka e ludi mu kuma kia Yave, babak’e nzengo za kunsadila. Andrew wayambula salu kiandi kana una vo watoma kio yangalelanga. Ekuma? E kuma kadi e kompani kasadilanga mu mambu ma vita kiayisianga. Wabak’e nzengo za sia e ndungidi a Nzambi va fulu kiantete. Vava Andrew kayambula e salu kiandi, wana awole kakala yau ye kakala diaka ye nzimbu zayingi ko. Mun’owu wa mbweno za wantu, diamoneka vo kakala y’evwa ko. Wabund’e vuvu muna Nzambi yo vava e salu kiakaka. Vava besungamenanga e tandu kiakina, Andrew y’esi nzo andi balenda vova ye ziku kiawonso vo koko kwa Yave ke kwakufama ko. (Yes. 59:1) Wau vo bavevola zingu kiau, Andrew yo nkaz’andi bakota muna salu kia ntangwa ke ntangwa. Wavova vo: “Vekalanga ye ntangwa ina tutokananga mu kuma kia nzimbu, nzo, mavimpi yovo mu kuma kia yindula vo mu kituka twina s’anunu. Kansi, o Yave ke kutuyambulanga ko. . . . Tulenda vova ye ziku kiawonso vo sadila Yave i lau disundidi dina muntu kalenda kala diau.” *—Kim. 12:13.
12. Nkia fu tufwete kala kiau muna tombel’ekulu ndungidi a Nzambi? Yika nona kia mpangi muna zunga kieno.
12 Yesu wavovesa alongoki andi vo: “Ovo nuna yo lukwikilu nze disu dia lulungu, nwavovesa mongo wau vo, yaluka kwaku, wenda kuna; nga wadi yaluka; ke ven’owu ulembi lendakana kwa yeno ko.” (Mat. 17:20) Nga olenda sia ndungidi a Nzambi va fulu kiantete kele vo mpasi dikutwasila? Avo lukatikisu una lwau, mokena y’ampangi muna nkutakani. O wá una Yave kekubasadisilanga muna zingu kiau dikumika kikilu lukwikilu lwaku.
Vutulanga Matondo Muna Nkubika za Mwanda Kevanganga o Yave
13. Nkia vuvu tulenda kala kiau avo tuyivene muna salu kia Yave?
13 Avo oyangalela elau diaku dia sadila Yave, olenda kala ye vuvu vo olungisa nsatu zaku za nitu ye za mwanda, nze una kalungisila zina za Anelevi. Badika nona kia Davidi. Kana una vo kuna nduka kakala, wakala ye vuvu vo Nzambi okunlunga-lunga. Yeto mpe tulenda bund’e vuvu muna Yave kana nkutu vava tumonanga vo ke vena muntu ko olenda kutusadisa. Sungamena vo vava Asafi kayenda “kuna nzo avauk’a Nzambi,” watoma bakula dina diantokanesanga. (Nku. 73:17) Oyeto mpe tufwete kalanga ye vuvu vo Yave okutuvana kina tuvwidi o mfunu kimana twakala ye ngwizani ambote yo yandi. Muna mpila yayi, tusonga vo tuyangalelanga elau dieto dia sadila Nzambi, kana nkutu nkia mpila zingu tuna kiau ye tuyambula vo Yave kakala kunku kieto.
14, 15. Adieyi tufwete vanga kele vo diambu disingikilu muna umbakuzi weto wa yaka sono ya Nkand’a Nzambi? Ekuma?
14 Nga obundang’e vuvu muna Yave, wa Nto a ntemo a mwanda, vava kesengomonanga “oma masina ma Nzambi” mena muna Nkand’a Nzambi? (1 Kor. 2:10-13) Petelo wa ntumwa watusisila mbandu ambote. Yesu wavovesa ana kalonganga vo: “Ovo nulembi dia nitu a Mwan’a muntu, yo nua menga mandi, ke nuna ya moyo ko omo yeno.” Wau babanza vo Yesu nitu ye menga ma muntu kayika, alongoki ayingi bavova vo: “E diambu diadi diampasi; nani olenda dio wa?” Muna kuma kiaki, ‘bavutuka ku nima.’ Kansi, Petelo wavova vo: “E Mfumu, kwa nani tukwenda? o mambu ma moyo a mvu ya mvu, nge una mau.”—Yoa. 6:53, 60, 66, 68.
15 Petelo katoma bakula ko dina Yesu kavova mu kuma kia dia nitu andi yo nua menga mandi. Kansi, wakala ye vuvu vo Yave okunsadisa kababakula e ludi. Vava kisingikwanga umbakuzi weto wa Nkand’a Nzambi o unu, nga ovavanga bakula e kuma divangamene? (Nga. 4:18) Esi Beroya kuna tandu kiantete, batambula e diambu “kuna mvevo a ntima, e lumbu yawonso bafimpidinge e sono.” (Mav. 17:11) O tanginina mbandu au diwokesa luyangalalu lwaku mun’elau una diau dia sadila Yave. O kala ye kiese wau vo Yave i kunku kiaku.
Sompela Kaka Muna Mfunu
16. Mun’owu wa sono kia 1 Korinto 7:39, aweyi Akristu ampumpa balenda yambulwila vo Nzambi kakala kunku kiau?
16 E mpila yakaka ina Akristu bafwete sila sungididi muna luzolo lwa Nzambi i lemvokela nkanikinu a Nkand’a Nzambi wa sompela kaka “muna Mfumu.” (1 Kor. 7:39) Ayingi bebakang’e nzengo za kwamanana kala mpumpa vana fulu kia kulula nkanikinu wau. Nzambi otoma lunga-lunganga mpangi zazi. Adieyi Davidi kavanga vava kakala mu kinsona yo banza vo kakala yo muntu ko lenda kunsadisa? Wavova vo: “Mpongolo ntantal’ame vana kena; yo kunsonga mpasi zame. O mwand’ame ovo uyoyele mu mono.” (Nku. 142:1-3) Nanga ngindu za mpila yayi mpe kakala zau Yeremiya wa ngunza, ona wasadila Nzambi ye kwikizi kiawonso mu mvu miayingi nze mpumpa. Olenda longoka e mbandu andi muna kapu kia 8 kia nkanda Jeremias e a Mensagem de Deus para Nós.
17. Aweyi mpangi mosi ankento una vo mpumpa kesundilanga kinsona?
17 Mpangi mosi ankento kuna Estados Unidos wavova vo: “Kikalanga y’ekani dia kwamanana kala mpumpa ko. Ngina ye luzolo lwa sompa kele vo nsolwele muntu ona umfwanukini. Ngudi ame una vo mundembi-kwikila, okunkomekenanga vo yasompa konso muntu unzolele. Yangyuvula kana vo ozolele kala nkwa kuma kele vo longo lwame ke lusikidi ko. Kuna kwalanda, vava kamona vo salu kiambote yakala kiau, yalendanga lungisa nsatu zame yo kala ye kiese, wayambula kunkomekena.” Ezak’e ntangwa mpangi ankento ndioyo omonanga kinsona. Wavova vo: “Ibundang’e vuvu kiame muna Yave. Ke kungyambulanga ko.” Adieyi dikunsadisanga mu bund’e vuvu muna Yave? Edi kavova vo: “E sambu kinkusadisanga mu zaya vo Nzambi una kikilu ye kina mono mosi ko. O Mpungu-ngolo owanga sambu yame, ediadi elau diampwena kikilu ye kiese kiayingi dikumpananga.” Wau vo okwikilanga dina diasonama muna Nkand’a Nzambi vo “edi diviokele e nsambu, dia vana, ke mu tambula ko,” wavova vo: “Isianga ngolo za sadisa akaka, lembi vingila vo oyau mpe bampana lekwa. Vava iyindulanga kana adieyi ndenda vanga mu sadisa muntu kingandi, kiese kiayingi imonanga muna ntima.” (Mav. 20:35) Elo, mpangi ndioyo oyambulanga vo Yave kakala kunku kiandi yo yangalela elau dia kunsadila.
18. Aweyi Yave kalenda kadila se kunku kiaku?
18 Kiakala nkia mpila zingu una kiau, olenda yambula vo Nzambi kakala kunku kiaku. Avo ovangidi wo, okala mosi muna nkangu akiese. (2 Kor. 6:16, 17) Muna mpila yayi, okitula Yave se kunku kiaku nze una wavanga selo yayingi ya Nzambi kuna nz’ankulu. (Tanga Nsiku 32:9, 10.) Nze una Nzambi kakadila se kunku kia Isaele nswaswani ye zula yakaka, olenda mpe kunsola kimana kakala kunku kiaku yo kulunga-lunga.—Nku. 17:8.
[Mvovo Vana Yand’a lukaya]
^ tini. 11 Tala Despertai! ya Novemba 2009, lukaya lwa 12-14.
Nkia Mvutu Ovana?
Aweyi olenda yambulwila vo Yave kakala se kunku kiaku. . .
• muna diambu dia tombel’ekulu Kintinu kia Nzambi ye ndungidi andi?
• muna diambu dia yangalela madia ma mwanda?
• muna diambu dia lemvokela nkanikinu a Nzambi wa sompela kaka muna Mfumu?
[Yuvu ya Longoka]
[Mvovo mia Sina muna lukaya lwa 13]
Avo tusidi salu kiandi va fulu kiantete, Yave okala kunku kieto
[Foto ina muna lukaya lwa 15]
E mbandu a Yeremiya ya lukasakeso kikilu
