Lelo Witabije Yehova Ekale Kyepelo Kyobe?

“Badikilai bidi kusaka bulopwe bwa Leza, ne boloke bwandi kumo, ebiya nankyo ne byabyo byonso bikemutentekelwapo.”—MAT. 6:33.

1, 2. (a) Le “bene Isalela ba Leza” batelelwe mu Ngalatea 6:16 i bāni? (b) Le “bisaka dikumi ne bibidi bya bene Isalela” bitelelwe mu Mateo 19:28, i bāni?

 POTAÑANGA dijina Isalela mu Bible, i bika byovulukanga? Le uvulukanga Yakoba mwanā Isake, wāinikilwe dya bu Isalela? Nansha le uvulukanga bana bandi, muzo wa kala wa Isalela? Le Isalela wa ku mushipiditu nandi? Shi batela mu kyelekejo Isalela, divule nankyo i “bene Isalela ba Leza” bobanenena’po, ba 144000, bashingilwe māni a mushipiditu sandu bekale bu balopwe ne bapidishitu momwa mūlu. (Ngat. 6:16; Kus. 7:4; 21:12) Ino tala muswelo wa pa bula utelelwe bisaka 12 bya Isalela mu Mateo 19:28.

² Yesu wānene amba: “I binebine byo nemunena’mba, bānwe banonda’bo, pa kupangulula pākatentama Mwanā muntu pa kipona kya ntumbo yandi, mukatentama pa bipona dikumi ne bibidi, kuketa mambo a bisaka dikumi ne bibidi bya bene Isalela.” Mu uno vese, “bisaka dikumi ne bibidi bya bene Isalela” i bantu bakaketelwa mambo na bana ba bwanga ba Yesu bashingwe māni, bantu bakulupile kukekala na būmi bwa nyeke mu Paladisa pano pa ntanda. Bakamwena mu mingilo ya bupidishitu ya ba 144000.

3, 4. Le bashingwe māni i balete kimfwa’ka?

 ³ Bashingwe māni dyalelo bamwene mwingilo wabo bu dyese pamo na mwādi mwiumwenine bapidishitu ne Bene Levi pa kala. (Umb. 18:20) Bashingwe māni kebatengelepo amba bebape kipindi kampanda kya ntanda pano panshi. Ino, abo batengele kwikala balopwe ne bapidishitu mūlu pamo na Yesu Kidishitu. Bakendelela kwingidila Yehova mūlu, mungya mwikilombwela myanda yotutanga mu Kusokwelwa 4:10, 11 itala pa bashingwe māni badi mūlu.—Ezek. 44:28.

⁴ Bashingwe māni kitatyi kyobadi pano panshi bekalanga na būmi bulombola’mba Yehova i kyepelo kyabo. Dyese dyabo dya kwingidila Leza dyo didi na mvubu ku meso abo. Badi na lwitabijo mu kitapwa kya kikūlwa kya Kidishitu ne kadi bamulondanga nyeke, mu uno muswelo, ‘baningijanga lwito lwabo, ne kutongibwa kwabo.’ (2 Pet. 1:10) I beshile mu ngikadilo ne mu bukomo. Ino, kebamonangapo bikoleja byabo bu kabepelo ka kuleka kwingila bininge mu mwingilo wa Leza. Abo babadikije mwingilo wa Leza kumeso, ne kwiwingila na bukomo bwabo bonso. Kadi baletanga kimfwa ku boba badi na lukulupilo lwa kwikala na būmi mu paladisa pano pa ntanda.

5. I muswelo’ka Mwine Kidishitu yense wakokeja kwitabija Yehova ekale kyepelo kyandi, ne mwanda waka kekipēlangapo?

⁵ Nansha shi tudi na lukulupilo lwa kwenda mūlu nansha lwa kwikala pano pa ntanda, tufwaninwe ‘kwipela batwe bene, kutekuna mutyi wa masusu ne kulonda Kidishitu nyeke.’ (Mat. 16:24) Bavule badi na lukulupilo lwa kwikala na būmi mu Paladisa pano pa ntanda, batōtanga Leza ne kulonda Kidishitu uno muswelo. Kebasangelangapo kwingila bityetye’tu abo na bukomo bulonga bivule. Bamo bapēleje būmi bwabo ne kwingila bupania. Bakwabo bengilanga bupania myeji imoimo mwaka ne mwaka. Bangi nabo, nansha byokebabwanyapo kwingila bu pania, beelelanga’ko kusapula bininge. Bano bantu badi’nka bwa Madia wa buswe, wāpungulwile māni a mwenye kashinga’o Yesu. Yesu wānene amba: “Wanongelapo mwingilo muyampe kadi. . . . Nanshi walongela monka mwāyūkile aye mwine kulongela.” (Mako 14:6-8) Kulonga mungya bukomo bwetu kekupēlangapo, mwanda tudi mu ntanda itādilwe na Satana. Nansha nankyo twielelanga’ko bininge kadi tukulupile mudi Yehova. Tala motulongelanga’kyo mu miswelo iná mipotoloke.

Kusaka Bidi Bulopwe

6. (a) Lelo bantu ba ino ntanda balombolanga namani amba kyepelo kyabo kidi mu buno būmi kete? (b) Mwanda waka kwikala na mumweno wādi na Davida i kuyampe mpata?

⁶ Yesu wāfundije balondi bandi babadikile bidi kusaka Bulopwe ne boloke bwa Leza. Bantu ba ino ntanda batele mutyima ku tumweno twabo dibajinji pamo bwa “bantu ba panopanshi ba kyabo [kyepelo] kidi mu buno būmi buno.” (Tanga Mitōto 17:1, 13-15.) Bantu bavule beelele mpata mu kukimba ntundubuko, kulela kisaka, ne kushiya bipyanwa, kwampikwa kuvuluka Leza. Kyepelo kyabo kidi’nka mu buno būmi kete. Davida aye, wādi utele mutyima ku kwilongela “dijina diyampe” kudi Yehova, pamo’nka na mwāsoñaninye’kyo wandi mwana ku bantu bonso mwenda mafuku. (Mus. 7:1) Pamo enka bwa Asafa, Davida wāmwene amba kupwana na Yehova bu Mulunda i kutabuke kulampe kwine kubadikija tumweno twa muntu mu būmi. Wāsangedile kunanga na Leza. Dyalelo, Bene Kidishitu bavule i babadikije mingilo ya Yehova kumeso kwa twaji twabo.

7. Lelo dyese’ka dyāmwene tutu umo kitatyi kyabadikile kusaka bidi Bulopwe?

⁷ Tala kimfwa kya Jean-Claude, wa mu République Centrafricaine. I mukulumpe musonge udi na bana basatu. Mu mine ino ntanda, pa kusokola kaji i dyemo, kadi bantu bavule baloñanga kyonso kyobebalomba mwanda wa kusokola kaji. Difuku dimo, mwimaniji wa kaji wanene Jean-Claude ashilule kwingila bufuku—kushilula na 6:30 ya kyolwa, mafuku onso asamba-abidi a mu yenga. Jean-Claude wamunene amba kutentekela pa kukwatakanya kisaka kyandi ku ngitu, ufwaninwe kadi ne kwikikwatakanya  mu myanda ya Leza. Wamulombwele ne kumulombola amba udi na kiselwa kya kukwasha kipwilo. Le mwimaniji wa kaji wamulondolola namani? Amba “shi ukimba kaji, ufwaninwe kwilwa bintu byonso, ne mukaji ne bana ne myanda mikwabo. Ufwaninwe kwipāninina abe yense ku kaji—kyobe’tu ke’nka kaji. Tonga’po kimo: shi kipwilo, shi kaji.” Le abe wadi wa kulonga’po bika? Inoko, Jean-Claude wavulukile amba shi ajimije kaji, Leza ukokeja kumukwatakanya. Wadi nyeke wa kwikala na bivule bya kulonga mu mwingilo wa Yehova Leza, Yehova wadi wa kumukwasha akwatakanye kisaka kyandi ku ngitu. Aye’ko kyolwa kyalondele’po, waenda kukapwila. Pa kutamba kaenda ku kaji, papo utatana shi usa kwingila. Ponka’po, telefone byoivuma’bi. Amba mwimaniji wa kaji wapangwa ku kaji, ino mwanetu waendelela na kwingila kaji.

8, 9. Le ukeula namani bapidishitu ne Bene Levi mu mwanda utala kutūla Yehova bu kyepelo kyobe?

⁸ Bantu bamo baikele mu kyaka kya kujimija twaji twabo ye bano beipangwile amba, ‘Le nsa kuvuija namani kiselwa kyami kya kulela kisaka?’ (1 Tem. 5:8) Wikale kodi mutanwe na ano makambakano, nansha kwatenwe nao, bintu byokodi mwimwene padi ke bikukulupije amba shi Leza i kyepelo kyobe kakakwelapo ne kadi ukwete na mutyika madyese obe a mingilo. Pānene Yesu bandi bana ba bwanga ‘babadikile bidi kusaka bulopwe,’ wēbakulupije amba: “Ne byabyo byonso”—bya kudya, bya kutoma, ne bya kuvwala—“bikemutentekelwapo.”—Mat. 6:33.

⁹ Vuluka Bene Levi kebāpelwepo ntanda ya kupyana. Mwanda mutōtelo wa bine o mwine obādi batele’ko mutyima, pa mwanda utala bya ku ngitu, bādi bakulupile kudi Yehova, wēbanenene amba: “Amiwa ne kyepelo kyobe.” (Umb. 18:20) Nansha byoketwingilangapo mu tempelo ya ku ngitu pamo bwa Bene Levi, ino tubwanya kwiula mutyima wabo, wa kukulupila mudi Yehova etupe bisakibwa byetu. Kikulupiji kyetu mu bukomo bwa Leza bwa kwitupa byotusakilwa ke kidi na mvubu mpata pano potwatokena mu mafuku a mfulo.—Kus. 13:17.

Kusaka Bidi Boloke bwa Leza

10, 11. Mu mwanda utala twaji, i muswelo’ka bantu bamo obakulupile Yehova? Leta kimfwa.

¹⁰ Kadi Yesu wāsoñenye bandi bana ba bwanga ‘basake bidi boloke bwa Leza.’ (Mat. 6:33) Kino kishintulula kutūla misoñanya ya Leza ya kiyampe ne kibi kumeso kwa bijila bya bantu. (Tanga Isaya 55:8, 9.) Padi ukavuluka’mba mafuku kunyuma, bantu bavule bādi bekujije mu kudima mfwanka, kumupoteja, kufundija bakwabo divita, nansha kupunga ne kupoteja byabulwi. Ino abo pa kuyuka bubinebine, bavule batongele kushinta twaji twabo, babwanya ne bisakibwa bya kubatyijibwa.—Is. 2:4; 2 Kod. 7:1; Ngat. 5:14.

¹¹ Kimfwa Andrew. Aye ne mukajandi pobefundile kuyuka Yehova, batongele kumwingidila. Andrew wadi wifyela na kaji kandi ino wekaleka. Mwanda waka? Mwanda wadi wingila mu kitango kikujije mu bya ntanda, ino wasumininwe kutūla kumeso boloke bwa Leza. Andrew pa kuleka kaji, wadi na bana babidi, kwampikwa kamweno, ino wadi’tu na tulupeto twa kudya makweji abala-anga kete. Mungya mumweno wa bantu, ukokeja kumweka bu kadipo na ‘kipyanwa’ nansha kimo. Wadi ukimba kaji, ukulupile enka Leza. Aye ne kisaka kyandi shi abavuluka mafuku apityile kunyuma, banenanga’mba bine kuboko kwa Yehova ke kwīpipo. (Is. 59:1) Ba Andrew ne mukajandi byobapēleje būmi bwabo, o mwanda baikele na dyese dya kwingila mwingilo wa kitatyi kyonso. Andrew unena’mba: “Kwadi ne kitatyi kyotwadi tuzumbija  mutyima pa lupeto, njibo, ne misongo, enka ne bununu’bu. Ino Yehova wadi nyeke pabwipi netu. . . . Tukokeja kunena pampikwa kutatana amba bine, kwingidila Yehova kyo kintu kifwaninwe kwipānina’mo muntu ne kileta mpalo.” *—Mus. 12:13.

12. I ngikadilo’ka ilombwa pa kubadikija misoñanya ya Leza kumeso? Leta bimfwa bya kwenu.

¹² Yesu wāsapwidile bandi bana ba bwanga amba: “Shi mudi ne lwitabijo lwa kwikala pamo na kamuseke ka kadadi, nankyo mukanena lūlu luno’lu amba: Sonsolokela kokwa! nalo lukasonsoloka, nabya kutupu nansha kimo kikemukolela.” (Mat. 17:20) Lelo ubwanya kubadikija misoñanya ya Leza kumeso nansha shi bikulomba kususuka? Shi ubatatana, ipangula banabenu bamo mu kipwilo. Na bubine, ukasengwa pa mutyima pokemvwana myanda yobamwene mu būmi.

Sangela Bidibwa bya ku Mushipiditu Bitupa Yehova

13. Shi tukulupile Yehova, i bika byotukatengela pa mwanda utala bidibwa bya ku mushipiditu?

¹³ Shi ukwate na mutyika madyese obe a kwingidila Yehova, ukakulupila amba ukakupa bisakibwa bya ku ngitu ne bya ku mushipiditu, monka mwaāpelele’byo Bene Levi. Tala Davida. Nansha byaādi mu mutá, wādi utala enka kudi Leza amukwashe. Netu tukulupilei mudi Yehova nansha shi tumona’mba pano bibakole. Tuvulukei pātwelele Asafa mu “njibo mipandulwemo ya Leza,” wājingulwile biyampe pa bintu byādi bimukambakanya. (Mit. 73:17) Netu, tufwaninwe kunyemena ku Nsulo ya Leza kudi bidibwa bya ku mushipiditu. Mu uno muswelo, tukalombola amba tusangedile dyese dyetu dya kwingidila Leza nansha bikale namani. Nankyo tubaitabija Yehova ekale kyepelo kyetu.

14, 15. Le tufwaninwe kulonga namani shi kubebweja mwinya mu kisonekwa kampanda, ne mwanda waka?

¹⁴ Le uloñanga namani shi Yehova, Nsulo ya mwinya wa ku mushipiditu waleta kitōkeji pa “bikomo bīne bya Leza” bidi mu Bible? (1 Kod. 2:10-13) Tudi na kimfwa kiyampe kya byālongele mutumibwa Petelo pānene Yesu kudi bemvwaniki bandi amba: “I binebine byo nemunena’mba: Wivwane shi kemudilepo ku mubidi wa Mwanā muntu, ne kutoma mashi andi mpika, nankyo kemudipo ne būmi munda mwenu, ehe.” Pa kwimvwana’byo bingi, bana ba bwanga bavule bānene amba: “Uno mwanda ubetukolela? Le i muntu ka wakuyūkidija’o”? Ke “bajokela munyuma.” Ino Petelo wānena’mba: “Abe Mfumwami, le tukenda kudi ani? Abewa wi wa binenwa bya muya wa nyeke ne nyeke.”—Yoa. 6:53, 60, 66, 68.

¹⁵ Petelo kādipo wimvwanije buluji bonso bwa byānene Yesu bitala kudya umbidi ne kutoma mashi andi. Inoko mutumibwa wādi ukulupile Leza alete mwinya wa ku mushipiditu. Shi mwinya wa ku mushipiditu ubaletwa, le utompanga kwimvwanija buluji bwa mu Bisonekwa bwajadikilwa nabya? (Nk. 4:18) Bene Belea ba mu myaka katwa kabajinji bātambwile mwanda na “mutyima onka wa lubilo, ke basakesake mu bisonekwa mafuku onso mo bukila, mo bukila’mba, shi momo byendele.” (Bil. 17:11) Kwibeula kukalengeja usangele mpata dyese dyobe dya kwingidila Yehova ne kumumona bu kyepelo kyobe.

Kwisonga Monka Mudi Mfumwetu

16. Lelo Leza ukokeja kwikala kyepelo kyetu namani na kulonda musoñanya udi mu 1 Kodinda 7:39?

¹⁶ Mwanda mukwabo ulomba Bene Kidishitu balame mpango ya Leza mu mityima yabo, i wa kulonda bwendeji bwa mu Bible bwa kwisonga “monka mudi Mfumwetu.” (1 Kod. 7:39) Bamo i batonge kushala bankunga pa kyaba kya kujilula uno musoñanya. Leza ukwatakanyanga senene bano bantu. Le Davida wālongele namani paēmwene bunka ne kwakubulwa wa kumukwasha? Wānene amba: “Mwangile mwanda wami mu kifuko [kya Leza]; Nombolanga tusua twami mu kifuko kyandi. Papungile mushipiditu  wami munda.” (Mit. 142:1-3) Padi ye monka mwēimvwanine ne mupolofeto Yelemia, wāingidile Leza na kikōkeji myaka na myaka bu nkungulume. Ubwanya kwifunda kimfwa kyandi kisambilwe’po mu shapita 8 wa dibuku Kinenwa Kitupele Leza Kupityila Kudi Yelemia.

17. Lelo kaka umo nkungakaji ulwanga namani na bunka bwa mu kitatyi kampanda?

¹⁷ Kaka umo wa mu États-Unis wanene amba: “Nkityipilepo kushala nkungakaji. Ngitabije kusongwa shi natana tutu onsaka. Mama ke Kamonipo, wadi untonona nsongwe na muntu ye-yensu’tu wakāya’wa. Namwipangwile shi uketabija kulambikwa myanda shi busongi bwami bubaikala boneke. Ino kyaba kimo, paamwene amba ngidi na kaji kayampe, nevwikanga ami mwine, kadi ngidi na nsangaji. Waleka’byo kuntonona.” Uno kaka kudi kyaba kimo kyaadi wimona bu udi bunka. Unena aye mwine amba: “Mu kino kitatyi, nadi ngeyalala kudi Yehova. Kadipo umpaluka nansha dimo.” Le i bika byakweshe uno kaka akulupile Yehova? Ulondolola’mba: “Milombelo yadi inkwasha mone Leza amba udi’ko bine ne amba nkidipo bunka. Mwine Mukatakata mwine wa diulu ne ntanda utejanga, le penepo kyonemwena bu mwelwe ne kubulwa nsangaji i kika?” Ubweja kadi amba: “Byongyukile amba dyese dya kupāna ditabukile dya kupebwa, Noñanga bukomo bwa kupāna, kwampikwa kutengela banjokejeje kintu. Kitatyi kyoneipangula amba, ‘Le nonge bika pa kukwasha uno muntu?’ Ngimvwananga nsangaji mu mutyima.” (Bil. 20:35) Bine umwene Yehova bu kyepelo kyandi kadi usangelanga dyese dyandi dya kumwingidila.

18. Le Yehova ukakulonga kodi kyepelo kyandi mu buluji’ka?

¹⁸ Nansha shi utanwe mu ngikadilo’ka, ubwanya kwitabija Leza ekale kyepelo kyobe. Polonga namino, ukabadilwa mu bantu bandi ba nsangaji. (2 Kod. 6:16, 17) Kino kikalengeja nobe wikale kyepelo kya Yehova, monka mwāikadile bantu bakwabo pa kala. (Tanga Kupituluka 32:9, 10.) Monka mwāikadile Isalela ke kyepelo kya Leza umbukata mwa mizo, ukokeja kukuyuka bu wandi ne kukukwatakanya na buswe.—Mit. 17:8.

[Kunshi kwa dyani]

Usa Kulondolola Namani?

Le uketabija namani Yehova ekale kyepelo kyobe

• na kubadikila bidi kusaka Bulopwe bwa Leza ne boloke bwandi?

• na kusangela bidibwa bya ku mushipiditu?

• na kulama musoñanya wa kwisonga monka mudi Mfumwetu?

[Bipangujo bya Kifundwa]

[Bushintuludi pa paje 16]

Yehova wikalanga ke kyepelo kyetu kitatyi kyotubadikija mwingilo wandi kumeso

[Kifwatulo pa paje 18]

Kimfwa kya Yelemia kitukankamika