Be Iweyo Jehova Obed Migapi?
Be Iweyo Jehova Obed Migapi?
“Dwaruru mokwongo pinyruodhe, gi wachne makare; eka mago duto nomednu.”—MATH. 6:33.
1, 2. (a) “Israel mar Nyasaye” miwuoyoe e Jo Galatia 6:16 ochung’ne jomage? (b) E Mathayo 19:28, “ogendini apar gariyo mag Israel” ochung’ ne jomage?
SAMA isomo nying’ Israel ei Muma, ang’o mabiro e pachi? Be mano miyo iparo Jakobo wuod Isaka, ma bang’e ne omi nying’ ni Israel? Koso iparo kuom nyikwaye, tiende ni oganda machon mar Israel? To nade Israel mar roho? Sama iwuoyo kuom Israel maok mar ringruok, kinde mang’eny mano ochung’ ne “Israel mar Nyasaye,” tiende ni ji 144,000 mowal kuom roho maler mondo gibed ruodhi kendo jodolo e polo. (Gal. 6:16; Fwe. 7:4; 21:12) Kata kamano, non ane weche manie Mathayo 19:28, kama iwuoyo kuom dhoudi 12 mag Israel e yo moro makende.
2 Yesu nowacho kama: “Chieng’ chuech manyien ka Wuod dhano nobed e kom duong’ne, un bende unubed e kombe apar gariyo kung’ado bura ni ogendini apar gariyo mag Israel.” E ndikoni, “ogendini apar gariyo mag Israel” ochung’ ne jogo ma jopuonjre mowal mag Yesu biro ng’adonegi bura, kendo gibiro yudo ngima mochwere e Paradis e piny. Tij dolo mar ji 144,000 biro kelonegi gweth.
3, 4. Jogo mowal oseketo ranyisi mane maber?
3 Mana kaka jodolo machon gi Jo-Lawi ne timo, jogo mowal e kindegi bende kawo tichgi ne Nyasaye kaka thuolo makende. (Kwan 18:20) Jokristo mowal ok gen yudo kamoro e piny ka kaka pokgi. Kar mano, gigeno bedo ruodhi kendo jodolo gi Yesu Kristo e polo. Gibiro dhi nyime tiyo ne Jehova e migawono, mana kaka Fweny 4:10, 11 nyisowa e wi jogo mowal ka gin e migawo margi e polo.—Eze. 44:28.
4 Ka podi gin e piny, jogo mowal dak e yo manyiso ni Jehova en migapgi. Thuolo margi mar tiyo ne Nyasaye e gimaduong’negi chutho chutho. Giketo yie e misango mar Kristo kaka rawar kendo gisiko ka giluwe, ka ginyisogo gadier ni ‘ne oluonggi kendo ne oyiergi.’ (2 Pet. 1:10) Chalgi ng’ato ka ng’ato koda nyalogi opogore. Kata kamano, ok giwe nyawo manyalo bedo ni gin-go mondo mi koro gitim manok e tij Nyasaye. Mopogore gi mano, giketo tij Nyasaye ema bedo motelo, kendo gitimo duto ma ginyalo e tijno. Bende, giketo ranyisi maber ne jogo ma ogeno dak e paradis e piny.
5. Ere kaka Jokristo duto nyalo weyo Jehova obed migapgi, to ang’o momiyo mano nyalo bedo gima ok yot?
5 Kata bed ni wan gi geno mar dhi e polo kata dak e piny, nyaka ‘wakwedre wawegi, mi wating’ yadh-sand marwa kendo siko ka waluwo Kristo.’ (Math. 16:24, New World Translation) Ji tara gi tara mogeno dak e Paradis e piny, sani lamo Nyasaye kendo giluwo Kristo e yo ma kamano. Ok gitim mana matin e tij Nyasaye, ka koni ging’eyo ni gin gi nyalo mar timo mang’eny. Thothgi oseketo ngimagi obedo mayot mi gibedo jopainia. Moko kuomgi tiyo tij painia e dweche moko higa ka higa. To kata obedo ni moko kuomgi ok nyal bedo jopainia, podi ginyiso kinda e tij lendo. Joma kamago chalo gi Mariam, ma ne oolo mo mang’we ng’ar kuom Yesu. Yesu nowacho kuome kama: ‘Osetimona tim maber. Osetimo gimonyalo.’ (Mari. 14:6-8) Timo duto mwanyalo ok yot, nimar wadak e piny ma Satan ema lochoe. Kata kamano, wakedo matek, kendo keto genowa kuom Jehova. Non ane yore ang’wen mwanyalo timogo kamano.
Dwar Mokwongo Pinyruodh Nyasaye
6. (a) Ere kaka ji mang’eny osenyiso ni gitimo ngima masani obed pok margi? (b) Ang’o momiyo ber ahinya ka wabedo gi chuny kaka mar Daudi?
6 Yesu nopuonjo jolupne mondo odwar mokwongo Pinyruoth gi wach makare mar Nyasaye. Ji mang’eny ohero keto mokwongo gigo mamorogi giwegi kaka “jopiny, ma pokgi ni e piny ka.” (Som Zaburi 17:1, 13-15.) Nikech ok gidew Jachwechgi, ji mang’eny keto chunygi ahinya kuom dak e ngima mayom, bedo gi joot, kendo weyo girkeni margi chien. Giketo ngima masani ema obed migapgi kata pok margi. Mopogore kodgi, Daudi to ne dwaro ahinya loso “nying’ maber” gi Jehova, mana kaka wuode ne ondiko bang’e. (Ekl. 7:1) Mana kaka Asaf, Daudi ne oneno ni bedo gi Jehova kaka Osiepne, ne ber ahinya moloyo keto dwaro mage owuon obed motelo e ngima. Ne omor ahinya wuotho gi Nyasaye. E kindewagi bende, nitie Jokristo mang’eny moseketo tiyo ne Nyasaye obed mokwongo kar tijegi mag ringruok.
7. Owadwa moro ne oyudo gweth mane nikech keto mokwongo wach Pinyruoth?
7 Ne ane ranyisi mar Jean-Claude, modak e piny Central African Republic. Jean-Claude en jaduong’-kanyakla ma nigi dhako gi nyithindo adek. E pinyno, tek ahinya yudo tich, kendo ji mang’eny oikore timo gimoro amora mondo omi girit tijegi. Chieng’ moro jatelo mar tich nowacho ne Jean-Claude mondo ochak tiyo gotieno—kochako sa 12:30 odhiambo, odiechienge abiriyo e juma. Jean-Claude ne olerone ni e wi ting’ mar rito joode e yor ringruok, ne en bende gi ting’ mar konyogi bedo gi winjruok maber gi Nyasaye. Bende nowacho ni ne en gi ting’ mar konyo kanyakla. Jatelono ne odwoke nade? Ne odwoke kama: “Ka in gi gweth makende mar bedo gi tich, wiyi koro nyaka wil gi gik mamoko, moriwo chiegi, nyithindi, koda chandruogeni. Nyaka ichiw ngimani duto ne tich momiyi, to ok gimachielo. Yier kind weche ariyogi: din mari kata tich.” En ang’o ma in dine itimo? Jean-Claude nong’eyo ni kapo ni ne olalo tije, Nyasaye ne dhi rite. Podi ne odhi bedo gi gik mang’eny ma ne odhi timo e tij Nyasaye, kendo Jehova ne dhi konye e rito joode e yor ringruok. Omiyo, ne odhi e chokruok ma ne luwo mar kor juma. Bang’ mano, ne oikore mar dhi e tich, to ne ok ong’eyo kabe ne idhi yiene tiyo. Gie kindeno, ng’ato nogoyone simo. Jalno ne owachone ni, jatelono oseriemb e tich, to owadwano ne podi nigi tije.
8, 9. Ere kaka wanyalo luwo ranyisi mar jodolo gi Jo-Lawi e keto Jehova obed migapwa?
8 Nyalo bedo ni jomoko ma osebedo e chal ma nenore ka gima gichiegni lalo tijegi, osepenjore kama, ‘Ere kaka adhi chopo ting’na mar pidho jooda?’ (1 Tim. 5:8) Kata bed ni gima kamano oseyudi kata podi, nyalo bedo ni in gadier kaluwore gi gik miseneno, ni keto Nyasaye obed migapi kendo kawo tichne gi pek, ok dimi iywag ang’e ngang’. Kane Yesu onyiso jopuonjrene mondo odwar mokwongo pinyruodhe, ne osingonegi kama: “Mago duto,” tiende ni, gik michamo, mimadho, kata mirwako—“nomednu.”—Math. 6:33.
9 Par ane wach Jo-Lawi ma ne ok yud lowo kaka girkeni margi. Nikech tich motudore gi lamo maler e gimaduong’ moloyo ma ne giluwo, ne nyaka gigen Jehova mondo omigi gik ma gipidhorego, nimar nosewachonegi kama: “An e migapi.” (Kwan 18:20) Kata obedo ni ok wati e hekalu masie kaka jodolo gi Jo-Lawi ne timo, wanyalo bedo gi chuny kaka margi, ka wan gadier chuth ni Jehova biro chiwonwa gigo madwarore. Kaka giko medo sudo machiegni, biro dwarore ahinya ni wamed keto genowa kuom teko ma Nyasaye nigo mar chiwonwa gigo madwarore e rito ngimawa.—Fwe. 13:17.
Dwar Mokwongo Wach Makare mar Nyasaye
10, 11. Ere kaka jomoko oseketo genogi kuom Jehova kaluwore gi weche mag tij ringruok? Chiw ane ranyisi.
10 Bende, Yesu nojiwo jopuonjrene ni ‘odwar mokwongo wach makare mar Nyasaye.’ (Math. 6:33) Mano tiende en luwo chike ma Jehova oketo kuom gik makare gi maok kare, kar luwo aluwa timbe mag dhano. (Som Isaiah 55:8, 9.) Nitie jomoko machon ne pidho ndawa kata uso gik miloso gi ndawa, moko ne tiego jomoko e weche mag lweny, kata loso kendo uso gige lweny. Bang’ ng’eyo adiera, thothgi ne oyiero loko tijegi mi gichopo e okang’ mar batiso.—Isa. 2:4; 2 Kor. 7:1; Gal. 5:14.
11 Andrew en achiel kuomgi. En gi chiege kane gipuonjore wach Jehova, ne ging’ado mar tiyone. Andrew ne okawo tije gi nyadhi ahinya, kata kamano ne oweyo tijno. Nikech ang’o? En nikech ne otiyo ne riwruok moro ma ne otudore gi weche mag lweny, to ne oseng’ado mar keto mokwongo wach makare mar Nyasaye. Kane Andrew oweyo tijno, ne en gi nyithindo ariyo, ne oonge gir yuto, mak mana pesa ma ne nyalo ritogi kuom dweche matin. E wang’ dhano, ne nyalo nenore ka gima ne oonge gi ‘gikeni.’ Ne omanyo tich machielo, koketo geno kuom Nyasaye. Ka ging’iyo chien, en gi joode ginyalo wacho gadier ni bad Jehova ok chiek. (Isa. 59:1) Nikech ne giketo ngimagi obedo mayot, Andrew kod chiege ne obedo gi thuolo mar tiyo kaka jopainia. Andrew wacho kama: “Nitie kinde ma wasebedo gi parruok nikech weche mag pesa, ot, koda tuoche, kaachiel gi bedo moti. Kata kamano, kinde duto Jehova osebedo ka sirowa. . . . Wanyalo wacho maonge kiawa moro amora ni tiyo ne Jehova kelo gweth mogundho, kendo e gimaberie moloyo ma dhano onego obed ni timo.” *—Ekl. 12:13.
12. En kido mane madwarore mabiro konyowa keto mokwongo chike Nyasaye? Wuo ane kuom ranyisi manie alworau.
12 Yesu nowacho ne jopuonjrene kama: “Ka un gi yie ma romo kaka koth karadali, unuwach ni godni ni, ‘A kani, idhi kacha,’ mi noa; kendo onge gimoro ma notamu timo.” (Math. 17:20) Be podi inyalo dhi nyime keto mokwongo chike Nyasaye kata ka timo mano nyalo keloni pek moko? Kapo ni in gi kiawa moro, wuo gi jomoko e kanyakla. Kuom adier, winjo sigand ngimagi biro duogo chunyi ahinya kendo jiwo yieni.
Nyis Erokamano Kuom Gigo ma Jehova Chiwonwa
13. Ka watiyo ne Jehova gi kinda, en ang’o mwanyalo geno kodok korka chiwo mag chuny?
13 Ka ikawo tiji ne Jehova kaka gimaduong’, inyalo bedo gadier ni obiro chiwoni gigo madwarore korka lamone koda ringruok, mana kaka ne ochiwo ne Jo-Lawi. Par ane Daudi. Kata obedo ni ne en e bur luanda, ne en gadier ni Nyasaye ne dhi chiwone gigo ma ne dwarore. Wabende wanyalo geno kuom Jehova sama chalo ka gima yorewa duto odinore. Ber ng’eyo ni ka Asaf nobiro modonjo “e sang’tuari mar Nyasaye,” eka ne obedo gi ng’eyo matut kuom gima ne chando chunye. (Zab. 73:17) Kamano bende, dwarore ni wadhi ir Jehova ma e Soko mar pidhowa e weche mag chuny. Mano biro nyiso ni wamor gi thuolowa mar tiyo ne Nyasaye kata bed ni wan e chal mane. Kuom mano, wabiro weyo Jehova obed migapwa.
14, 15. Onego watim nade sama nitie ler momedorenwa e wi ndiko moko, to nikech ang’o?
14 Ijatimo nade sama Jehova ma e Soko mar ler, ochiwonwa ler momedore e wi “gik matut mag Nyasaye” mayudore ei Muma? (1 Kor. 2:10-13) Petro ketonwa ranyisi maber kuom okang’ ma nokawo bang’ kane Yesu owacho ne jowinjone kama: “Ka ok uchamo ringre Wuod dhano, kendo madho rembe, uonge gi ngima e iu.” Nikech ne gikawo wechego e yo masie, jopuonjre mang’eny nowacho kama: “Wachni tek; ng’a ma nyalo winjogo?” Omiyo, ne ‘gidok chien’ e gik machon. Petro to nowacho kama: “Ruoth, wadhi ir ng’a? In gi weche mag ngima mochwere.”—Joh. 6:53, 60, 66, 68.
15 Petro ne ok ong’eyo chuth tiend gima Yesu nowacho kaluwore gi chamo ringrene koda madho rembe. Kata kamano, jaoteno ne ogeno kuom Nyasaye mondo ema oelne wachne. Sama ler omedorenwa e wi puonj moro, be itemo mondo ing’e weche manie Ndiko momiyo otim lokruokno? (Nge. 4:18) Jo-Beria ma ne odak e kinde Jokristo mokwongo ne ‘orwako wach ka chunygi oikore chutho, ka ginono weche manie Ndiko pile.’ (Tich 17:11) Luwo ranyisi margi biro miyo imed hero tiyo ne Jehova, ka ikete obed migapi.
Donjo e Kend Mana Kuom Ruoth
16. Ere kaka Nyasaye nyalo bedo migapwa kuom wach michiko e 1 Jo Korintho 7:39?
16 Gimachielo madwarore ni Jokristo oketie dwaro mar Nyasaye e pachgi, en kuom puonj mar Muma ni, ka wadonjo e kend to watim kamano “mana kuom Ruoth.” (1 Kor. 7:39) Ji mang’eny oseyiero dong’ maok gidonjo e kend kar ketho siemno moa kuom Nyasaye. Nyasaye ok jwang’ joma kamago. Ang’o ma ne Daudi otimo kane owinjo kokuyo kende, kendo ne nenore ka gima oonge gi kony moro amora? Nowacho kama: “Agolo ywakna e nyime; e nyime anyiso chandrwokna. Ka ne chunya ool.” (Zab. 142:1-3) Janabi Jeremia ma notiyo ne Nyasaye kochung’ motegno kuom higini pieche ka ok odonjo e kend, bende ne nyalo bedo gi kuyo ma kamano. Inyalo somo ranyisi mare ma yudore e sula 8 e bug Wach ma Nyasaye Wachonwa Kokalo Kuom Jeremia.
17. Ere kaka nyaminwa moro maok nie kend, kedo gi chuny mar winjo ka en kende?
17 Nyaminwa moro modak Amerka wacho kama: “Ok en yiero mara siko ka ok okenda. Aikore donjo e kend sa asaya ma aromo gi ng’at mowinjorena. Minwa maok en Janeno ne otemo jiwa mondo okenda gi ng’ato ang’ata mobiro. Ne apenje kabe ne oikore bedo gi ting’ kata bura kapo ni kendna odhi marach. Bang’ kinde, ne oneno ka an gi tich maber, ne arito ngimana maber, kendo ne amor. Ne oweyo thung’a gi weche kend.” Nitie seche ma nyaminwano jawinjo ka en kende kendo kokuyo. Owacho kama: “Sama ajawinjo kamano, atemo geno kuom Jehova. Pok ojwang’a ngang’.” Ang’o mosekonye geno kuom Jehova? Owacho kama: “Lamo konya winjo ni Nyasaye en ng’ama sie kendo ok an kenda. Ng’a Mamalo Chutho e wi gik moko duto chikona ite, omiyo, ang’o ma dimona winjo mamor kendo modhial?” Nikech en gadier ni “miyo kelo gueth moloyo kawo,” omedo wacho kama: “Atemo chiwora ahinya mondo akony jomoko, maok agen yudo chudo moro. Sama aparo e chunya ni, ‘Ere gima anyalo timo mondo akony ng’atni?’ Awinjo ka in gi mor ma iye.” (Tich 20:35) Ee, oketo Jehova obed migape, kendo omor gi thuolo makende mar tiyone.
18. Inyalo keto Jehova obed migapi e yo mane?
18 Kata bed ni in e chal mane, inyalo weyo mondo Nyasaye obed migapi. Sama itimo kamano, ibiro kwani e kind joge mamor. (2 Kor. 6:16, 17) Mano biro miyo ibed migap Jehova, mana kaka jomoko ne obedo e kinde mokalo. (Som Rapar mar Chik 32:9, 10.) Mana kaka Israel nobedo migap Nyasaye e kind ogendini, onyalo kawi kaka ng’ate kendo rito ngimani e yor hera.—Zab. 17:8.
[Weche moler piny]
^ par. 11 Ne Amkeni! ma Novemba 2009, ite mag 12-14.
Inyalo Dwoko Nade?
Ere kaka inyalo weyo mondo Jehova obed migapi
• kuom dwaro mokwongo Pinyruodh Nyasaye gi wachne makare?
• kuom nyiso erokamano ne puonj ma Nyasaye chiwonwa?
• kuom luwo kaka Nyasaye chikowa ni wadonj e kend mana kuom Ruoth?
[Penjo mag Puonjruok]
[Picha manie ite mar 13]
Jehova nyalo bedo migapwa ka waketo tichne ema obed motelo e ngimawa
[Picha manie ite mar 15]
Ranyisi mar Jeremia jiwowa
