“Ëxtääyˈadëˈëtstë jawyiin ja Diosë yˈanaˈamën ets ja tyëyˈäjtën, ets tukëˈëyë tyäˈädë tijaty mˈakˈyajmoˈoytyëp.” (MAT. 6:33, Traducción del Nuevo Mundo [NM])

1, 2. 1) ¿Pënaty yajmaytyakp mä Romanʉs 2:29? 2) ¿Pënaty yajtijp ja “nimäjmajtsk käjpnbë Israel jäˈäyëty” diˈib miimp mä Matewʉ 19:28?

¿PËN miimp mä winmäˈäny ko mä Biiblyë nbatëmë tadë ayuk Israel? Waˈan nwinmäˈäyëm ko yëˈë duˈunë Jacob yajxëëmooy, ja yˈuˈungë Isaac, ets ja tyëëm yˈääts. Perë Biiblyë nan yajnikejpyë tyäˈädë ayuk. Extëm ko jyënaˈany: “Ja jäˈäy tëyˈäjtën yˈisraelitëˈattë pën wiˈix ja yˈää jyotëty”, yëˈë yajmaytyakpë 144,000 diˈibë Jyobaa të wyinˈixëdë mëdë yˈespiritë santë parë tyundët rey ets saserdotë jam tsäjpotm (Rom. 2:29; Diˈibʉ Jat. 7:4; 21:12). Per mä Matewʉ 19:28 yëˈë myaytyakypy ja “nimäjmajtsk käjpnbë Israel jäˈäyëty”. Nˈokˈijxëm ti yˈandijpy.

² Jesus jyënany: “Mä tëgekyë yˈoyët jemy, ko yëˈë Naxwinyëdë Jäˈäyëtyë Kyudënaabyë yˈuˈunyët mët niˈigyë mëjˈäjtën mä yajkutukäˈäny, miitsëty extëm xypyanëjxtë mˈuˈunyëdëp nandëˈën mä mäjmajtskë unyaaybyajn es xypyayoˈoytyët ja nimäjmajtskë käjpnbë Israel jäˈäyëty”. ¿Pënaty yajtijp ja “nimäjmajtsk käjpnbë Israel jäˈäyëty”? Yëˈë pënaty jukyˈatandëp winë xëë mä ja tsujpë lugäär. Etsë 144,000 yëˈë tunandëp extëmë fes ets saserdotë.

3, 4. ¿Wiˈix dyaktë oybyë ijxpajtën pënaty nëjkxandëp tsäjpotm?

³ Ja lebitëty etsë saserdotëty myëjjäˈäwëdëp ijty ko tmëdundë Dios, nanduˈun tyam pënaty nëjkxandëp tsäjpotm (Núm. 18:20). Kyaj tjëjpˈixtë  etsë Jyobaa tyukumayëdët tuk pedasë nyax. Per jyantsy tsyojktëp jyäˈtët ja tiempë parë tyundët rey ets saserdotë mëdë Jesukristë jam tsäjpotm, ets extëm jyënaˈanyë Diˈibʉ Jatanʉp 4:10, 11 myëduunˈadëˈëtsandëbë Dios (Eze. 44:28).

⁴ Mientrës jyukyˈattë yä Naxwiiny, ¿wiˈix dyajnigëxëˈëktë ko yëˈë Jyobaa kyumäˈäyënˈäjttëp? Ko dyaˈixëdë ko nitii duˈun kyajëjpˈamëty extëm ko tmëdundë Dios. Apostëlë Pedro jyënany: “Niˈigyë mnaybyëjtäˈägëdë mëk es xyaˈixëdët mä yëˈë mjikyˈäjtën ko tyëyˈäjtënëty ko Dios mwinˈijxëdë es mwoojëdë” (2 Peed. 1:10). Pënaty nëjkxandëp tsäjpotm tyuundëp duˈun mët ko tmëbëktë ko Jesus ojts xyjuˈuybyëtsëˈëmëm, ets xëmë tmëmëdowdë. Kyaj niˈamukë oy mëk yajpäättë, per kyaj yëˈë ttukkäjpxtë parë tmäjtsˈyungëdë Diosë tyuunk. Niˈigyë ttundë mëjää parë tmoˈoytyë Jyobaa nuˈun myadäˈäktë. ¡Jantsy oyë ijxpajtën tmoˈoytyë pënaty jukyˈatandëp yä Naxwiiny!

5. ¿Ti mbäät nduˈunëm parë nmëdäjtëmë Jyobaa extëmë kumäˈäyën, ets tiko tsyiptaˈaky?

⁵ Jesus jyënany: “Pën jaats pën xypyanëjxäˈäny, tsojkëp tmastuˈudët ja kyëˈëm winmäˈäny es jyikyˈatët extëm tuˈugë jäˈäy diˈibë pyagiipy ja [kyepy] ko yˈoˈkën tninejxy, esëts xypyatsoonët” (Mat. 16:24). Jëjpˈam ets duˈun nduˈunëm pën nmëdatäˈänëmë Jyobaa extëmë kumäˈäyën. Miyonkˈamë jäˈäy diˈib jukyˈatandëp mä ja lugäärë tsujpë, duˈun tyam tmëdundë Dios ets tpanëjkxtë Kristë. Kyaj jeˈeyë yajkajpxyˈamondë, tuundëbë duˈun nuˈun myadäˈäktë. May ttukniwitsëdë parë mbäät tyundë prekusoor regulaar, etsë wiinkpëty kanäk poˈo tyundë prekusoor ausilyaar. Duˈun extëm ja María diˈibë Jesus ojts ttukutaameˈeky ja aseytë diˈib päˈäkxuˈkp. Jesus jyënany: “Duˈun neby ëëtsy adaa të xytyunyëny oy jaˈa duˈun. [...] Adaa toˈoxyëjk të adaa tuny duˈun neby të myadaˈagyëny” (Mar. 14:6-8, Nuevo Testamento de Mazatlán). Tyam tsip nduˈunëm nuˈun nmadakëm mët ko njukyˈäjtëm mä Satanás yˈaneˈemy. Per mbäät nduˈunëmë mëjää ets nmëbëjkëmë Jyobaa. Min nˈokˈijxëm taxk peky mä mbäät duˈun nduˈunëm.

Nˈokˈëxtäˈäyëm jawyiin ja Diosë yˈAnaˈamën

6. 1) ¿Tiko mbäät njënäˈänëm ko naxwinyëdë jäˈäy yëˈëyë kyumäˈäyënˈäjttëbë “tyäˈädë jukyˈäjtën”? 2) ¿Tiko yˈoyëty nbanëjkxëmë yˈijxpajtënë David?

⁶ Jesus tyukniˈˈijxë ja yˈëxpëjkpëty ets jawyiin tˈëxtäˈäytyët ja Diosë yˈanaˈamën ets ja tyëyˈäjtën. ¡Tim tëgatsyë naxwinyëdë jäˈäy diˈib kyumäˈäyënˈäjttëbë yëˈëyë “tyäˈädë jukyˈäjtën”! (Käjpxë Salmo 17:1, 13-15.) Yëˈëyë myëmääy myëdäjtëp wiˈix oy dyajnaxtëdë jyukyˈäjtën, tmëdattëdë fyamilyë ets ttukumaytyëdë yˈuˈunk yˈënäˈk tukëˈëyë tijaty myëdäjttëp, kyaj tjamyatstë Jyobaa diˈib të yajkojëdë. Per ëtsäjtëm duˈun njäˈäyˈatäˈänëm extëmë David, yëˈë mas tmëjotmaybyaty dyajwëˈëmët oyë xyëë Dios windum, extëm ok jyënanyë Salomón (Ecl. 7:1, nota). Duˈun extëm ja Asaf, David ojts këˈëm ttimˈixy ko nitii duˈun kyajëjpˈamëty ets tkayakyë jotkujkˈäjtën extëm ko nnaymyaˈayëm mëdë Jyobaa. Tyam, nanduˈun jyënäˈändë mayë Dios mëduumbë, pääty mas jëjpˈam tpëjtäˈäktë Diosë tyuunk ets ok tijaty jaˈäjtp, extëmë tyuunk yˈayoˈon.

7. ¿Wiˈix ojts yajkunuˈkxy tuˈugë nmëguˈukˈäjtëm ko jëjpˈam tpëjtakyë Diosë yˈAnaˈamën?

⁷ Min nˈokˈijxëmë yˈijxpajtënë Jean-Claude diˈib tsënaapy República Centroafricana. Tamë nyëdoˈoxy, tëgëëgë yˈuˈunk ets mëjjäˈäy tyuny mä naymyujkën. Tëgokë wyintsën yˈanmääyë ko yajtuundëkëyaˈanyëty koots, ja tyëkët a las 6:30 ets duˈun tyunët sëmään abety. Mä tyäˈädë paˈis amääyë tuunk, pääty mayë jäˈäy kyaj dyajtëgoyäˈändë tyuunk. Per ¿ti tyuunë Jean-Claude? Ojts tˈanëëmë ja wyintsën ko kyaj jeˈeyë tnikëjxmˈaty dyajkay dyaˈuugëdë fyamilyë, nanduˈunën ttukniˈˈixëdë Diosë jyaˈa ets tkuentˈatët ja naymyujkën. Ta ja wyintsën mëk yˈatsoojë: “Oyxyëp xyjawë ko mduunk xymyëdaty. Ets xyjaˈaytyëgoyëdë mnëdoˈoxy, mˈuˈunk mˈënäˈk etsë mˈamay mjotmay. Yëˈëyë mduunk mmëmay mmëdäj. Ti mtsejpy: ¿mrelijyonk o mduunk?”. ¿Tixyëp mijts mduun? Jean-Claude ijtpë nety seguurë ko Jyobaa yëˈë kuentˈatanëp pën  yajtëgoopy ja tyuunk. Pääty ojts twinˈixy tpëjtäˈägäˈäny jëjpˈamë Diosë jyaˈa, ets seguurë yˈijty ko Dios pudëkëyanëp parë tmoˈoyëdë fyamilyë tijaty tëgoyˈäjtxëp. Ko jyajty ja xëë mä nyëjkxtë mä naymyujkën, ta Jean-Claude ojts nyijkxy extëm xëmë ttuny, ets ok, ta net ojts nyijkxy mä tyuny oyë nety tkanijawë pën yaˈëxkaxäämp o pën kyaj. Per ta ojts yajmëgajpxy mä telefënë ets yaˈˈanmääy ko të nety ja wyintsën yaˈëxkexy, per yëˈë kyaj dyajtëgooy ja tyuunk.

8, 9. Duˈun extëm ja saserdotëty ets ja lebitëty, ¿wiˈix mbäät nyaˈijxëm ko nmëdäjtëmë Jyobaa extëmë kumäˈäyën?

⁸ Mayë nmëguˈukˈäjtëm diˈibë duˈumbë jotmay të tpäättë nyayajtëwëdë: “Ets pën nyajtëgoobyëtsë nduunk, ¿wiˈixëts nˈixëdë nfamilyë?” (1 Tim. 5:8). Oy të nbatëmë duˈumbë jotmay o kyaj, nnijäˈäjëm ko Jyobaa ninäˈä tkamastuˈuty pënaty mëdäjtëdëp extëmë kyumäˈäyën ets tpëjtäˈäktë jëjpˈamë tyuunk. Ets waˈan këˈëm të nˈijxëm mä jukyˈäjtën ko tëyˈäjtën extëmë Jesus jyënany: “Ëxtääyˈadëˈëtstë jawyiin ja Diosë yˈanaˈamën [...] ets tukëˈëyë tyäˈädë tijaty [extëmë käˈäy ukën o wit nijam] mˈakˈyajmoˈoytyëp” (Mat. 6:33, NM).

⁹ Nˈokwinmäˈäyëm jatëgok mä ja lebitëty, yëˈëjëty kyaj yajtukumääytyë nyax. Per diˈibë nety jëjpˈam tyuunkˈäjttëp yëˈë ja Diosë tyuunk, pääty mbäädë netyë Jyobaa yˈijxˈit kyuentˈatëdë extëm tyukwandakëdë: “Ëjts nëjkx mijts duˈun xyjyawë duˈun ta [...] mgumäˈäyën xypyikyën” (Núm. 18:20, Mʉgoxpʉ ja̱ noky mʉdiˈibʉ jyaayʉn Moisés). Oy tyam ngatuˈunëm mä Diosë tyëjk diˈibë jäˈäy të tkojy, oy ko nanduˈun nmëbëjkëm ko Dios yëˈë xymyoˈoyäˈänëm tijaty nyajtëgoyˈäjtëm duˈun extëm ja saserdotëty ets ja lebitëty. Kom niˈigyë nmëwingoˈonëm ja kutëgoˈoyën, pääty jyëjpˈamëty ets nmëdäjtëmë tyäˈädë mëbëjkën (Diˈibʉ Jat. 13:17).

Nˈokˈëxtäˈäyëm jawyiin ja Diosë tyëyˈäjtën

10, 11. ¿Wiˈix dyajnigëxëˈëktë näägë nmëguˈukˈäjtëm ko myëdäjttëbë Jyobaa extëmë kyumäˈäyën? Nimaytyäˈäk tuˈugë ijxpajtën.

¹⁰ Jesus nan yˈanmääyë yˈëxpëjkpëty ets tˈëxtäˈäytyët jawyiin ja Diosë tyëyˈäjtën (Mat. 6:33). Tyäˈädë yëˈë yˈandijpy ko nwinmäˈäyëm extëmë Jyobaa wyinmay mä diˈibë oy ets diˈibë axëëk, ets kyaj extëmë naxwinyëdë jäˈäy wyinmay (käjpxë Isaías 55:8, 9). Extëm nˈokpëjtakëm, mä nety näägë nmëguˈukˈäjtëm kyatëkëdë ëxpëjkpë, yaˈujtsˈijttëp ijty o tyoˈktëp, dyajkojtë tujn o ttooktë, ets nääk tyukniˈˈijxëdëbë ijtyë jäˈäy wiˈix tsyiptundët. Per ko tnijäˈäjëdë tëyˈäjtën, ta dyajtëgäjtstë tyuunk parë mbäät nyëbattë (Isa. 2:4; 2 Kor. 7:1; Gal. 5:14).

¹¹ Andrew yëˈë diˈib duˈun tyuun, ko tnijäˈäjëdë tëyˈäjtën mëdë nyëdoˈoxy, ta tpëjtaktë wyinmäˈäny tmëdunäˈändë Dios. Oyë nety mëk tjantsy tsyeky ja tyuunk diˈib myëdäjtypy, ojts tmastuˈuty. ¿Tiko? Yëˈko pyudëjkëbë nety mä jäˈäy tsyiptundë, ets yëˈë jëjpˈamë nety tpëjtäˈägäˈäny ja Diosë tyëyˈäjtën. Ko ja tyuunk tmastuty, jeˈeyë netyë meeny sentääbë tmëdaty diˈib tyukˈixëp tuk poˈo majtsk poˈo ja yˈuˈunk yˈënäˈk. Duˈunë nety yajpääty extëm ja lebitëty diˈibë kyaj ti tmëdäjttë. Per myëbëjkë Jyobaa ets ta ojts tˈëxtäˈäyë tyuunk. ¿Wiˈixë tyäˈädë familyë dyajnaxyë xyëë tiempë? Të tˈixtë ko “Jyobaa kyëˈë” xëmë tijaty dyaky mëjwiin kajaa (Isa. 59:1). Ko Andrew mëdë nyëdoˈoxy jyukyˈattë adëyë, ta axtë tyundë prekusoor. Yëˈë jyënaˈany: “Tëjëts näˈäty nmëmon nmëduktë meeny sentääbë, yuu päˈäm, mäjëts ntsëënëdët o ko tamëts nmëjäˈäyëndë. Per xëmëtsë Jyobaa xypyudëkëdë. [...] Kojëts mëdë nëdoˈoxy nwinmaytyë ja tiempë diˈib të nyaxy, tajëts njënäˈändë ko ni diˈibë tuunk kyaˈoyëty ets tkayakyë jotkujkˈäjtën extëm ko nmëduˈunëmë Jyobaa” (Ecl. 12:13). *

12. ¿Ti tsojkëp nmëdäjtëm parë jëjpˈam nbëjtakëmë Diosë tyëyˈäjtën? Nimaytyäˈäk tuˈugë nmëguˈukˈäjtëmë yˈijxpajtën mä mtsëënë.

 ¹² Jesus tˈanmääy ja yˈëxpëjkpëty: “Kooxyëp xymyëdattë ja mëbëjkën, oy dëˈënën jeˈeyë extëmë mortas päjk, mˈanmaapxyëp miitsëty tyäˈädë kopk: Jëgaˈak yää es nëjx wiinktsoo, es jëgakpxyëp. Nitii diˈibë kyaj [tyun jyatëdët]” (Mat. 17:20). Extëm yä jyënaˈany, oy ko niˈamukë nnayajtëˈëjëm: “¿Nbëjtäˈägëbëts jëjpˈamë Diosë tyëyˈäjtënë oyëts nyajnaxëdë amay jotmay?”. Pën kyaj nˈijtëm seguurë, ¿tiko ngayajtëˈëjëm näägë nmëguˈukˈäjtëm wiˈixë Jyobaa të pyudëkëdë? Yëˈë nëjkx dyajkëktëkë ja mëbëjkën.

Nˈokmëjjäˈäwëm ti Dios yajtuumpy parë xyajkäˈäy xyaˈukëm

13. ¿Ti mbäät nmëbëjkëm pën nmëdäjtëmë Jyobaa extëmë kumäˈäyën?

¹³ Pënaty myëdäjttëbë Jyobaa extëmë kyumäˈäyën myëbëjktëp ko yëˈë moˈoyanëp tukëˈëyë tijaty yajtëgoyˈäjttëp, duˈun extëm tkuentˈäjty ja lebitëty. Nˈokwinmäˈäyëmë David, oyë nety yajpääty äängoty, ijtpë nety seguurë ko Dios pudëkëyanëp. Ëtsäjtëm nan mbäät nmëbëjkëmë Jyobaa, oy kyëxëˈëgët ko kyaj pën diˈib mbäät xypyudëjkëm. Nˈokjamyajtsëm ko Asaf tyëjkë mä “Diosë tyëjk”, jap tjaygyujkë ti nety jotmaytyuunëp (Sal. 73:17). Nanduˈun ëtsäjtëm, tsojkëp nmëbëjkëmë Jyobaa ko yëˈë xymyoˈoyäˈänëm tijaty nyajtëgoyˈäjtëm parë oy mëët nˈijtëm. Duˈuntsoo nyajnigëxëˈkëm ko nmëjjäˈäwëmë Diosë tyuunk ets ko nmëdäjtëmë Jyobaa extëmë kumäˈäyën oy wiˈix ja xëë jukyˈäjtën myinët.

14, 15. ¿Wiˈix mbäät nˈaxäjëm ko yajkäjpxˈoyë tuˈugë tëyˈäjtën diˈib mä Biiblyë, ets tiko?

¹⁴ Näˈäty yajkäjpxˈoˈoyëbë “këkpë nimëjääbë wyinmäˈäny ja Dios” (1 Kor. 2:10-13). ¿Ngupëjkëm ko Jyobaa mas yajxon xytyukjaygyujkëm yˈAyuk? Mbäät nbanëjkxëmë yˈixpajtënë Pedro. Tëgokë Jesus jyënany: “Pën kyaj xyˈaxäjë extëmë käˈäy ukën yëˈë nniniˈxëts, diˈibë ëj, ja Naxwinyëdë Jäˈäyëtyë Kyudënaabyë, nmoˈoyaambyëts, es yëˈë nneˈpynyëts diˈibëts ndamaampy nyokaampy, kyaj xymyëdattët ja jikyˈäjtën”. Tam diˈib winmääytyë ko Jesus jantsy yëˈë myaytyakypy ja nyeˈpyny ets ja nyiniˈkx, pääty jyënandë: “Tyäˈädë diˈibë myaytyakypy, nimëjää oy es ngupëjkëm. ¿Pën tyunaambyë kuentë?”. Net may ja jäˈäyëty “myastutëdë es kyaj mët yˈokjëdijnëdë”. Pedro ta tˈanmääyë Jesus: “Wintsën, ¿pënëts nbanëjxtëp? Mij naytyiˈigyë mmëdäjtypy ja ayuk diˈibë myatyakypy ja jikyˈäjtën diˈibë winë xëë winë tiempë” (Fwank 6:53, 60, 66, 68).

¹⁵ Pedro kyaj yajxon tjaygyujkë ti Jesus myaytyäˈägan. Per kyaj yëˈë ojts tmëmay tmëdäjy, pes ijt seguurë ko Dios tuknijawëyanëp ja tëyˈäjtën. Ets ëtsäjtëm, ¿wiˈix nˈaxäjëm ja tëyˈäjtën ko yajkäjpxˈoyë? ¿Nduˈunëmë mëjää parë njaygyujkëm yajxon tiko të yajwijtsˈoyë ja tëyˈäjtën diˈib mä Biiblyë? (Pro. 4:18.) Duˈun mbäät nduˈunëm extëmë ja Dios mëduumbëty diˈib Berea mä primer siiglë, diˈib ojts “tˈaxäjëdë amumduˈukjot ja yˈëxpëjkën [...], es bom bom tˈëxtääytyë mä ja Diosë jyaaybyajtën pën tëyˈäjtën” (Apos. 17:11). Pën niˈˈijxtutëm, ta niˈigyë nmëjjäˈäwëm ko nmëduˈunëmë Dios ets ko nmëdäjtëm extëmë kumäˈäyën.

Yëˈë mbëktëp diˈib “myëbejkypy ja Jesukristë”

16. ¿Wiˈix mbäät nbaduˈunëmë 1 Korintʉ 7:39 ets nmëdäjtëmë Jyobaa extëmë kumäˈäyën?

¹⁶ Taaˈäjtpë Dios mëduumbë diˈib yaˈijxëdëp ko yëˈë Jyobaa kyumäˈäyënˈäjttëp, ko tmëmëdowdë yˈanaˈamën ets kyaj tpëktë jäˈäy diˈib kyaj yˈëxpeky oy naytyuˈuk tyimwëˈëmët (1 Kor. 7:39). Niˈamukë mbäät tmëbëktë ko Jyobaa tsojkëdëp ets kuentˈatanëdëp. Ko nyayjawëdët naytyuˈuk o mon tuk, tsojkëp tˈaˈoogëdë Jyobaa ets ttukmëtmaytyäˈägëdë yˈamay jyotmay, duˈun extëm ttuunyë David: “Yëˈëjëts të ndukëdëjkëtyaˈayë nˈamay njotmay; wyinduuyëts ndukmëtmaytyaktäˈäy wiˈixëts njantsy yˈayoy kojëtsë njäˈäwënë duˈunyë tyëgooy njodotyëts” (Sal. 142:1-3). Waˈan ja kugajpxy Jeremías duˈun nyayjäˈäwë, pes jëmëjtˈam Dios mëduuny naytyuˈuk, kyaj pënë  nyëdoˈoxy. Japë yˈijxpajtën yajnimaytyaˈaky mä liibrë Dios nos habla mediante Jeremías, kapitulo 8.

17. ¿Ti tyuumpy tuˈugë nmëguˈukˈäjtëm ko naytyuˈuk nyayjawëty?

¹⁷ Tuˈugë kiixy diˈib Estados Unidos jyënaˈany: “Kyajts njatsojkënyëˈaty nwëˈëmäˈäny naytyuˈuk. Yëˈëts njaˈˈawijxypy tuˈugë jäˈäy diˈibëts mbäät nbeky. Ndäägëts diˈib kyaj Tyestiigëty, mëktaˈagyëts ojts xyˈanëëmë parëts nbëkët pënëts xytyimmëgäjpxp. Per tajëts nˈanmääy: Pën nbejkypyëts pënëts jawyiin xymyëgäjpxp ets kyaˈoyëdëtsë ntsënäˈäy njukyˈäjtën, ¿nëjkxëp xyaˈoyë? Ok, ta tpejkyë kuentë ko nmëdäjtypyëtsë nduunk, njäjtypyëts këˈëm nnaygyuentˈatëdët ets ko jotkujkëts nˈity. Tajëts kyaj wiˈix xynyekyˈanmääy”. ¿Ti tyuumbyë tyäˈädë nmëguˈukˈäjtëm ko naytyuˈuk nyayjawëty? Yëˈë jyënaˈany: “Yëˈëjëts nˈaˈoˈkëbë Jyobaa. Yëˈë ninäˈäts xykyamastuˈuty”. ¿Ti pudëjkëp parë tmëdatyë Jyobaa extëmë kumäˈäyën? Yëˈë jyënaˈany: “Nuˈkxtakën. Kojëts nnuˈkxtaˈaky tajëts njamyetsy ko jantsy tamë Dios ets ko xëmë yajpääty mët ëjts. ¿Wiˈixëts jotkujk nganayjawëdët ets mëj, pën oyëts nˈity mët ja Rey diˈib yˈanaˈamdaapy tukëˈëyë?”. Tyäˈädë nmëguˈukˈäjtëm yajtëyˈäjtëndëjkëp ko “niˈigyë njotkujkˈäjtëm ko wiink jäˈäy nbudëjkëm es kyaj ko wiink jäˈäy xypyudëjkëm”, pääty jyënaˈany: “Nbudëjkëbëtsë wiinkpë ets kyajts nˈawixy parëts ti xymyoˈoyët. Jantsy jotkujkëts nnayjawëty koogoots nwinmay tijatyëts mbäät ndukmëduny tuˈugë jäˈäy” (Apos. 20:35). Tyäˈädë nmëguˈukˈäjtëm jantsy jotkujk nyayjawëty ko tmëdatyë Jyobaa extëmë kyumäˈäyën ets ko mbäät tmëduny.

18. ¿Wiˈix mbäädë Jyobaa xyjäˈäwëm extëmë kyumäˈäyën?

¹⁸ Oy wiˈix nyaˈijx nyajpatëm, mbäädë Jyobaa ngumäˈäyënˈäjtëm. Duˈuntsoo jantsy jotkujk nyajpatëm mëdë nyax kyäjpn (2 Kor. 6:16, 17). Ets diˈib mas oy, yëˈë ko Jyobaa nëjkxëp xyjäˈäwëm extëmë kyumäˈäyën, duˈun extëm tjäˈäwë pënaty tëëyëp mëduunëdë (käjpxë Deuteronomio 32:9, 10). ¡Jantsy oy ko Jyobaa xykyuentˈatäˈänëm niduˈuk niduˈuk duˈun extëm tkuentˈäjty ja israelitëty! (Sal. 17:8.)

[Notë diˈib noky ëxˈääy]

¿Ti diˈib të njäjtëm?

Nimaytyäˈäk wiˈix mbäädë Jyobaa nmëdäjtëm extëmë kumäˈäyën ko...

• jëjpˈam nbëjtakëmë yˈAnaˈamën etsë tyëyˈäjtën.

• nmëjjäˈäwëm ti Dios yajtuumpy parë xyajkäˈäy xyaˈukëm.

• nmëdoˈojëmë yˈanaˈamën ets nbëjkëmë jäˈäy diˈib “nandëˈën myëbejkypy ja Jesukristë”.

[Yajtëˈëwën]

[Letrë diˈib miimp mä pajina 16]

Nmëdäjtëmë netyë Jyobaa extëmë kumäˈäyën ko jëjpˈam nbëjtakëmë tyuunk

[Letrë diˈib miimp mä dibujë mä pajina 18]

Xyjotkujkmoˈoyëmë yˈijxpajtënë Jeremías