Kõm̦m̦an bwe Jeova En Tarrin Kõj eo Am̦
Kõm̦m̦an bwe Jeova En Tarrin Kõj eo Am̦
‘A kom̦win pukot m̦okta aelõñ in Anij, im wãnõk eo An; im naaj koorl̦o̦k men kein otemjej ñan kom̦.’—MATU 6:33.
1, 2. (1) Ekkar ñan Galetia 6:16, wõn eo ej “Israel an Anij”? (2) Ekkar ñan Matu 19:28, wõn eo ej “bwij ko joñoul ruo bwijjin Israel”?
ÑE KWÕJ riiti Baibõl̦ im lo naan in Israel, wõn eo kwõj l̦õmn̦ake? Kwõj ke l̦õmn̦ak kõn l̦eo nejin Aisak etan Jekõb, eo im tokãlik kar n̦aetan Israel? Ak kwõj l̦õmn̦ak ke kõn ri Israel ro etto bwijin Jekõb? Baibõl̦ ej bareinwõt kõnono kõn bar juon kumi im ej n̦aetaer “Israel an Anij.” Wõn rein? Rej kumi eo em̦õj kabit er bwe ren irooj ilañ im oraer ej 144,000. (Galetia 6:16; Revelesõn 7:4; 21:12) Bõtab, jen lale wãween eo juon Baibõl̦ eo ej kõjerbale naan in Israel. Im jemaroñ lo men in ilo Matu 19:28 (UBS).
2 Jijej ear ba: “Ilo ebeben eo ekãl, komeañ joñoul ruo ri kalora naj jijet ion tron ko bareinwõt, im ekajete bwij ko joñoul ruo bwijjin Israel.” Ilo eoon in, “bwij ko joñoul ruo bwijjin Israel” ej jitõñl̦o̦k ñan ro renaaj mour indeeo ilo Pedetaij eo ioon lal̦. Ro 144,000 renaaj pris im ri ekajet ñan armej rein.
3, 4. Ewi wãween ri kabit ro retiljek rej kwal̦o̦k juon joñak em̦m̦an ñan kõj?
3 Ãinwõt pris im ri Livai ro, ri kabit ro ilo raan kein rej watõke jerbal eo aer ñan Jeova ãinwõt juon jeraam̦m̦an el̦ap. (Bõnbõn 18:20, UBS) Ri kabit ro rejjab kõtmãne bwe enaaj wõr aer wãto ak jikier ioon lal̦ in. Revelesõn 4:10, 11 ej kwal̦o̦k bwe rein renaaj wõnm̦aanl̦o̦k ilo aer jerbal ñan Jeova ilo lañ, ijo renaaj kiiñ im pris ippãn Jijej Kũraij ie.—Ezekiel 44:28.
4 Ilo iien eo ri kabit ro rej pãd ioon lal̦ in, rej aikuj kalikkar ilo mour ko aer bwe Jeova ej tarrin kõj eo aer. Jerbal eo aer ñan Jeova ej men eo eaorõktata ippãer. Rijjelõk Piter ear ba: “Komin kanuij kate kom bwe kir in im kãlet in an Anij en bed ibbemi ien otemjej.” (2 Piter 1:10, UBS) Ri kabit rein rej kõm̦m̦ane men in ikijjeen aer tõmak ilo katok in mej eo an Jijej im l̦oore wõt joñak eo an. Joñan maroñ ko an rein im wãween mour ko aer reoktak jãn doon. Bõtab, rejjab jekpen kõn men kein bwe en dikl̦o̦k aer kõm̦m̦ane jerbal eo an Anij. Rej likũt jerbal eo an Anij im̦aan men otemjej im rej kamaat joñan aer maroñ ñan kõm̦m̦ane men in. Im rej kwal̦o̦k juon joñak em̦m̦an ñan ro me rekõn̦aan mour ioon lal̦.
5. Ewi wãween aolep Kũrjin remaroñ kõm̦m̦an bwe Jeova en tarrin kõj eo aer? Etke emaroñ pen men in?
5 Jijej ear ba bwe aolep Kũrjin, meñe kõjatdikdik eo aer ej ñan mour ilañ ak ioon lal̦, rej aikuj “make kaarmejjete” er im l̦oore. (Matu 16:24) Elõñ milien armej ro im rej reim̦aanl̦o̦k ñan mour ilo Pedetaij eo, rej kabuñ ñan Anij im l̦oor Kũraij ilo aer kaarmejjeteik er make. Rein rejjab baj ba wõt bwe ebwe ijo kun̦aaer ilo jerbal eo an Anij. Rej kal̦apl̦o̦k kun̦aaer ñe rej lo bwe ewõr aer maroñ. Elõñ iaaer rar kõm̦m̦an oktak ko bwe ren maroñ regular pioneer. Ro jet rej bõk kun̦aaer ilo jerbal in auxiliary pioneer ilo jet allõñ ko kajjojo iiõ. Im ro me rejjab maroñ pioneer, rej kate wõt er ilo kwal̦o̦k naan. Rein rej ãinwõt Meri me ear lutõke pinneep eo eñaj n̦a ãnbwinin Jijej. Jijej ear ba kõn Meri: “E ar jerbal ñan eõ jerbal em̦m̦an. . . . Ear kõm̦m̦an ãinwõt an maroñwe.” (Mark 14:6-8) Setan ej irooj in lal̦ in. Eñin unin emaroñ pen ñan ad kamaat joñan ad maroñ. Ak jej aikuj kate wõt kõj im lõke Jeova. Kiiõ, jenaaj etale emãn wãween ko me jemaroñ kõm̦m̦ane men in.
Pukot M̦okta Aelõñ eo an Anij
6. (1) Ewi wãween armej ro ilo lal̦ in rej kwal̦o̦k bwe aer jolõt ej mour in? (2) Etke jen anõke joñak eo an Devid?
6 Jijej ear katakin ri kal̦oor ro an bwe ren pukot m̦okta Aelõñ eo an Anij im wãnõk eo an Anij. Ekkã an armej ro ilo lal̦ in pukot kõn̦aan ko aer make. Baibõl̦ eo ej kõnono kõn rein ãinwõt ‘armej in lal̦ in ro me aer jolõt ej mour in.’ (Riit Sam 17:1, 13-15.) Rein rejjab l̦õmn̦ak kõn Jeova. Men ko wõt rej l̦õmn̦ak kaki ej juon mour em̦m̦an, ejaake juon baam̦le, im kõm̦m̦an joortoklik ñan ro nejier. Eñin unin Baibõl̦ ej ba bwe aer jolõt ej mour in. Ak Devid ear oktak kõnke ear kõn̦aan kõm̦m̦ane “juon ãt em̦m̦an” ippãn Jeova. Tokãlik, l̦eo nejin etan Solomon ear ba bwe kõj aolep jej aikuj bar kõm̦m̦ane men in. (Ekklisiastis 7:1) Ãinwõt Esap, Devid ear jel̦ã bwe men eo el̦aptata an aorõk ej jem̦jerã eo an ippãn Anij. Men in ear kõm̦m̦an bwe Devid en m̦õn̦õn̦õ. Ilo raan kein, elõñ Kũrjin ro rar likũt jerbal eo aer ñan Jeova m̦oktata jãn jerbal eo aer ilo jikin jerbal.
7. Ta jeraam̦m̦an eo juon brother ear loe kõn an kar likũt Jeova m̦oktata?
7 Jean-Claude ej jokwe ilo juon aelõñ ilo Africa. Ej juon elder im ewõr ippãn im jilu nejierro. Aelõñ in rej pãd ie ekanooj pen ellolo jerbal ie. Innem, ñe juon ej ellolo an jerbal ej kaarmejjete men otemjej ñan kõjparok jerbal eo an. Juon raan, bo̦o̦j eo an Jean-Claude ear jiroñl̦o̦k e bwe ej aikuj jino jerbal in boñ. Jerbal eo an enaaj jino ilo 6:30 jota jãn M̦ande ñan Jabõt. Jean-Claude ear ba ñan bo̦o̦j eo an bwe ejjab jerbal wõt bwe en aikuj kõke aikuj ko an lio pãleen im ajri ro nejin. Ej aikuj bar an iien ippãer im jipañ er ñan pokake Anij. Ear bareinwõt ba bwe ej aikuj jipañ ro ilo congregation eo. Bo̦o̦j eo an ear ba ñan e: “Kwõ jeraam̦m̦an bwe ewõr am̦ jerbal. Kwõn jab l̦õmn̦ak kõn lio pãleem̦ im ajri ro nejõm̦ im apañ ko am̦. Kwõn l̦õmn̦ak kõn jerbal eo am̦ wõt im m̦õj. Kwõn kõm̦m̦ane pepe eo am̦: kabuñ eo am̦ ke ak jerbal n̦e am̦?” El̦aññe en kar kwe Jean-Claude, ta eo kwõn kar kõm̦m̦ane? Jean-Claude ear lõke bwe el̦aññe ejako jerbal eo an, Anij enaaj kõjparok e. Meñe enaaj jako jerbal eo an ak enaaj lõñ men ko emaroñ kõm̦m̦ani ilo jerbal eo an Anij. Im Jeova enaaj jipañe ñan kõke aikuj ko an im lio pãleen kab ajri ro nejierro. Innem, ear etal im kweilo̦k. Ãlikin kweilo̦k ear ro̦o̦l im kapojak ñan jikin jerbal meñe ejjab lukkuun jel̦ã el̦aññe em̦õj aer fire e jãn jerbal eo an. Ilo iien eo wõt, juon ear call e im ba bwe em̦õj aer fire e bo̦o̦j eo an. Ak brother in ear wõnm̦aanl̦o̦k im jerbal im rar jab jol̦o̦ke e.
8, 9. Ãinwõt pris ro im ri Livai ro, ta eo jej aikuj in kõm̦m̦ane bwe Jeova en tarrin kõj eo ad?
8 Bõlen jet iaami kom̦ ar iione ejja wãween eo wõt. Bõlen kwaar inepata kõn wãween am̦ naaj kõke aikuj ko an eo pãleem̦ im ajri ro nejõm̦ el̦aññe kwaar luuji jerbal eo am̦. (1 Timote 5:8) Bõtab jekdo̦o̦n kwaar iione wãween in ak jaab, bõlen em̦õj am̦ make lo bwe Jeova ejjab kejole ro rej kõm̦m̦an bwe En tarrin kõj eo aer im likũt e m̦oktata. Ke Jijej ear ba ñan ri kal̦oor ro an bwe ren pukot m̦okta aelõñ in Anij, ear kallim̦ur im ba bwe Jeova enaaj kõke aikuj ko aer ãinwõt kijeir, limeer im ballier.—Matu 6:33.
9 L̦õmn̦ak kõn ri Livai ro me ear ejjel̦o̦k aer kõj ilo ãne eo. Ri Livai ro rar poub im tõl ri Israel ro jet ilo aer kabuñ ñan Jeova. Eñin unin rar aikuj lõke bwe Jeova enaaj kõke aikuj ko aer kõnke ear ba, ‘Ña, Iroij, ña wõt ij tarrin kõj eo am.’ (Bõnbõn 18:20, UBS) Meñe rainin, jejjab jerbal ilo tampel̦ eo an Jeova ãinwõt kar ri Livai ro, bõtab jemaroñ bar kwal̦o̦k ad lõke Jeova. Ke ej epaaktok jem̦l̦o̦kin, jej kõtmãne bwe enaaj l̦apl̦o̦k mãlejjoñ ko kõnke jejjab bõk kun̦aad ilo lal̦ eo an Setan. Innem elukkuun aorõk bwe jen lõke bwe Anij enaaj kabwe aikuj ko ad.—Revelesõn 13:17.
Pukot M̦okta Wãnõk eo an Anij
10, 11. Ewi wãween jet rar kalikkar aer lõke Jeova ke rar kããlõt jerbal eo aer? Kwal̦o̦k juon waanjoñak.
10 Jijej ear bar rõjañ ro ri kal̦ooran ñan pukot m̦okta wãnõk eo an Anij. (Matu 6:33) Mel̦el̦ein men in bwe jej aikuj bõk l̦õmn̦ak ko an Jeova im jab l̦õmn̦ak ko an armej ikijjeen jim̦we im bõd. (Riit Aiseia 55:8, 9.) Bõlen ewõr jet armej kwõj keememej er me rekõn ekkat tobacco ak wiakake men ko kõm̦m̦an jãn tobacco ãinwõt jikka im tip. Bareinwõt rar katakin armej ñan tarin̦ae ak kõm̦m̦an kein tarin̦ae ko im wiakaki. Ak ãlikin aer katak m̦ool eo jãn Baibõl̦, enañin aoleper rar kããlõt ñan ukot jerbal ko aer im rar maroñ in peptaij.—Aiseia 2:4; 2 Korint 7:1; Galetia 5:14.
11 Andrew ej juon eo im ear kõm̦m̦ane men in. Ke erro lio pãleen rar katak im jel̦ã kõn Jeova, rar pepe in karejar ñan e. Andrew ear kam̦õje jãn jerbal eo an meñe ear lukkuun em̦m̦an ippãn. Etke? Kõnke company eo ej jerbal ie rar kõm̦m̦ane waan tulo̦k ko ñan tarin̦ae. Bõtab, ear kõn̦aan kõm̦m̦ane men eo Jeova ej ba ejim̦we im ear bõjrak. Ke Andrew ear kam̦õje jãn jerbal, kar ruo nejin ajri im jããn eo ippãn ebwe wõt ñan jejjo allõñ ko. Ear ãinl̦o̦k wõt ri Livai ro im ear ejjel̦o̦k aer menin jolõt ak kõj ilo ãneo. Ear lõke Anij im ear bar kapok juon an jerbal. Kiiõ, ñe rej reilikl̦o̦k ñan iien in, Andrew im baam̦le eo an remaroñ kam̦ool naan kein me ej ba: “Lo pein Jeova e jab kadu.” (Aiseia 59:1) Kõnke rar jokwane wõt kõn men ko ewõr ippãer, Andrew im lio pãleen rar maroñ in pioneer. Andrew ej ba bwe ewõr iien rej inepata kõn jããn, jikin aer jokwe, aer ãjmour, im kõn aer rũttol̦o̦k. Bõtab, aolep iien Jeova ej jipañ er. Kõn men in, remaroñ ba bwe karejar ñan Jeova ej juon jeraam̦m̦an el̦ap.—Ekklisiastis 12:13, UBS.
12. Ta eo ej aikuj wõr ippãd me emaroñ jipañ kõj ñan kõm̦m̦ane men eo ejim̦we? Kwal̦o̦k jet waanjoñak ko jãn congregation eo am̦.
12 Jijej ear jiroñ ri kal̦oor ro an: “El̦aññe ewõr ami tõmak ãinwõt juon ine in mõstad, kom̦ naaj ba ñan tol̦ in, ‘Kwõn ruwaakl̦o̦k ñan ijjuweo,’ im enaaj ilo̦k, im ejjel̦o̦k men ko kom̦ naaj bane.” (Matu 17:20) Kwõn ke likũt kien ko an Anij m̦oktata meñe emaroñ pen ñan kwe? El̦aññe kwõjjab lukkuun jel̦ã ñe kwõmaroñ kõm̦m̦ane men in, kwõn kõnono kake ippãn ro jet ilo congregation eo. Bwebwenato ko aer kõn wãween an Jeova kar jipañ er, enaaj lukkuun kakajoor tõmak eo am̦.
Kam̦m̦oolol kõn Menin Letok ko jãn Jeova
13. El̦aññe jej kate wõt kõj ilo jerbal eo an Jeova, ta eo jemaroñ lõke bwe enaaj kõm̦m̦ane?
13 El̦aññe kwõj kaorõke jerbal eo am̦ ñan Jeova, kwõmaroñ lõke bwe enaaj kabwe aolep aikuj ko am̦ ãinwõt an kar kõm̦m̦ane ñan ri Livai ro. Bareinwõt l̦õmn̦ak m̦õk kõn kar Devid. Meñe ear kũttiliek ilo juon roñ, ak ear lõke bwe Anij enaaj kar jipañ e. Jemaroñ bar lõke Jeova meñe jet iien jej l̦õmn̦ak bwe ejjel̦o̦k en̦ enaaj jipañ kõj. Keememej bwe ke Esap ear etal ñan “temple eo” an Anij, ear mel̦el̦e ta eo ear kainepataik e. (Sam 73:17, UBS) Ilo ejja wãween in wõt, jej aikuj lõke Jeova bwe enaaj letok men ko jej aikuji ñan kõjparok jem̦jerã eo ad ippãn. Men in ej kalikkar bwe jej lukkuun kaorõke jerbal eo ad ñan Jeova jekdo̦o̦n ta apañ ko jej iioni. Ilo wãween in, jej kõm̦m̦an bwe Jeova en tarrin kõj eo ad.
14, 15. Ta eo jen kõm̦m̦ane ñe ej wõr oktak ko rainin kõn mel̦el̦e eo ad kar m̦okta kõn jet eoon ko ilo Baibõl̦? Etke?
14 Kwõj lõke ke Jeova ñe ej jipañ kõj bwe jen mel̦el̦e “men ko re m̦wilal̦” ilo Baibõl̦ eo? (1 Korint 2:10-13) Rijjelõk Piter ej juon joñak em̦m̦an me ear kõm̦m̦ane men in. Juon iien Jijej ear jiroñ ri Ju ro: “El̦aññe kom̦ jab m̦õñã kanniõkin Nejin armej, im jab idaak bõtõktõkin, ejjel̦o̦k mour ilo kom̦.” Ke ear ba men in elõñ iaan ri kal̦oor ro rar l̦õmn̦ak bwe ej kõnono kõn lukkuun kanniõk im bõtõktõk in armej. Rar ba bwe naan ko an Jijej rekakũm̦m̦ũl̦o̦k er, im rar ba, “Wõn e maroñ in roñjake?” Kõn men in, rar bar “jepl̦aak” ñan mour eo aer m̦okta. Bõtab, Piter ear ba: “Irooj, kõm naaj ilo̦k ñan wõn? Ippam̦ naan ko naan in mour indeeo.”—Jon 6:53, 60, 66, 68.
15 Piter ear jab lukkuun mel̦el̦e kõn naan ko an Jijej. Ak ear lõke bwe Jeova ear kõjerbale Jijej ñan jipañ armej mel̦el̦e kõn m̦ool eo. Ñe ewõr oktak ko rainin kõn mel̦el̦e eo ad kar m̦okta kõn jet eoon ko ilo Baibõl̦, kwõj ke kajjioñ in mel̦el̦e kõn unin oktak kein? (Jabõn Kõnnaan 4:18) Ri Beria ro ilo raan ko an rijjelõk ro, ear “m̦õkaj aer bõk naan im m̦õn̦õn̦õ, im pukot ilo Jeje ko raan otemjej.” (Jerbal 17:11) El̦aññe kwõj anõke joñak eo an rein, enaaj l̦apl̦o̦k am̦ kaorõke jerbal eo am̦ ñan Anij. Innem, kwõnaaj lukkuun kam̦m̦oolol bwe Jeova ej tarrin kõj eo am̦.
M̦are Wõt ilo Irooj
16. Ekkar ñan 1 Korint 7:39, ewi wãween Kũrjin ro ejjel̦o̦k rejetaer remaroñ kõm̦m̦an bwe Anij en tarrin kõj eo aer?
16 Bar juon wãween Kũrjin ro rej kõm̦m̦an bwe Anij en tarrin kõj eo aer ej ñe rej pokake kien eo an ñan m̦are wõt “ilo Irooj.” (1 Korint 7:39) Elõñ rar pepe ñan make iaaer im jab rupe kien eo an Jeova. Anij ej kõjparok ro im rej kõm̦m̦ane men in. Ke Devid ear bũrom̦õj kõn an make iaan im l̦õmn̦ak bwe ejjel̦o̦k enaaj jipañ e, ta eo ear kõm̦m̦ane? Ear kajjitõk jipañ jãn Jeova. Devid ear ba: “Ij kwalok aoleb abnõnõ ko aõ ñõne; Ij kennaniki kin aoleb ban ko aõ ñe ij iten ebbwer.” (Sam 142:1-3, UBS) Jeremaia ear tiljek wõt ilo an karejar ñan Anij meñe ear ejjel̦o̦k rejetan. Emaroñ kar bareinwõt bũrom̦õj kõn an make iaan. Kwõmaroñ lale katak eo etan “Kortokjen Mour eo Am ilo Ien eo Ejelok Beleõm” ilo Imõniaroñroñ eo an Jãnwõde 15, 2011, peij 17.
17. Ta eo juon jeid im jatid kõrã ej kõm̦m̦ane ñe ej bũrom̦õj kõn an make iaan?
17 Juon jeid im jatid kõrã ilo Amedka ear ba bwe ear jab l̦õmn̦ak bwe enaaj kar make wõt iaan. Ej ba ekõn̦aan m̦are ñe ej iion armej eo ekkar. Kõrã eo jinen me ejjab Ri Kõnnaan an Jeova, ejjab kea wõn eo liin nejin enaaj mareiki. Ekar kõn̦aan wõt bwe en m̦are im wõr pãleen. Innem, ear kajjitõk ippãn jinen en ke bũrom̦õj ñe ebõd an kããlõt kõn an kar iuuni bwe en m̦are. Innem jinen el̦ak lale bwe em̦m̦an jerbal eo an, ej make kabwe aikuj ko an, im aolep iien ej m̦õn̦õn̦õ, ear bõjrak an ekkeroro. Jet iien in jeid im jatid ej bũrom̦õj kõnke emake iaan. Ej ba: “Ij kate wõt eõ im lõke Jeova. Im ejañin el̦l̦o̦k jãn ña.” Ta eo ear jipañe ñan lõke wõt Jeova? Ej uwaak im ba: “Men in jar el̦ap an jipañ eõ bwe in kile bwe Anij em̦ool an pãd im ijjab make iaõ. Eo Eutiejtata iaolepen lañ im lal̦ ej roñjake eõ, innem ij kile aõ utiej ippãn im el̦ap aõ lañlõñ.” Ej lõke naan kein ilo Baibõl̦: “Elablok mõnõnõ ilo lelok jen bõk.” Innem liin ej kajjioñ in jipañ ro jet im ejjab kõtmãne jabdewõt men jãn er. Ej wõnm̦aanl̦o̦k im ba: “Ij lo lañlõñ ñe ij kajjitõk ippa make, ‘Ta eo imaroñ kõm̦m̦ane ñan jipañ armej in?’ ” (Jerbal 20:35, UBS) Jeova ej tarrin kõj eo an im el̦ap an m̦õn̦õn̦õ ilo an jerbal ñane.
18. Ewi wãween bwe kwõn maroñ erom kõj eo an Jeova?
18 Jekdo̦o̦n ta wãween eo kwõ pãd ie, kwõmaroñ kõm̦m̦an bwe Anij en tarrin kõj eo am̦. El̦aññe kwõj kõm̦m̦ane men in, kwõnaaj uwaan armej ro an rem̦õn̦õn̦õ. (2 Korint 6:16, 17) Tokjãn men in, kwõmaroñ oktak im erom kõj eo an Jeova ãinwõt kar ri karejar ro jet an ilo iien ko etto. (Riit Duteronomi 32:9, 10.) Ibwiljin ri aelõñ ko, ri Israel ro wõt rar erom kõj eo an Anij. Jeova emaroñ bareinwõt kããlõt kwe bwe kwõn tarrin kõj eo an im enaaj lale im kõjparok eok.—Sam 17:8.
Ta Uwaak eo Am̦?
• Ewi wãween kwõmaroñ kõm̦m̦an bwe Jeova en tarrin kõj eo am̦ ilo am̦ pukot m̦okta Aelõñ eo an Anij im wãnõk eo an?
• Ewi wãween kwõmaroñ kõm̦m̦an bwe Jeova en tarrin kõj eo am̦ ilo am̦ kam̦m̦oolol kõn menin letok ko jãn E?
• Ewi wãween kwõmaroñ kõm̦m̦an bwe Jeova en tarrin kõj eo am̦ ikijjeen am̦ pokake kien eo an ñan m̦are wõt ilo Irooj?
[Kajitõk ko ñan katak]
[Blurb on page 13]
Jeova ej tarrin kõj eo ad ñe jej likũt jerbal eo ad ñan e m̦oktata
[Pija ilo peij 15]
Joñak eo an Jeremaia ej kakajoor kõj
