Kasin Ipapanengneng Mon si Jehova so Apag Mo?

“Itultuloy yo . . . ya anapen nin unona so panarian tan say inkatunong to, tan sarayan amin a bengatla so niarum ed sikayo.”​—MAT. 6:33.

1, 2. (a) Siopay irerepresenta na “Israel na Dios” ya asalambit ed Galacia 6:16? (b) Siopay irerepresenta na “labinduan tribu na Israel” ya asalambit ed Mateo 19:28?

SANO nabasam so ngaran ya Israel ed Biblia, antoy nanonotan mo? Kasin nanonotan moy anak nen Isaac ya si Jacob, a diad saginonor et atawag ya Israel? Odino saray ilalak to, say nasyon na Israel nensaman? Nasasalambit met ed Biblia so nipaakar ed espiritual ya Israel, odino “Israel na Dios.” Saraya et say 144,000 ya alanaan na masanton espiritu a magmaliw ya arari tan saserdote ed tawen. (Gal. 6:16; Apo. 7:4; 21:12) Balet, imanoen pay nikaduman impanukoy ed 12 tribu na Israel a nabasad Mateo 19:28.

² Oniay inkuan nen Jesus: “Diad pamasimbalo ed amin a bengatla, sano akayurong la so Anak na too ed maglorian trono to, sikayoran tinmumbok ed siak so onyurong met diad labinduan trono, pian mangukom ed labinduan tribu na Israel.” Diad sayan bersikulo, say tutukoyen na “labinduan tribu na Israel” et saramay manbilay na andi-anggaan diad Paraison dalin. Tan nagunggonaan irad panaglingkor na 144,000 bilang ukom tan saserdote.

3, 4. Anton maabig ya ehemplo so ipapanengneng na saray alanaan?

 ³ Singa saray saserdote tan Levita nensaman, ipapasen na saray alanaan a pribilehyo so panlilingkor dad si Jehova. (Num. 18:20) Ag-iilaloan na saray alanaan a naikdan iray teritorya odino apag diad dalin. Imbes, ipapabitar na Apocalipsis 4:10, 11 ya itultuloy day panlingkor dad si Jehova diad tawen bilang arari tan saserdote a kaiba nen Jesu-Kristo.​—Eze. 44:28.

⁴ Legan a wala nid dalin iray alanaan, ipapanengneng dad paraan na panagbilay da a si Jehova so apag da. Manunad bilay da so panaglingkor ed Dios. Oniay imbaga nen apostol Pedro: “Gawa yoy anggaay nayarian yon makapansiansia a matoor bilang saray tinawag tan pinili.” (2 Ped. 1:10) Nagagawaan da iya diad pangipapatnag day pananisia ed dondon bagat nen Kristo tan ed panutumbok dad sikato. Nanduruma so kipapasen tan abilidad da. Ingen, agda ibabaraan a lapud limitasyon da et daiset labat so gawaen dan panaglingkor ed Dios. Imbes, satan so prayuridad da, tan gagawaen day anggaay nayarian da. Maabig so ehemplo rad saramay maniilalon manbilay diad paraison dalin.

5. Panon a magmaliw ya apag na amin a Kristiano si Jehova, tan akin ya aliwan mainomay a gawaen itan?

⁵ Balanglan say ilalo tayo et manbilay ed tawen odino diad dalin, nepeg tayon ‘iburi so inkasikatayo tan sakbatey panamairapan a kiew tan mantultuloy ya ontumbok ed Kristo.’ (Mat. 16:24) Satan a masakripisyon awawey so ipapanengneng natan na minilyon a totoon maniilalon manbilay ed Paraison dalin legan dan dadayewey Dios tan itutultuloy a tutumbokey Kristo. Ag-ira kontento ed panggawa labat na daiset no sarag da met so manggaway mas dakel. Walaray apakiwas a pasimpliey bilay da pian makapanpayunir. Saray arum et makapanpapayunir na pigaran bulan ed kada taon. Wala met so arum ya anggano ag-ira makapanpayunir et masetseseg irad ministeryo. Singa iraya si Maria, ya angikalbo na ambalingit a larak ed si Jesus. Oniay inkuan nen Jesus nipaakar ed si Maria: “Sikatoy nanggawa na maabig ed siak. . . . Ginawa toy anggaay nayarian to.” (Mar. 14:6-8) Aliwan mainomay so panggawa ed anggaay nayarian tayo ta manbibilay itayod mundo ya uuleyan nen Satanas. Balet ta kaukolan tayoy mipuligesgesan, tan panmatalkan tayoy Jehova. Pantongtongan tayo natan so apatiran paraan no panon tayon nagawaan itan.

Anapen Nin Unona so Panarian

6. (a) Panon ya ipapatnag na saray totoo ed mundo a say apag da et diad sayan bilay labat? (b) Akin et mas maabig ya aligey David?

⁶ Imbangat nen Jesus ed saray papatumbok to a kaukolan dan anapen nin unona so Panarian tan say inkatunong na Dios. Saray totoo ed mundo et uunaen day panlabayan da. Tutukoyen ira na Biblia bilang “totoo a minumundo, a say nabebetangan da [et] wala ed saya a bilay.” (Basaen so Salmo 17:1, 13-15.) Ibabaliwala da si Jehova, tan say iisipen da labat et say panagpamilya, komportablen panagbilay, tan no antoy ipatawir dad ananak da. Say apag da et diad sayan bilay labat. Duma balet si David. Labay toy manggawa na “maong a ngaran” ed arap nen Jehova, a singa impaseseg met na anak ton si Solomon. (Ecl. 7:1) Singa met si Asaf, amta nen David a mas importante so pikakaaro tod si Jehova nen say pangiyunad dilin panlabayan to. Nanggayagaan toy panakar a kaiba na Dios. Diad panaon tayo, iyuuna na dakel a Kristiano so panaglingkor dad Jehova imbes a say sekular a trabaho ra.

7. Anton bendisyon so naawat na sakey ya agi lapud inyuna toy Panarian?

⁷ Konsideraen tayo pay alimbawa nen Jean-Claude, a taga Central African Republic. Sikatoy sakey ya elder a walaan na asawa tan taloran ananak. Mairap so makalmoy trabaho ed lugar da, kanian gagawaen na saray empleyado so amin a nayarian da pian ag-ira naekal ed trabaho. Sakey ya agew, impaamta na manedyer ed si Jean-Claude a say balon eskedyul na trabaho to et dia lad labi ya onggapod 6:30, manlapud Lunes ya anggad Simba. Impaliwawa nen  Jean-Claude ya aliwan materyal labat so nepeg ton itarya ed pamilya to, noagta ontan met ed espiritual ya pankaukolan da. Imbaga to met a sikatoy walaan na responsabilidad ed kongregasyon. Antoy inkuan na manedyer? “Maong ka ta walay trabahom, kanian lingwanan mo lan amin, pati asawam, ananak mo, tan saray problemam. Say trabahom labat so nonot mo, anggapo lay arum. Manpili ka: relihyon mo odino trabahom.” No sikayoy walad kipapasen nen Jean-Claude, antoy gawaen yo? Amoria nen Jean-Claude ya no naekal ed trabaho, say Dios so makauley ed sikato. Dakel nin siansiay nagawaan tod panaglingkor ed Dios, tan si Jehova so ontulong pian nitarya toy materyal a pankaukolan na pamilya to. Kanian, siansia nin inmatendid aral da. Kayari na satan, sikatoy namparaan a mantrabaho, ya agsegurado no kasin wala ni trabaho to. Kabebekta, walay naawat ton tawag ed telepono. Asisante manaya imay manedyer, balet ta agnakal ed trabaho si Jean-Claude.

8, 9. Panon tayon naalig iray saserdote tan Levita diad impangipanengneng dan si Jehova so apag da?

⁸ Nayarin asali yo met lay ontan ya situasyon. Ompan mapaga kayo no panon yon asikasoen so pankaukolan na pamilya yo no naekal kayod trabaho. (1 Tim. 5:8) Asali yo man itan odino andi, seguradon apaneknekan yo lan mismo ya agbalot nadismaya iramay say apag da et si Jehova tan iyuuna rad bilay da so panaglingkor ed sikato. Sanen imbaga nen Jesus ed saray papatumbok ton itultuloy dan anapen nin unona so panarian, oniay impaseguro tod sikara: “Sarayan amin a bengatla”​—singa say kanen, inumen, odino isulong—​“so niarum ed sikayo.”​—Mat. 6:33.

⁹ Isipen pa iray Levita. Anggapoy tawir dan dalin. Say manunan kimey da et idaulo so nasyon ed malinis a panagdayew, kanian kaukolan ya manmatalek iran saray pankaukolan da et itarya nen Jehova, ya angibagad sikaran: “Siak so apag [yo].” (Num. 18:20) Anggan agtayo manlilingkor ed literal a templo a singa sikara, naalig tayoy panagmatalek dad si Jehova. Legan a manasingger so anggaan, nagkalalo lan kakkaukolan itayon manmatalek ya itarya na Dios iray pankaukolan tayo.​—Apo. 13:17.

Anapen Nin Unona so Inkatunong na Dios

10, 11. Panon ya impanengneng na arum so panagmatalek dad si Jehova no nipaakar ed trabaho? Mangiter na alimbawa.

¹⁰ Pinaseseg met nen Jesus iray disipulo ton ‘itultuloy ya anapen nin unona so inkatunong na Dios.’ (Mat. 6:33) Kabaliksan na saya ya unoren tayo ray estandarte nen Jehova nipaakar ed no antoy duga tan aliwa, imbes a saray estandarte na totoo. (Basaen so Isaias 55:8, 9.) Walaray arum ya antis dan naamtaay katuaan et mantatanem odino manlalako iray tabako, mangipapasal ed arum a miguerra, odino manggagawa tan manlalakoy armas. Balet sanen naamtaan day katuaan, dakel ed sikara so nananap na sananey a trabaho tan nagmaliw a kualipikado parad bautismo.​—Isa. 2:4; 2 Cor. 7:1; Gal. 5:14.

¹¹ Si Andrew so sakey ya alimbawa. Sanen naamtaan dan sanasawa so nipaakar ed si Jehova, nandesisyon iran manlingkor ed sikato. Labalabay nen Andrew so trabaho to balet ta nan-resign. Akin ey? Lapud say pantratrabahoan to et walay koneksion tod saray guerra, tan labay ton iyuna so inkatunong na Dios. Sanen sikatoy nan-resign, walay duaran anak to, tan say kuartan atipon to et magenap labat a pambilay dad pigaran bulan. No diad panmoria na too, singa anggapoy “tawir” to. Sikatoy nananap na trabaho tan nanmatalek ed Dios. Sano nanonotan dan pamilya iman ya agawa, talagan nibaga ran ‘aliwan antikey so lima nen Jehova.’  (Isa. 59:1) Lapud pinasimpli ray bilay da, akapanpayunir iran sanasawa. “Walaray panaon ya mapaga kami lapud kuarta, panayaman, bunigas, tan anggan say itatatken mi,” so kuan nen Andrew. “Balet lanang kamin tutulongan nen Jehova. . . . Talagan nibaga mi a say panaglingkor ed si Jehova so sankaabigan tan sankaliketan a nagawaan na too.” *​—Ecl. 12:13.

12. Antoy kaukolan pian niyuna tayoy estandarte na Dios? Mangiter na alimbawa ed lugar yo.

¹² Inkuan nen Jesus ed saray disipulo to: “No walay pananisia yo a singa kamelag na bukel na mustasa, ibaga yo ed sayan palandey, ‘Onalis ka diman,’ et onalis itan, tan anggapo so imposible ed sikayo.” (Mat. 17:20) Kasin sarag mon iyuna iray estandarte na Dios anggan sano mairap so resulta na satan? No bilang ta agka segurado no kasin sarag mo, salim so miistoryaan ed saray agagi ed kongregasyon. Seguradon napabiskeg kad saray eksperiensya ra.

Apresyaen Iray Espiritual a Probisyon nen Jehova

13. Antoy nailaloan tayo no maseseg tayod panaglingkor ed si Jehova?

¹³ No papablien moy pribilehyom ya lingkoray Jehova, makaseguro kan itarya toy pisikal tan espiritual ya pankaukolan mo, a singa ginawa tod saray Levita. Nonoten pay David. Anggan walad ungib, matalek ya tulongan nen Jehova. Ontan tayo met, makapanmatalek itayod si Jehova anggan sano singa anggapo lay nagawaan tayo. Tandaan tayon sanen linmay Asaf “ed santuaryo na Dios,” atalosan to no antoy mangogonigon ed sikato. (Sal. 73:17) Nepeg a manmatalek tayo met ya ipagamor nen Jehova so espiritual a pankaukolan tayo. No ontan, ipapatnag tayon papablien tayo so panaglingkor ed si Jehova anggan antoy kipapasen tayo, sirin et ipapanengneng tayon si Jehova so apag tayo.

14, 15. Antoy reaksion tayo sano walay balon liwawa nipaakar ed sakey a bangat diad Biblia, tan akin?

¹⁴ Kasin manmamatalek kad si Jehova sano tutulongan to itayon natalosan iray “aralem a kanonotan” to a walad Biblia? (1 Cor. 2:10-13) Makaaral tayod reaksion nen apostol Pedro sanen imbaga nen Jesus ed saray Judio ya, “No agyo kanen so laman na Anak na too tan inumen so dala to, agkayo nawalaan na bilay.” Lapud literal so impakatalos dad sayan imbaga nen Jesus, dakel ed saray disipulo so angibagan: “Makapabigla iyan imbaga to. Siopay makayarin ondengel ed satan?” Kanian, “pinmawil [irad] saray binenegan da.” Ingen ta imbaga nen Pedro: “Katawan, siopa ni so laen mi? Walad sika iray salita a mangitonton ed bilay ya andi-anggaan.”​—Juan 6:53, 60, 66, 68.

¹⁵ Agsigpot ya atalosan nen Pedro so imbaga nen Jesus nipaakar ed pangan na laman tan iyinum na dala To. Ingen, matalek si Pedro ya si Jesus so uusaren nen Jehova pian tulongan iray totoo a natalosay katuaan. No walay balon liwawa nipaakar ed sakey a bangat diad Biblia, kasin panggugunaetan mon talosan iray Makasulatan a basiyan na sayan pananguman? (Uli. 4:18) Saray taga Berea nen inmunan-siglo et “akaparaan a maong so nonot dan angawat ed salita, a maalwar dan uusisaen so Kasulatan ya inagew-agew.” (Gawa 17:11) No aligen moy ehemplo ra, mas onaralem so panamablim ed pribilehyom a manlingkor ed Dios. Talagan naapresyam si Jehova bilang apag mo.

Mangasawa o Miasawa Dia Labat ed Katawan

16. No nipaakar ed samay ganggan a walad 1 Corinto 7:39, panon tayon nipanengneng a si Jehova so apag tayo?

¹⁶ Say sananey nin paraan a nipanengneng tayon si Jehova so apag tayo et diad pangunor ed ganggan na Biblia a mangasawa o miasawa “dia labat ed Katawan.” (1 Cor. 7:39) Mas pinili na dakel so pansiansian andiay asawa imbes a sumlangen iyan ganggan. Agpaulyanan na Dios iramay manguunor ed satan. Antoy ginawa nen David sanen naeermenan tan singano anggapo lay ontulong ed sikato? Oniay kuan to: “Naynay kon ibabalikas ed [si Jehova] so kapagaan ko; Ibabagak ed sikato so pakakagonigon  ko sano maneermen a maong so espirituk.” (Sal. 142:1-3, NW) Nayarin ontan met so alikna nen Jeremias. Bilang andian na asawa, sikatoy matoor ya nanlingkor ed Dios diad loob na pigaran taotaon. Ompano labay mon aralen so ehemplo to a nabasad kapitulo 8 na libron Mensahe na Dios ed Sikatayo Panamegley nen Jeremias.

17. Antoy gagawaen na sakey ya agin andian na asawa no sikatoy naeermenan?

¹⁷ Oniay inkuan na sakey ya agin taga United States: “Agkon balot implano ya mansiansian andiay asawa. Labay ko pa met so miasawa basta nakabat ko la ‘may talagan nagusgustoan ko. Kokombinsien ak na Nanay kon aliwan Tasi ya miasawa ak lad anggan siopa, balet ta imbagak ya sikaray natetel no bilbilang ta makapuy so pansumpalan na piasawak. Agnambayag, anengneng dan marakep so trabahok, naaasikasok so sarilik, tan maliket ak. Kanian agda ak la pinilit a miasawa.” No maminsan et naeermenan met iyan agi. “Diad oniaran pankanawnawa,” so kuan to, “manmamatalek ak ed si Jehova. Amtak ya agto ak balot paulyanan.” Antoy akatulong ed sikaton manmatalek ed si Jehova? “Tinmulong ed siak so pikakasi pian namorian tudtua so Dios tan agko bukbukor. Dedengelen ak na Sankatagyan ed uniberso, kanian amtak ya walay dignidad ko tan maliket ak.” Lapud sikatoy matalek a “mas makapaliket so mangiter nen say mangawat,” inkuan ton: “Ontutulong ak ed arum tan agak manaalagar na kasalat. Sano nononoten kon, ‘Anto kasi nagawaan ko parad sayan too?’ talagan naliliketan so pusok. (Gawa 20:35) On, si Jehova so apag to, tan panliliketan toy panlingkor ed sikato.

18. Panon kan magmaliw ya apag nen Jehova?

¹⁸ Antokaman so kipapasen mo, nayarian mon ipanengneng a si Jehova so apag mo. No gawaen mo itan, magmaliw kan kabiangan na saray maliket a totoo to. (2 Cor. 6:16, 17) Bilang resulta, ipasen ka nen Jehova bilang apag to, a singa met ed saray lingkor to nensaman. (Basaen so Deuteronomio 32:9, 10.) No panon a say Israel et pinili na Dios manlapud saray nasyon pian magmaliw ya apag to, ipasen to ka met bilang kayarian to tan maaro to kan asikasoen.​—Sal. 17:8.

[Paimano ed leksab]

Antoy Ebat Mo?

Panon mon nipanengneng a si Jehova so apag mo diad

• pangiyuna ed Panarian na Dios tan say inkatunong to?

• pangapresya ed espiritual a tagano?

• pangunor ed ganggan na Dios a mangasawa o miasawa dia labat ed Katawan?

[Tepetepet Parad Panagaral]

[Blurb ed pahina 13]

Si Jehova so apag tayo no iyuuna tayoy panlingkor ed sikato

[Litrato ed pahina 15]

Makapaseseg so ehemplo nen Jeremias