Kau Ke Kongei er a Jehovah el Mo Blingelem?

“Mo momuchel losiik ra rengedel a Dios ma llemeltel, ma ika le medchel el rokui lekor kemiu.”​—MATTEUS 6:33.

1, 2. (a) A “Israel ra Dios” el ngar er a Galatia 6:16, ngomtechei er a rua techang? (b) Tirke el “tacher ma teblol klebliil ra Israel” el ngar er a Matteus 19:28, te omtechei er a rua techang?

SEL mchiuii a ngakl el Israel er a Biblia, e ngtechang a bo molatk er ngii? Ke mo lotkii a ngelekel a Isak el Jakob, el mlungakl el Israel er a uriul? Me a lechub e ke mo melatk er a ruldidellel a rsechel, el renged er a Israel er a irechar? A Biblia a dirrek el mesaod er a “Israel ra Dios,” el tirke el 144,000 el mlechilt er a oureor el klisichel a Dios el mo king e prist el ngar er a eanged. (Galatia 6:16; Chocholt 7:4; 21:12) Engdi ngngar er ngii a kuk ta er a ileakl el usbechel tia el ngakl el Israel el sebeched el menguiu er ngii er a Matteus 19:28.

² A Jesus a dilu el kmo: “Sel bocha le beches a belulechad ma Ngelekel a chad bocha ldengchokl ra kingellel a klebkall, e kemiu el uleltirakl er ngak a dirrek el mo dengchokl ra tacher ma teblol kingall er chomerreder e oukerrekeriil a tacher ma teblol klebliil ra Israel.” Ngar tia el bades, e tirke el “tacher ma teblol klebliil ra Israel” a tirke el bo loukerrekeriil er tir a rengellitel el disaiplo er a Jesus, el ngar er ngii a techellir el mo nguu a diak a ulebengelel el klengar el ngar er a Paradis el chutem. Te mo ngmai a klungiolir er a omesiungir tirke el mo mesiou el prist el 144,000.

3, 4. Ngera el ungil el kerebai a loruul er ngii a reblak a rengrir el ngellitel?

³ Ngdi ua reprist me a Relevait er a irechar, e a rengellitel er chelechang a omes er a omesiungir el ileakl el techall. (Ulecherangel 18:20) Me a rengellitel a diak lolatk el mo ngmai a blingelir el ngar tia el chutem e te bai omes el bedul sel taem el bo el king e prist el obengkel a Jesus Kristus el ngar er a eanged. Te mo melemolem el mesiou er  a Jehovah el oltaut er a ngerechelir, el ua losaod er ngii a Chocholt 4:10, 11 el kirel a deruchellir a rengellitel el ngar er a eanged.​—Esekiel 44:28.

⁴ Me sel lengar tia el chutem, e a blekerdelel a klengar er a rengellitel a olecholt el kmo a Jehovah a blingelir. A techellir el mesiou er a Dios a kot el klou a ultutelel el tekoi el kirir. Te olecholt a klaumerang er tir er a olubet el tengetengel a Kristus e melemolem el oltirakl er ngii, el ‘mengal mo blak a rengrir e mutebechel a ikel [mlor] tir lokedong ma ngilt.’ (2 Petrus 1:10) Malta e a blekerdelel a klengar er tir me a duch er tir a kakerous engdi ngdiak lousbech a chelitecheterir el mo uchul e lak leblak a rengrir el meruul er a omesiungir el mo er a Dios. Te bai mo er a tkurrebab el sebechir el mesiou er a Jehovah. E seikid e te mecherei a ungil el kerebai el mo er tirke el melatk el mo kiei er a paradis el chutem.

5. Te mekerang a rokui el Kristiano e kongei er a Jehovah el mo blingelir, e ngera me tia sebechel el mo meringel el tekoi?

⁵ Me a doba omelatk el mo er a eanged me a lechub e kede mo kiei er tia el chutem, e ngkired el ‘choitii a klechad er kid e . . . cholngii a [teluo el kerrekar] er kid’ e melemolem el oltirakl er a Kristus. (Matteus 16:24) A rebetok el miliol el omes el bedul a klengar el ngar er a Paradis el chutem a mesiou er a Dios e oltirakl er a Kristus el ngar tiakid el rolel. Ngdiak el kengei el di mengoit a kesai el taem el kirel a omesiungir a lsekum e te medengei el kmo ngsebechir el menglou er a omesiungir. A rebetok a mla omekbeot er a klengar er tir me bo el sebechir el mesiou el mui el taem. A rebebil a melasem el mesiou el 50 el sikang er a bebil er a buil er a chelsel a bek el rak. E a rekuk bebil, el diak el sebechir el mesiou el mui el taem, a meruul aike el sebechir el ngar er a omesiungir. Choua tirka el chad a di uai a blak a rengul el Maria, el ulitelii a ungil a bul el cheluch er a bdelul a Jesus. Me a Jesus a dilu el kmo: “Ngika rirellii a ungil el mer ngak. . . . Ngmla remuul a ikel sebechel.” (Markus 14:6-8) Ngdiak el beot a doruul aike el sebeched e le kede kiei er a beluulechad el chederedall er a Satan. Me nguaisei, engdi kede meruul aike el rokui el sebeched e otuil a klaumerang er kid er a Jehovah. Kede mo omes a eua el rolel e ngsebeched el meruul el uaisei.

Mosiik er a Rengedel a Dios el Kot

6. (a) A rechad er chelecha el taem te mekera lolecholt el kmo tiaikid el klengar a blingelir? (b) Ngera me ngungil a doba osengel a David?

⁶ A Jesus a ullisechakl er a rulebengkel el mo osiik er a Rengedel a Dios me a llemeltel el kot. A rechad er tia el beluulechad a osiik aike el sorir el kot, el di ua rechad “el blingelir er a klengar a ngar a beluulchad.” (Monguiu er a Psalm 17:1, 13-​15.) Me ngdiak lolatk er a Omebelir a uchul e te mengoit a klisichir el meruul er a klengar er tir el mo ungil, e omekeroul er a rengelekir, e mechei a dikesir a rengelekir e le tiakid el klengar a blingelir. Engdi a David a bai mle semeriar el meruul er a “ungil chisel” el obengkel a Jehovah, el ua lulengelechel a ngelekel er a uriul el kired el mo meruul er ngii. (Olisechakl 7:1) Me ngdi ua Asaf, e a David a ulemes er a deleongel er ngii me a Jehovah el lmuut el ngarbab er a ngii di el tekoi el mle soal. Ngmle dmeu a rengul el merael el obengkel a Dios. Me chelecha el taem, e a rebetok el Kristiano a omes er a omesiungir el mo er a Jehovah el lmuut el klou a ultutelel er a urerir.

7. Ngera el klengeltengat a lengilai a ta er a odam er kid e le ngulsiik er a Renged el kot?

⁷ Ka molatk er a Jean-Claude, el kiei er a Central African Republic. Ngikang a ta er a remechuodel er a ongdibel el bechiil, el ngar er ngii a retedei el ngelekel. Ngar seikid el beluu, e ngmeringel a debetik a ureor, me a ruumesingd el chad a melasem er a tkurrebab el sebechir me lak loriid a urerir. A ta er a klebesei, e a merreder er a ureor a dilu er a Jean-Claude me bo loureor a leklebesei, el omuchel er a 6:30, el euid el klebesei er a ta el sandei. A Jean-Claude a milsaod er a ngerechelel el mesiou er a ongalek er ngii e dirrek el olengeseu er tir el mo ungil a deleuill er tir me a Jehovah. Ngdirrek el milsaod el kmo ngar er ngii a ngerechelel el olengeseu er a ongdibel. Me ngngera mle nger er a merredelel? Ngdilu el kmo: “A lsekum e ke ngeltengat el ngar er ngii a urerem, e ngkmal kirem el obes a rokui el tekoi, el uldimukl er a bechim, me a rengelekem, me a mondai er kau. Ngkmal kirem el nguu a urerem el mo kot er a rokui el tekoi. Me di lekau el melilt el kmo ngklechelid er kau me a lechub e ngurerem a kot.” Ke mo mekerang oleko tia el tekoi a  dilubech el eko er kau? A Jean-Claude a mle medengei el kmo a lsekum e ngoridii a urerel, e a Jehovah a mo omekerreu er ngii. Ngkmal betok a sebechel el meruul er a omesiungel el mo er a Jehovah e Ngii a mo omekerreu aike el lousbech a ongalek er ngii. Me a Jean-Claude a mlo er sel miting er a ongdibel er a klebesei. E a bo lekuk, e ngkiltmeklii el mo oureor, e dimlak lodengei el kmo ngdirk ngar er ngii a urerel me a lechub e ngdiak. E sola e te oudengua el mei er ngii el kmo a merredelel a mla modik er a urerel, e ngika el odam er kid a dirk ngar er ngii a urerel.

8, 9. Ngoeak a ngera el rolel e ngsebeched el oukerebai er a reprist me a Relevait el nguu a Jehovah el mo blingeled?

⁸ A rebebil el mla er a chouaitia el blekeradel el sebechir el oriid a urerir a locha millatk el kmo, ‘Ngmekera e sebechek el mo kutmokl a ngerechelek el kirel a ongalek er ngak?’ (1 Timoteus 5:8) Me a obla mchelebangel er a chouaitia el omelsemai me a lak, e ke locha medengei el okiu a tekoi el dilubech el eko er kau el kmo, a Dios a diak lechiteterir a rechad el Ngii a blingelir, e mla rullii a omesiungir el mo er ngii el mo kot er a klengar er tir. Me a Jesus er a ledu er a redisaiplo er ngii el mo osiik er a renged el kot, e ngtilbir el mo er tir el kmo a Dios a mo mesterir aike el lousbech, el kelir, me a imelir, me a bilir.​—Matteus 6:33.

⁹ Ka molatk er a Relevait el dimlak lengai a dikesir er a beluu. A bliochel el omengull a mle ngaruchei el ngerechelir me ngmle kirir el ultuil er a Jehovah el kirel aike el lousbech e le ngdilu er tir el kmo: “Ngak a blingelem.” (Ulecherangel 18:20) Me kid er chelechang a diak dosiou el ngar er a templo el ua reprist me a Relevait, engdi ngsebeched el oukerebai er sel blekerdelir el mle ultuil er a Jehovah. A klaumerang er kid er a klisichel a Dios el omeskid aike el dousbech a mengal mo klou a ultutelel sel lolekeed a ulebongel er aika el uriul el sils.​—Chocholt 13:17.

Mosiik er a Llemeltel a Dios el Kot

10, 11. Te milekerang a rebebil e otuil a klaumerang er tir er a Jehovah el kirel a urerir? Mochotii a ta er a kerebai.

¹⁰ A Jesus a dirrek el milengelechel er a redisaiplo er ngii el ‘momuchel losiik ra llemeltel’ a Dios. (Matteus 6:33) Tia belkul a kmo kede ngmai a llechul a Jehovah el kirel a ungil me a mekngit el mo er uchei er a llecherir a rechad. (Monguiu er a Isaia 55:8, 9.) Ke locha medengei el kmo a ngar er a mong, e a rebebil el chad a millalem e olterau a dekool, e ullisechakl er a rebebil el kirel a mekemad, e mirruul e dirrek el ulelterau a klekedall er a mekemad. Engdi uriul er a lesubii a klemerang, e a rebetok er tir a millodech a urerir me ngmlo sebechir el mo metecholb el Kristiano.​—Isaia 2:4; 2 Korinth 7:1; Galatia 5:14.

¹¹ A Andrew a ta er a ungil el kerebai. Ngii me a bechil er a bo lodengelii a Jehovah, e te tilib a rengrir el mo mesiou er ngii. A Andrew a kmal mle soal a urerel engdi ngkilengei el mo diak loureor. E ngera uchul? E le sel urerel a mle teloi er a cheldebechel el milengetmokl el kirel a mekemad, e ngii a mle soal el nguu a llemeltel a Dios el mo kot. Me sera bo lak loureor, e ngmla er ngii a reteru el ngelekel, e dimlak a kerrekerengel, e mla er ngii a udoud el sebechir el ousbech el kesai el buil. Ngar er a osengir a rechad, e ngii a ua lekea ‘dikesel.’ Me ngulsiik er a urerel, e otuil a klaumerang er ngii er a Dios. Me chelechang, e ngsebechel el melekoi el kmo, ngii me a ongalek er ngii a kmal oumerang el kmo a chimal a Jehovah a diak el kedeb. (Isaia 59:1) Tir el melemolem el omekbeot er a klengar er tir a uchul me a Andrew me a bechil a mla er ngii a techellir el ngar er a mui el taem el omesiou. Me ngdilu el kmo: “A lebebil er a taem e ngmlo suebek a rengmam el kirel a udoud me a blai me a klisichel a bedengam me kemam el mechudelang. Engdi a Jehovah a mle blechoel el omekerreu er kemam. . . . Me ngkmal sebecham el melekoi el kmo a dosiou er a Jehovah a kot el chetengakl e klou a ultutelel el ureor el sebechel a chad el rullii.”​—Olisechakl 12:13.

12. Ngera el blekeradel a dousbech er ngii a dosiik er a llemeltel a Dios el kot? Mouchais a bebil el kerebai er a beluam.

 ¹² A Jesus a dilu er a redisaiplo er ngii el kmo: “A lsekum ngngarngii er kemiu choua di tal chiusel a meringel el kloumerang, e cho molekoi er tial rois el kmo, ‘Mengukl er tia el mor sei,’ e ngmengukl; me nguaisei el diak a tal tekoi el diak lak el sebechiu.” (Matteus 17:20) Kau ke mo kongei el osiik er a llemeltel a Dios el kot a lsekum e ngmo uchul a ringel el kirem? A lsekum e ngdiak lulterekokl a rengum el kmo ngsebechem el rullii tia el tekoi, e bo mongedecheduch er a rebebil el chad er a ongdibel. A tekoi el dilubech el mo er tir el lochotii a rolel a Jehovah er a lengesuterir a ulterekokl el mo smisichii a klaumerang er kau.

Doureng a Saul el Kirel Aike el Lomeskid a Jehovah

13. Sel doruul aike el sebeched el mesiou er a Jehovah, e ngerang mo meskid?

¹³ A lsekum e ngmekreos er a rengum tia el techellem el mesiou er a Jehovah, e ngsebechem el oumerang el kmo ngmo meskau aike el rokui el mousbech, el di ua omerellel el mo er a Relevait. Ka molatk er a David. Alta e ngmla er a ii, engdi ngmle sebechel el ultuil er a Dios el mo omsa aike el lousbech. Kid me ngdirrek el sebeched el ultuil er a Jehovah er sel taem el sal mo chetituokel a tekoi el kired. Ka molatk er a Asaf er ‘ser a lebor a Templo’ er a Dios, e ngmlo sebechel el mtebengii sel tekoi el mle meringel er a uldesuel. (Psalm 73:17) Me kid me ngdirrek el kired el otuil a klaumerang er kid er a Jehovah el mo meskid aike el dousbech me lolemolem a klausechelei er kid el obengkel. E seikid e kede ochotii a omereng el saul er kid el kirel a techelled el mesiou er a Dios er a chelsel a ngii di el blekeradel el bo dechelebangel er ngii. A doruul el uaisei e kede rullii a Jehovah el mo blingeled.

14, 15. Ngkirel el mo ua ngerang a osenged er sel taem el lemengodech a klemedengei er kid el kirel a bebil er a bades, e ngera uchul?

¹⁴ Kau ke mo oumerang er a Jehovah sel lengesukau el mo medengei a “dmolech ra Dios” el tekoi el ngar er a Biblia? (1 Korinth 2:10-​13) Ngar er ngii a kot el ungil el kerebai er a blekerdelel a apostol el Petrus er sel taem el Jesus a dilu er a rulerrenges er ngii el kmo: “A lak bo monga techel a bedengel a Ngelekel a chad e molim a rsechel, e ngdiak a klengar ra chelsiu.” A rebetok el disaiplo a ulemdasu el kmo a Jesus a millekoi el kirel a techel a bedengel me a rsechel me te dilu el kmo: “Tia meringel lomelekoi; ngtecha sebechel lorrenges choua ikal tekoi?” Me te “chilitii el dimlekea lluut lobengkel el merael.” Engdi a Petrus a dilu el kmo: “Rubak, a ki mor techang? Kau cholab a tekoi ra diak a ullebengelel klengar.”​—Johanes 6:53, 60, 66, 68.

¹⁵ A Petrus a dimlak el lungil a klemedengei er ngii er sel tekingel a Jesus el kirel a bo longa techel a bedengel e lolim a rsechel. Engdi nguluumerang el kmo a Jehovah a ousbech er a Jesus el  mo ngosuterir a rechad el mo medengelii a klemerang. Me sel lemengodech a klemedengei er kid el kirel a klemerang er a Biblia er chelechang, e kau ke melasem el mo medengelii a uchul tia el omelodech? (Osisechakl 4:18) A rechad er a Borea er a kot el dart el rak a “mle blak a rengrir el melai a Tekoi, me te mlerriter a chedaol Llechukl ra bek el sils.” (Rellir 17:11) A doukerebai er a blekerdelir e ngkilungii a omereng el saul er kid el kirel tia el techelled el mesiou er a Jehovah, e nguu el mo blingeled.

Mo Bechiil el Di Ngar er a Rubak

16. Ngmekerang a Dios e mo blingeled el kirel sel omellach el ngar er a 1 Korinth 7:39?

¹⁶ A ta er a rolel el sebechir a Rekristiano el ochotii el kmo te melatk aike el moktek er a Dios a sel loltaut er a ulekrael er a Biblia el mo bechiil el di “ngara Rubak.” (1 Korinth 7:39) A rebetok a mla ngiltii el melemolem el diak bo el bechiil er a bai lolemall er tia el omellach er a Dios. Me a Dios a mo omekerreu er tirke el uaisei el chad. Ngmilekerang a David er sel taem er a di lengii el tang el diak a chad el mo ngosuir? Ngdilu el kmo: “Ak dmu er [a Dios] a ikel rokui el chetik; e ouchais er ngii a bek el chelebulek. Sel bo le mechitechut a renguk, e ke di medengelii a rolek.” (Psalm 142:1-3) A chouaike el uldasu a locha lulemelechesiu a profet el Jeremia, el ngii a mle mesobil el blak a rengul el mesiou er a Dios el betok el rak. Ngsebechem el mesuub el kirel a kerebil el ngar er a 8 el bliongel er sel babier el God’s Word for Us Through Jeremiah.

17. Ngmekerang a ta el mesobil el odos er kid a loutekangel aike el taem el lekora mo sabisi?

¹⁷ A ta el odos er kid er a beluu er a Merikel a melekoi el kmo: “Ngdimlak el telbilel a renguk el di melemolem el mesobil. Me ngsebechek el mo bechiil a lsekum e ak metik er a ungil el chad. A delak, el diak el ngar er a klemerang, a melasem el orrimel er ngak el mo bechil a ngii di el chad el semeriar er ngak. Me a kdilu er ngii el kmo ngmo ngerechelem a lsekum e ngmetemall a chebechiielek. Cherengel a taem, e ngmilsekak el ngar er ngii a urerek, e di mle ngak el omekerreu er ngak, e dmeu a renguk er a klengar er ngak. Me seikid, e ngmlo diak lorrimel er ngak el mo bechiil.” Ngika el odos a dirrek el lebebil er a taem e ngmo sabisi. Engdi ngmelekoi el kmo: “Sel bo el uaisei, e ak mle blechoel el ultuil er a Jehovah. E ngii a kmal diak lechitak.” Ngera mla ngosuir el mo ultuil er a Jehovah? Ngmelekoi el kmo: “A nglunguuch a ngosukak el mo medengei el kmo a Dios a mera el ngar er ngii el olengeseu er ngak me ngdiak di lengak el tang. Ngika el Kot el Ngarbab er a eanged me a chutem a orrenges er ngak, mak mekerang e diak kumelechesiu er ngak el dmeu a renguk e klou a ultutelek er Ngii?” Me ngii el odos el oumerang el kmo “a dorous e ngbai ngeltengat ra dolai” a uchul e ngmelekoi el kmo: “Ak melasem el olengeseu er a rebebil el diak kulatk el melai a omeksullek. Me sel kulebedebek el kmo, ‘Ak mekerang e ngosuir ngika el chad?’ e ngmo uchul a deuil a renguk.” (Rellir 20:35) Me nguaisei, el mla nguu a Jehovah el mo blingelel, e kmal dmeu a rengul er a techellel el mesiou er ngii.

18. Ngoeak a ngera el rolel, e a Jehovah a sebechel el rullau el mo blingelel?

¹⁸ Me a ngii di el blekeradel el mngar er a chelsel, e ngdirk sebechem el nguu a Dios el mo blingelem. E sel moruul el uaisei, e ke mo teloi er a rechedal el tir a dmeu a rengrir. (2 Korinth 6:16, 17) E seikid e ke mo blingelel a Jehovah, el ua rebebil el chad er a irechar. (Monguiu er a Duteronomi 32:9, 10.) Me ngdi ua Israel el mlengilt er a delongelel a betok el renged el mlo blingelel a Dios, me nguaisei e a Dios a sebechel el ngiltau el mo blingelel e mo omekerreu er kau.​—Psalm 17:8.

Ngmekerang a Omonger?

Ke mekerang e rullii a Jehovah el mo blingelem

• el oeak a omosiik er a Rengedel a Dios me a llemeltel el kot?

• el oeak a omoba omereng el saul el kirel aike el lomeskau?

• el oeak a omoltirakl er a omellach er Ngii el mo bechiil el di ngar er a Rubak?

[Aike el Ker er a Suobel]

[Blurb el ngar er a 16 el llel]

A Jehovah a mo blingeled sel denguu a omesiungel el mo kot er a klengar er kid

[Siasing el ngar er a 17 el llel]

A kerebil a Jeremia a kmal melisiich er kid