¿Herenciantsiktanöku Jehoväta katsintsik?

“Diospa mandaquinincho cawaquillatana, y pe munashqanno allicunata rurellatana tirayë. Tseno cawacuyaptiqueqa, manam janapita, ni pachapita jipayanquitsu.” (MAT. 6:33.)

1, 2. a) ¿Pikunapaqtaq Galatas 6:16 “Diospa rasonpa israel” nunankuna nirqa parlëkan? b) ¿Pikunataq kayan Mateo 19:28 textochö “chunca ishque israel casta” nunakunaqa?

BIBLIACHÖ Israel palabrata tarirqa, ¿imapaqtaq yarpärintsik? Itsa yarpärintsik Isaacpa tsurin Jacob y mirënimpita yarqoq nación tsë shutipa reqishqa kanqanman. Pero hina Bibliachöqa “Diospa rasonpa israel nunancunata” o ciëlota ewaqpaq kaq 144.000 akrashqakunatapis tsë shutipam qayan, pëkunataqa Jehovämi santo espïritunwan akrashqa ciëlochö reynö y sacerdötenö sirveyänampaq (Gal. 6:16; Apo. 7:4; 21:12). Pero Mateo 19:28 textochö “chunca ishque (12) israel casta” nunakuna nirqa hukkunapaqnam parlëkan. Këkunapita yachakurishun.

² Jesusmi kënö nirqan: “Rasontam niyaq: Que munducho imecapis mushoqman ticranan junaqmi, y Diospita Shamushqa Nuna poderninwan mandacur tacurinan junaqmi, qatirämaqcunaqa alli täcunacunaman tëcur, chunca ishque (12) israel casta nunacunata jusgayanqui”. ¿Kë versïculochö “chunca ishque israel casta” nirqa pikunapaqtaq parlëkan? Tsënö nirqa parlëkan Jesuspa discïpulonkuna juzgayänampaq kaq y huk shumaq paraïsochö kawakuyänampaq kaq nunakunapaqmi. Pëkunam 144.000 sacerdötekunapita yanapakïta chaskiyanqa.

3, 4. ¿Imatataq ciëlota ëwaqpaq kaqkuna yachatsimantsik?

³ Ciëlota ewaqpaq kaq cristiänokunaqa unë levïtakunanö y sacerdötekunapanömi Jehoväta servïta alläpa kuyayan (Núm. 18:20). Pëkunaqa manam kë Patsata herenciankuna Jehová qonantatsu shuyaräyan. Pero Apocalipsis 4:10, 11 ninqannömi Jesuswan paqta reykunanö y sacerdötekunanö mandakamïta shuyaräyan y Jehoväta imëpis servïta (Eze. 44:28).

 ⁴ Pero kë patsachö këkar-raqqa, ¿imanötaq herenciankuna Jehová kanqanta rikätsikuyan? Imanöpis kawakuyanqanwanmi, pëkunapaqqa manam imapis kantsu Jehoväta servinöqa. Hinamampis markäkuyan Jesucristu wanunqanmanmi, y mandakunqantam rurayan. Tsënöpam pëkunaqa musyayan ‘Diosnintsic qayanqanta y acrashqanta’ (2 Ped. 1:10). Pero manam llapampaqtsu fäcil-lla Jehoväta servinanqa, tsënö kaptimpis, tukï hipakïkunapa pasayanqampitaqa manam qelanäriyantsu. Tsëpa rantinqa llapan puëdeyanqanmannömi Jehoväta serviyan. Pëkuna rurayanqampitaqa kë patsachö mana wanushpa kawëta shuyaraqkunapis yachakïta puëdentsikmi.

5. ¿Imatataq rurashun Jehoväta herenciantsiktanö katsinapaq y imanirtaq kë rurananqa ajaraq o sasaraq?

⁵ Llapan cristiänokunam ciëlopaq kar o Patsapaq karpis Jesus mandakunqanta cumpliyänan, kënömi nirqan: “Pipis qatirämaqnï queta munarnenqa, quiquinpa muneninta jaqiricur, crus [“qeru”, NM] apaqno noqata qatimätsun” (Mat. 16:24). Y tsënömi, shumaq paraïsochö kawëta shuyaraqkunaqa Jehoväta servikäyan y Cristu ruranqanta qatikäyan. Wallka wallkalla rurayänampa rantinmi, llapan puëdeyanqannö Jehoväta serviyan. Wakinkunaqa precursor regularnö serviyänanrëkurmi wallkallawan kawayänampaq churapakäyan. Wakinkunanam precursor auxiliar kayan atska killakunapa. Y wakinkunanam precursor këta mana puëderpis llapan puëdeyanqanman yachatsikuyan. Jesuspa peqanman pukutaq aceiteta hichaq Marïanömi kayan. Kë warmi kënö ruranqampita, ¿imataq nirqan Jesus? Kënömi nirqan: “Noqapaqqa allapa allitam rurashqa. [...] Que warmeqa puedenqanmannomi noqapaq rurashqa” (Mar. 14:6-8). Rasun kaqchöqa, Satanaspa makinchö këkaq mundochöqa Jehoväta servinan manam fäciltsu. Tsënö kaptimpis llapan puëdenqantsiktam rurantsik y markäkuntsikmi ciëlochö këkaq teytantsikman. Rikärishun tsëpaq chusku yachatsikïkunata.

“Diospa mandaquinincho cawaquillatana” ashishun

6. a) ¿Imanirtaq nishwan kë mundochö nunakunapa herenciankunaqa kë kawëllachö kanqanta? b) ¿Imanirtaq Davidnö pensëqa yachaq kë kanman?

⁶ Jesusqa discïpulonkunata yachatsirqan Diospa gobiernonta y alli rurëninta puntata ashiyänampaqmi. ¡Imanö hukläyam kayan kë mundochö kawaq nunakunapitaqa! Tsë nunakunapa herenciankunaqa kë kawëllachömi (lei Salmo 17:1, 13-15 *). Awmi, kamaqninkunaman yarpayänampa rantinmi pëkunaqa imëkayoq këllapaq, familiayoq këllapaq y wambrankunata atska qellëta herenciankuna qoyllapaq yarparäyan. Pero noqantsikqa Davidnö këtam munantsik. Pëpaqqa alläpam precisarqan Jehoväpa rikënimpaq “alli shutiyoq” kë, tsënö rurayänampaqmi wambran Salomonpis nirqan (Ecl. 7:1). Asafnömi Davidpis alli musyarqan Jehoväpa amïgon kënöqa imapis mana kanqanta. Kanan witsan cristiänokunapis tsënölla pensarmi kikinkunapa rurëninkunata haqirir Jehoväpa kaqta puntaman churayan.

7. ¿Ima bendiciontataq huk cristiano chaskirqan Diospa mandakïninllachö kawakïta ashinqampita?

⁷ Rikärishun República Centroafricana nishqanchö täraq kima wambrayoq congregacionpa ancianon Jean-Claude pasanqanta. Huk hunaqmi trabajonchö jëfen willarirqan huk turnochöna trabajanampaq kaqta, y llapan semänakunam ampipa trabajanan karqan seis mediapita qallëkur. Yarpänantsikmi tsë markachö trabajo mana kaptin nunakunaqa trabäjonkunata  mana oqrëta munar tukïta rurayanqanta. ¿Ima nirqantaq Jean-Claude? Jëfentam nirqan familian mantenilla mana kanqanta, sinöqa, Diospita yachatsikï y congregacionpaqpis ruranan kanqanta. Jëfenqa shinchipam kënö nirqan: “Atska suerteyoqmi kanki, tsëmi këchö trabajëkanki. Más alliqa kanman warmikita, wambrëkita y tukï problemëkitapis haqirinqëkim. Emprësapaq alli trabajë y wakin kaqkunataqa qonqari. Qammi akranëki, religionnikita kar o trabäjïkita karpis”. Pë pasanqampa pasëkarqa, ¿imataraq rurashwan karqan? Jean-Claude nunaqa alleqmi markäkurqan trabäjonta oqraptinqa Jehová pëta cuidanampaq kaqta. Tsëmi Jehoväpaq rurëninkunata haqirqantsu familianta Dios cuidananman markäkur. Reunión hora chäramuptinqa imëpis ruranqannömi ëwarqan, tsëpitanam alistakurqan trabäjonman ëwanampaq, qarquyänanta o mana qarquyänanta mana musyëkarpis. Tsëllanam telëfonopa qayarir willariyarqan jëfenta qarquriyanqanta. Kë cristiano mayintsikqa manam trabäjonnaqtsu quedarqan.

8, 9. ¿Imanötaq sacerdötekunanö y levïtakunanö Jehová herenciantsik kanqanta rikätsikushwan?

⁸ Atskaq cristiänokunam trabäjonkunata oqrariyänanna kaptin kënö tapukuyashqa: “Trabäjonnaq karqa, ¿imanöraq familiäta mantenishaq?” (1 Tim. 5:8). Tsënöpa pasashqa kar o manapis alleqmi musyantsik herenciankunatanö katseqkunata y pëta servita kuyaqkunataqa Jehová mana haqinqanta. Itsachi Jesus kënö ninqanta alleq musyantsik kikintsikpis pasashqa karnin: “Peru qamcunaqa Diospa mandaquinincho cawaquillatana, y pe munashqanno allicunata rurellatana tirayë. Tseno cawacuyaptiqueqa, manam janapita, ni pachapita jipayanquitsu” (Mat. 6:33).

⁹ Leví kastapaq yapë yarpärishun. Pëkunapaqqa manam ima chakrapis herenciankunapaq karqantsu. Tsënö kaptimpis Jehoväta serviyanqampitam pë cuidarqan, kikinmi nirqan: “Noqam qampa kaqqa kä y herenciëkipis” (Núm. 18:20). Nuna ruranqan templochö Diosta mana servirnimpis, sacerdötekunanö y levïtakunanömi Dios imëkantsikkuna qomänapaq kaqman markäkunantsik. Kë tiempopa ushakënin masna chëkämuptinmi, kënö markäkïyoq këqa alläpa precisan (Apo. 13:17).

“Allicunata rurellatana” ashishun

10, 11. ¿Imanötaq wakin nunakunaqa Jehoväman markäkuyanqanta rikätsikuyashqa? Willakaramï.

¹⁰ Hina Jesusqa qateqninkunatam nirqan alli rurëkunallatana ashiyänampaq (Mat. 6:33). Tsëmi, imapis alli kanqanta o mana alli kanqanta musyëta munarqa, Jehová ninqannö rurëta tïrantsik y manam nunakuna niyanqannötsu (lei Isaías 55:8, 9 *). Más musyarinapaq këman yarpärishun. Manaraq Bibliapita yachakurninmi, wakin nunakunaqa cocata muruyaq o rantikuyaq, guërrapaq armakunata rurayaq y guërrakunachö peleayänampaq yachatsikuyaq. Pero Bibliapita yachakurirqa tsë trabäjonkunata haqiyashqam y bautizakuyashqam (Isa. 2:4; 2 Cor. 7:1; Gal. 5:14).

¹¹ Tsënö nunakunam karqan Andrew. Pëmi Bibliapita warminwan estudiar qallëkuyarqan y Diosta serviyänampaqmi churapakäriyarqan. Trabäjonwan kushishqa këkarpis haqirirqanmi. ¿Imanir? Gobiernokunaman qaqë mana alli kanqanta Biblia yachatsikunqanwan mana igualaptinmi y Dios munanqannö alli rurëllatana rurëta munarmi. Trabäjonnaq quedariptinqa wallka killakunallapaqmi wambrankunata mikïninkuna qaranampaq qellënin tinkurqan. Huk parlakïchöqa levïtakunanömi tikrarirqan, manam imampis kapurqantsu. Pero Jehovämanmi markäkurqan y trabajo asheqmi yarqurqan. Tsëpita, ¿imanötaq kë familia karqan? Rikäyashqam “Jehoväpa makin” hatun kanqanta (Isa. 59:1). Pero manam tsëllatsu, kayäpunqanllawan kawarmi, Andrewwan familianqa llapan tiemponwan Jehoväta serviyashqa. Pëmi kënö nin: “Yarpachakuyarqömi qellënïkuna pishiptin, wayipaq, saludnïkunapaq y edadna kayanqäpaqpis. Pero Jehoväqa imëpis yanapëkäyämashqallam. Unë kawënïkunata warmïwan yarparqa, rikäyämi Jehoväpaq trabajë y bendicionkunata chaskinöqa ima trabäjopis mana kanqanta” (Ecl. 12:13). *

12. ¿Imatataq wanantsik imëpis Dios munanqannö alli kaqllata ruranapaq? Markëkichö pasakunqankunata willakaramï.

 ¹² Jesusmi nirqan: “Sitsun marcäquiniquicuna canman mostasa muruno ichicllanllapis; que jircata ‘Juc laduman witicurï’ niyaptiquipis, que jirca witicurinmanmi, y imapis ruracärinmanmi” (Mat. 17:20). Kënö Jesus ninqanman yarparmi tapukushwan: “¿Dios munanqan allikunallatatsuraq ashikäshaq sasa o aja kawëkunapa pasanä kaptimpis?”. Tsëta rurëta mana puëdeqnö karqa, ¿imanirtaq wakinkunata tapupärintsiktsu Jehová imanö yanapanqantapis willaramänapaq? Willaramanqantsikqa markäkïnintsiktam sinchiyätsinqa.

Qaramänantsikpaq Dios churamunqankunata valorashun

13. ¿Imamantaq markäkuyan Jehoväta sirveqkunaqa?

¹³ Jehoväta sirveqkunaqa levïtakunatanöllam markäkuyan Jehová cuidanampaq kaqta. Y manam röpankuna y mikïninkunallatsu qonqa, sinöqa palabrampitapis yachatsinqam. Davidman yarpärishun: huk machëpa más rurinchö këkarnimpis Jehoväpa yanapakïnintaqa chaskikarqallam. Noqantsikpis tsënöllam markäkunantsik problëmantsikkuna mana altsakaqnö kaptimpis. Y ama qonqashuntsu Asaf ruranqanta. Pëqa “Diospa shumaq templonman” yëkurirninmi yarparëninkunata huknöpana rikar qallëkurqan (Sal. 73:17). Tsënöllam noqantsikpis Jehoväpa kaqchö tarishun pë yanapamänata ashirqa. Tsënöpam rikätsikushun imëka pasakuptimpis pëta adorëno y herenciantsiktanö katsiqa imapis mana kanqanta.

14, 15. Bibliata más entienderirna punta yachatsikïkunata huknöpana yachatsikayämuptin, ¿imanötaq rikashwan y imanir?

¹⁴ Höraqa “Dios Yayapa yachayninchö imayca pacaraycagnö llapan mana regengantsicta[m]” musyaratsimantsik (1 Cor. 2:10-13). ¿Imanötaq rikantsik punta yachatsikïkunata más huknöpana Jehová palabranwan yachatsimanqantsikta? Pëdrunömi kanantsik. Huk kutim wiyaqninkunata Jesus kënö nirqan: “Diospita Shamushqa Nunapa etsanta mana micorqa y yawarninta mana uporqa, manam wiñe caweta tariyanquitsu”. Wakin nunakunaqa tsë yachatsikïta alleq mana entiendermi kënö niyarqan: “Que yachatsiconqanqa allapa sasataq. ¿Piraq tseta wiyarpis cäyinman!”. Tsëpitanam, “Jesusta jaqiricur eucuyarqan”. Pero Pëdruqa kënömi nirqan: “Teyta, ¿pimanraq ewallayäshaq? ¡Qamllataq parlanqui wiñe cawaquipaq!” (Juan 6:53, 60, 66, 68).

¹⁵ Rasumpa kaqchöqa, kë apostolqa manam entienderqantsu ëtsäta mikoq kaq y yawarnïta upoq kaq nir Jesus yachatsikunqanta. Pero tsënö karpis manam yarpachakurqantsu, Diosnintsik imanöpis yachatsinampaq kaqta musyarnin. Y noqantsikqa, ¿imanötaq rikantsik punta yachakunqantsikta huknöpana yachatsikarayämuptin? ¿Musyëtaku tïrantsik Bibliata más entienderirna huknöpana yachatsikayämunqanta? (Pro. 4:18.) Apostolkuna kawayanqan witsan Berea markachö täraq nunakunanömi kanantsik, pëkunaqa “cushicurmi chasquiyarqan tse alli willaquicunata. Y cada junaqmi estudiayarqan Diospa palabranta” (Hech. 17:11). Pëkunanö rurarqa masmi kuyashun Diosnintsikta servita y herenciantsiktanö katsitapis.

“Creyicoq nunallawan” casakï

16. ¿Imataraq rurashwan 1 Corintios 7:39 ninqanta cumplinapaq y Jehoväta herenciantsiktanö katsinapaq?

¹⁶ Wakin cristiänokunaqa Jehoväta respetayanqantam rikätsikuyashqa soltera quedakuyänan kaptimpis “creyicoq nunallawan” casakï nir Biblia mandakunqanta wiyakurninmi (1 Cor. 7:39). Llapankunam markäkuyänan Jehová kuyananman y cuidananman. Hinamampis hapallankuna sientekuyanqan hora y qelanäyanqan höram Jehoväta ashiyänan y willayänan llapan yarparëninkunata David ruranqannö, pëmi nirqan: “Llapan yarpachakïnïkunatam pëta willëkarqä, llapan llakikïnïpaqmi parlapëkarqä, kikïchö espïritü wanunäriptin” (Sal. 142:1-3). Itsachi Jeremïaspis tsënö sientekurqan, porque tsë witsan Jehoväpa rurëninta ruraptinqa manam majan karqantsu yanapanampaq. Pëpita shumaq willakïkunataqa tarintsik Dios nos habla mediante Jeremías nishqan libropa 8 kaq capïtulonchömi.

17. ¿Imatataq huk cristiana ruran hapallanlla kar llakikunqan höra?

 ¹⁷ Estados Unidos nacionchö täraq huk cristiänam pasanqampita kënö willakun: “Manam hapallä quedakïta munartsu, sinöqa shuyarëka noqapaqnö kaq ollqutam casakunapaq. Mamänïqa manam Testïgotsu, tsëmi imëkanöpapis creitsimëta munarqan, pipis niramaptinqa tsëwan casakunäpaq. Pero noqanam tapurirqä: ‘Punta niramaq kaqwan casakuriptï, casado kawakïnï mana alli yarquriptinqa, ¿qamtsuraq altsamunkiman?’. Tiempowanqa cuentata qokurirqanmi hapallä cuidakïta yachanqäta, trabäjö kanqanta y këkanqänö kushishqa kanqäta. Tsëpitaqa manam tsëpaq más parlapamarqannatsu”. ¿Imatataq kë cristiana ruran hapallan kar llakikunqan höra? Kikinmi kënö nin: “Jehovächömi tsapäkïnï ashï. Y pëqa manam imëpis haqïmantsu”. ¿Imataq yanapashqa Diosman markäkunampaq? Kikinmi hina nin: “Mañakunqämi. Mañakurqa yarpärïmi Dios rasumpa kanqanman y imëpis lädochö këkanqanman. ¿Imanirtaq kushishqatsu käman Ciëlochöpis y Patsachöpis reywan junto këkarqa?”. Awmi, pëpaqqa “qaraquimi mas cushiqueqa chasquir cushiquipitapis” y tsëmi kënö nin: “Wakinkunatam yanapëta tïrä pëkunapita imatapis mana shuyarashpa. Imëpis yarparämi, ‘¿imataraq këpaq o wak nunapa ruräman nir?’ alläpa kushishqam sientekö” (Hech. 20:35). Rasumpam rikakan kë cristiana Jehoväta servita y herenciatanö katsita alläpa kuyanqanta.

18. ¿Imanötaq noqantsikpis Jehoväpa herencian tikrarishwan?

¹⁸ Imëkakunapa pasarpis Jehovätaqa herenciantsiktanö katsita puëdentsikmi. Tsënöpam imawampis mana igualaq Jehoväpa markanchö kashun (2 Cor. 6:16, 17). Hina noqantsikpis unë nunakunanömi Jehoväta katsishun, manam herenciantsiktanöllatsu, sinöqa noqantsikpis pëpa herencianmi kashun (lei Deuteronomio 32:9, 10 *). ¡Imanö kushikïpaqmi unë Israel markantanö alläpa väleq tesöronkunatanö cuidamänantsikta musyëqa! (Sal. 17:8.)

[Päginapa ura kuchunchö willakïkuna]

¿Imatataq yachakurquntsik?

Këkunachö Jehoväta herenciantsiktanö imanö katsinqantsikta willakaramï:

• Diospa mandakïninta y alli rurëninkunata puntaman churëchö

• Akranqan nunakunawan Diosnintsik yachatsimanqantsikpita agradecikunqantsikchö

• Diosman “creyicoq nunallawan” casakunapaq Biblia mandakunqanchö

[Yachakunapaq kaqpa tapukïninkuna]

[15 kaq päginachö ninqan]

Jehoväpa kaqta puntaman churarmi pëta herenciantsiktanö katsintsik

[18 kaq päginachö dibüju]

Jeremías ruranqanmi yanapamantsik