¿Jehová Diosqa herencianchikchu?

“Puntataqa maskaychik Diospa munaychakusqantawan paypa munasqan allin ruraytayá hinaptinqa qosunkichikmi tukuy ima pisipusuqnikichikta” (MAT. 6:33).

1, 2. a) Galatas 6:16, NM ‘Diospa Israelninmanta’ rimaspan, ¿pikunamantam rimachkan? b) Mateo 19:28 ‘chunka iskayniyoq Israel ayllukunamanta’ rimaspan, ¿pikunamantam rimachkan?

¿IMAPIM piensanchik Israel rimayta Bibliapi leespanchik? Yaqapaschá piensanchik Diospa serviqnin Jacobpi otaq mirayninmanta kaq nacionpi. Ichaqa manam paykunallamanta rimananpaqchu Bibliaqa servichikun. Servichikuntaqmi ‘Diospa Israelninmanta’ otaq hanaq pachapi reykuna hinaspa sacerdotekuna hina servinankupaq akllasqa 144.000 cristianokunamanta rimananpaq (Gal. 6:16, NM; Apo. 7:4; 21:12). Chaymantapas Mateo 19:28 nisqanpim riman ‘chunka iskayniyoq Israel ayllukunamanta’. Kaymanta astawan qawasun.

² Jesusmi nirqa: “Tukuy imapas mosoqyanan tiempopi Diosmanta hamuq Runa achkirichkaq tiyanaypi tiyaykuptiymi qatiqniykunapas tiyaykunkichik chunka iskayniyoq hatun tiyanakunapi hinaspam juzgankichik chunka iskayniyoq Israel ayllukunata”, nispa. Kaypi nisqanman hina, ¿pikunataq kanku ‘chunka iskayniyoq Israel ayllukunaqa’? Paykunaqa kanku hanaq pachaman riq cristianokunawan juzgasqa kanankupaq runakunam, hinaspam kay Pachapi wiñaypaq kawsanqaku. Llapallankum 144.000 akllasqa cristianokunapa yanapakuyninta chaskinqaku.

3, 4. ¿Imaynatam hanaq pachaman riqkunaqa qawachinku Jehová Dios herencianku kasqanta?

³ Leviy castakuna chaynataq sacerdotekuna hinam, hanaq pachaman rinankupaq suyakuyniyoq cristianokunaqa anchata chaninchanku Jehová Dios serviyninkuta (Num. 18:20). Paykunaqa manamá suyankuchu kay Pachapi allpata Dios qonantaqa. Ichaqa anchatam munanku Jesuswan kuska hanaq pachapi reykuna hinaspa sacerdotekuna kayta, hinaspam Apocalipsis 4:10, 11 nisqanman hina Jehová Diosta servinqaku (Eze. 44:28).

 ⁴ Kay Pachapi kaspankuqa, ¿imaynatam qawachinku Jehová Dios herencianku kasqanta? Imayna kawsasqankuwanmi qawachinku Dios serviyninku imamantapas ancha allin kasqanta. Iñinkutaqmi Jesucristopa wañukusqanpi hinaspapas kasukunkum kamachisqankunata. Chaynata ruraspankum Dios qayasqantawan akllasqanta mana chinkachinkuchu (2 Ped. 1:10). Manamá llapallankuchu atinku wakinkuna hina Jehová Dios serviytaqa, chayna kaptinpas tukuy sonqonkuwan servinankupaqmi kallpanchakunku. ¡Mayna qatipakunapaqmi paykunaqa kanku!

5. ¿Imatam rurananchik Jehová Dios herencianchik kananpaq, hinaspa imanasqam sasa?

⁵ Lliw cristianokunam Jesuspa kayna nisqanta kasukunanchik: “Pipas qatiwayta munaspaqa amaña kikillanpaq kawsaspayá ñakaristinpas qatiwachun”, nisqanta (Mat. 16:24). Chaynatam ruranku kay Pachapi kawsayta munaq millonnintin runakuna. Paykunaqa tukuy sonqonkuwan Diosta servinankupaqmi atisqankuman hina kallpanchakunku. Achkamá ima rurasqankutapas saqespanku precursor kanku. Wakinñataqmi achka killakuna precursor auxiliar hina servinku. Wakinkuñataqmi precursor kayta mana atispankupas anchata kallpanchakunku predicanankupaq. Paykunaqa Jesusman miski asnaq aceiteta talliq Maria hinam kanku. Chay rurasqanmantam Jesusqa kaynata nirqa: “Payqa allintam rurarun ñoqapaq [. . .]. Kay warmiqa tukuy atisqantam rurarun”, nispa (Mar. 14:6-8). Arí, wakinpiqa manamá munasqanchikman hinachu Jehová Diostaqa servinchik, Satanaspa munaychakusqanpi kawsasqanchikrayku. Chayna kaptinpas tukuy atisqanchiktam ruranchik hinaspa Diospi hapipakunchik. Qawasun imakunapi chayna kanamanta.

Diospa munaychakuynintam puntata maskana

6. a) ¿Imanasqam nichwan kay pachapi kaqkunalla kunan tiempopi runakunapaq herencianku kasqanta? b) ¿Imanasqam qatipakunanchik Davidta?

⁶ Jesusmi qatiqninkunata yachachirqa Diospa Munaychakuynintawan allin rurayta puntata maskanankupaq. Ichaqa manam chaynatachu ruranku kunan tiempopi ‘mana allin runaqa’, paykunaqa kay pachapi kaqkunallatam herenciankuta hina qawanku (leey Salmo 17:1, 13-15). Unanchaqninkuta maskanankumantaqa aswanmi afanakunku tukuy imayoq, familiayoq hinaspa warmankuna achka qollqeyoq kanankupaq. Ñoqanchikmi ichaqa David hina kayta munanchik. Paypaqa ancha allinmi karqa Jehová Diospa qayllanpi allin qawasqa kaynin, chayna kanapaqmi churin Salomonpas nirqa (Ecl. 7:1, NM). Asaf hinam Davidpas cuentata qokurqa Jehová Diospa amistadnin kay imamantapas aswan allin kasqanmanta. Chaynatam kunan tiempopi achka cristianokunapas piensanku, chaymi Dios serviyninkuta imamantapas puntapi churanku.

7. ¿Imaynatam huk iñiqmasinchik Diospa Munaychakuyninta puntapi churasqanrayku chaskirqa?

⁷ Rimasun República Centroafricana lawmanta kimsa churiyoq Jean-Claude sutiyoq ancianomanta. Huk kutipim llamkayninpi kamachiq runa nirqa lunesmanta domingo punchawkama sapa tutaña llamkananpaq. Chay lawpiqa manataqmi ancha llamkayqa kanchu, chaymi runakunaqa tukuyta ruranku hinalla llamkapakunankupaq. ¿Imatam rurarqa chay iñiqmasinchikqa? Chay kamachiqninmanmi nirqa mikunanpaq llamkaspanpas, familiantawan iñiqmasinkunata iñiyninkupi yanapanamanta. Hinaptinmi chay kamachiqnin nirqa: “Qampaqa llamkayllaykipas kanmi. Allinmi kanman warmikita, churikikunatawan imapas llakichisusqaykikunata saqeynikiqa. Llamkaynikiman hapipakuspayá imatapas qonqay. Qanmi akllakunayki: religionnikitachu icha llamkaynikitachu”, nispa. Pay kaspaqa, ¿imatam rurachwan karqa? Kay iñiqmasinchikqa llamkayninmanta wischurachikunan kaptinpas, manam iskayrayarqachu Jehová Dios yanapananmantaqa. Chaymi Dios serviyninpi hinalla kallpanchakurqa familianta yanapananta  suyaspan. Huñunakunanpaq punchaw chayaramuptinmi payqa hinalla huñunakuyninman rirqa, hinaspapas llamkayninman rinanpaqmi allichakuyta qallaykurqa. Hinaptinmi qonqayllamanta telefonon waqayta qallaykamurqa, hinaspam willaykurqaku kamachiqnin runata qarqorusqankumanta. Iñiqmasinchikqa manamá llamkayninmanta qarqosqachu karqa.

8, 9. ¿Imaynatam qawachinchik Leviy castakuna hina Jehová Dios herencianchik kasqanta?

⁸ Achka iñiqmasinchikkunam chaynapi tarikuspanku tapukurqaku: “Llamkayninmanta wischuruwaptinkuqa, ¿imaynatam familiayta mantienesaq?”, nispa (1 Tim. 5:8). Chaynapi tarikuspanchikpas, yachanchikmi Jehová Dios herencianchik kaspan haykapipas mana saqewananchikmanta. Yaqapaschá kikinchikpas vidanchikpi qawarqanchik Jesuspa kayna nisqan cheqap kasqanmanta: ‘Puntataqa maskaychik Diospa munaychakusqanta [. . .] hinaptinqa qosunkichikmi tukuy ima pisipusuqnikichikta’ (Mat. 6:33).

⁹ Kaqmanta rimasun Leviy castakunamanta. Paykunaqa manam ima allpatapas herenciata hinaqa chaskirqakuchu. Chaywanpas Diospa santuarionpi servisqankuraykum, Jehová Diosqa kaynata nirqa: “Ñoqam kasaq tocanciayki chaynataq herenciaykipas”, nispa (Num. 18:20). Ñoqanchikqa manamá Diospa santuarionpichu servinchik, chayna kaptinpas allinmi kanman Leviy castakuna hina Jehová Dios imapipas yanapawananchikta suyayqa. Chayna iñiyniyoq kayqa ancha allinmi tukupay punchawkunapi kasqanchikrayku (Apo. 13:17).

Diospa munasqan allin ruraytayá puntata maskasun

10, 11. ¿Imaynatam wakin iñiqmasinchikkunaqa Jehová Diospi confiasqankuta qawachirqaku?

¹⁰ Jesusqa nirqataqmi Diospa munasqan allin rurayta qatiqninkuna puntata maskanankupaq (Mat. 6:33). Chaymi imapas allin otaq mana allin kasqanmanta yachanapaqqa, runakunapa niwasqanchikman hina ruranamantaqa Jehová Diospa niwasqanchiktam kasukuna (leey Isaias 55:8, 9). Qawasun, wakin iñiqmasinchikkunam manaraq Bibliata estudiachkaspanku cocata tarpuqku otaq rantikuqku, armakunata ruraqku otaq rantikuqku, wakinpiñataqmi militarkuna karqaku. Ichaqa cheqapmanta yacharuspankum chay rurasqankuta saqerurqaku hinaspam bautizakururqaku (Isa. 2:4; 2 Cor. 7:1; Gal. 5:14).

¹¹ Chaytam rurarqa Andrew, paymi señoranwan Bibliata estudiaspan Dios servinanpaq tantearurqa. Llamkayninmanta ancha kusisqa kaspanpas saqerurqam. ¿Imanasqa? Payqa musyakurqam Bibliapa yachachisqanman hina llamkaynin mana allin kasqanta, hinaspam Diospa allin rurayninta puntapi churayta munarqa. Mana llamkayniyoq qeparuspanmi iskay churinkunata iskay-kimsa killakunalla mikuchinanpaq qollqeyoq karqa. Paykunaqa mana herenciayoq Leviy castakuna hinam tarikurqaku. Ichaqa Diospi hapipakuspanmi huk llamkayta maskaq rirqa. ¿Imapim tukurqa? Jehová Diospa yanapasqantam qawarqaku (Isa. 59:1). Aswanqa mana ancha kapuqniyoq kaspankum, Andrew hinaspa señoranqa tukuy tiemponkuwan Diosta servirqaku. Paymi nin: “Wakinpiqa hukmanyarqanikum qollqemanta, wasiykumanta, onqorunaykumanta hinaspa yuyaqyarunaykumantapas. Ichaqa Jehová Diosmi yanapawarqaku. [. . .] Ñawpaq tiempopi pasasqaykuta señoraywan yuyarispaykuqa, musyakunikum Jehová Dios serviyqa imamantapas aswan allin kasqanta”, nispa (Ecl. 12:13). *

12. ¿Imataq yanapawasun Diospa munasqan allin rurayta puntata maskanapaq? Yachasqayki lawpi pasakusqanta willamuy.

 ¹² Jesusmi qatiqninkunata nirqa: “Huk mostazapa muhun hinallapas iñiynikichik kaptinqa niwaqchikmi kay orqota: ‘Suchuy kaymanta waklawman’ nispa, hinaptinqa pasanmanmi. Manam imapas sasaqa kanmanchu”, nispa (Mat. 17:20). Chaymi llapanchik tapukunanchik: “¿Hinallachu Diospa munasqan allin rurayta puntapi churayman sasachakuykunapi tarikunay kaptinpas?”, nispa. Mana chayna kaptinqa, ¿imanasqam iñiqmasinchikkunata mana tapunkichu Jehová Dios imayna yanapasqanmanta? Willawasqanchikqa iñiyninchiktam kallpanchanqa.

Chaninchasun yachachiwananchikpaq servichikusqanta

13. ¿Imamantam mana iskayrayanmankuchu Jehová Diosta servinankupaq kallpanchakuqkunaqa?

¹³ Pipas Jehová Dios servisqankuta chaninchaqkunaqa segurom kananku Leviy castakunata hina Dios waqaychananmanta. Manam imapas necesitasqankullapichu yanapanqa, aswanqa iñiyninkupipas. Yuyarisun Davidmanta. Machay ukupi kachkaspanpas manam iskayrayarqachu Dios yanapananmantaqa. Chaynam ñoqanchikpas kananchik llumpay sasachakuypi tarikuspaqa. Asaftapas qatipakunanchikmi, payqa ‘Diospa santuarionman yaykuspanmi’ imayna piensasqanta cambiarqa (Sal. 73:17). Ñoqanchikpas Jehová Diosman asuykuspaqa iñiyninchikpim kallpanchasqa tarikusun. Chaynapim imaña kaptinpas qawachisun Dios serviyninchikta ancha chaninchasqanchikta hinaspa herencianchik kasqantapas.

14, 15. ¿Imaynatam qawananchik ima yachachikuymantapas qellqanchikkunapi aswan allinta entiendechiwaptinchik, hinaspa imanasqa?

¹⁴ Wakinpiqa ‘Diospa sonqonpi kaqkunamantam’ aswan allinta entiendechiwanchik (1 Cor. 2:10-13). ¿Imaynatam qawanchik Palabranta allinta entiendenapaq Diospa chayna yanapawasqanchikta? Apostol Pedro hinam kananchik. Huk kutipim Jesusqa uyariqninkunata nirqa: “Cuerpoyta mana mikuspaykichikqa chaynataq yawarniytapas mana tomaspaykichikqa manapunim kawsankichikchu”, nispa. Chaymi nisqanta cheqapta hina hapispanku wakinqa nirqaku: “Kaykuna rimasqanqa sasam. ¿Pitaq kaytaqa chaskinman?”, nispa. Chaymi “achkaq karunchakururqaku”. Pedrom ichaqa Jesusta nirqa: “Señor ¿pimantaq riymanku? Qampa rimasqaykiqa wiñay kawsay qokuqmi”, nispa (Juan 6:53, 60, 66, 68).

¹⁵ Pedroqa manamá allintachu entienderqa Jesuspa cuerpon mikunamantawan yawarnin tomanamanta nisqantaqa. Chaywanpas manam hukmanyarurqachu, payqa yacharqam Dios astawan yachachinanmanta. ¿Imatam nichwan ñoqanchikmanta? ¿Imaynatam qawanchik ima yachachikuymantapas qellqanchikkunapi aswan allinta entiendechiwaptinchik? ¿Entiendenchikchu imarayku chay rurakusqanmanta? (Pro. 4:18.) Ñawpaq tiempopi Berea llaqtayoq runakuna hinam kananchik, paykunam “gustollawanña Diospa palabranta uyarispanku sapa punchaw Bibliata estudiarqaku” (Hech. 17:11). Paykunata qatipakuspaqa, Dios herencianchik kasqantawan Pay servisqanchiktam anchata chaninchasun.

‘Señorpi iñiqllawan’ casarakuymanta

16. ¿Imatam rurananchik 1 Corintios 7:39 nisqanpi kamachisqanta kasukunapaq, chaynapi Dios herencianchik kananpaq?

¹⁶ Wakin iñiqmasinchikkunam sapallanku qepananku kaptinpas, Jehová Diospa munasqanta ruranku ‘Señorpi iñiqllawan’ casarakunankupaq Bibliapa kamachisqanta kasukuspanku (1 Cor. 7:39). Paykunaqa segurom kananku haykapipas Dios mana saqenanmanta. Sapallanku otaq hukmanyasqa tarikuspankuqa, Diosman asuykuspankum imayna tarikusqankuta David hina willakunanku, paymi nirqa: “Paypa qayllanpim ñakarisqaymanta willakullani. Hukmanyasqa kaspaymi willakullani”, nispa (Sal. 142:1-3). Wakinpiqa yaqapaschá Jeremiaspas chayna tarikurqa. Payqa  watantinmi solterolla Diosta servirqa. Paymantam astawan rimachkan Dios nos habla mediante Jeremías, qellqapa 8 yachachikuyninpi.

17. ¿Imaynatam huk iñiqmasinchik sapallan tarikusqanta atipan?

¹⁷ Estados Unidos lawpi yachaq soltera iñiqmasinchikmi nin: “Manam wiñaypaq solteralla kayta munaspaychu chayna kani. Aswanmi casarakunaypaq hina kaqta suyachkani. Jehová Diospi mana iñiq mamaymi hikutawarqa piwanpas casarakunaypaq. Hinaptinmi tapurqani: ‘casarakusqay runawan mana allinpi tukuruptiykuqa, ¿imatam rurawaq?’, nispa. Tiempopa risqanman hinam cuentata qokurqa llamkayniyoq kasqaymanta, kikiymanta nanachikusqayta hinaspa soltera kasqaywan kusisqa tarikusqaymantapas. Chaymi manaña hikutawarqañachu”, nispa. ¿Imatam kay iñiqmasinchik ruran sapallan tarikuspan? Paymi nin: “Jehová Diospim amparakuni. Payqa manam haykapipas saqewanchu”, nispa. ¿Imam yanaparqa Diospi hapipakunanpaq? Ninmi: “Diosta mañakusqaymi. Chayna rurasqayqa yuyarichiwanmi haykapipas Jehová Dios waqtaypi hina kasqanta. ¿Imanasqamá manaqa kusisqachu kasaq, tukuy Unanchaq Dioswan rimaspayqa?”, nispa. Arí, “ima chaskiqmantapas aswan kusisqaqa imapas qoqmi”, chaymi nin: “Pitapas mana imallapaq yanapanaypaqmi kallpanchakuni. Piensanim hukkunata imayna yanapanaymanta. Chaywanmi ancha kusisqa tarikuni”, nispa. (Hech. 20:35). Kay iñiqmasinchikqa anchatam chaninchan Dios servisqantawan herencian kasqantapas.

18. ¿Imaynatam ñoqanchikpas Diospa herencian kachwan?

¹⁸ Imayna tarikuspanchikpas, atichwanmi Jehová Dios herencianchik kanantaqa. Chaynapim Diospa llaqtan ukupi tarikusun (2 Cor. 6:16, 17). Chaymantapas, ñawpaq tiempopi Diospa serviqninkunapa hinam Jehová Diosqa herencianchik kanqa hinaspa ñoqanchikpas Paypa herencian kasunchik (leey Deuteronomio 32:9, 10). ¡Maynatam kusikunchik israelitakunata hina Diosninchik sapakamata herencianta hina waqaychawananchikmanta! (Sal. 17:8.)

[Willakuy]

¿Imatam yacharunchik?

Imaynatam Jehová Dios herencianchik kasqanta kaykunapi qawachinchik:

• Munaychakuynintawan paypa munasqan allin rurayta puntata maskaspa

• Yachachiwananchikpaq servichikusqanta chaninchaspa

• ‘Señorpi iñiqllawan’ casarakunapaq Bibliapa kamachisqanta kasukuspa

[Kay yachachikuypa tapukuyninkuna]

[13 kaq paginapi suti rikuylla kaq willakuy]

Munayninta puntapi churaptinchikqa Jehová Diosmi herencianchik kanqa

[15 kaq paginapi dibujo]

Jeremiasta qatipakuyqa yanapawanchikmi