¿Jehová Dioschu herencianchis?

“Diospa qhapaqsuyunta chanin-kaynintawan ñawpaqtaqa maskhaychis, payqa tukuy chaykunatapas qosunkichismi.” (MAT. 6:33.)

1, 2. a) Gálatas 6:16 textopi nisqanman hina, ¿pikunan kanku ‘Diospa cheqaq Israel llaqtan’? b) ¿Pikunan kanku Mateo 19:28 textopi ‘Israelpa chunka iskayniyoq ayllun’?

¿IMATAN yuyaykunchis Bibliapi Israel simita leespa? Yaqapaschá Isaacpa churin Jacobpi hinallataq miraynin chhayna sutichakusqanpipas. Bibliapin chay sutiwan reqsikullantaq ‘Diospa cheqaq Israel llaqtanta’. Paykunatan Dios santo espiritunwan akllarqan hanaq pachapi reykuna sacerdotekuna kanankupaq, llapanpiqa 144.000 kanku (Gál. 6:16; Rev. 7:4; 21:12). Ichaqa Mateo 19:28 textopin huk hinamanta rimashan ‘Israelpa chunka iskayniyoq ayllun’ nispa. ¿Pikunan paykuna kanku? Chaymanta t’aqwirisun.

² Jesusmi nirqan: “Tukuy imapas mosoqyachisqa kaqtinmi, Runaq Churin kamachikuy qhapaq tiyananpi tiyaykuqtin, qankunapas ñoqawan purisqaykichisrayku chunka iskayniyoq tiyanakunapi tiyaykullankichistaq, Israelpa chunka iskayniyoq ayllunta juzgaspa kamachinaykichispaq”, nispa. ¿Pikunan kanku ‘Israelpa chunka iskayniyoq ayllun’? Paykunaqa kay pachapi wiñaypaq tiyaq runakunan kanku, paykunaq allinninpaqmi 144.000 akllasqa cristianokuna juzganqaku.

3, 4. ¿Ima ejemplotan qowanchis akllasqa cristianokuna?

³ Akllasqa cristianokunaqa ñawpaq tiempopi Leví runakuna sacerdotekuna hinan mana suyankuchu Dios kay pachapi hallp’ata qonanta. Aswanpas paykunaq herencianqa Diosta servisqankun (Núm. 18:20). Paykunaqa anchatan valoranku servicionkuta. Chaytan ruwashallanqaku Apocalipsis 4:10, 11 textopi nisqan hina, hanaq pachapi reykuna sacerdotekuna hina Jesuswan kuska llank’aspa. Kay tiempopiqa Jehová Diosmi herencianku, kaqllataqmi hanaq pachapipas kanqa (Eze. 44:28).

⁴ Kay pachapiraq kashaspa, ¿imaynatan rikuchinku Jehová Dios herencianku kasqanta? Imayna kawsasqankuwanmi rikuchinku payta serviy ancha importante kasqanta, kasukunkun kamachikuyninkunata Cristoq sacrificionpitaq iñinku. Chhaynapin ‘Diospa waqyasqan kasqankupi paypa akllasqan kasqankupipas allin takyasqa kashanku’ (2 Ped. 1:10). Manan llapankuchu allin kallpayoq qhali kashanku ichaqa manan chayraykuchu pisikallpayanku ima ruwayninkupipas, aswanpas tukuy atisqankutan ruwanku Dios serviyninkupi. Paykunaqa allin ejemplon kanku kay pachapi wiñay kawsayta suyakuqkunapaq.

5. ¿Imatan ruwananchis Jehová Dios herencianchis kananpaq? ¿Imaraykun chay ruway sasa?

 ⁵ Jesusmi nirqan: “Pipas qhepayta hamuyta munaqqa, pay kikinta negakuchun, hinaspa [‘k’aspipi’] ñoqarayku ñak’arishaq hina ñak’arispa qhepayta hamuchun”, nispa (Mat. 16:24). Llapa cristianokunan chay nisqanman hina kawsananchis Dios herencianchis kananpaq. Kay pachapi wiñay kawsayta suyakuq askha runakunan chhaynata tukuy sonqo Diosta servishanku, Cristotapas qatikushanku. Kallpankuta mana mich’akuspan tukuy atisqankuta llank’ashanku. Askhan imachus necesitasqallankuwan kawsanku precursor regular kanankupaq, wakintaq askha killakuna precursor auxiliar kanku. Wakintaq manaña precursorchu kanku chaypas, tukuy atisqankuta predicashanku. Paykunaqa María hinan kanku, payqa q’apaq hawinawanmi Jesusta hawirqan. ¿Imaynatan chay ruwasqanta Jesús qhawarirqan? “Ñoqapaqqa allin ruwaytan ruwan [...]. Kay warmiqa ima atisqantan ruwan,” nirqanmi. (Mar. 14:6-8.) Ichaqa Saqraq kamachisqan pachapi kawsasqanchisraykun sasa ñoqanchispaq chayta ruway. Hinaña kaqtinpas manan hark’awasunchu tukuy atisqanchista Diospaq llank’ananchista nitaq paypi confiananchistapas. Chaypaq tawa ruwaykunamanta qhawarisunchis.

Diospa Gobiernonta ñawpaqta maskhana

6. a) ¿Imaraykun Diosta mana serviq runakunaq herencian ‘kay pacha kaqkunalla’? b) ¿Imaraykun David hina yuyaykunanchis?

⁶ Jesusmi qatikuqninkunata yachachirqan Diospa Gobiernonta chanin-kaynintawan ñawpaqtaqa maskhanankupaq. Diosta mana serviq runakunaq “kaqninqa kay pacha kaqllan” (leey Salmo 17:1, 13-15). Kamaqninkumanta yuyarinankumantaqa qolqeyoq kayllapin afanakunku, familiayoq kaypi, wawankuman herenciata saqenankupaqwan. Ñoqanchismi ichaqa David hina kayta munanchis. Paypaqqa Diospa ‘sumaqpaq hap’isqan’ kaymi aswan importante karqan, chaytan qhepaman churin Salomón nillarqantaq (Ecl. 7:1) Asaf hinan Davidqa kikin kawsayninpi rikurqan Jehová Diospa amigon kay ancha importante kasqanta ancha kusikuyta apamusqantapas. Kaqllatataqmi kay tiempopi askha cristianokunapas yuyaykunku. Jehová Diostan herenciankuta hina qhawarinku, chayraykun llank’ayninkuta saqespa espiritual ruwaykunata ñawpaqman churanku.

7. ¿Ima saminchaytan chaskirqan huk iñiqmasinchis Diospa Gobiernonta ñawpaqta maskhasqanrayku?

⁷ República Centroafricana nacionpi tiyaq Jean-Claude umalliq iñiqmasinchismanta rimasun, payqa kinsa wawayoq casado cristianon. Huk p’unchaymi jefen nirqan llank’anan horariota cambiananpaq, willarqanmi semanantin seis y media ch’isinmantapacha sapa p’unchay llank’ananpaq. Chay nacionpiqa manan ancha llank’ana tarikunchu, chaymi yaqa llapa runakuna ima atisqankuta ruwanku mana qarqochikunankupaq. ¿Imatan ruwarqan Jean-Claude? Jefentan nirqan llank’ananmantapas familianta espiritualpi yanapanan kasqanta, hinallataq iñiq t’aqanta qhawarinantapas. Ichaqa jefenmi nirqan: “Qanqa suerteyoqmi kanki llank’anaykipaq, chayrayku warmiykita, wawaykikunata sasachakuyniykikunatawan qonqaspa empresapi llank’anaykiman qokuy. Qanña decidiy llank’anaykiwanchu icha religioniykiwanchu qhepakunki chayta”. ¿Imatan ruwasunman karqan chhaynapi tarikuspa? Jean-Claude iñiqmasiqa seguron kasharqan mana llank’anayoq qhepakuqtinqa Jehová Dios yanapananta. Chayraykun decidikurqan espiritual ruwayninkunata hunt’ashanallanpaq, familiantataq Diospa yanapayninwan cuidananpaq. Huñunakuyninmanqa kaqllatan rirqan, chaymantataq empresaman ripunanpaq alistakurqan, payqa manan yacharqanchu llank’ananpi chaskillankumanchus chayta. Chayllamanmi celularninman waqyamuspa willarqanku jefenta qarqopusqankuta. ¡Iñiqmasinchisqa llank’anallayoqmi kasharqan!

8, 9. ¿Imaynatan levitakuna, sacerdotekuna hina rikuchinchis Dios herencianchis kasqanta?

 ⁸ Askha cristianokunan llank’anankumanta sasachakuypi tarikuspa tapukunku: “¿Imawanmi familiayta uywasaq mana llank’anayoq qhepakuspa?”, nispa (1 Tim. 5:8). Chhaynapiña tarikurqanchis otaq manaña chaypas, cristianokunaqa yachanchismi Jehová Dios payta herencianta hina qhawariqkunata mana hayk’aqpas saqesqanta. Yaqapaschá kikin kawsayninchispi rikurqanchis Jesuspa promesan cheqaqpuni kasqanta, paymi nirqan: “Diospa qhapaqsuyunta [‘gobiernonta’, NM] [...] ñawpaqtaqa maskhaychis, payqa tukuy chaykunatapas qosunkichismi”, nispa (Mat. 6:33). Arí, tukuy sonqo serviqtinchisqa Diosqa manan mikhunatapas p’achatapas faltachiwasunchu.

⁹ Yachasqanchis hina, Leví aylluqa manan hallp’ata chaskirqanchu. Paykunaqa Dios serviyllamanmi qokuqku chaymi Dios paykunataqa cuidarqan. Kaytan prometerqan: “Ñoqan [...] kaqniykipas herenciaykipas kani”, nispa (Núm. 18:20). Manaña levitakuna, sacerdotekuna hinachu Dios yupaychana wasipi servinchis chaypas, paykuna hinan Jehová Diospi confianchis tukuy necesitasqanchistapas qowananchispi. Astawan tukukuy p’unchaykuna asuykamusqanman hinan chay iñiyninchisqa aswan importante (Apo. 13:17).

Diospa chanin-kayninta ñawpaqta maskhana

10, 11. ¿Imaynapi tarikuspan wakin cristianokuna rikuchirqanku Dios herencianku kasqanta?

¹⁰ Jesusqa qatikuqninkunatan yachachillarqantaq Diospa chanin-kayninta ñawpaqta maskhanankupaq (Mat. 6:33). Chayraykun imachus allin imataqchus mana allin kasqanta decidinapaqqa, Diospa nisqanman hina akllananchis, manataq runakunaq yuyaykusqanman hinachu (leey Isaías 55:8, 9). Kaypi yuyaykusun: manaraq cristiano kashaspan wakin iñiqmasikuna llank’arqanku otaq venderqanku tabaco nisqata, hinallataq fabricarqanku otaq venderqanku guerrapaq armakunata. Wakintaq guerrapi maqanakunankupaq hukkunata entrenaqku. Ichaqa Bibliata estudiaspan chay llank’ayninkuta saqepurqanku, hinan bautizakurqanku (Isa. 2:4; 2 Cor. 7:1; Gál. 5:14).

¹¹ Paykunamanta hukninmi Andrew iñiqmasinchis karqan. Payqa esposanwan iman Bibliata estudiarqan, chaymantataq Diosta servinanpaq decidikurqan. Payqa ancha allinpaqmi llank’ananta qhawarirqan, ichaqa saqepurqanmi guerraman riywan tupasqanrayku. Payqa Diospa chanin-kaynintan ñawpaqman churayta munarqan. Mana llank’anayoq kapuqtinqa wakin killakuna wawankunata mikhuchinallanpaqmi qolqen ayparqan. Levitakuna hinan tarikurqan, paykunaqa manan ima hallp’atapas chaskirqankuchu llank’anankupaq. Andrewqa Diospi confiaspan huk llank’ana maskhaq rirqan. ¿Imaynapin familian tarikurqan chaymantapacha? ‘Diospa atiyninqa [manan] pisiyarqanchu’ paykunata yanapananpaq (Isa. 59:1). Chaymantapas Andrewqa esposanpiwan necesitasqallankuwan kawsasqankuraykun tukuy tiemponkuwan Diosta servinku. Andrewmi nin: “Mayninpiqa llakikurqaykun wasimanta, qolqemanta, mana qhali kasqaykumanta kurakña kasqaykumantapas. Ichaqa Jehová Diosqa yanapawarqankupunin. [...] ñawpa kawsayniykumanta esposaypiwan yuyaymanaspan reparayku mana imapas Jehová Diosta serviy hinaqa kasqanta”, nispa (Ecl. 12:13). *

12. ¿Imatan necesitanchis Diospa chanin-kayninta ñawpaqta maskhanapaq? Llaqtaykimanta huk experienciata willay.

¹² Llapanchismi tapukunanchis: “Sasachakuykunapi  tarikuspay, ¿maskhashallaymanchu ñawpaqta Diospa chanin-kayninta?” nispa. Jesuspa nisqan hina, ‘huk mostaza ruru hinallapas iñiyninchis kanman chayqa, huk orqotan nisunman: Kaymanta haqayman suchuriy, nispa, hinan suchunman. Iñiqtinchisqa manan imapas mana atikuqqa kanmanchu’ (Mat. 17:20). ¿Sasachu ñoqanchispaq chay promesanpi creey? Chhayna kaqtinqa, huk iñiqmasinchiskunatan tapusunman imaynatachus Jehová Dios yanaparqan chayta. Experienciankuta uyariyqa iñiyninchistan kallpachanqa.

Espiritualpi Diospa qowasqanchista agradecekuna

13. ¿Imapin confianku Diosta servinankupaq kallpachakuqkuna?

¹³ Jehová Dios serviyninkuta valoraqkunaqa levitakuna hinan yanapayninpi confianku. Diosqa yanapanqan kawsanankupaq necesitasqankupi, hinallataq espiritualpipas. Davidpi yuyaykusun, qaqa t’oqopi kashaspapas chaskirqanmi Diospa yanapayninta. Ñoqanchispas pay hinan Diospi confiananchis manaña sasachakuyninchiskunata imayna allichayta atispapas. Asafpa ejemplontapas manan qonqananchischu, payqa ‘Diospa ch’uya wasinman haykuspan’ llakikuyninkunamanta huknirayta yuyaykurqan (Sal. 73:17). Chhaynatan ñoqanchispas Jehová Diosman asuykuspaqa kallpata hap’isun. Chhaynapin rikuchisun imaña kaqtinpas Dios serviyta valorasqanchista, payta herencianchista hina qhawarisqanchistapas.

14, 15. ¿Imaynatan chaskinanchis Bibliamanta ima yachachikuypas sut’inchakuqtin, imarayku?

¹⁴ Mayninpiqa allin yuyayniyoq hunt’aq kamachin sut’inchawanchis ‘Diospa ukhu sonqonta’ otaq allin t’aqwina yachachikuykunata (1 Cor. 2:10-13). ¿Imaynatan qhawarinchis Bibliamanta yachachikuykuna sut’inchakuqtin? Pedro hinan qhawarinchis. Huk kutinmi runakunata Jesús nirqan: “Runaq Churinpa cuerponta mana mikhuspaykichisqa, yawarnintapas mana ukyaspaykichisqa manan kawsayniyoqchu kankichis”, nispa. Chay nisqanta mana entiendespan wakinqa nirqanku: “Sinchi sasan kay yachachikuyqa, picha chaykunata entiendeyta atikunmanpas”, nispa. Chaymantapachan Jesusta askha uyariqkuna “qhepaman kutipurqanku, manañataq paywan purirqankuñachu”. Pedron ichaqa nirqan: “Señor, ¿pimantaq risaqku? Qanpa rimasqaykikunaqa wiñay kawsay simikunan”, nispa (Juan 6:53, 60, 66, 68).

¹⁵ Apóstol Pedroqa manan allintachu entienderqan Jesuspa nisqanta, ichaqa manan chayraykuchu iskayyarqan, payqa yacharqanmi Cristowan Dios yachachikuyninkunata sut’inchashasqanta. Ñoqanchisrí, ¿imaynatan qhawarinchis yachachikuyta sut’inchakuqtin? ¿Entiendenchischu Bibliaq nisqanman hina imarayku sut’inchakamusqanta? (Pro. 4:18.) Qallariy siglopi Berea llaqtamanta runakuna hinan kananchis, “paykunan Diospa siminta tukuy sonqo chaskikurqanku, chaykunaqa hinapunichus kasqantataq Diospa Simin Qelqakunapi sapa p’unchay t’aqwirqanku” (Hech. 17:11). Paykunaq ejemplonta qatikuspaqa astawanmi Dios serviyninchista valorasun hinallataq payta herencianchista hina qhawarisqanchistapas.

“Señorpi iñiqwanpuni” casarakuna

16. ¿Imatan ruwananchis 1 Corintios 7:39 textota hunt’anapaq, chhaynapi Dios herencianchis kananpaq?

¹⁶ Wakin cristianokunaqa “Señorpi iñiqwanpuni” casarakuy nisqa kamachikuyta respetaspan Diosta kasukunku, chayraykuña soltero qhepakapunkuman chaypas (1 Cor. 7:39). Paykunataqa Diosmi munakuspa uywanqa chaypin confiananku. Chaymantapas sapanku sientekuspanku pisikallpayaspankupas Diospa yanapaynintan maskhananku, willakunankutaqmi ima llakikuyninkutapas. Chaytan Davidpas ruwarqan, nirqanmi: “Paymanmi llakipakuyniyta rimarini, paymanmi llaki-phutiyniyta willakuni”, nispa (Sal. 142:1-3). Profeta Jeremiaspas mayninpiqa chhaynatachá sientekurqan, payqa sapallanmi askha watakuna  Diosmanta willarqan. Dios nos habla mediante Jeremías nisqa libropi, 8 capitulopin paymanta astawan willakushan.

17. ¿Imatan huk iñiqmasinchis ruwan sapallan sientekuspa?

¹⁷ Estados Unidosmanta huk cristianan nin: “Manan solterallachu qhepakuyta munani, aswanpas huk cristianowanmi casarakuyta munani. Mamitayqa manan Testigochu, chaymi munarqan piwanpas casarakunayta. Ichaqa tapurqanin: ‘Sichus pipas casarakunaypaq niwaqtin hina casarakusaq, hinaspa mana kusisqachu kawsasaq chayri, ¿qanchu sasachakuypi tarikuqtiy yanapawanki?’ nispa. Tiempowanqa allin llank’anayoq kasqayta, ñoqa kikiy mantenekuy atisqayta, kusisqa kawsasqaytapas reparaspan manaña imaniwarqanpasñachu”, nispa. ¿Imatan kay iñiqmasinchis ruwan sapallan sientekuspa? Paymi nin: “Jehová Diospin pakakuni, payqa manan hayk’aqpas saqerpariwanchu”, nispa. ¿Iman yanaparqan Diospi confiananpaq? Paymi nin: “Mañakuymi yanapawan Diosqa cheqaq kasqanta qhawarinaypaq, hinallataq cuidawaqniyta hina rikunaypaqpas. ¿Imaynan mana kusisqachu sientekuyman tukuyta kamaq Reywan amigontin kaspa?” nispa. Payqa yachanmi ‘aswan kusisamiyoqqa qoq chaskiqmantaqa’, kasqanta. Chaymi nin: “Hukkunatan yanapani manan imatapas qowanankuta suyaspalla. Mayninpin yuyaykuni: ‘¿Imatan hukkunapaq ruwapuyman?’ nispa, chhaynapin kusisqa sientekuni”, nispa (Hech. 20:35). Chay cristianaqa anchatan valoran Jehová Dios serviyta herencianta hina qhawariytapas.

18. ¿Imaynapin Diospa herencian kasunman?

¹⁸ Sapankapas imaynapiña kawsayninchispi tarikusunman chaypas, atisunmanmi Diosta herencianchista hina qhawariyta. Chhaynapin llaqtallanpi kashasun (2 Cor. 6:16, 17). Hinaspapas ñawpa tiempopi serviqninkuna hinan kusisqa kasun, ñoqanchispaqpas manan Jehová Diosllachu herencianchis kanqa, aswanpas Diospa herencianmi kallasuntaq (leey Deuteronomio 32:9, 10). May allinmi kayta yachayqa: ¡payqa Israel llaqtata hinan sapankanchista cuidawasun paypa kaqninta hina! (Sal. 17:8.)

[Uranpi willakuy]

¿Imatan yacharqanchis?

Willay, imaynapin Jehová Dios herencianchis kanman:

• Diospa Gobiernonta chanin-kaynintawan maskhaspa

• Espiritualpi Diospa qowasqanchista agradecekuspa

• “Señorpi iñiqwanpuni” casarakuymanta kamachikuyta respetaspa

[Tapuykuna]

[13 paginapi willakuy]

Dios serviyninchista ñawpaqman churaqtinchisqa paymi herencianchis kanqa

[15 paginapi foto]

Jeremiaspa ejemplonmi kallpachawanchis